I Sam 28 - Sơ̆p Hlabơar Nơ̆r 'Bok Kei-Dei

Sôl păng pơjâu oei tơ Ênđôr

¹ Kơplah ei, kon pơlei bơngai Philistin akŭm pơpôi jơhngơ̆m pran wă năm tơblah hăm bơngai Isơrael. Akis khan kơ Đawit: Ih athei băt ih păng lu bơngai kiơ̆ ih gô lĕch hơdai hăm inh năm tơblah.

² Đawit tơl nơ̆r Akis: Pơtao gô 'bôh dôm tơdrong đĭch đam pơtao pơm. Akis khan kơ Đawit dơ̆ng: Na inh gô iŏk ih pơm đam kơiĕng inh ling-lang.

³ Kơplah noh, Samuel lôch boih đĭ lu bơngai Isơrael nhơ̆m hmoi kơ sư păng 'bŭ sư tơ Rama, pơlei sư kơdih. Sôl puh tơweh đĭ lu bơngai pơm pơjâu.

⁴ Thoi noh kon pơlei bơngai Philistin akŭm băl pơm kơđông tơ Sunem,a gah Sôl kư̆m krao akŭm đĭ-đăng lu bơngai Isơrael păng lu sư kư̆m pơm kơđông oei tơ Gilbôa.

⁵ Sôl 'bôh lu linh lu bơngai Philistin, na hli păng lăm jơhngơ̆m tơtơ̆ dêh.

⁶ Sôl krao khan kơ Kră Yang; mă-lei Kră Yang ưh kơ đei tơl nơ̆r sư, lăm tơdrong apo, dah đơ̆ng Urim dah đơ̆ng 'bơ̆r lu bơngai khan lê̆ adrol.

⁷ Sôl khan kơ lu đĭch đam sư: Chơchă kơ inh minh 'nu bơngai drŏ-kăn pơjâu inh gô năm apinh sư, lu đĭch đam tơl: Tơ Ênđôr đei minh 'nu bơngai drŏ-kăn pơjâu.

⁸ Sôl sư pơm wă kơ đe ưh kơnăl hrŭk ao nai, năm chông ba 'bar 'nu bơngai kiơ̆, năm truh tơ hnam bơngai drŏ-kăn kơmăng, Sôl khan: Apinh ih krao tơgŭm ăn kơ inh tơdrong wă truh păng krao bơhngol bơngai lôch mă inh gô roi kơ ih.

⁹ Bơngai drŏ-kăn tơl: Ih băt hơđăl boih dôm tơdrong Sôl pơm, sư pơlôch pơđĭ lu bơngai mă pơm pơjâu. Na, liơ ih pơm hơđong wă pơlôch inh?

¹⁰ Sôl pao anăn Kră Yang pơkă hăm bơngai drŏ-kăn: Inh pao anăn Kră Yang mă arih ling-lang pơkă, ih ưh kơ đei yoch kiơ lăm tơdrong jang 'nâu.

¹¹ Bơngai drŏ-kăn jet: Inh krao bơngai bu 'bơ̆t anăp ih? Sôl tơl: Krao Samuel tŏk tơ âu.

¹² Wă bơngai drŏ-kăn noh 'bôh Samuel, na ôr hơdrăi 'bơ̆r re dêh pơma khan kơ Sôl: Yua kơ kiơ ih hơlĕnh kơ inh? Ih Sôl!

¹³ Sôl pơlung sư: 'Nĕ kơ hli; roi ăn kơ inh 'bôh kiơ? Sư tơl: Inh 'bôh minh 'nu yang lĕch đơ̆ng teh,

¹⁴ Sôl apinh ih 'bôh hơbŏ sư liơ? Bơngai drŏ-kăn tơl: Inh 'bôh minh 'nu 'bok kră hrŭk ao tai, Sôl băt noh Samuel, na kŭp kơ̆l drap tơ teh păng kơkuh.

¹⁵ Samuel jet Sôl: Yua kơ kiơ ih pơhrơ inh krao inh tŏk wă pơm kiơ? Sôl tơl: Inh đei tơdrong truh tih, yua kơ lu bơngai Philistin tơblah păng inh. Na Kră Yang 'Bok Kei-Dei achăng lê̆ inh, Sư ưh kơ tơl nơ̆r inh dơ̆ng yua 'bơ̆r lu bơngai khan lê̆ adrol, dah đơ̆ng apo. Thoi noh na inh khŏm krao ih tŏk, wă kơ ih roi tơ'bôh ăn kơ inh băt inh athei pơm kiơ.

¹⁶ Samuel tơl: Yua kơ kiơ ih krao inh, yua kơ Kră Yang achăng lê̆ ih boih na jing ayăt kơ ih?

¹⁷ Kră Yang pơm kiơ̆ thoi nơ̆r sư đei khan boih. Kră Yang pơdrâu iŏk teh đak đơ̆ng tơpang ti ih na ăn kơ bơngai nai noh jơ̆ Đawit.

¹⁸ Ih ưh kơ chu kiơ̆ nơ̆r kư̆m ưh kơ pơm kiơ̆ phak lu bơngai Amalek kiơ̆ thoi tơdrong Kră Yang; hil mĭl thoi noh năr 'nâu Kră Yang pơm kơ ih thoi âu,

¹⁹ Kră Yang gô jao lu bơngai Isơrael păng ih lăm tơpang ti kon pơlei bơngai Philistin; năr dơning ih păng lu kon drŏ-nglo ih gô oei hăm inh. Kră Yang kư̆m gô jao lu linh bơngai Isơrael lăm tơpang ti kon pơlei bơngai Philistin.

²⁰ Sôl pơ̆k kơmŭ brum jơ'mrơh tơ teh, yua kơ dôm nơ̆r Samuel pơm kơ sư hli tơrơ; na mah kơtĕch jơhngơ̆m hloi, lăm năr noh păng măng noh sư ưh kơ đei sa kiơ.

²¹ Na, bơngai drŏ-kăn noh năm jê̆ Sôl, 'bôh sư hli, na khan: 'Nâu inh đĭch đam ih chu kiơ̆ nơ̆r ih. Inh jao tơdrong arih inh chu kiơ̆ dôm nơ̆r ih bơtho,

²² Dang ei ih kư̆m athei mơ̆ng bĕ dôm nơ̆r đĭch đam ih 'nâu: Inh hơmet dan 'bơ̆t anăp ih tơmam sa, ih sa bĕ wă kơ đei jơhngơ̆m pran, adrol kơ wă yak năm.

²³ Sôl sơngah khan: Inh ưh kơ sa, mă-lei lu đĭch đam sư păng bơngai drŏ-kăn adrin pơlung sư dĭng sư chu kiơ̆ nơ̆r athei; sư iung đơ̆ng teh tŏk hơ-oei kơpal giơng.

²⁴ Bơngai drŏ-kăn ei đei minh pơm kon rơmo bek, hăt hot 'bet pơlôch rơmo noh, na iŏk tơpŭng pơm 'bĕng ưh kơ đei 'buih pông.

²⁵ Hơmet 'bơ̆t anăp Sôl păng lu đĭch đam sư; đang kơ sa lu sư iung păng yak năm lăm măng noh hloi.