I Yo 5 - Sơ̆p Hlabơar Nơ̆r 'Bok Kei-Dei

¹ Bơngai bu lui kơ Yêsu 'Bok Krist mă 'Bok Kei-Dei wơh wă dŏng pơklaih bơ̆n, bơngai 'noh kon 'Bok Kei-Dei. Bơngai bu 'mêm kơ 'bă đe, bơngai 'noh kư̆m 'mêm kơ kon đe mơ̆n.

² Thoi noh dah bơ̆n 'mêm kơ 'Bok Kei-Dei păng răk dôm tơdrong Sư pơkă, lei bơ̆n kư̆m 'mêm kơ lu kon Sư lei-lăi mơ̆n.

³ Dah bơ̆n 'mêm kơ 'Bok Kei-Dei lei bơ̆n athei răk dôm tơdrong Sư pơkă. Dôm tơdrong Sư pơkă noh ưh kơ gleh ôh.

⁴ Kơlih kơ dôm tơdrong lĕch đơ̆ng ala teh âu jei lu kon 'Bok Kei-Dei ngăl. Dôm lu tơdrong lĕch đơ̆ng ala teh âu thuơ kơ bơ̆n kơlih kơ bơ̆n lui kơjăp.

⁵ Dôm tơdrong ala teh âu thuơ kơ bu? Dôm tơdrong ala teh âu thuơ kơ lu bơngai mă lui kơ Yêsu Kon 'Bok Kei-Dei.

Yêsu Kon 'Bok Kei-Dei tơpă

⁶ Yêsu Krist jur tơ ala teh âu Sư iŏk 'batem hăm đak păng Sư lôch tuh pham yua kơ bơ̆n, ưh kơ sĭ tơdrong iŏk 'batem đĕch ôh, tơdrong Sư tuh pham yua kơ bơ̆n mơ̆n.

⁷ Yang Bơhngol 'Lơ̆ng kư̆m roi kơ bơ̆n thoi noh wă kơ bơ̆n băt Yêsu Kon 'Bok Kei-Dei tơpă. Yang Bơhngol 'Lơ̆ng Sư pơma ling-lang tơpăt ngăl.

⁸ Đei pêng tơdrong roi gah Yêsu Kon 'Bok Kei-Dei: Mă mônh Yang Bơhngol 'Lơ̆ng, mă 'bar đak 'batem, mă pêng Sư tuh pham. Pêng tơdrong âu tơhlôh ăn kơ bơ̆n băt Yêsu Kon 'Bok Kei-Dei tơpă.

⁹ Thoi bơ̆n lui kơ buăl bơ̆n bơngai mă pơma tơpăt ling-lang, sư roi kơ bơ̆n na bơ̆n lui kơ sư roi, thoi noh bơ̆n athei lui kơ 'Bok Kei-Dei mă loi yua kơ Sư pơma tơpăt ngăl. Na pêng tơdrong 'noh hei đơ̆ng 'Bok Kei-Dei Sư roi tơbăt ăn kơ bơ̆n Yêsu Kon Sư tơpă.

¹⁰ Bơngai bu lui kơ Kon 'Bok Kei-Dei, bơngai 'noh lăm to sư, sư băt tơpă gah tơdrong 'Bok Kei-Dei tơbăt gah Kon Sư. Bơngai bu ưh kơ lui kơ nơ̆r 'Bok Kei-Dei pơma, bơngai 'noh sư khan 'Bok Kei-Dei hơlĕnh kơlih kơ sư ưh kơ lui kơ nơ̆r 'Bok Kei-Dei pơma gah Kon Sư.

¹¹ 'Bok Kei-Dei pơma gah Kon Sư thoi âu: Sư wă kơ bơ̆n arih ling-lang păng Sư. Bơ̆n gô arih ling-lang tơpă dah bơ̆n lui kơ Kon Sư.

¹² Bơngai bu lui kơ Kon Sư, bơngai 'noh gô arih ling-lang păng 'Bok Kei-Dei. Bơngai bu ưh kơ lui kơ Kon 'Bok Kei-Dei, bơngai 'noh ưh kơ gơh arih ling-lang păng Sư ôh.

Tơdrong arih ling-lang

¹³ Inh chih kơ iĕm kơthơ âu kơ lu iĕm bơngai mă lui kơ Yêsu Kon 'Bok Kei-Dei wă kơ iĕm băt nhên iĕm gô arih ling-lang păng 'Bok Kei-Dei.

¹⁴ Păng bơ̆n gơh krao khan kơ 'Bok Kei-Dei kơlih kơ bơ̆n băt kơ Sư mơ̆ng bơ̆n tơpă dah bơ̆n apinh trŏ thoi Sư wă.

¹⁵ Dah bơ̆n băt kơ Sư mơ̆ng bơ̆n apinh tơdrong kiơ kiơ, lei bơ̆n kư̆m băt kơ Sư ăn kơ bơ̆n tơdrong noh mơ̆n.

¹⁶ Dah iĕm 'bôh 'nhŏng oh bơ̆n bơngai lui sư pơm yoch iĕm athei krao khan kơ 'Bok Kei-Dei kơ sư, na 'Bok Kei-Dei gô ăn kơ sư arih ling-lang. Sơmă đei 'bar khŭl tơdrong yoch. Minh khŭl noh bơ̆n 'bôh 'nhŏng oh bơ̆n pơm yoch, athei krao khan kơ 'Bok Kei-Dei tơgŭm sư. Minh khŭl dơ̆ng bơ̆n 'bôh 'nhŏng oh bơ̆n pơm yoch khŏm khŏm, inh ưh kơ đei athei iĕm krao khan tơgŭm sư dơ̆ng ôh. Bơngai bu pơm yoch thoi noh sư gô răm tơpă.

¹⁷ Dôm tơdrong ưh kơ trŏ kơ tơdrong juăt 'Bok Kei-Dei, tơdrong yoch ngăl. Sơmă đei 'bar khŭl yoch.

¹⁸ Bơ̆n băt boih dôm lu bơ̆n kon 'Bok Kei-Dei ưh kơ gơh pơm yoch khŏm khŏm ôh kơlih kơ Yêsu Kon 'Bok Kei-Dei, Sư wei-lăng bơ̆n, na yang Satan ưh kơ gơh pơrăm lu bơ̆n ôh.

¹⁹ Păng bơ̆n kư̆m băt bơ̆n kon 'Bok Kei-Dei boih păng bơ̆n băt đĭ-đăng dôm lu bơngai mă lĕch đơ̆ng ala teh âu mă ưh kơ lui kơ Kon Sư, yang Satan pơgơ̆r lu sư.

²⁰ Bơ̆n băt Kon pôm 'Bok Kei-Dei jur tơ bơ̆n boih. Sư roi tơbăt ăn kơ bơ̆n tôm tơdrong 'Bok Kei-Dei Kră Yang tơm tơpă. Bơ̆n pôm đon păng Kră Yang 'Bok Kei-Dei păng pôm đon păng Kon Sư Yêsu Krist mơ̆n. Yêsu Krist Sư kư̆m Kră Yang tơpă mơ̆n na Sư ăn kơ bơ̆n arih ling-lang.

²¹ Ơ lu kon hơ'lơ̆p, iĕm athei weh ataih đơ̆ng dôm tơdrong yang kơnê̆ hŏ.