Jang 6 - Sơ̆p Hlabơar Nơ̆r 'Bok Kei-Dei

¹ Hơtai ei đe lui kiơ̆ Yêsu rai lơ. Lu bơngai lui ei khŭl bơngai Juđê pơma nơ̆r Grĕk păng khŭl Juđê mơ̆n sư pơma nơ̆r Juđê, lu sư pơjah pơjăng dih băl. Na khŭl mă pơma nơ̆r Grĕk, lu sư khan kơ đe mă asong tơmam sa, khan rim năr lu bơngai yă adro gah khŭl sư, đe ăn tơmam sa ưh kơ mah.

² Thoi noh na lu mơjĭt-'bar 'nu bơngai jơ̆ng 'bang Yêsu krao akŭm đĭ-đăng bơngai lui khan hloi: “Ơ lu 'nhŏng oh, nhôn ưh kơ wăn wă asong tơmam sa ôh, nhôn bơngai bơtho tơdrong 'Bok Kei-Dei đĕch.

³ Na iĕm athei rơih chă lăm bôl iĕm tơpơh 'nu, lăm tơpơh 'nu 'noh chă bơngai tơpăt mă hơgei 'biơ̆ păng bơngai mă 'bĕnh kơ Yang Bơhngol 'Lơ̆ng, noh nhôn wă kơ lu sư wei-lăng đe asong tơmam.

⁴ Na nhôn krao khan păng bơtho tơdrong 'Bok Kei-Dei đĕch.”

⁵ Thoi noh na lu đe ei kơtơ̆ng sư pơma thoi noh boih lu sư lăp đon tơpă. Na lu bơngai lui rơih iŏk lu bơngai âu: Êtien, sư bơngai lui kơjăp tơpă păng sư 'bĕnh kơ Yang Bơhngol 'Lơ̆ng; lu bơngai âu dơ̆ng, anăn lu sư Philip, Prôkơrô, Nikanor, Timôn, Parmina, Nikôla. Nikôla âu sư ưh kơ sĭ bơngai Juđê ôh, mă-lei sư kiơ̆ tơdrong juăt đe Juđê đơ̆ng sư lui kơ 'Bok Kei-Dei sơ̆. Sư đơ̆ng Pơlei Antiôs.

⁶ Lu bôl sư anhăk ba lu sư tơpơh 'nu bơngai ei tơ lu bơngai jơ̆ng 'bang Yêsu. Na lu jơ̆ng 'bang Yêsu pel hloi kơ̆l krao khan apinh 'Bok Kei-Dei tơgŭm lu sư jang tơdrong ei.

⁷ Đe bơtho nơ̆r 'Bok Kei-Dei rai đunh rai jơ̆p. Lu bơngai lui lăm Pơlei Jêrusalem rai lơ tơpă, kư̆m đei bơngai 'bok soi lui kiơ̆ kơ Yêsu lơ mơ̆n.

Đe rôp Êtien

⁸ 'Bok Kei-Dei kư̆m tơgŭm 'bok Êtien jing pran pơm lơ tơdrong mơsêh mơyang 'bơ̆t anăp đe kon pơlei pơla.

⁹ Tơ Pơlei Jêrusalem đei lu bơngai đơ̆ng hnam akŭm 'Bok Kei-Dei đe anăn hnam akŭm đe rơngei. Đei lu bơngai đơ̆ng Pơlei Siren, đơ̆ng Pơlei Aleksandrê păng đơ̆ng dêh Salisia, đơ̆ng noh dêh Asi năm akŭm tơ ei ngăl. Lăm lu bơngai ei đei mơ'nah chă pơjah pơjăng păng Êtien.

¹⁰ Lu sư klai yua kơ jei Êtien ngăl. Yua kơ Yang Bơhngol 'Lơ̆ng tơgŭm Êtien pơma hơgei, dôm nơ̆r lu sư pơma jei Êtien ngăl.

¹¹ Na lu sư năm khan kơ bôl sư na athei bôl sư chă roi kơ đe thoi âu: “Nhôn kơtơ̆ng Êtien pơma kơnê̆ kơ Môis păng 'Bok Kei-Dei.”

¹² Thoi noh lu sư pơchŭt lu kon pơlei pơla, đe kră sek tơlang păng lu kră bơtho tơdrong juăt Juđê. Đơ̆ng noh na đe năm rôp Êtien anhăk ba sư tơ anăp đe kră sek tơlang.

¹³ Klaih kơ noh sư ăn bơngai hơlĕnh gah Êtien roi kơ lu kră sek tơlang thoi âu: “Bơngai âu ling-lang pơma kơnê̆ kơ hnam akŭm 'Bok Kei-Dei tơm âu păng pơma kơnê̆ kơ tơdrong juăt bơ̆n.

¹⁴ Nhôn kơtơ̆ng sư khan Yêsu gô pơrăm hnam akŭm 'Bok Kei-Dei tơm âu păng tơplih tơdrong juăt mă đêl Môis ată kơ bơ̆n sơ̆.”

¹⁵ Đĭ-đăng bơngai oei tơ hnam sek tơlang 'bloh pơchơ̆k kơ Êtien, 'bôh muh măt sư nhen lĕ muh măt linh jang 'lơ̆ng 'Bok Kei-Dei mơ̆n.