Jang 9 - Sơ̆p Hlabơar Nơ̆r 'Bok Kei-Dei

^1-2 Sôl sư oei kơnam wă pơlôch lu bơngai lui kơ Kră Yang Yêsu. Sư năm apinh tơ 'bok soi tơm pơm ăn kơ sư hla bơar wă kơ gơh rôp lu bơngai lui. Na 'bok soi pơm ăn kơ Sôl hla bơar gơh năm rôp đe tơ rim hnam akŭm đe Juđê tơ Pơlei Đamas, anhăk tơ Pơlei Jêrusalem dôm lu bơngai lui kiơ̆ Yêsu mă drŏ-nglo mă drŏ-kăn.

³ Kơplah Sôl oei yak rok trong wă jê̆ truh tơ Pơlei Đamas, sư 'bôh hloi ŭnh đơ̆ng plĕnh pơchrang tăp dăr kơ sư.

⁴ Sư huŏng hơtat hloi đơ̆ng kơdŭ aseh. Na Sôl sư kơtơ̆ng nơ̆r pơma kơ sư khan thoi âu: “Ơ Sôl, Inh pơm kiơ kơ ih, na ih pơm kơnê̆ kơ Inh?”

⁵ Sôl khan: “Ơ 'Bok, anăn Ih bu?” Kră Yang Yêsu khan: “Inh Yêsu mă ih areh kơ Inh.

⁶ Na dang ei ih iung bĕ năm mơ̆t tơ Pơlei Đamas. Tơ noh đe gô khan kơ ih Inh wă ăn kơ ih jang tơdrong kiơ kơnh.”

⁷ Lu bơngai năm hơdai hăm Sôl ei sơleng kơ đon ưh kơ đei pơma; dang lĕ kơtơ̆ng 'bơ̆r mă-lei ưh kơ 'bôh bu.

⁸ Klaih kơ noh Sôl iung hloi. Lăp sư lar măt, măt sư bơbul, ưh kơ 'bôh hơdah. Na bôl sư rôp ti chông ba sư truh tơ Pơlei Đamas.

⁹ Pêng năr Sôl sư ưh kơ đei sŏng sa păng nhă đak. Măt sư ưh kơ 'bôh hơdah ôh.

¹⁰ Tơ Pơlei Đamas đei minh 'nu bơngai anăn sư Anania, sư lui kơ Yêsu. Anania kơtơ̆ng nơ̆r Yêsu khan kơ sư: “Ơ Anania ơi.” Anania khan: “Ơ Kră Yang, Ih wă kơ kiơ? Inh tơ âu.”

¹¹ Kră Yang Yêsu khan kơ sư: “Inh athei ih năm tơ Trong Tơpăt, truh tơ hnam Juđa, chă minh 'nu bơngai đơ̆ng Pơlei Tarsơ, anăn sư Sôl. Tơ ei sư oei krao khan kơ Inh.

¹² Sôl sư apo 'bôh ih mơ̆t tơ sư pel kơ̆l sư wă kơ gơh 'bôh thoi đêl.”

¹³ Anania tơl: “Ơ Kră Yang Yêsu, inh kơtơ̆ng lơ 'măng boih Sôl âu dah kiơ pơm kơnê̆ kơ lu bơngai lui kơ Ih tơ Pơlei Jêrusalem?

¹⁴ Lu 'bok soi tih kư̆m ăn kơ sư gơh rôp lu bơngai lui kơ Ih oei tơ âu.”

¹⁵ Kră Yang Yêsu khan kơ Anania: “Ih jah năm tơ sư, yua kơ Inh rơih sư wă kơ bơtho tơdrong Inh jơ̆p kơ teh đak, bơtho lu 'bok pơtao păng lu bơngai Isơrael.

¹⁶ Inh wă tơbăt kơ sư, sư gô đei tơdrong pơmat dang yơ yua kơ sư gô bơtho tơdrong Inh.”

¹⁷ Anania năm tơ Sôl, sư pel kơ̆l Sôl khan hloi: “Ơ 'nhŏng, Kră Yang Yêsu mă ih tơ'bơ̆p tơ trong hăm mơsêh mơyang Sư, Sư wơh inh năm tơ ih wă ăn kơ ih gơh 'bôh hơdah thoi đêl păng ăn kơ ih 'bĕnh kơ Yang Bơhngol 'Lơ̆ng.”

¹⁸ Thoi noh na Sôl gơh 'bôh hơdah hloi, yua kơchai măt sư huŏng. Klaih kơ noh đe pơm hloi kơ sư 'batem.

¹⁹ Đơ̆ng rŏng đe pơm kơ sư 'batem sư đei sŏng por. Đơ̆ng noh sư đei jơhngơ̆m 'biơ̆ mơ̆n. Sư oei păng lu bơngai lui kơ Yêsu tơ Pơlei Đamas đunh 'biơ̆ mơ̆n.

Sôl bơtho tơdrong Yêsu tơ Pơlei Đamas

²⁰ Sư kư̆m bơtho hloi tơdrong Yêsu tơ hnam akŭm đe Juđê. Sư khan Yêsu Kon 'Bok Kei-Dei tơpă.

²¹ Đĭ-đăng bơngai kơtơ̆ng sư sơleng kơ đon păng khan: “Hăm trŏ 'bok âu dah kiơ pơm răm kơ lu bơngai lui kơ Yêsu tơ Pơlei Jêrusalem ki? Sư kư̆m khan wă năm tơ âu rôp bơngai lui kơ Yêsu ăn kơ lu 'bok soi tih dơ̆ng.”

²² Sôl bơtho rai đunh rai hơgei na lu bơngai Juđê oei tơ Pơlei Đamas ưh pă gơh pơjah ôh. Sư bơtho khan Yêsu boih 'Bok Krist mă 'Bok Kei-Dei ăn wă kơ pơgơ̆r bơ̆n.

²³ Đunh đơ̆ng noh lu bơngai Juđê pơđâu wă pơlôch Sôl.

²⁴ Lu sư gak lăng 'măng tơm pơlei prăt măng prăt năr wă rôp pơlôch Sôl. Mă-lei Sôl kơtơ̆ng thoi noh.

²⁵ Na lu bơngai kiơ̆ gah Sôl tơ kơmăng tah Sôl lăm bai, chô̆ bai păng tơlei tơjur hloi sư đơ̆ng dur pơlei tơ teh.

Sôl truh tơ Pơlei Jêrusalem

²⁶ Sôl năm truh tơ Pơlei Jêrusalem boih, sư wă akŭm kơkuh kơ 'Bok Kei-Dei hơdai lu bơngai lui kơ Yêsu. Mă-lei lu đe noh hli kơ Sôl. Lu sư ưh kơ lui kơ Sôl kiơ̆ Yêsu boih.

²⁷ Mă-lei 'Barna'ba năm ba Sôl tơ lu jơ̆ng 'bang Yêsu. 'Barna'ba roi kơ lu sư tơdrong Sôl tơ'bơ̆p Kră Yang Yêsu păng kơtơ̆ng 'bơ̆r Yêsu pơma kơplah Sôl oei yak rok trong. Sư kư̆m roi kơ lu sư tơdrong Sôl bơtho đe kư̆m nuih 'biơ̆ tơpă mơ̆n kơplah sư oei bơtho tơdrong Yêsu kơ khŭl bơngai Juđê tơ Pơlei Đamas.

^28-29 Klaih kơ noh na Sôl oei hơdai păng lu jơ̆ng 'bang Yêsu. Păng sư kư̆m nuih 'biơ̆ mơ̆n bơtho tơdrong Kră Yang Yêsu jơ̆p kơ Pơlei Jêrusalem. Sư pơjah pơjăng păng lu đe Juđê mă pơma nơ̆r Grĕk. Mă-lei lu bơngai 'noh wă pơlôch sư.

³⁰ Lu bôl Sôl kơtơ̆ng thoi noh na năm ba sư truh tơ Pơlei Sêsarê. Đơ̆ng noh na Sôl năm truh tơ pơlei sư Tarsơ minh drô̆ sư.

³¹ Yua kơ Sôl lui boih na lu bơngai lui kơ Yêsu oei jơ̆p-jang dêh Juđê păng dêh Galilê, dêh Samri hiôk-hian huay pă đei tơdrong truh tơ lu sư. Lu sư kư̆m rai đunh rai pran. Lu sư lui tơpă kơ Kră Yang păng Yang Bơhngol 'Lơ̆ng tơgŭm lu sư ling-lang, na lu sư rai đunh rai lơ.

Pêtrôs yua anăn Yêsu Krist pơklaih Anêa

³² Pêtrôs năm akŭm jơ̆p pơlei, sư kư̆m năm hơpong tơ lu bơngai lui tơ Pơlei Liđa.

³³ Tơ ei đei minh 'nu bơngai hơwen hơwo, anăn sư Anêa. Sư ưh kơ gơh iung oei ôh, sư 'bĭch ling-lang ling-lang minh anih đĭ tơhngam sơnăm boih.

³⁴ Pêtrôs khan kơ Anêa: “Ơ Anêa, Yêsu Krist wă pơklaih ih dang ei, ih iung bĕ, chơ̆p hơmet buk ih.” Đơ̆ng noh Anêa sư iung hloi.

³⁵ Đĭ-đăng bơngai pơlei đe Liđa păng pơlei đe Sarôn 'bôh sư klaih boih, na 'bar tŏ pơlei ei, lu sư lui hloi kơ Kră Yang Yêsu.

Pêtrôs yua nơ̆r 'Bok Kei-Dei tơiung arih yă Đêka

³⁶ Tơ Pơlei Japa đei bơngai lui kơ Yêsu, anăn sư Tabitha lăm nơ̆r Juđê, Đêka lăm nơ̆r Grĕk. Yă Đêka ling-lang sư gơh tơgŭm đe bơngai dơnuh hin păng gơh mơnat kơ đe.

³⁷ Hơtai Pêtrôs oei tơ Pơlei Liđa, yă Đêka đei tơdrong jĭ sư lôch hloi. Đei bôl sư ôp arao 'nhao akâu atâu ei păng tơ'bĭch sư lăm hnam gah kơpal.

³⁸ Pơlei đe Japa jê̆ pơlei đe Liđa. Lu bơngai lui kiơ̆ Yêsu kơtơ̆ng Pêtrôs oei tơ pơlei đe Liđa, sư wơh 'bar 'nu bơngai năm krao Pêtrôs đơ̆ng pơlei đe Liđa. Sư khan: “Ơ Pêtrôs, ih năm tơgŭm 'biơ̆ nhi bĕ, yua kơ nhôn đei bơngai lôch boih.”

³⁹ Na Pêtrôs năm kiơ̆ hloi bre sư tơ Pơlei Japa. Lăp sư truh tơ hnam boih, đe năm ba sư tŏk lăng tơ hnam kơpal ei. Lu yă adro tơ'bôh kơ Pêtrôs ao yă Đêka đêl sĭt boih, wă kơ Pêtrôs băt kơ yă Đêka sư oei arih sư gơh tơgŭm đe. Lu yă adro hơdai nhơ̆m hmoi ơh mơ̆n.

⁴⁰ Pêtrôs athei lu sư lĕch đĭ-đăng đơ̆ng lăm hnam ei. Pêtrôs sư sơtơ̆p kŭl-tăng krao khan kơ Kră Yang. Đơ̆ng noh sư iung glĕch akâu sư kơdih, hue lăng atâu ei. Sư khan: “Ơ Đêka, iung bĕ.” Đơ̆ng noh yă Đêka lar măt păng 'bôh hloi Pêtrôs. Yă Đêka iung đơ̆ng 'bĭch tơoei 'bơ̆t anih sư.

⁴¹ Đơ̆ng noh Pêtrôs rôp ti sư tơiung sư hloi. Klaih kơ noh Pêtrôs krao đe yă adro păng lu bơngai lui, tơ'bôh kơ lu sư yă Đêka iung arih boih.

⁴² Thoi noh na lu pơlei đe Japa 'bôh tơdrong Pêtrôs pơm hlĭch hlăch tơpă, lu sư wă lui hloi kơ Kră Yang Yêsu.

⁴³ Pêtrôs oei tơ Pơlei Japa kư̆m đunh 'biơ̆ mơ̆n. Sư oei păng bơngai jang akar, anăn sư Simôn.