I Sam 8 - Sơ̆p Hlabơar Nơ̆r 'Bok Kei-Dei

Isơrael krao apinh wă kơ đei pơtao

¹ Kơplah Samuel đĭ kră bơih, na pơjao ăn kơ lu kon drŏ-nglo sư pơgơ̆r pơm 'bok sek tơlang kơ bơngai Isơrael.

² Kon kơdră sư anăn Jôel păng kon mă 'bar sư anăn Abija, bre sư pơm 'bok sek tơlang tơ lăm pơlei Bêrsêba.

³ Mă-lei 'bar 'nu kon drŏ-nglo sư ưh kơ rok kiơ̆ 'bă bre sư ôh, bre sư hưch ham kơ jên tơmam, pơgâm sa tơmam đe păng sek ưh kơ tơpăt.

⁴ Na đĭ-đăng lu yŏng kră pơgơ̆r bơngai Isơrael akŭm băl, năm chă Samuel tơ hnam Sư tơ pơlei Rama,

⁵ Lu sư khan kơ sư: Ih đĭ kră pă kĕ bơih na bre kon drŏ-nglo ih ưh kơ rok thoi ih. Lei na apinh ih chă ăn kơ lu nhôn minh 'nu pơtao wă kơ pơgơ̆r lu nhôn, thoi lu adrĕch adrung nai mă đei pơtao pơgơ̆r.

⁶ Kơtơ̆ng nơ̆r lu sư apinh: Ăn bĕ kơ lu nhôn minh 'nu pơtao wă pơgơ̆r lu nhôn, nơ̆r noh Samuel ưh kơ lap đon ôh; na Samuel krao khan apinh Kră Yang.

⁷ Kră Yang tơl Samuel khan: Ih athei pơm kiơ̆ dôm nơ̆r kon pơlei apinh ih; noh ưh kơ sĭ lu sư sơngah kơ ih ôh, noh lu sư sơngah kơ Inh, ưh kơ wă kơ Inh pơm pơtao wei-lăng pơgơ̆r lu sư dơ̆ng.

⁸ Lu sư pơm kơ ih kư̆m thoi lu sư juăt kơ pơm kơ Inh iŏk đơ̆ng năr Inh pơklaih lu sư lĕch đơ̆ng dêh char Êyiptơ truh tơ dang ei, lu sư achăng lê̆ inh na kơkuh kơ yang nai.

⁹ Na dang ei, ih athei mơ̆ng nơ̆r lu sư, mă-lei ih 'nĕ hiơt pơma mă trŏ mă 'lơ̆ng păng tơbăt kơ lu sư băt kơ pơtao mă wă pơgơ̆r lu sư noh gô liơ kơnh.

¹⁰ Samuel roi ăn kơ kon pơlei dôm nơ̆r Kră Yang đei khan gah tơdrong lu sư đei apinh sư wă kơ đei pơtao,

¹¹ na khan: 'Nâu tơdrong mă pơtao iĕm gô pơgơ̆r lu iĕm. Sư gô rôp kon drŏ-nglo iĕm pơm linh wă huơ̆r gre aseh sư, dah ăn hao aseh, mơ'nah yak jơ̆ng wă kơ năm tơblah adrol kơ gre sư.

¹² Sư gô ăn pơm yŏng kơ rơbâu 'nu linh păng pơm yŏng kơ pơđăm-jĭt 'nu, dah rôp lu sư choh chŭn sư, kĕch kơ sư 'ba, hơjơ̆m tơmam tơblah ăn kơ sư păng lu tơmam pơm gre aseh tơblah.

¹³ Sư gô rôp kon adruh lu iĕm pơm pơgang 'bâu phu kơ sư, pai gŏ ăn kơ sư păng thơ̆ pơm 'bĕng mi kơ sư.

¹⁴ Sư gô iŏk mir chŭn, pơgar hơmu păng mir 'long ôliwơ mă 'lơ̆ng hloh đơ̆ng lu iĕm, na ăn kơ đĭch đam sư.

¹⁵ Sư gô iŏk thuê̆ minh lăm mơjĭt đơ̆ng chŭn mir iĕm păng pơgar hơmu lu iĕm na asong ăn kơ lu pơm 'bok kuan păng đĭch đam sư.

¹⁶ Sư gô rôp lu đĭch đam drŏ-nglo, drŏ-kăn, lu adruh tơdăm mă pran kơtang đơ̆ng lu iĕm, truh tơ mah rôp iŏk rơmo aseh iĕ iĕm yua lăm tơdrong jang sư.

¹⁷ Sư gô iŏk thuê̆ minh lăm mơjĭt gah bơbe triu lu iĕm păng lu iĕm gô pơm đĭch đam kơ sư.

¹⁸ Kơplah ei kơnh lu iĕm gô ôr krao yua kơ đơ̆ng pơtao mă iĕm đei rơih iŏk noh, mă-lei Kră Yang ưh kơ wă mơ̆ng nơ̆r lu iĕm ôh.

¹⁹ Kon pơlei sơngah ưh kơ wă mơ̆ng nơ̆r Samuel, na khan: Ưh ôh, wă kơ đei minh 'nu pơtao pơgơ̆r lu nhôn.

²⁰ Lu nhôn wă kơ đei pơtao thoi lu adrĕch nai; pơtao pơgơ̆r lu nhôn gô năm adrol kơ lu nhôn, na tơblah ăn kơ lu nhôn.

²¹ Samuel mơ̆ng dôm nơ̆r lu kon pơlei pơla, na sư krao khan roi ăn kơ Kră Yang.

²² Kră Yang drơ̆ng nơ̆r Samuel: Athei chu kiơ̆ dôm nơ̆r lu sư păng ăn kơ lu sư minh 'nu pơtao. Kơplah ei Samuel khan kơ lu bơngai Isơrael: Lu iĕm rim 'nu athei wih brŏk tơ pơlei iĕm kơdih.