I Tim 2 - Sơ̆p Hlabơar Nơ̆r 'Bok Kei-Dei

^1-2 Dôm tơdrong inh wă pơkă kơ ih dang ei tơdrong âu kăl tơpă: Inh athei iĕm krao khan bơnê kơ 'Bok Kei-Dei ling-lang apinh Sư dŏng mơnat đĭ-đăng bơngai păng đĭ-đăng 'bok pơtao păng đĭ-đăng kră pơgơ̆r wă kơ bơ̆n oei hiôk-hian păng đei đon tơpăt kiơ̆ tơdrong 'Bok Kei-Dei.

³ Bơ̆n krao khan thoi noh 'lơ̆ng tơpă păng Kră Yang 'Bok Kei-Dei lăp đon tơpă. Sư pơklaih bơ̆n đơ̆ng tơdrong yoch.

⁴ Păng Sư wă kơ đĭ-đăng bơngai gơh klaih đơ̆ng pơm yoch păng wă kơ lu sư băt tơdrong 'Bok Kei-Dei:

⁵ Đei minh 'nu Kră Yang 'Bok Kei-Dei păng đei minh 'nu pơm 'long sơlam đĕch anhăk kon bơngai ala teh wă kơ bơngai ala teh hiôk hăm 'Bok Kei-Dei. Bơngai mă pơm 'long sơlam ei anăn Sư Yêsu Krist.

⁶ Sư ăn akâu Sư kơdih lôch tang wă huai iŏk đĭ-đăng kon bơngai. Truh boih sơnăm 'Bok Kei-Dei pơkă Kon Sư lôch ei sơ̆, sơnăm 'noh boih Yêsu lôch tang huai iŏk kon bơngai, wă kon bơngai băt kơ 'Bok Kei-Dei pơklaih đĭ-đăng bơngai đơ̆ng yoch.

⁷ Kơlih kơ thoi noh 'Bok Kei-Dei ăn kơ inh pơm jơ̆ng 'bang Yêsu Krist wă bơtho tơdrong 'noh kơ đĭ-đăng teh đak, wă bơtho lu sư gah tơdrong lui kơ Yêsu Krist păng tơdrong 'Bok Kei-Dei. Inh ưh kơ hơlĕnh ôh, inh pơma tơpă kơ ih.

⁸ Tơ rim anih akŭm tơduă iĕm, inh wă kơ lu drŏ-nglo krao khan kơ 'Bok Kei-Dei, lu bơngai drŏ-nglo bu mă đei jơhngơ̆m 'lơ̆ng tơpăt ưh kơ hil kơ đe.

⁹ Gah tơdrong hơbĕn ao lu bơngai drŏ-kăn, inh ưh kơ wă kơ sư hrŭk hơbĕn ao wă pơang akâu kơdih đĕch. Păng inh ưh kơ wă kơ sư pơm sŏk sư wă pơang kơ đe; păng ưh kơ wă kơ sư 'bot tơmam maih hơdah anam kăp. Inh ưh kơ wă kơ sư hrŭk ao rŏ kăp jên mơ̆n.

¹⁰ Bơngai bu lui kơ 'Bok Kei-Dei sư ưh kơ gơh pơm thoi noh ôh. Sư athei đei đon 'mêm mơnat kơ đe păng asong đe tơmam.

¹¹ Lăm lu iĕm akŭm tơdrong 'Bok Kei-Dei, lu bơngai drŏ-kăn athei oei thĕng, mơ̆ng bơngai mă bơtho, lui yom kơ bơngai bu mă bơtho iĕm 'noh.

¹² Inh ưh kơ ăn lu bơngai drŏ-kăn bơtho tơdrong 'Bok Kei-Dei lăm iĕm akŭm. Păng inh ưh kơ ăn sư pơgơ̆r lu bơngai drŏ-nglo mơ̆n. Lu sư athei oei thĕng 'nĕ kơ pơma lăm iĕm akŭm.

¹³ Kơlih kơ 'Bok Kei-Dei pơjing 'bok Ađam hơdrol, klaih kơ noh pơjing yă Ewơ.

¹⁴ Păng ưh kơ sĭ 'bok Ađam lui kơ yang Satan ôh, yă Ewơ lui kơ yang Satan pơhlŭ, na sư pơm yoch hiong tơdrong 'Bok Kei-Dei pơkă.

¹⁵ Mă-lei lu bơngai drŏ-kăn gô đei jơhngơ̆m hiôk yua kơ sư tơpŭ kon. Păng sư athei lui kơ 'Bok Kei-Dei khŏm khŏm păng 'mêm kơ 'Bok Kei-Dei hăm đĭ-đăng bơngai. Sư athei pơm jơhngơ̆m 'lơ̆ng tơpăt păng 'nĕ kơ pơm kư̆ kă.