Je 1 - Sơ̆p Hlabơar Nơ̆r 'Bok Kei-Dei

¹ Nơ̆r Jêrêmi kon drŏ-nglo Hilkia. Sư minh lăm lu 'bok soi oei tơ pơlei Anathôt, lăm char Bênjamin.

² Kră Yang khan kơ sư lăm sơnăm mơjĭt-pêng kơplah Jôsia, kon drŏ-nglo Ammôn pơgơ̆r pơm pơtao đe Juđa.

³ Kră Yang đei khan kơ sư dơ̆ng lăm chăl Jêhôiakim kon drŏ-nglo Jôsia pơm pơtao đe Juđa, dĭng truh tơ khei pơđăm sơnăm mơjĭt-mônh chăl pơtao Sêđekia kon drŏ-nglo Jôsia pơm pơtao đe Juđa, kơplah noh mă đe rôp kon pơlei Jêrusalem pơm bơnă.

Kră Yang krao Jêrêmi

⁴ Kră Yang khan kơ inh thoi âu:

⁵ “Inh băt kơ ih adrol kơ Inh pơjing ih lăm klak mĕ ih; adrol kơ đe tơpŭ kơ ih, Inh rơih iŏk ih, Inh wă ăn kơ ih jing bơngai khan lê̆ adrol kơ jơ̆p teh đak.”

⁶ Inh tơl: “Ơ Kră Yang! Inh ưh kơ băt wă pơma kiơ, yua kơ inh oei 'lơ̆p.

⁷ Mă-lei Kră Yang khan kơ inh: 'Nĕ pơma khan inh oei 'lơ̆p;” yua kơ ih gô năm tơ jơ̆p-jang anih tơ yơ mă Inh wơh ih, ih gô pơma roi dôm nơ̆r mă Inh đei tơbăt ăn kơ ih pơma.

⁸ “'Nĕ hli kơ lu sư ôh, yua kơ Inh oei hơdai ih wă dŏng pơklaih ih.” Kră Yang khan.

⁹ Kră Yang yơ̆r ti Sư pel 'bơ̆r inh, Kră Yang khan kơ inh: “Âu, Inh dan boih nơ̆r Inh lăm 'bơ̆r ih.”

¹⁰ Năr 'nâu Inh pôk ih pơm yŏng kơ đĭ kon pơlei pơla păng đĭ kơ dêh char, ih gơh buch păng hŭt lê̆, dah pơrăm păng pơlôch dah man tơiung păng pơtăm ming.

¹¹ Kră Yang khan kơ inh dơ̆ng: “Ơ Jêrêmi, ih 'bôh kiơ?” Inh tơl: “Inh 'bôh minh pôm dơng 'long hơđơ̆r.”

¹² Kră Yang khan kơ inh: “Ih 'bôh trŏ boih, Inh hơđơ̆r wă pơsĭt nơ̆r Inh khan.”

¹³ Kră Yang khan kơ inh wơ̆t mă 'bar: “Ih 'bôh kiơ?” Inh tơl: “Inh 'bôh minh pôm gŏ oei blôk 'bơ̆r sư grê đơ̆ng gah yă-nơ̆m.

¹⁴ Kră Yang khan kơ inh: “Đơ̆ng gah yă-nơ̆m gô đei tơdrong gleh truh kơ đĭ-đăng kon pơlei lăm teh âu.”

¹⁵ 'Nâu Kră Yang khan: “Inh gô krao lu adrĕch adrung đơ̆ng dêh char gah yă-nơ̆m,” Lu sư gô truh, rim 'nu lu sư kư̆m gô pơdơ̆ng anih pơtao lu sư tơ 'măng jang pơlei Jêrusalem; wă pơrăm dur tăp dăr kơ pơlei păng pơrăm đĭ lu pơlei lăm char Juđa.

¹⁶ Inh gô sek tơlang kon pơlei Inh, yua kơ đơ̆ng tơdrong kơnê̆ lu sư pơm, lu sư achăng lê̆ Inh, soh 'long 'bâu phu ăn kơ yang nai păng kơkuh kơ yang mă đơ̆ng ti lu sư pơm kơdih.

¹⁷ Gah ih, tơ̆n bĕ tơlei tơ̆n, iung bĕ păng khan tơbăt ăn kơ lu sư dôm tơdrong mă Inh đei tơbăt ăn kơ ih boih. 'Nĕ kơ hli kơ lu sư, kơnh hli kơ Inh pơm kơ ih hli 'bơ̆t anăp lu sư.

¹⁸ Âu, năr 'nâu, Inh ăn kơ ih thoi minh pôm pơlei kơjăp, jrăng hăm mam, man dur hăm kong, wă tơblah hăm đĭ-đăng lu dêh char, hăm lu pơtao dêh Juđa, hăm lu 'bok soi, hăm lu kon pơlei pơla.

¹⁹ Lu sư gô tơblah hăm ih; mă-lei lu sư ưh kơ kĕ kơ ih ôh, yua kơ Inh oei hơdai ih, dŏng pơklaih ih, Kră Yang khan.a