Je 11 - Sơ̆p Hlabơar Nơ̆r 'Bok Kei-Dei

Pơm glăi kơ nơ̆r pơgơ̆p

¹ Kră Yang khan kơ Jêrêmi thoi âu:

² “Mơ̆ng bĕ lu nơ̆r tơdrong pơgơ̆p âu, khan bĕ kơ lu bơngai lăm char Juđa păng lu bơngai oei lăm pơlei Jêrusalem.

³ Ih athei khan ăn kơ lu sư, Kră Yang 'Bok Kei-Dei bơngai Isơrael khan thoi âu: ‘Hiap bĕ lu bơngai mă ưh kơ wă mơ̆ng kiơ̆ nơ̆r pơgơ̆p âu.

⁴ Inh đei tơtă boih hăm lu 'bok yă iĕm kơplah Inh chông tơlĕch lu sư đơ̆ng char Êyiptơ, lĕch đơ̆ng tơnuh kơdơ̆r đe rơ̆ mam.’ Inh khan: ‘Mơ̆ng bĕ nơ̆r Inh tơtă kơ lu iĕm păng pơm kiơ̆ bĕ dôm nơ̆r Inh đei bơtho tơtă, lei na lu iĕm jing kon pơlei pơla Inh, na Inh jing Kră Yang 'Bok Kei-Dei lu iĕm.

⁵ Na Inh wă pơsĭt nơ̆r Inh pơkă pơkăm hăm lu 'bok yă iĕm, wă ăn kơ lu sư dêh char 'lơ̆ng đei ro thoi đak sut đak toh,’ char mă iĕm oei dang ei.” Inh tơl: “Ơ Kră Yang ăn đei bĕ thoi noh, A-men.”

⁶ Kră Yang khan kơ inh: “Roi bĕ đĭ dôm nơ̆r pơma âu tơ lăm đĭ-đăng pơlei lăm char Juđa hăm tơ rok trong tih lăm pơlei Jêrusalem: ‘Mơ̆ng păng pơm kiơ̆ bĕ nơ̆r pơgơ̆p âu.

⁷ Inh đei bơtho tơtă boih ăn kơ lu 'bok yă lu iĕm kơplah Inh chông tơlĕch lu sư đơ̆ng char Êyiptơ sơ̆ dĭng truh năr 'nâu, Inh ling-lang tơbăt kơ lu sư: “Chu kiơ̆ bĕ nơ̆r Inh.”

⁸ Mă-lei lu sư ưh kơ chu ôh, kư̆m ưh kơ wă mơ̆ng, lu sư yak kiơ̆ kơ jơhngơ̆m kơnê̆ arăng lu sư kơdih. Yua kơ thoi noh na Inh đei phak lu sư kiơ̆ kơ nơ̆r pơgơ̆p âu, nơ̆r pơgơ̆p mă Inh đei tơtă boih kơ lu sư wă kơ pơm kiơ̆ mă-lei lu sư ưh kơ pơm kiơ̆ ôh.’ ”

⁹ Kră Yang khan kơ inh. Đei boih tơdrong pơjah lăm lu bơngai Juđa păng lu bơngai oei lăm pơlei Jêrusalem.

¹⁰ Lu sư wơ̆t kiơ̆ pơm tơdrong kơnê̆ thoi lu 'bok yă lu sư sơ̆, lu bơngai mă sơngah kuă kơ kiơ̆ nơ̆r Inh tơtă. Lu sư kiơ̆ păng kơkuh kơ yang nai. Adrĕch Isơrael păng adrĕch Juđa pơm glăi boih kơ nơ̆r Inh pơgơ̆p hăm 'bok yă lu sư sơ̆.

¹¹ Thoi noh Kră Yang khan thoi âu: Inh gô ăn tơdrong gleh răm truh, lu sư ưh kơ gơh klaih ôh, mă lu sư krao ôr apinh Inh, Inh ưh kơ wă mơ̆ng lu sư ôh.

¹² Kơplah noh jơ̆p-jang pơlei lăm dêh char Juđa păng đĭ-đăng kơ lu bơngai mă oei lăm pơlei Jêrusalem gô tŏk năm krao kơkuh kơ lu yang mă lu sư oei soh 'long 'bâu phu, mă-lei yang noh ưh kơ gơh pơklaih lu sư ôh, kơplah lu sư đei tơdrong răm truh.

¹³ Lu iĕm đei rup yang lơ dêh thoi iĕm đei pơlei, ơ bơngai Juđa; lu chơnang soi pơm kơ lu iĕm mơlâu, mă lu iĕm pơdơ̆ng anih boih wă soh 'long 'bâu phu kơ yang Baal lơ nhen thoi trong glung lăm pơlei Jêrusalem!”

¹⁴ “Gah ih 'nĕ pă krao khan tơgŭm kon pơlei 'nâu, ih kư̆m 'nĕ yua kơ lu sư na krao apinh, yua kơ Inh ưh pă mơ̆ng boih mă lu sư krao apinh Inh kơplah lu sư đei tơdrong truh.

¹⁵ “Kon pơlei mă Inh 'mêm kơeng pơm kiơ boih lăm hnam Inh? Lu sư pơm yoch kơnê̆. Nơ̆r pơkă păng 'nhĕm tơmam soi hăm gơh găn tơdrong răm wă truh kơ lu iĕm ưh? Lu iĕm chơt hiôk kơplah noh ră?

¹⁶ Sơ̆ Kră Yang krao anăn iĕm 'long ôliwơ bluh hla hơdrih 'lơ̆ng păng đei plei trem. Mă-lei đei jơwa thoi kial hơbŭt kơtang, Kră Yang gô soh lê̆ hla sư, gơ̆ lê̆ dơng sư.

¹⁷ Kră Yang Tih Hloh boih Tơ'ngla mă pơtăm iĕm, na sư kư̆m đei khan wă pơrăm lu iĕm, yua kơ tơdrong kơnê̆ adrĕch Isơrael păng adrĕch Juđa pơm, bơhle tơblĕk Inh soh 'long 'bâu phu kơ yang Baal.

Tơdrong đe wă pơm kơnê̆ kơ Jêrêmi

¹⁸ Kră Yang đei roi ăn boih kơ inh băt tơdrong noh păng inh băt boih; Kră Yang đei pơdah boih kơ inh tơdrong kơnê̆ lu sư wă pơm.

¹⁹ Gah inh, thoi minh pôm kon triu rơmơ̆n đe ba wă pơlôch, inh ưh kơ băt lu sư pơđâu wă pơlôch inh, khan: “Pơrăm bĕ đơ̆ng tơm truh tơ plei sư. Kăl klơ̆m hŭt lê̆ sư đơ̆ng teh đak lu bơngai arih, Wă kơ huay pă đei bu 'blŏk kơ anăn sư dơ̆ng.”

²⁰ Ơ Kră Yang Tih Hloh, Tơ'ngla sek tơlang tơpăt, Tơ'ngla mă băt, lăm jơhngơ̆m păng lăm kơ̆l 'ngok tơchĕng, Ăn kơ inh 'bôh tơdrong Ih iung kơting kơ lu sư. Yua kơ inh jao boih tơdrong inh kơ Ih.

²¹ “Thoi noh Kră Yang khan gah kon pơlei Anathôt lu bơngai chơchă wă pơlôch ih khan: ‘Ih 'nĕ pă khan lê̆ adrol hăm anăn Kră Yang, dah ưh kơ chu ih gô lôch kơ ti nhôn.’

²² Kră Yang Tih Hloh khan: “Inh gô phak lu sư, lu tơdăm gô lôch kơ đao gưm; lu adruh tơdăm kư̆m gô lôch kơ pơngot rơwĕt.

²³ Ưh kơ đei minh 'nu bu klaih ôh. Yua kơ Inh gô ăn tơdrong gleh răm truh kơ kon pơlei Anathôt lăm sơnăm Inh phak lu sư.’