I Tim 1 - Sơ̆p Hlabơar Nơ̆r 'Bok Kei-Dei

Pơih nơ̆r pơma

^1-2 Inh Pôl jơ̆ng 'bang Yêsu Krist chih hơpong kơ Timôthê. Hmach kơ ih, dăm. Ih kon inh tơpă kơlih kơ ih lui kơ Kră Yang Yêsu Krist đơ̆ng inh bơtho ih sơ̆. Kră Yang 'Bok Kei-Dei hăm Kon Sư Yêsu Krist athei inh pơm jơ̆ng 'bang Sư. 'Bok Kei-Dei dŏng pơklaih bơ̆n đơ̆ng tơdrong yoch. Bơ̆n lui kơ Yêsu Krist bơ̆n băt kơ Sư gô ăn kơ bơ̆n oei hơdai hăm Sư ning-mônh. Inh krao khan apinh 'Bă tơm bơ̆n 'Bok Kei-Dei hăm Kră Yang bơ̆n Yêsu Krist wei-lăng ih tôm tơdrong. Apinh Sư mơnat kơ ih, hăm ăn kơ ih hiôk-hian ling-lang.

Timôthê athei khă lu bơngai bơtho ưh kơ trŏ

³ Inh wă kơ ih kư̆ oei tơ Pơlei Êphêsô, kư̆m thoi inh athei ih ki lăp inh wă năm đơ̆ng Pơlei Êphêsô tơ dêh char Masêđôn. Na inh athei ih oei tơ pơlei âu khŏm khŏm yua kơ đei lu bơngai tơ noh bơtho tơdrong ưh kơ trŏ tơdrong 'Bok Kei-Dei tơpă. Na ih athei khă lu sư 'nĕ pă bơtho thoi noh dơ̆ng.

⁴ Ih athei lu sư hŭt lê̆ tơdrong roi kư̆ kă gah adrĕch adrung yă 'bok so sơ̆. Kơlih kơ sư bơtho tơdrong 'noh na lu sư pơjah ling-lang. Lu tơdrong 'noh ưh kơ yua wă tơgŭm bơ̆n ôh. Bơ̆n chu lui kơ Sư mă tơpă na bơ̆n gơh jang tơdrong Sư.

⁵ Inh athei ih khă lu sư thoi noh wă kơ lu sư đei đon 'lơ̆ng tơpăt, hăm lui mă trŏ, thoi noh na sư gơh 'mêm kơ 'Bok Kei-Dei hăm bôl buăl tơ ala teh âu mơ̆n.

⁶ Đei bơngai mơ'nah hŭt lê̆ tơdrong lui sư na jing pă đei đon 'lơ̆ng tơpăt dơ̆ng, na jing hơwơ̆l kơ tơdrong 'Bok Kei-Dei. Lu sư bơtho kư̆ kă đĕch 'noh.

⁷ Lu sư wă bơtho lu tơdrong juăt 'Bok Kei-Dei pơkă sơ̆, mă-lei lu sư ưh kơ hlôh wă bơtho thoi yơ. Lu sư khan gơh bơtho tơpă, mă-lei lu sư ưh kơ hlôh wao kơdih sư.

⁸ Bơ̆n băt tơdrong juăt 'Bok Kei-Dei pơkă sơ̆ 'lơ̆ng tơpăt tơpă na lu bơ̆n athei bơtho mă trŏ.

⁹ 'Bok Kei-Dei pơkă dôm lu tơdrong noh yua Sư wă phak lu bơngai kơnê̆ ưh kơ sĭ wă phak lu bơngai 'lơ̆ng ôh. Sư wă kơ phak lu bơngai ưh kơ chu, lu bơngai kư̆ kă, lu bơngai ưh kơ lui kơ Sư, lu bơngai pơm yoch, lu bơngai mă chă pơlôch đe, lu bơngai mă pơlôch mĕ 'bă kơdih,

¹⁰ lu bơngai ngôi pơyô kư̆ kă, lu bơngai tơduă drŏ-nglo tơngôi băl, lu bơngai chă rôp tĕch đe, lu bơngai chă hơlĕnh kơ đe, lu bơngai jâu pơlơ̆m kơ đe, hăm dôm lu bơngai hŭt lê̆ tơdrong 'lơ̆ng tơpăt.

¹¹ Tơdrong 'lơ̆ng tơpăt noh tơdrong 'nao 'lơ̆ng 'Bok Kei-Dei. 'Bok Kei-Dei ăn kơ inh bơtho tơdrong 'nao 'lơ̆ng Sư. Sư boih mă hiôk-hian ling-lang. Sư Kră Yang tih hloh.

Pôl bơnê kơ Kră Yang Yêsu Krist 'mêm mơnat kơ sư

¹² Inh bơnê kơ Kră Yang bơ̆n Yêsu Krist yua kơ Sư ăn kơ jơhngơ̆m inh pran kơtang jang tơdrong Sư. Păng inh bơnê kơ Sư tơchĕng đon Sư khan inh trŏ bơngai gơh jang tơdrong Sư, na Sư rơih iŏk inh jang kơ Sư hloi.

¹³ Mă inh pơma kơnê̆ kơ Sư sơ̆, inh pơjăm Sư păng pơm kơnê̆ kơ lu bơngai lui kơ Sư, mă-lei Sư rơih iŏk inh mơ̆n. 'Bok Kei-Dei mơnat kơ inh sơ̆ kơlih kơ inh tam mă lui kơ Kră Yang Yêsu, na inh ưh kơ tơtĭnh dôm tơdrong 'noh kơnê̆.

¹⁴ Kră Yang bơ̆n Yêsu Krist 'mêm mơnat kơ inh tơpă ăn kơ inh lui kơ Sư păng ăn kơ inh 'mêm kơ Sư hăm đĭ-đăng bơngai. Sư kư̆m ăn kơ đĭ-đăng bơngai lui lei-lăi mơ̆n.

¹⁵ Tơdrong âu trŏ tơpă, bơ̆n gơh lui tơpă: Kră Yang Yêsu Krist jur oei tơ ala teh âu wă kơ pơklaih lu bơngai yoch. Inh boih bơngai mă pơm yoch lơ hloh kơ đĭ-đăng bơngai nai.

¹⁶ Mă-lei 'Bok Kei-Dei oei mơnat kơ inh na pơklaih inh yua kơ Kră Yang Yêsu Krist wă tơbăt kơ kon bơngai Sư mơnat tơpă kơ inh mă pơm yoch lơ hloh kơ đĭ-đăng bơngai nai. Na lu bơngai nai gô 'bôh tơdrong Sư mơnat kơ inh, sư băt 'Bok Kei-Dei mơnat tơpă kơ đĭ-đăng bơngai, na lu sư gô lui kơ Kră Yang Yêsu Krist hăm arih ling-lang.

¹⁷ Bĕ bơ̆n ư-ang kơ 'Bok Kei-Dei, Sư Pơtao bơ̆n mă arih ling-lang. Đei minh 'nu Sư đĕch. Sư Kră Yang ưh kơ đei layơ lôch. Bơ̆n ưh kơ gơh 'bôh Sư ôh. Bĕ bơ̆n ư-ang kơ Sư ling-lang ưh kơ đei layơ tôch. A-men.

¹⁸ Ơ dăm Timôthê, ih pơm dôm tơdrong inh athei ih âu hŏ. Ih pơm kư̆m thoi lu bơngai khan lê̆ hơdrol pơkă gah ih sơ̆. Ih 'blŏk kơ tơdrong sư pơkă 'noh wă kơ ih nuih kơ tơblah hăm yang kơnê̆,

¹⁹ păng wă kơ ih lui kơjăp khŏm khŏm pơm đon 'lơ̆ng tơpăt kơ 'Bok Kei-Dei hăm đĭ-đăng bơngai. Đei lu bơngai mơ'nah hŭt lê̆ đon 'lơ̆ng sư kơdih na jing hŭt lê̆ tơdrong lui sư mơ̆n.

²⁰ Thoi bre Himenaius hăm Aleksandrê hŭt tơdrong lui bre sư, na inh jao lê̆ bre sư kơ yang Satan wă kơ bre sư đei tơdrong gleh na wă kơ bre sư tơbral ưh pă pơma kơnê̆ kơ 'Bok Kei-Dei dơ̆ng.