I Sam 6 - Sơ̆p Hlabơar Nơ̆r 'Bok Kei-Dei

Kon pơlei Philistin pơdrâu Hom Pơgơ̆p

¹ Hom Pơgơ̆p Kră Yang oei tơ lăm char Philistin đei tơpơh khei.

² Bơngai Philistin krao lu 'bok soi păng 'bok pơjâu, na jet khan: Bơ̆n wă pơm liơ kơ Hom Pơgơ̆p Kră Yang? Roi bĕ kơ lu nhôn băt pơm thoi yơ gơh pơdrâu Hom Pơgơ̆p noh tơ anih so.

³ Lu sư tơl khan: Tơdah lu iĕm wă ba Hom Pơgơ̆p Kră Yang đe Isơrael wih 'nĕ kơ năm ba hoh đĕch; iĕm athei chĕp ba tơmam soi wă huai iŏk tơdrong glăi, na lu iĕm gơh klaih păng kư̆m băt yua kơ kiơ Sư ăn tơdrong gleh truh ling-lang tơ iĕm noh.

⁴ Lu sư jet: Tơmam soi yă kiơ lu nhôn pơyơ̆r kơ Kră Yang wă kơ huai iŏk đơ̆ng tơdrong glăi? 'Bok soi păng lu bơngai pơjâu tơl khan: Pơđăm tŏ rup pơtôch pơm păng maih păng pơđăm tŏ kơne pơm păng maih, kiơ̆ kơ kơsơ̆ yŏng pơgơ̆r bơngai Philistin, yua kơ đĭ-đăng lu iĕm păng lu yŏng pơgơ̆r kư̆m đei tơdrong gleh truh lei-lăi ngăl.

⁵ Pơm bĕ lu rup pơtôch păng lu rup kơne mă oei pơrăm phe 'ba, na lu iĕm pơyơ̆r ư-ang kơ Kră Yang 'Bok Kei-Dei đe Isơrael; Rŏ lăng sư huay pă ăn tơdrong truh phak lu iĕm, lu yang iĕm păng mir 'ba dêh char iĕm.

⁶ Liơ mă lu iĕm oei arăng kơ̆l thoi lu bơngai Êyiptơ păng Pharaôn pơm. Iĕm hăm 'blŏk ưh Kră Yang phak pơmat lu sư thoi yơ, na mah ăn kơ kon pơlei năm.

⁷ Na dang ei lu iĕm athei pơm minh pơm gre 'nao, rôp 'bar tŏ rơmo yŏng kon oei mŏm tam mă lah tah tơ 'long ăt tah hloi tơ gre mă-lei athei puh tơmơ̆t lê̆ kon iĕ lăm hơdrong, 'nĕ ăn druh kiơ̆ yŏng sư.

⁸ Na iĕm tung tah Hom Pơgơ̆p 'Bok Kei-dei tơ lăm gre noh. Tơ gah cheng Hom Pơgơ̆p lu iĕm tah lăm hôp tơmam pơyơ̆r hăm maih mă lu iĕm wă pơyơ̆r pơm tơmam soi huai đơ̆ng yoch glăi. Na tah rơmo achăng lê̆ năm kơdih.

⁹ Na lu iĕm lăng hnhoi sư năm; tơdah lu sư năm tơ gah hơdral char sư tơ pơlei Bêt Sêmes, lei 'nâu Kră Yang 'Bok kei-Dei Isơrael boih phak pơrăm bơ̆n; mă-lei tơdah rơmo yak năm trong nai lei ưh kơ trŏ Kră Yang 'bok Kei-Dei phak lu bơ̆n. Tơdrong phak truh noh băt truh kơdih đĕch.

¹⁰ Bơngai Philistin pơm kiơ̆ lui, sư rôp 'bar tŏ rơmo yŏng oei tơmŏm kon tah tơmơ̆t tơ gre păng chĭt lê̆ kon sư tơ lăm hơdrong.

¹¹ Lu sư tah Hom Pơgơ̆p lăm gre, hăm tah hôp rup pơtôch đek pơm păng maih păng kơne kư̆m pơm păng maih.

¹² 'Bar tŏ rơmo hor gre yak tơpăt tơ rok trong pơlei Bêt Sêmes, ưh kơ weh tơ 'ma dah tơ 'ngiĕo. Lu kră pơgơ̆r bơngai Philistin kiơ̆ lăng đơ̆ng rŏng truh tơ hơdral pơlei Bet Semes.

¹³ Kon pơlei, pơlei Bêt Sêmes oei kĕch 'ba bơyan lăm thŭng, wă lu sư ngơk lăng 'bôh Hom Pơgơ̆p, lu sư chhôk 'nă tơpă.

¹⁴ Gre rơmo 'nao wă jê̆ dơ̆ng tơ mir 'bok Jôsuê bơngai pơlei Bêt Sêmes dơ̆ng. Tơ noh đei minh pơm tơmo tih. Kon pơlei teng blah gre rơmo noh pơm 'long ŭnh 'buh pơyơ̆r 'bar tŏ rơmo yŏng noh pơm tơmam soi 'buh ăn kơ Kră Yang.

¹⁵ Lu bơngai Lêwi iŏk tung tơjur Hom Pơgơ̆p păng hôp tah rup yang păng maih noh dan kơpal tơmo tih noh. Lu bơngai pơlei Bêt Sêmes pơyơ̆r tơmam soi 'buh ăn kơ Kră Yang lăm char noh.

¹⁶ Pơđăm 'nu lăm Kră pơgơ̆r 'bôh dôm tơdrong noh, lu sư wih brŏk tơ pơlei Ekrôn hloi lăm năr noh.

¹⁷ 'Nâu pơđăm tŏ rup pơtôch pơm hăm maih bơngai Philistin pơyơ̆r ăn kơ Kră Yang pơm tơmam soi huai yoch dơ̆ng glăi. Minh pơm kơ pơlei Asdôt, minh pơm kơ pơlei Gasa, minh pơm kơ pơlei Askalon, minh pơm kơ pơlei Gat, minh pơm kơ pơlei Ekrôn.

¹⁸ Lu rup kơne pơm hăm maih kư̆m asong kơ pơđăm tŏ pơlei kiơ̆ kơ pơđăm 'nu kră pơgơ̆r bơngai Philistin iŏk đơ̆ng pơlei tih kơjăp truh tơ lu pơlei iĕ ataih. Tơmo tih mă đêl dan Hom Pơgơ̆p Kră Yang oei đei truh kơ dang ei lăm mir 'bok Jôsuê bơngai pơlei Bêt Sêmes.

¹⁹ Kră Yang phak kon pơlei Bêt Sêmes yua kơ lu sư pơih lăng tơ lăm Hom Pơgơ̆p Kră Yang. Sư pơlôch tơpơh-jĭt 'nu lăm lu sư. Kon pơlei nhơ̆m hmoi yua kơ Kră Yang phak lu sư tih tơpă.

²⁰ Kon pơlei Bêt Sêmes khan: Bu kĕ dơ̆ng 'bơ̆t anăp Kră Yang 'Bok Kei-Dei 'lơ̆ng rơgoh 'nâu? Lu bơ̆n wă năm ba Hom Pơgơ̆p âu đơ̆ng lu bơ̆n kơ bu.

²¹ Lu sư wơh bơngai năm khan kơ pơlei Kiriat Jêrim, khan lu bơngai Philistin tung ba pơdrâu boih Hom Pơgơ̆p Kră Yang, jur năm tơ âu tung iŏk kơ lu iĕm bĕ.