I Sam 7 - Sơ̆p Hlabơar Nơ̆r 'Bok Kei-Dei

¹ Đe Kiriat Jêrim năm tung iŏk Hom Pơgơ̆p Kră Yang, ba tơ hnam Abinađap, tơ kơpal groi, đơ̆ng noh rơih iŏk Êlêasar, kon drŏ-nglo sư, wă wei-lăng Hom Pơgơ̆p Kră Yang.

Samuel pơm 'bok sek tơlang lăm Isơrael

² Hom Pơgơ̆p Kră Yang đe ming lê̆ tơ Kiriat Jêrim đunh 'biơ̆ mơ̆n, mah 'bar-jĭt sơnăm, đĭ-đăng đe Isơrael nhơ̆m 'blŏk wih brŏk tơ Kră Yang.

³ Samuel khan kơ đĭ-đăng bơngai Isơrael thoi âu: Tơdah đĭ jơhngơ̆m wih brŏk tơ Kră Yang, iĕm athei hŭt lê̆ lu rup yang bơngai tơmoi păng rup yang drŏ-kăn Astarôt đơ̆ng lăm iĕm, na đĭ jơhngơ̆m kiơ̆ Kră Yang, lăp kơ bơ̆jang kơ minh 'nu Sư đĕch. Sư gô dŏng pơklaih iĕm đơ̆ng bơngai Philistin ngei ngei.

⁴ Na bơngai Isơrael klơ̆m hŭt lu yang Baal păng rup yang Astarôt, kơkuh kơ minh 'nu Kră Yang đĕch.

⁵ Đơ̆ng noh Samuel khan: Athei krao akŭm đĭ bơngai Isơrael tơ pơlei Mispa, inh gô krao apinh Kră Yang tơgŭm ăn kơ lu iĕm.

⁶ Lu sư akŭm đĭ tơ Mispa, chhŏ đak păng tuh đak noh 'bơ̆t anăp Kră Yang. Lăm năr noh lu sư ơ̆t kơ sŏng sa păng tơbral: Lu nhôn đei pơm yoch hăm Kră Yang. Samuel pơgơ̆r păng pơm 'bok sek tơlang kơ bơngai Isơrael.

⁷ Wă lu bơngai Philistin kơtơ̆ng khan lu bơngai Isơrael akŭm tơ Mispa, na lu yŏng pơgơ̆r lu sư năm blah bơngai Isơrael, lu bơngai Isơrael kơtơ̆ng khan tơdrong âu, lu sư hli kơ lu bơngai Philistin.

⁸ Na khan kơ Samuel khan: Apinh ih krao khan kơ Kră Yang ling-lang, wă kơ Sư dŏng pơklaih nhôn đơ̆ng ti bơngai Philistin.

⁹ Samuel rôp minh pơm triu kon oei mŏm, pơyơ̆r pơm tơmam soi 'buh kơ Kră Yang. Sư krao khan apinh Kră Yang; Kră Yang tơl nơ̆r sư.

¹⁰ Kơplah Samuel oei pơyơ̆r tơmam soi 'buh lu bơngai Philistin năm blah lu bơngai Isơrael. Mă-lei lăm năr ei Kră Yang ăn grơ̆m glaih jruh tơ bơngai Philistin, pơm kơ lu bơngai Philistin hli tơrơ kơdâu tơklah tơklang.

¹¹ Lu bơngai Isơrael lĕch đơ̆ng Mispa druh blah bơngai Philistin truh tơ ala kơ pơlei Bêtkar đei pơlôch lơ bơngai.

¹² Samuel iŏk pơdơ̆ng minh pơm tơmo tih dan 'bơ̆t sơlam Mispa păng Sen, sư anăn Êbênêser.a Sư khan: Kră Yang đei tơgŭm lu bơ̆n truh tơ âu.

¹³ Philistin thuơ bơih, ưh pă pơ̆n tơgar iŏk teh đơ̆ng bơngai Isơrael dơ̆ng. Đĭ chăl arih Samuel, ti Kră Yang găn ưh kơ ăn bơngai Philistin tơgar iŏk dơ̆ng.

¹⁴ Lu pơlei mă bơngai Philistin đei blah iŏk đơ̆ng bơngai Isơrael đơ̆ng pơlei Ekrôn truh tơ pơlei Gat, lu sư pơdrâu đĭ kơ bơngai Isơrael; bơngai Isơrael đei iŏk teh noh đơ̆ng bơngai Philistin pơgơ̆r na đei tơdrong rơngei oei hiôk-hian bơngai Isơrael hăm bơngai Amôrit.

¹⁵ Samuel pơgơ̆r păng pơm 'bok sek tơlang kơ bơngai Isơrael đĭ chăl arih sư.

¹⁶ Rim sơnăm sư chă dăr jơ̆p kơ pơlei tih Bethel, Gilgal păng Mispa chă sek tơlang ăn kơ kon pơlei pơla bơngai Isơrael tơ lăm lu pơlei noh.

¹⁷ Na sư wih brŏk tơ pơlei Rama, anih hnam sư oei. Tơ noh sư kư̆m sek tơlang kơ kon pơlei Isơrael păng pơm chơnang soi kơkuh kơ Kră Yang.