I Tim 5 - Sơ̆p Hlabơar Nơ̆r 'Bok Kei-Dei

¹ Ih khă lu bơngai kră mă 'lơ̆ng, ih athei pơma lung sư yua kơ sư kră hloh kơ ih; păng ih lăng sư thoi lĕ kơ 'bă ih. Ih lăng lu bơngai drŏ-nglo 'lơ̆p kơ ih kư̆m thoi oh ih mơ̆n.

² Ih lăng lu yă kră thoi mĕ ih păng ih lăng lu drŏ-kăn 'lơ̆p kơ ih kư̆m thoi oh ih mơ̆n, ih athei pơma dơnuh păng sư mă 'lơ̆ng đĕch.

Lu drŏ-kăn adro

³ Păng ih athei tơgŭm lu drŏ-kăn adro mă ưh kơ đei bu 'me sa sư.

⁴ Mă-lei lu bơngai drŏ-kăn adro đei kon dah sâu sư, noh lê̆ lu kon sâu lu sư 'noh 'me sa sư. 'Bok Kei-Dei wă kơ bơ̆n wei-lăng 'me sa mĕ 'bă, yă 'bok bơ̆n kơdih. Bơ̆n athei 'me plơ̆ sư dơ̆ng.

⁵ Bơngai adro tơpă ưh kơ đei bu wă 'me sư na sư lui kơ 'Bok Kei-Dei gô tơgŭm sư. Sư krao khan kơ 'Bok Kei-Dei ling-lang apinh Sư tơgŭm.

⁶ Dah đei drŏ-kăn adro pơm đi chă mơdro akâu sư kơ lu bơngai drŏ-nglo, mă sư oei arih ră mă-lei lăng sư dang lĕ kơ lôch đĕch 'noh.

^7-8 Ih khan kơ lu bơngai mă oei mĕ dah yă adro po, ih athei lu sư wei-lăng 'me sa kơdih wă kơ đe huay kơ pơjĭp pơjăm bâu roi. Dah bơngai lui bơ̆n bu mă ưh kơ wă tơdŏng mơnat kơ mĕ 'bă, yă 'bok, 'nhŏng oh, kon akăn sư, đe lăng dang lĕ ưh kơ lui boih. Đe lăng sư kơnê̆ hloh kơ lu bơngai tam mă lui dơ̆ng.

^9-10 Ih 'nĕ chih tơmơ̆t anăn lu drŏ-kăn adro lăm sơ̆p hla bơar dah sư tam mă truh tơdrâu-jĭt sơnăm. Ih chih anăn lu bơngai drŏ-kăn adro mă đei minh 'nu klo đĕch sơ̆ păng đe jô̆ kơ sư bơngai 'lơ̆ng, pơtih gia sư rong kon sư gơh găt, sư gơh sơng iŏk bơngai tơmoi truh tơ hnam sư, sư ôp rơgoh jơ̆ng bơngai lui, sư tơgŭm lu bơngai đei tơdrong gleh pơmat-tat, sư gơh tơgŭm đe ling-lang tơpă.

¹¹ Ih 'nĕ chih anăn lu bơngai adro mă sư oei moh hli kơ sư oei wă iŏk klo dơ̆ng na hŭt lê̆ tơdrong jang Yêsu Krist,

¹² na lu sư jing yoch yua kơ lu sư ưh kơ pơm kiơ̆ thoi sư pơkă kơ Yêsu hơdrol.

¹³ Lu sư nơ̆k nơ̆k tu, nơ̆k nơ̆k bơbah ling-lang nŏng kơ chă ngôi hnam âu hnam to ưh kơ wă jang păng chă pơma plĕch kơ đe, pơma tơdrong ưh kơ trŏ kơ nơ̆r pơma.

¹⁴ Yua kơ thoi noh na inh wă kơ bơngai drŏ-kăn adro oei moh iŏk klo na sư tơpŭ kon wei-lăng hnam dơnŏ sư kơdih wă kơ đe mă ưh kơ lui huay pă che bơle kơ bơ̆n dơ̆ng.

¹⁵ Đei bơngai adro mơ'nah achăng lê̆ tơdrong lui sư na jing kiơ̆ yang Satan.

¹⁶ Bơngai lui bơ̆n mă drŏ-nglo, mă drŏ-kăn, bu mă đei bơngai adro lăm kơtum sư, sư athei 'me kơdih ưh kơ gơh ăn kơ bơngai lui 'me ôh. Bơngai lui 'me pôm lu bơngai adro mă ưh kơ đei bơngai tơgŭm 'me sư 'noh đĕch. Thoi noh na jên iĕm mah 'biơ̆.

Kră wei-lăng bơngai lui

¹⁷ Lu kră wei-lăng bơngai lui bơngai bu jang 'lơ̆ng iĕm thim 'biơ̆ jên khei sư, mă loi lu bơngai bơtho tơdrong 'Bok Kei-Dei.

¹⁸ Ih athei pơm thoi noh yua kơ sơ̆p hla bơar 'Bok Kei-Dei khan thoi âu; mă mônh: “Iĕm 'nĕ kơ trôp 'bơ̆r rơmo kơplah sư oei jang juă hơnong 'ba.” Mă 'bar: “Bơngai jang athei đei sa apah.” Thoi noh na bơngai bơtho lei-lăi mơ̆n, iĕm athei apah jên kiơ̆ kơ sư jang.

¹⁹ Dah đe jâu kơnê̆ kơ kră wei-lăng bơngai lui, ih 'nĕ kơ mơ̆ng sư hŏ, dah minh 'nu bơngai đĕch jâu sư. Dah lu sư 'bar pêng 'nu wă pơma thoi noh tơpă, 'noh ih gơh mơ̆ng păng jet hloi lu sư khan: “Tơdrong kiơ iĕm jâu sư?”

²⁰ Bơngai bu pơm yoch tơpă ih athei pơma khă sư 'bơ̆t anăp đe tơpôl lu bơngai lui wă kơ lu bơngai lui kơchăng đon ưh kơ wă pơm yoch thoi bơngai 'noh dơ̆ng.

²¹ Kră Yang bơ̆n 'Bok Kei-Dei, Yŏng bơ̆n Yêsu Krist păng linh jang 'lơ̆ng Sư 'bôh bơ̆n ling-lang na ih athei kơchăng pơm kiơ̆ dôm tơdrong inh pơkă kơ ih 'noh. Inh wă kơ ih lăng đĭ-đăng bơngai lei-lăi đĕch, ih 'nĕ kơ lăng minh 'nu bơngai hloh kơ đe nai.

²² Ih 'nĕ kơ hăt hot pel kơ̆l krao khan kơ đe wă ăn kơ đe wei-lăng bơngai lui. Ih athei gô pơlong lăng sư đunh 'mơ̆i. Dah ih hơloh pel kơ̆l krao khan kơ sư, na sư ưh tam tơchĕng đon hơdrol noh, hli kơ sư pơm yoch ning-mônh, dang lĕ ih athei sư pơm yoch. Ih athei pơm 'lơ̆ng tơpăt ling-lang.

²³ Krô hmă ih jĭ klak, ih 'nĕ pă nhă đak 'blăng ngăl hŏ, ih athei et 'biơ̆ sik hơmu tŏ sĕt wă kơ huay pă jĭ dơ̆ng.

²⁴ Pơtih gia đei bơngai mơ'nah pơm yoch, mơ'nah bơ̆n 'bôh sư pơm yoch hơdrol kơ đe sek tơlang tơdrong sư, mơ'nah đơ̆ng rŏng kơ sư pơm yoch 'noh oei đunh.

²⁵ Lei-lăi thoi noh mơ̆n, đei lu bơngai pơm 'lơ̆ng tơpăt bơ̆n kư̆m 'bônh kơ 'bôh tơdrong 'lơ̆ng sư mơ̆n. Phŏ phŏ tơdrong 'lơ̆ng sư pơm ưh kơ 'bôh dang ei, mă-lei ning-mônh bơ̆n kư̆m 'bôh.