I Sam 4 - Sơ̆p Hlabơar Nơ̆r 'Bok Kei-Dei

Kon pơlei Philistin tơgar iŏk Hom Pơgơ̆p

¹ Samuel roi tơbăt ăn kơ đĭ-đăng bơngai Isơrael nơ̆r Kră Yang. Isơrael năm blah bơngai Philistin păng anih lu sư oei 'bơ̆t jê̆ Êbênêser, gah Philistin anih lu sư oei jê̆ pơlei Aphek.

² Kon pơlei Philistin lu sư gă năm blah Isơrael; Isơrael thuơ kơ đe Philistin păng đei bơngai lôch tơ anih tơblah noh dang puăn-rơbâu 'nu.

³ Wă kon pơlei mă oei arih brŏk tơ kơđông linh, lu đe kră Isơrael khan: Yua kơ kiơ năr 'nâu Kră Yang ăn kơ đe Philistin tơblah pơrăm lu bơ̆n? Lu bơ̆n năm tung iŏk Hom Pơgơ̆p Kră Yang đơ̆ng Silô; brŏk tơ âu Sư gô oei hơdai bơ̆n dŏng pơklaih lu bơ̆n đơ̆ng ti lu bơngai ayăt kơ bơ̆n!

⁴ Thoi noh, lu sư wơh bơngai năm tơ Silô, tung iŏk Hom Pơgơ̆p Kră Yang Tih Hloh, Tơ'ngla mă oei tơ lăm lu chêrubim. 'Bar 'nu kon drŏ-nglo Hêli, jơ̆ Hopni păng Phinêhas, bre sư kư̆m năm kiơ̆ Hom Pơgơ̆p Kră Yang 'Bok Kei-Dei mơ̆n.

⁵ Wă Hom Pơgơ̆p Kră Yang tung tơmơ̆t truh tơ lăm kơđông linh, đĭ-đăng bơngai Isơrael jreo hiôk chơt tih, teh mah pơpơ̆.

⁶ Kon pơlei Philistin kơtơ̆ng nơ̆r noh, na jet khan: Nơ̆r jreo re hiôk chơt tih lăm kơđông linh lu bơngai Hêbrơ noh kiơ kih? Lu sư kơtơ̆ng băt khan Hom Pơgơ̆p Kră Yang đe 'nao tung truh tơ lăm kơđông.

⁷ Kon pơlei Philistin lu sư hli, lu sư khan: Lu yang 'nao truh lăm kơđông linh. Đơ̆ng noh lu sư ôr khan Răm boih kơ lu bơ̆n! Mă đơ̆ng sơ̆ ưh tam lah kơtơ̆ng khan đei tơdrong truh thoi noh.

⁸ Răm boih kơ lu bơ̆n! Bu gô pơklaih bơ̆n đơ̆ng ti lu yang mă mơsêh kơtang dang noh? Noh bơih lu yang mă pơrăm kon pơlei Êyiptơ tơm tơdrong truh tơ lăm char glă.

⁹ Ơ bơngai Philistin, mă nuih bĕ, tơblah mă kơtang bĕ! Kơnh hli kơ iĕm pơm đĭch kon pơlei Hêbrơ, thoi lu sư đei pơm đĭch lu iĕm! Athei mă nuih kơtang năm blah bĕ!

¹⁰ Kon pơlei Philistin năm tơblah, bơngai Isơrael thuơ kơdâu ôn brŏk tơ bơsŭn lu sư kơdih. Noh bơih jĭ minh tơdrong tơblah thuơ tih dêh; pêng-jĭt rơbâu linh trong teh lôch glơch glach.

¹¹ Hom Pơgơ̆p Kră Yang 'Bok Kei-Dei đe blah iŏk, 'bar 'nu kon drŏ-nglo Hêli, Hopni păng Phinêhas, lôch.

¹² Minh 'nu bơngai Bênjamin kơdâu ôn klĕch đơ̆ng anih tơblah, truh tơ Silô lăm năr noh, sư hek hơbĕn ao hiah đĭ, iŏk 'mui teh săi 'bĕnh kơ kơ̆l wă tơ'bôh đei tơdrong sơ'ngon.

¹³ Lăp bơngai ei truh, Hêli oei hơ-oei kơpal tang-dŏ sư 'bơ̆t cheng trong, răp gô hăm jơhngơ̆m hli tơtăm; Hêli sư hli tơtăm kơ Hom Pơgơ̆p Kră Yang 'Bok Kei-Dei. Wă bơngai noh mơ̆t lăm pơlei roi, đĭ bơngai lăm pơlei bu bu kư̆m ôr hơdrăi.

¹⁴ Hêli kơtơ̆ng 'bơ̆r ôr re na khan: Tơjrông tơjrang kơ kiơ hah? Na bơngai noh hăt hot kơ roi ăn kơ Hêli.

¹⁵ Kơplah noh Hêli đĭ tơsĭn-jĭt tơhngam sơnăm bơih. Măt bơbul, ưh pă gơh 'bôh.

¹⁶ Bơngai noh khan kơ Hêli: Inh âu bơngai mă klĕch đơ̆ng anih tơblah năr âu. Hêli jet khan: Ơ dăm, lei tơdrong truh liơ liơ?

¹⁷ Bơngai noh tơl: Bơngai Isơrael thuơ kơdâu ôn 'bơ̆t anăp kon pơlei Philistin; kon pơlei bơ̆n thuơ tih dêh. Đơ̆ng noh, 'bar 'nu kon drŏ-nglo ih Hopni păng Phinêhas kư̆m lôch păng Hom Pơgơ̆p Kră Yang 'Bok Kei-Dei đe blah iŏk bơih.

¹⁸ Wă sư roi truh tơ Hom Pơgơ̆p Kră Yang 'Bok Kei-Dei, Hêli arăng hơron pơ̆k hraih đang đơ̆ng tang-dŏ hơtat kong koi lôch hloi; yua kơ sư đĭ kră trăp trĭn. Sư pơm 'bok sek tơlang đe Isơrael lăm puăn-jĭt sơnăm.

¹⁹ Mŏ mai sư, akăn Phinêhas, oei anăp wă jê̆ rơneh; kơtơ̆ng khan đe blah iŏk Hom Pơgơ̆p Kră Yang 'Bok Kei-Dei păng kơtơ̆ng khan Hêli tơnei sư păng klo sư lôch, na kơtă ei sư jĭ anăp sư pơtăm kŭl-tăng tơpŭ hloi.

²⁰ 'Bơ̆t sư wă jê̆ lôch, lu bơngai drŏ-kăn kơ'mĭn khan: 'Nĕ kơ hli ôh, ih tơpŭ kơ minh 'nu kon drŏ-nglo. Mă-lei sư ưh pă tơl, ưh pă đei kơtơ̆ng kiơ.

²¹ Sư anăn kơ kon hơ'lơ̆p sư noh Ikabôt,a wă khan: Tơdrong ư-ang Kră Yang 'Bok Kei-Dei đĭ weh jăk đơ̆ng bơngai Isơrael; Sư pơma noh wă khan gah Hom Pơgơ̆p Kră Yang 'Bok Kei-Dei đe blah iŏk, hăm tơnei păng klo sư lôch.

²² Sư pơma dơ̆ng: Tơpă, tơdrong ư-ang Kră Yang đe Isơrael đĭ weh boih đơ̆ng bơngai Isơrael yua kơ Hom Pơgơ̆p Kră Yang 'Bok Kei-Dei đe đĭ blah iŏk bơih.