I Sam 5 - Sơ̆p Hlabơar Nơ̆r 'Bok Kei-Dei

Hom Pơgơ̆p tơ lăm Philistin

¹ Đơ̆ng rŏng kơ kon pơlei Philistin blah iŏk Hom Pơgơ̆p Kră Yang 'Bok Kei-Dei, đơ̆ng Êbênêser tơ pơlei Asdôt.

² Đơ̆ng noh, lu sư iŏk Hom Pơgơ̆p 'Bok Kei-Dei tơmơ̆t lăm hnam kơkuh kơ yang Dagôn dan 'bơ̆t jê̆ rup yang Dagôn.

³ Pơgê đơ̆ng rŏng kon pơlei Asdôt lu sư iung đơ̆ng hrôih 'bôh đơ̆ng rup yang Đagơn păk kơmŭ brum 'bơ̆t anăp Hom Pơgơ̆p Kră Yang, Pơgê đơ̆ng rŏng dơ̆ng, lu sư iung đơ̆ng hrôih kư̆m 'bôh rup yang Dagôn păk kơmŭ brum tơ teh 'bơ̆t anăp Hom Pơgơ̆p Kră Yang, mă-lei pơgê noh lăp oei 'bôh pă akâu, kơ̆l păng 'bar pah ti kơtĕch 'bôh tă tơ 'măng.

⁴ Pơgê đơ̆ng rŏng Asdôt iung đơ̆ng hrôih, 'bôh yang Dagôn 'bĭch kơmŭ brum tơ teh 'bơ̆t anăp Hom Pơgơ̆p Kră Yang, kơ̆l păng 'bar pah ti kơtĕch kơdih phara pha. Klơ̆m lê̆ 'bơ̆t 'măng hnam, oei pă akâu sư đĕch oei 'bơ̆t kơtă ei.

⁵ Yua kơ thoi ei, truh tơ dang ei, lu 'bok soi tơm Dagôn, mă bu bu wă mơ̆t tơ lăm hnam sư noh, lu sư wer ưh kơ pơ̆n chro jơ̆ng yak trong 'măng ei.

⁶ Ti Kră Yang tuh ăn tơdrong pơmat-tat tih kơ kon pơlei Asdôt, ba tơdrong hli krưp, pơm ăn răm truh tơ lăm lu sư păng lu pơlei oei jê̆ kiơ̆ ei đei, tơdrong jĭ tôch hơbuh.

⁷ Wă kon pơlei Asdôt 'bôh lu sư đei tơdrong truh, lu sư pơma tơduă lu sư khan: Ưh pă gơh lê̆ Hom Pơgơ̆p Kră Yang 'Bok Kei-Dei Isơrael tơ âu hăm lu bơ̆n dơ̆ng, yua kơ ti Kră Yang ăn tơdrong gleh phak truh tih tơ lu bơ̆n păng tơ yang Dagôn, lu bơ̆n.

⁸ Lu sư wơh krao akŭm đĭ lu yŏng pơgơ̆r đe Philistin, na jet: Bơ̆n wă pơm liơ hăm Hom Pơgơ̆p Kră Yang 'Bok Kei-Dei đe Isơrael âu? Lu yŏng pơgơ̆r tơl khan: Athei tung Hom Pơgơ̆p Kră Yang 'Bok Kei-Dei đe Isơrael năm ba tơ pơlei Gat. Na đe năm tung ba Hom Pơgơ̆p Kră Yang. 'Bok Kei-Dei đe Isơrael truh tơ noh.

⁹ Mă-lei đơ̆ng rŏng kơ đe tung Hom Pơgơ̆p Kră Yang 'Bok Kei-Dei truh tơ pơlei Gat boih Kră Yang phak pơlei ei, ăn đei tơdrong truh kơ lu sư hli rŭng răng. Lăm kon pơlei noh, đơ̆ng hơ'lơ̆p truh tơ đe kră; đĭ lu sư tă kơ đei jĭ pơtôch ngăl.

¹⁰ Na, lu sư wơh đe tung ba Hom Pơgơ̆p Kră Yang 'Bok Kei-Dei tơ pơlei Ekrôn, wă Hom Pơgơ̆p noh truh tơ pơlei Ekrôn kon pơlei Ekrôn ôr krao: Đe tung ba Hom Pơgơ̆p Kră Yang 'Bok Kei-Dei đe Isơrael truh tơ bơ̆n wă pơlôch bơ̆n păng kon pơlei pơla lu bơ̆n!

¹¹ Lu sư wơh krao akŭm lu yŏng pơgơ̆r đe Philistin, na khan: Athei tung ba Hom Pơgơ̆p Kră Yang 'Bok Kei-Dei đe Isơrael, wih ba sư tơ anih sư so lê̆ tơ âu kơnh hli kơ nhôn păng kon pơlei nhôn lôch. Yua kơ kon pơlei krưp; tơ noh Kră Yang kư̆m ăn tơdrong gleh phak tih dêh.

¹² Lu bơngai mă tam mă lôch kư̆m đei jĭ pơtôch đơ̆ng lăm pơlei đei nơ̆r ôr krao truh tơ plĕnh ti,