I Sam 3 - Sơ̆p Hlabơar Nơ̆r 'Bok Kei-Dei

Kră Yang krao Samuel

¹ Samuel oei 'lơ̆p sư bơ̆jang kơ Kră Yang 'bơ̆t anăp Hêli. Kơplah noh nơ̆r, Kră Yang mă pơma dơnuh anăp mă hui kơđei, kư̆m hui kơ đei ăn kơ kon bơngai 'bôh tơdrong kiơ.

² Hêli măt ưh pă bang, pă 'bôh nhen, lăm minh măng ei, sư 'bĭch tơ anih sư juăt kơ 'bĭch tep.

³ Ŭnh kơđeng Kră Yang 'Bok Kei-Dei ưh tam mă păt, Samuel 'bĭch tep lăm hnam akŭm Kră Yang tơ anih đe dan hom pơgơ̆p Kră Yang 'Bok Kei-Dei.

⁴ Kră Yang krao Samuel; na sư tơl: Đei inh tơ âu!

⁵ Sư kơdâu năm tơ Hêli khan: Đei inh tơ âu, ih krao inh ah. Hêli khan: Inh ưh kơ đei krao ôh, năm tep dơ̆ng bĕ. Samuel năm tep dơ̆ng.

⁶ Kră Yang krao dơ̆ng: Ơ Samuel! Samuel gruih iung, năm tơ Hêli khan: Đei inh tơ âu, ih krao inh ah. Hêli tơl, ơ dăm, inh ưh kơ đei krao ih ôh, năm tep dơ̆ng wăi.

⁷ Kơplah noh, Samuel tam mă băt kơ nơ̆r Kră Yang; nơ̆r Kră Yang tam mă pơma tơklă 'bơ̆t anăp sư tơ'bôh kơ sư.

⁸ Kră Yang krao đơ̆ng Samuel wơ̆t mă pêng; sư gruih iung năm tơ Hêli, na khan: Ih krao inh ah? Kơplah noh Hêli băt kơ Kră Yang krao bơngai hơ'lơ̆p noh.

⁹ Na Hêli khan kơ Samuel: Ih năm tep wăi. Tơdah đei nơ̆r krao ih dơ̆ng, ih tơl: Ơ Kră Yang, apinh Ih khan bĕ, Inh đĭch Ih oei mơ̆ng! Samuel năm tep tơ anih sư dơ̆ng.

¹⁰ Kră Yang năm tơ noh, Sư krao dơ̆ng thoi adrol ki: Ơ Samuel! Ơ Samuel! Samuel drơ̆ng Apinh Ih bơtho khan bĕ, đĭch đam ih oei mơ̆ng!

¹¹ Kră Yang khan kơ Samuel: Inh wă pơm tơ lăm Isơrael minh tơdrong, bơngai bu mơ̆ng 'bar pah đon sư gô hrơ̆ng hreng.

¹² Năr noh, Inh gô pơm 'blep dôm tơdrong thoi inh đei khan lê̆ adrol boih gah hnam dơnŏ Hêli: Đơ̆ng blŭng-a truh tơ tôch.

¹³ Inh đei khan lê̆ adrol bơih Inh gô phak hnam dơnŏ sư ling-lang, yua kơ sư băt boih bre kon drŏ-nglo sư pơm yoch pơjăm Kră Yang 'Bok Kei-Dei, mă-lei sư ưh kơ găn bre sư.

¹⁴ Thoi noh, inh đei pơkă sĭt tơdrong yoch hnam dơnŏ Hêli ưh kơ gơh huai iŏk, mă khan hăm tơmam soi hăm sem dah hăm tơmam soi phe 'ba.

¹⁵ Samuel tep dĭng truh hơdah, đơ̆ng noh sư pơih 'măng hnam akŭm Kră Yang. Sư hli na ưh kơ pơ̆n roi dôm tơdrong tơ'bôh kơ sư noh kơ Hêli.

¹⁶ Mă-lei Hêli krao Samuel: Ơ Samuel, kon dăm năm tơ âu, sư tơl: Đei inh tơ âu.

¹⁷ Hêli jet: Kră Yang đei pơma bơtho tơdrong kiơ hăm ih? Ih 'nĕ ôn kơ inh ôh. Tơdah ih ôn lăm dôm nơ̆r mă Kră Yang đei pơma dơnuh bơtho hăm ih, apinh Kră Yang 'Bok Kei-Dei phak ih mă trăp.

¹⁸ Na Samuel roi đĭ dôm tơdrong, ưh kơ đei ôn kiơ hăm sư. Hêli tơl khan: Sư bơih Kră Yang, apinh Sư pơm dôm tơdrong thoi Sư lăp đon!

¹⁹ Samuel wơ̆ 'lŏ gơh hơgei, Kră Yang oei hơdai sư: Kră Yang ưh kơ đei lê̆ minh nơ̆r hơyơ đơ̆ng Sư mă đei pơma boih. Sư gô pơm keh.

²⁰ Đơ̆ng Đan truh tơ Bêrsêba, đĭ-đăng bơngai Isơrael băt ngăl kơ Samuel jing 'bok khan lê̆ adrol tơpăt đơ̆ng Kră Yang ăn.

²¹ Kră Yang jur tơ'bôh dơ̆ng akâu Sư tơ kông Silơ, tơ kông Silơ Kră Yang tơ'bôh akâu sư kơdih, jur pơma dơnuh hăm Samuel.