I Yo 4 - Sơ̆p Hlabơar Nơ̆r 'Bok Kei-Dei

¹ Ơ lu 'nhŏng oh mă juăt păng inh, iĕm 'nĕ lui kơ đĭ-đăng bơngai mă khan sư đei Yang Bơhngol 'Lơ̆ng pơma hơgei. Iĕm athei jet pơlong lăng sư 'mơ̆i wă kơ băt sư đei Yang Bơhngol 'Lơ̆ng đơ̆ng 'Bok Kei-Dei, dah yang nai đĕch ăn kơ sư pơma. Kơlih kơ đei lơ bơngai jơ̆p kơ teh đak chă bơtho, sư khan sư pơtruh nơ̆r sư kơtơ̆ng đơ̆ng 'Bok Kei-Dei sơmă sư hơlĕnh đĕch.

² Wă kơ iĕm băt bơngai ayơ đei Yang Bơhngol 'Lơ̆ng đơ̆ng 'Bok Kei-Dei tơpă iĕm athei tơdra thoi âu: Dah sư khan Yêsu Krist jur jing bơngai tơpă, lei bơngai 'noh đei Yang Bơhngol 'Lơ̆ng đơ̆ng 'Bok Kei-Dei tơpă.

³ Bơngai bu khan Yêsu Krist ưh kơ jur jing bơngai, bơngai 'noh ưh kơ đei Yang Bơhngol 'Lơ̆ng đơ̆ng 'Bok Kei-Dei ôh. Bơngai bu khan thoi noh, sư 'noh ayăt kơ Yêsu Krist. Iĕm kơtơ̆ng boih sơ̆ lu bơngai ayăt kơ Yêsu Krist khan gô truh, na dang ei lu sư truh tơ âu tơpă boih.

⁴ Ơ lu kon hơ'lơ̆p, gah iĕm kon 'Bok Kei-Dei tơpă, lu bơngai ayăt kơ Yêsu Krist thuơ kơ iĕm boih. Lu sư thuơ kơ iĕm kơlih kơ Yang Bơhngol 'Lơ̆ng oei lăm lu iĕm, Sư pran hloh kơ yang mă oei lăm lu bơngai ala teh âu.

⁵ Lu bơngai ayăt kơ Yêsu bơtho gah tơdrong ala teh âu ngăl, na lu bơngai ala teh âu mơ̆ng sư kơlih kơ lu sư tơduă bơngai ala teh.

⁶ Sơmă bơ̆n kon 'Bok Kei-Dei. Bơngai bu băt kơ 'Bok Kei-Dei, bơngai 'noh sư mơ̆ng bơ̆n. Bơngai bu ưh kơ băt kơ 'Bok Kei-Dei, bơngai 'noh ưh kơ mơ̆ng bơ̆n ôh. Thoi noh bơ̆n băt bơngai bu kiơ̆ Yang Bơhngol 'Lơ̆ng tơpă, bu wă kiơ̆ yang Satan đĕch.

'Bok Kei-Dei 'mêm kơeng kơ bơ̆n tơpă

⁷ Ơ lu 'nhŏng oh mă juăt păng inh, bơ̆n athei 'mêm mơnat dih băl yua kơ 'Bok Kei-Dei ăn kơ lu bơngai mă khŭl kon Sư athei 'mêm mơnat dih băl. Bơngai bu 'mêm mơnat kơ 'nhŏng oh sư, bơngai 'noh sư kon 'Bok Kei-Dei păng sư băt kơ 'Bok Kei-Dei tơpă.

⁸ Bơngai bu ưh kơ 'mêm mơnat kơ 'nhŏng oh sư, bơngai 'noh ưh kơ băt kơ 'Bok Kei-Dei ôh, yua kơ 'Bok Kei-Dei Sư gah tơdrong 'mêm mơnat đĕch.

⁹ 'Bok Kei-Dei tơ'bôh kơ bơ̆n tơdrong Sư 'mêm mơnat kơ bơ̆n tơpă thoi âu: Sư wơh Kon pôm Sư jur tơ ala teh âu wă kơ Sư lôch tang bơ̆n, wă kơ bơ̆n arih ling-lang hăm Sư.

¹⁰ Âu boih tơdrong 'Bok Kei-Dei 'mêm mơnat kơ bơ̆n: Sư 'mêm mơnat kơ bơ̆n mah ăn Kon pôm Sư lôch tang bơ̆n, pơklaih bơ̆n đơ̆ng tơdrong yoch. Bơ̆n 'mêm kơ Sư ưh kơ đei dang noh ôh.

¹¹ Ơ 'nhŏng oh mă juăt păng inh, 'Bok Kei-Dei 'mêm mơnat kơ bơ̆n dang noh, na bơ̆n athei 'mêm mơnat dih băl tơduă bơ̆n.

¹² Ưh tam đei bu 'bôh 'Bok Kei-Dei, sơmă dah bơ̆n 'mêm mơnat dih băl, 'noh yua kơ 'Bok Kei-Dei oei hơdai păng bơ̆n păng ăn kơ bơ̆n đei đon 'mêm mơnat kư̆m thoi Sư 'mêm mơnat mơ̆n.

¹³ Bơ̆n băt tơpă boih gah tơdrong bơ̆n pôm đon păng 'Bok Kei-Dei păng tơdrong Sư oei lăm bơ̆n kơlih kơ Sư ăn kơ bơ̆n Yang Bơhngol 'Lơ̆ng Sư.

¹⁴ Nhôn 'bôh tơpă tơdrong 'Bok Kei-Dei wơh Kon Sư jur tơ ala teh âu wă dŏng pơklaih đĭ-đăng kon bơngai, thoi noh na nhôn gơh roi kơ đe Kon Sư jur tơpă.

¹⁵ Bơngai bu khan Yêsu Kon 'Bok Kei-Dei, 'Bok Kei-Dei oei lăm bơngai 'noh, bơngai 'noh sư pôm đon păng 'Bok Kei-Dei tơpă boih.

¹⁶ Bơ̆n băt kơ Sư 'mêm mơnat kơ bơ̆n tơpă. 'Bok Kei-Dei Sư gah tơdrong 'mêm mơnat đĕch, na bơngai bu 'mêm mơnat kơ đe tơpă, bơngai 'noh pôm đon păng 'Bok Kei-Dei păng 'Bok Kei-Dei oei lăm sư.

¹⁷ 'Bok Kei-Dei wă kơ bơ̆n 'mêm kơ Sư tơpă wă kơ bơ̆n huay kơ hli kơplah năr Sư wă sek tơlang ning-mônh. Bơ̆n ưh kơ hli kơlih kơ bơ̆n oei arih tơ ala teh âu dang ei kư̆m lei-lăi thoi Yêsu arih mơ̆n.

¹⁸ Bơngai bu 'mêm kơ 'Bok Kei-Dei tơpă, bơngai 'noh huay kơ hli kơ 'Bok Kei-Dei ôh. Thoi noh na bơngai bu oei hli, bơngai 'noh tam mă 'mêm kơ 'Bok Kei-Dei mă tơpă, yua kơ bơngai 'noh sư hli kơ 'Bok Kei-Dei wă phak sư ning-mônh.

¹⁹ Bơ̆n 'mêm kơ 'Bok Kei-Dei kơlih kơ Sư 'mêm kơ bơ̆n adrol.

²⁰ Bơngai bu khan sư 'mêm kơ 'Bok Kei-Dei mă-lei oei hil areh kơ 'nhŏng oh sư, bơngai 'noh hơlĕnh đĕch. Dah sư ưh kơ 'mêm kơ 'nhŏng oh sư mă oei hơdai ling-lang, thoi yơ sư gơh 'mêm kơ 'Bok Kei-Dei mă sư ưh kơ 'bôh.

²¹ Na Yêsu Krist bơtho pơkă kơ bơ̆n thoi âu: Bơngai bu 'mêm kơ 'Bok Kei-Dei, bơngai 'noh athei 'mêm mơnat kơ 'nhŏng oh sư mơ̆n.