I Sam 31 - Sơ̆p Hlabơar Nơ̆r 'Bok Kei-Dei

Sôl păng lu kon drŏ-nglo sư lôch

¹ Kon pơlei bơngai Philistin tơblah hăm lu bơngai Isơrael; bơngai Isơrael kơdâu thuơ ôn achăng pră lê̆ lu bơngai lôch tơ kông Gilbôa.

² Kon pơlei bơngai Philistin druh kiơ̆ 'moi Sôl hăm kon drŏ-nglo sư, pơlôch Jônathan, Abinađap păng Malkirsua lu kon Sôl.

³ Tơdrong tơblah druh pơm kơ Sôl dêh; lu linh chĕp hră prah 'bơm sư, sư jĭ rơka jĭ dêh.

⁴ Sôl khan kơ bơngai chĕp tơmam tơblah sư: Toh bĕ tơju ih, 'bet inh wăi, kơnh lu bơngai ưh kơ chu kăt tơdra akar 'bet inh păng gô che bơle kơ inh. Mă-lei bơngai mă chĕp tơmam sư tơblah ưh kơ pơ̆n 'bet, yua kơ hli dêh; Sôl iŏk tơju glơ̆m akâu sư kơdih.

⁵ Kơplah noh bơngai chĕp tơmam Sôl tơblah 'bôh Sôl lôch kư̆m iŏk đao glơ̆m akâu sư kơdih mơ̆n kư̆m lôch hơdai hăm Sôl,

⁶ Thoi noh lăm năr noh pêng 'nu kon drŏ-nglo Sôl, bơngai mă chĕp tơmam tơblah Sôl păng đĭ-đăng lu bơngai kiơ̆ sư kư̆m wăng lôch hơdai.

⁷ Kơplah lu bơngai Isơrael oei pah to pŭng-lŭng păng pah to Krong Jôrđăn, 'bôh lu linh bơngai Isơrael kơdâu ôn, Sôl păng pêng 'nu kon drŏ-nglo sư lôch boih, na achăng lê̆ lu pơlei sư kơdih na năm kơdâu ôn; na lu kon pơlei bơngai Philistin truh iŏk oei tơ lăm lu pơlei noh.

⁸ Năr đơ̆ng rŏng, kon pơlei Philistin truh năm chă pơpơih lu bơngai lôch, 'bôh Sôl păng pêng 'nu kon drŏ-nglo sư lôch jơ'mrơh kơpal kông Gilbôa.

⁹ Lu sư kăt kơ̆l Sôl iŏk tơmam tơblah sư păng roi tơbăt ăn tơdrong 'lơ̆ng âu kơ jơ̆p-jang lăm dêh kon pơlei bơngai Philistin, lăm lu hnam kơkuh kơ rup yang lu sư păng lăm đĭ-đăng kon pơlei pơla sư.

¹⁰ Lu sư 'măn lê̆ đao Sôl tơ lăm hnam kơkuh kơ Yang Astarôt păng atol atâu sư 'bơ̆t dur pơlei Bêtsan.

¹¹ Lu kon pơlei Jabes mă oei tơ Gileat băt kơ tơdrong mă kon pơlei Philistin pơm kơ Sôl.

¹² Đĭ-đăng lu bơngai nuih pran iung năm kơmăng iŏk atâu akâu Sôl păng kon drŏ-nglo sư đơ̆ng dur pơlei Bêtsan, đơ̆ng noh lu sư wih brŏk tơ Jabes soh pơđĭ lu akâu Sôl păng pêng 'nu kon drŏ-nglo sư tơ noh,

¹³ iŏk kơting lu sư 'bŭ ala tơm 'long prai tơ Jabes păng ơ̆t kơ sŏng sa lăm tơpơh năr.