Je 12 - Sơ̆p Hlabơar Nơ̆r 'Bok Kei-Dei

Jêrêmi ưh kơ lăp

¹ Ơ Kră Yang, Ih jơ̆ 'lơ̆ng tơpăt mưh inh roi tơdrong inh kơ Ih. Mă-lei inh oei wă pơma hăm Ih trŏ tơdrong tơpăt Ih: Liơ trong lu bơngai kơnê̆ oei hiôk-hian, liơ tơdrong jang lu bơngai hơlĕnh pơdăr oei mơdrŏng?

² Ih pơtăm lu sư, lu sư chăt rơh, wơ̆ tih păng đei plei, 'bơ̆r lu sư jê̆ Ih, mă-lei jơhngơ̆m lu sư ataih đơ̆ng Ih.

³ Mă-lei, ơ Kră Yang, Ih băt boih kơ inh, Ih 'bôh inh, Ih pơlong lăng păng băt jơhngơ̆m inh hăm Ih, Apinh Ih dui lu sư tơ 'nguaih thoi đe dui triu wă 'bet pơlôch, Apinh Ih lê̆ lu sư pha 'măn kơ năr wă 'bet pơlôch!

⁴ Lăm char gô ơh sơ'ngon dĭng dang yơ? 'Nhĕt tơ chŭn mir gô jô kro dĭng dang yơ? Yua kơ đơ̆ng tơdrong kơnê̆ kon pơlei oei lăm noh pơm, lu sem bri sem păr lôch đĭ. Đei lu sư khan: “Kră Yang ưh kơ 'bôh ôh tơdrong kiơ lu bơ̆n pơm.”

Kră Yang tơl tơwih

⁵ Tơdah ih kơdâu pơlong jơ̆ng hoh hăm đe boih, na jei đe, Liơ ih kĕ kơdâu pơlong hăm aseh lĕ? Kơplah lăm char oei hiôk-hian mă ih pơ̆k boih, liơ ih kĕ tŏk lăm bri brah đak Krong Jôrđăn?

⁶ Lu 'nhŏng oh ih adrĕch adrung 'bă ih, mă lu sư kư̆m jreo tơkĕch wă pơm kơ ih. 'Nĕ kơ gơnang kơ lu sư, mă khan lu sư pơma hiôk hăm ih ră.

⁷ Inh achăng boih hnam Inh, Inh lê̆ boih kon pơlei Inh; Inh jao boih kon pơlei mă Inh 'mêm lăm ti lu bơngai ayăt kơ lu sư.

⁸ Kon pơlei Inh pơm kơ Inh, thoi dăm-brang lăm bri. Sư hơrum wă pơm kơ Inh, thoi noh Inh areh achăng lê̆ lu sư.

⁹ Kon pơlei Inh hăm trŏ thoi klang, Lu klang nai wang tăp dăr wă pơm kơ kon pơlei Inh hă? Akŭm bĕ đĭ-đăng lu sem bri, ba lu sư sa kon pơlei Inh.

¹⁰ Lu bơngai wei triu pơrăm boih mir hơmu Inh; Pơjuă gơhlơ̆r teh Inh jang sa; lu sư pơm kơ teh 'lơ̆ng Inh jing bri juơ.

¹¹ Đe pơm kơ anih noh jing juơ rơhiăng; đe pơrăm boih sư ôr 'bơ̆t anăp Inh. Jơ̆p kơ dêh char noh jing juơ, ưh kơ đei bu wă lăng.

¹² Lu bơngai wă pơrăm truh boih, tơ jơ̆p-jang kơ groi grôn kơjung tơ lăm tơmăn glă; yua kơ đao gưm Kră Yang oei pơrăm teh đơ̆ng teh âu dĭng tơ to; Ưh kơ đei kon bơngai dah Sem brem kiơ mă oei hiôk hơđơ̆ng.

¹³ Lu sư rei boih 'ba mi mă-lei kĕch iŏk găr jơla; lu sư jang hrat mă-lei ưh kơ yua kiơ. Gô mơlâu kơ kĕch iŏk tŏ sĕt, Yua kơ Kră Yang hil kơtang tơpă.

¹⁴ 'Nâu Kră Yang khan: “Gah đĭ-đăng lu rông 'bôt Inh mă pơm kơnê̆, mơ̆t iŏk boih tơmam Inh mă ăn kơ lu kon pơlei Inh, Isơrael; 'nâu, Inh gô buch hiŏng lê̆ lu sư đơ̆ng lăm char lu sư păng buch hiŏng lê̆ adrĕch Juđa đơ̆ng tŏk-bŏk lu sư.

¹⁵ Mă-lei đơ̆ng rŏng kơ Inh buch lê̆ lu sư boih, Inh gô mơnat kơ lu sư dơ̆ng. Inh gô anhăk ba lu sư wih tơ char lu sư kơdih păng iŏk teh jang sa.

¹⁶ Tơdah lu sư pơnam hŏk pơhrăm iŏk kiơ̆ trong kon pơlei pơla Inh păng pơkă pơkăm hăm anăn Inh. ‘Tơpă Kră Yang arih,’ thoi sơ̆ lu sư kư̆m bơtho kon pơlei Inh pơkă hăm yang Baal, kơplah noh lu sư gô oei kơjăp lăm kon pơlei pơla Inh.

¹⁷ Mă-lei tơdah lu kon pơlei ayơ kuă kơ mơ̆ng nơ̆r Inh, Inh gô buch hŭt lê̆ hloi kon pơlei noh, buch pơlôch lê̆ hloi” 'noh Kră Yang khan.