I Sam 30 - Sơ̆p Hlabơar Nơ̆r 'Bok Kei-Dei

Đawit blah pơrăm bơngai Amalek

¹ Đawit hăm lu bơngai kiơ̆ sư truh tơ Siklak, lăm năr mă pêng kon pơlei Amalek truh boih tơ gah gơal kơ pơlei Siklak, blah soh pơđĭ pơrăm pơlei noh;

² lu sư rôp lu bơngai drŏ-kăn păng đĭ-đăng lu 'lơ̆p 'lŏ mă oei lăm noh. Lu sư ưh kơ đei pơlôch minh 'nu bơngai bu, sư chông ba pơđĭ pơm bơnă.

³ Wă Đawit hăm lu bơngai kiơ̆ sư truh mơ̆t lăm pơlei 'bôh pơlei ŭnh sa đĭ boih, kon akăn lu sư rôp chĕp ba pơm bơnă.

⁴ Na Đawit hăm lu bơngai kiơ̆ sư nhơ̆m hmoi, nhơ̆m ôr dĭng pă kĕ kơ hmoi.

⁵ 'Bar 'nu akăn Đawit kư̆m rôp chĕp ba pơm bơnă mơ̆n, Ahinôam mă đơ̆ng Jêsreel păng Abigail đêl akăn Nabal mă oei tơ Karmel.

⁶ Đawit đei tơdrong hli krưp tih dêh yua kơ lu bơngai kiơ̆ sư wă klơ̆m sư păng tơmo. Đĭ-đăng kơ lu linh kiơ̆ sư đei jơhngơ̆m ơh sơ'ngon dêh, yua kơ hiong kon drŏ-nglo kon drŏ-kăn lu sư, mă-lei Đawit đei jơhngơ̆m nuih pran đơ̆ng Kră Yang 'Bok Kei-Dei ăn kơ sư.

⁷ Na Đawit khan kơ 'bok soi Abiathar kon Ahimelek: Inh apinh ih chĕp ba ăn kơ inh êphot tơ âu: Abiathar chĕp ba êphot ăn kơ Đawit,

⁸ Đawit krao apinh Kră Yang: Inh hăm gơh druh 'moi bơngai blah tơtông tơgar iŏk 'nâu ưh? Inh druh 'moi lu sư hăm tam? Kră Yang khan: Năm bĕ druh 'moi lu sư, tơpă ih druh 'moi gô tam păng dŏng pơklaih đĭ-đăng bơngai đêl lu sư rôp.

⁹ Đawit lĕch năm hăm tơdrâu-hrĕng 'nu kiơ̆ sư. Truh 'bơ̆t Thong Bêsôr, lu sư lap, đei 'bar-hrĕng 'nu pơdơh 'bơ̆t noh.

¹⁰ Mă-lei Đawit hăm puăn-hrĕng 'nu bơngai kiơ̆ sư oei yak năm; gah 'bar-hrĕng 'nu bơngai noh pơdơh kơ lap, yua kơ pă kĕ boih, ưh kơ kĕ yak hlôi kơ thong boih.

¹¹ Linh Đawit tơ'bơ̆p minh 'nu bơngai Êyiptơ lăm chŭn, chông ba năm truh tơ Đawit, ăn kơ bơngai 'nâu 'bĕng sa đak nhă;

¹² kư̆m ăn kơ sư minh tơpei 'bĕng plei hơra kro, păng 'bar hơie plei hơmu kro. Sư sa, na đei jơhngơ̆m pran dơ̆ng; yua kơlăm pêng năr pêng măng sư ưh kơ đei sa kiơ, kư̆m ưh kơ đei nhă kiơ.

¹³ Đawit jet bơngai ei: Ih oei hăm bu? Păng ih đơ̆ng yơ? Sư tơl khan. Inh minh 'nu bơngai Êyiptơ, pơm đĭch đam bơngai Amalek, yŏng tơ'ngla inh achăng lê̆ inh pêng năr boih, yua kơ inh bơlŏ.

¹⁴ Lu nhôn năm blah tơgar tơ teh goh gơal kon pơlei Kêrêthit, lăm dêh Juđa păng kư̆m năm blah tơgar tơ teh gah gơal kơ Kalep lu nhôn soh pơđĭ Siklak.

¹⁵ Đawit jet: Ih hăm wă 'maih chông ba lu nhôn năm truh tơ lu đe noh? Sư tơl khan: Ih athei pao anăn Kră Yang 'Bok Kei-Dei 'mơ̆i na pơkă hăm inh, ih 'nĕ kơ pơlôch inh păng kư̆m 'nĕ kơ jao inh kơ yŏng tơ'ngla inh, na inh gô chông ba ih năm truh tơ lu bơngai tơtông tơgar noh.

¹⁶ Bơngai Êyiptơ chông ba lu sư năm truh. Lu sư 'bôh kon pơlei Amalek jơ̆p-jang kơ teh, et sa, chơt hiôk, yua kơ lu sư tơgar iŏk lơ tơmam đơ̆ng lăm dêh Philistin păng lăm dêh Juđa.

¹⁷ Đawit blah lu sư đơ̆ng pơgê hrôih năr 'noh truh tơ kơsơ̆ năr đơ̆ng rŏng; na ưh kơ đei minh 'nu bơngai bu lĕch hlôi. Lăp puăn-hrĕng 'nu bơngai tơdăm mơlôh gơh klaih hao aseh lăk-đa kơdâu ôn.

¹⁸ Đawit dŏng pơklaih đĭ-đăng bơngai đêl bơngai Amalek blah rôp tơgar iŏk boih păng kư̆m dŏng pơklaih 'bar 'nu akăn sư hai.

¹⁹ Ưh kơ đei hiong minh 'nu bơngai bu, 'lơ̆p dah 'lŏ drŏ-nglo dah drŏ-kăn, dah mă minh mŭk tơmam yă kiơ đêl kon pơlei Amalek tơgar iŏk, Đawit brŏk chĕp ba pơdrâu đĭ-đăng dôm tơmam noh,

²⁰ Đawit kư̆m rôp chĕp ba dơ̆ng lu rơmo păng triu, lu linh kiơ̆ Đawit năm adrol puh ba kơ lu sem dơrong 'nâu, păng pơkă khan: 'Nâu đơ̆ng Đawit blah pơdrâu iŏk.

²¹ Đawit brŏk truh tơ anih lu 'bar-hrĕng 'nu bơngai mă pơdơh kơ lap, ưh pă kĕ kiơ̆ lu sư, 'bơ̆t Thong Bêsôr, 'bar-hrĕng 'nu bơngai 'noh năm sơng Đawit păng lu bơngai linh kiơ̆ sư; Đawit năm jê̆ na jet lu sư hăm oei liĕm akâu ưh.

²² Mă-lei đei lu bơngai kơnê̆ mă kiơ̆ Đawit pơma rơ̆n khan: Yua kơ lu sư ưh kơ năm hơdai hăm lu bơ̆n, lu bơ̆n 'nĕ kơ asong lu sư đêl mŭk tơmam đêl mă lu bơ̆n blah tơgar iŏk, pơdrâu ăn kon akăn kơ lu sư đĕch!

²³ Mă-lei Đawit tơl: Ơ lu 'nhŏng oh, 'nĕ kơ pơm thoi noh gah tơmam mă Kră Yang hlôi asong ăn kơ lu bơ̆n; thoi yơ Sư wei rong bơ̆n hiôk-hian, pơjao ăn lăm ti lu bơ̆n lu linh năm blah bơ̆n.

²⁴ Ưh kơ đei bơngai bu mơ̆ng kiơ̆ nơ̆r iĕm khan noh ôh. Tơmam bơngai năm tơblah hăm tơmam lu bơngai răp gô wei-lăng tơmam athei lei-lăi đĕch; lu iĕm athei klah asong thoi noh trŏ.

²⁵ Đơ̆ng năr noh, Đawit pơjing dôm tơdrong noh, pơm tơdrong juăt lăm lu bơngai Isơrael kư̆m oei đei truh tơ dang ei.

²⁶ Đawit wih brŏk tơ Siklak păng asong ăn tơmam kơ lu đe kră lăm dêh Juđa păng kư̆m gơih nơ̆r pơma khan: Gơih ăn kơ iĕm tơmam âu. 'Nâu jơ̆ tơmam asong ăn kơ lu iĕm đơ̆ng tơmam bơ̆n blah tơgar iŏk đơ̆ng lu bơngai mă ayăt kơ Kră Yang.

²⁷ Đawit asong ăn kơ lu bơngai kră mă oei tơ Bethel, Ramôt tơ Negep păng Jatir.

²⁸ An kơ lu bơngai kră mă oei tơ Arôe, Sipmôt, Êthemôa,

²⁹ asong ăn kơ lu bơngai kră mă oei tơ Rakal păng mă oei lăm lu pơlei kon pơlei bơngai Jêrahmêel, ăn kơ lu bơngai kră oei lăm lu pơlei Kênit,

³⁰ asong ăn kơ lu bơngai kră oei tơ Horma, Bortasan, Athach,

³¹ Hêbrôn păng asong ăn jơ̆p-jang dêh mă đêl Đawit hăm lu bơngai linh kiơ̆ sư chă drong găn.