I Sam 20 - Sơ̆p Hlabơar Nơ̆r 'Bok Kei-Dei

Đawit hăm Jônathan pơgơ̆p

¹ Đawit klĕnh đơ̆ng Naiôt lăm pơlei Rama, năm tơ Jônathan, na apinh Jônathan: Inh đei pơm yoch kiơ, tơdrong kơnê̆ kiơ? Inh pơm tơdrong yoch kiơ hăm 'bă ih, na mă sư chă đon wă pơlôch inh?

² Jônathan tơl sư: Ưh, ih huay kơ lôch ôh. 'Bă inh ưh kơ đei pơm kiơ, mă tơdrong tih dah tơdrong iĕ, khan ưh kơ roi kơ inh. Na 'bă inh wă ôn kơ inh tơdrong 'nâu ah? Ưh kơ đei ôh.

³ Mă-lei Đawit khan hơđăl: 'Bă ih băt hơđăl ih 'mêm kơ inh, na đei pơma khan: 'Nĕ kơ roi ăn kơ Jônathan băt, kơnh sư hơ'ngon inh pao anăn Kră Yang mă arih ling-lang păng tơdrong arih ih na pơkă: Lăp minh yak đĕch sơlam inh hăm tơdrong lôch.

⁴ Jônathan tơl Đawit: Tơdah ih wă kơ inh pơm kiơ, inh gô pơm ăn kơ ih.

⁵ Đawit khan: Dơning năr mă mônh, lăm khei plơ̆ng inh juăt et sa hơdai hăm pơtao, mă-lei lê̆ inh năm ôn lăm tơmăn glă truh tơ kơsơ̆ năr mă pêng.

⁶ Tơdah 'bă ih 'bôh inh krŭl, na athei roi ăn kơ sư: Đawit apinh ih athei song sư brŏk tơ pơlei Betlehem, pơlei sư kơdih, yua kơ tơ noh đĭ hnam sư juăt kơ pơyơ̆r tơmam soi rim sơnăm.

⁷ Tơdah sư tơl: 'Lơ̆ng, lei inh âu đĭch đam ih gô gơh hiôk, mă-lei tơdah sư hil blĕk, 'noh ih băt kơ sư wă pơlôch inh.

⁸ Apinh ih răk nơ̆r ih pơkă hăm inh đĭch đam ih, yua kơ ih đei pơkă anăn Kră Yang mă pơgơ̆p hăm đĭch đam ih. Dah inh đei yoch kiơ, apinh ih jah pơlôch inh bĕ; ngĕ kơ kiơ ba inh tơ 'bă ih?

⁹ Jônathan tơl: 'Nĕ kơ tơchĕng kư̆ kă thoi noh! Tơdah inh băt tơpă kơ 'bă inh chă đon wă pơlôch ih, lei inh kư̆m ưh kơ roi kơ ih hă?

¹⁰ Đawit apinh: Tơdah 'bă ih hil blĕk tơl ih, lei bu roi kơ inh băt?

¹¹ Jônathan tơl: Bĕ, ba năm tơ tơmăn glă. Bre sư lĕch năm tơ tơmăn glă.

¹² Jônathan khan: Đei Kră Yang 'Bok Kei-Dei lu bơngai Isơrael pơm kơdranh! Dơning dah dơmônh, kư̆m lăm jơ 'nâu inh gô jet lăng 'bă inh, tơdah đei tơdrong kiơ 'lơ̆ng kơ ih, inh wơh bơngai năm roi ăn kơ ih băt.

¹³ Tơdah 'bă inh khŏm pơm wă pơrăm ih, inh gô roi ăn kơ ih băt, athei ih năm mă hiôk-hian, dah ưh, apinh Kră Yang phak inh mă trăp! Hơpơi apinh Kră Yang oei hơdai ih, kư̆m thoi Sư oei hơdai boih hăm 'bă inh.

¹⁴ Kơplah noh dah inh oei arih hăm apinh ih pơm 'lơ̆ng 'mêm mơnat dơ̆ng kơ inh. Wă kơ Inh lôch huay kơ,

¹⁵ Apinh ih oei wei tơdrong 'mêm ih hăm lu kon sâu nhôn ling-lang mă khan Kră Yang pơlôch pơđĭ lu bơngai ayăt kơ ih lăm kơpal teh âu.

¹⁶ Na, Jônathan pơgơ̆p hăm Đawit păng hnam dơnŏ sư. Apinh Kră Yang phak lu bơngai ayăt kơ Đawit. Dah lu sư ưh kơ 'blŏk kơ tơdrong pơgơ̆p ba.

¹⁷ Jônathan 'mêm kơ Đawit thoi 'mêm kơ akâu sư kơdih, na athei Đawit pơkă. Kŭm 'mêm kơ sư.

¹⁸ Jônathan khan dơ̆ng: Dơning năr mă mônh khei plơ̆ng đe ei 'bôh ih krŭl yua kơ 'bơ̆t anih ih ưh kơ đei bơngai oei.

¹⁹ Năr mă pêng wă khan năr dơmônh inh gô truh tơ anih ih ôn adrol ki, na gô lăng 'bơ̆t cheng tơmo Êse!

²⁰ Inh gô prah pêng găr 'brơ̆m hră tơklă tơmo tih noh. Thoi đe prah pơđam.

²¹ Đơ̆ng noh, inh gô wơh đĭch đam inh na khan kơ sư: Năm dônh lu 'brơ̆m hră to, tơdah inh khan kơ sư: To 'brơ̆m hră pah âu e, iŏk wăi, noh wă khan hiôk hiang na ih athei lĕch: Kră Yang arih ling-lang gô pơm kơdranh. Inh khan kơ ih, ưh kơ đei hli kiơ ôh!

²² Mă-lei tơdah inh khan kơ đĭch đam inh: To, 'brơ̆m hră pah to ataih 'biơ̆, kơplah noh ih athei ôn yua kơ Kră Yang wă kơ ih năm.

²³ Gah nơ̆r ba hlôi pơkă pơkăm boih, hơpơi kơ Kră Yang pơm kơdranh tŏk-bŏk ih hăm inh truh ning-mônh ling-lang.

²⁴ Thoi noh, Đawit ôn lăm tơmăn glă truh tơ giĕng năr mônh, khei plơ̆ng, pơtao hơ-oei wă sŏng sa;

²⁵ Pơtao hơ-oei 'bơ̆t anih juăt kơ hơ-oei jê̆ tơnăr Jônathan muh măt tơklă 'bă sư, na Apner hơ-oei cheng Sôl; 'bơ̆t anih Đawit ưh kơ đei bu hoh-hoy.

²⁶ Năr noh, Sôl ưh kơ đei pơma kiơ, tơchĕng khan băt đei tơdrong kiơ truh kơ Đawit boih 'nâu! Hơbŏ sư ưh kơ rơgoh, đei tơdrong 'mê̆-'mach boih 'nâu.

²⁷ Mă-lei năr đơ̆ng rŏng, năr 'bar anih Đawit kư̆m ưh kơ đei bu dơ̆ng. Sôl khan kơ Jônathan kon drŏ-nglo sư: Yua kơ kiơ kon drŏ-nglo Jese ưh kơ năm sŏng sa hơdai năr brei păng năr 'nâu hloi?

²⁸ Jônathan tơl Sôl khan: Đawit apinh inh asong ăn kơ sư brŏk tơ pơlei Betlehem.

²⁹ Lê̆ inh năm; yua kơ hnam nhôn đei tơdrong pơyơ̆r tơmam soi lăm pơlei, na 'nhŏng inh pơkă kơ inh athei năm tơ noh. Dah inh đei mơnat 'bơ̆t anăp ih, apinh ăn kơ inh năm ngôi tơ lu 'nhŏng oh inh. Yua kơ thoi noh sư ưh kơ gơh truh sŏng sa hơdai.

³⁰ Na, Sôl khan kơ Jônathan: Ơ kon drŏ-nglo hơlĕnh păng ayăt plơ̆ plĕch kơ inh, inh băt kơ e pơm buăl juăt hăm kon drŏ-nglo Jese, wă pơm ăn kơ e mơlâu đĕch păng pơm ăn kơ mĕ e kư̆m mơlâu mơ̆n!

³¹ Dah kon drŏ-nglo Jese arih sot lăm kơpal teh âu dĭng truh dang yơ, na e păng teh đak e kư̆m ưh kơ đei dang noh mơ̆n; dang ei hloi, chông ba sư tơ inh âu; sư trŏ kơ lôch.

³² Jônathan tơl, 'bă sư: Liơ wă pơlôch sư? Sư pơm glăi kiơ?

³³ Sôl hrang dao wă pơlôch; Jônathan băt tơpă kơ 'bă sư wă pơlôch Đawit.

³⁴ Jônathan iung weh tơ nai, blĕk dêh na lăm năr 'bar khei plơ̆ng noh na ưh kơ đei sa kiơ, hơ'ngon ưh kơ hiôk kơ Đawit, yua kơ 'bă sư pơjăm Đawit.

³⁵ Pơgê đơ̆ng rŏng, Jônathan lĕch năm tơ tơmăn glă tơ anih pơkă hăm Đawit; đei minh 'nu đĭch tơdăm kiơ̆ sư.

³⁶ Sư athei bơngai noh: E năm dônh lu 'brơ̆m hră mă đêl inh prah, bơngai đĭch noh kơdâu. Jônathan prah minh găr 'brơ̆m hră hlôi kơ sư.

³⁷ Na bơngai đĭch noh năm truh tơ anih 'brơ̆m hră đêl Jônathan prah, na Jônathan krao khan: 'Brơ̆m hră pah to kơ e ataih 'biơ̆.

³⁸ Jônathan krao dơ̆ng bơngai đĭch noh: Năm mă tĕnh, 'nĕ kơ pơhiơ̆! Bơngai đĭch noh dônh 'brơ̆m hră, wơ̆t hơlơ̆k tơ tơ'ngla sư dơ̆ng.

³⁹ Na đĭch sư ưh kơ băt kơ kiơ ôh, mă-lei Đawit hăm Jônathan đei băt.

⁴⁰ Jônathan ăn kơ đĭch sư hră păng khan: Năm bĕ, chĕp ba brŏk tơ pơlei.

⁴¹ Hlôi kơ đĭch sư năm boih, Đawit iung đơ̆ng gah gơal kơ tơmo sơtơ̆p kŭl-tăng tơ teh păng kơkuh kơ Jônathan pêng wơ̆t, na bre sư tơkuăr chŭm păng nhơ̆m, Đawit nhơ̆m đunh hloh.

⁴² Jônathan pơma dơnuh hăm Đawit: Yak năm bĕ kơ ih mă 'lơ̆ng; lu bơ̆n yua anăn Kră Yang pơgơ̆p nơ̆r pơkă băl; Kră Yang gô pơm kơdranh sơlam tŏk-bŏk inh hăm ih tŏk-bŏk adrĕch adrung inh păng adrĕch adrung ih dĭng truh ning-mônh ling-lang.

⁴³ Thoi noh, Đawit iung yak năm, gah Jônathan brŏk mơ̆t lăm pơlei.