I Sam 14 - Sơ̆p Hlabơar Nơ̆r 'Bok Kei-Dei

Jônathan blah bơngai Philistin

¹ Lăm minh năr 'nei, Jônathan, kon drŏ-nglo Sôl, khan kơ bơngai chĕp tơmam tơblah sư Bĕ ba, năm tơ kơđông Philistin, oei tơ gah to. Mă-lei sư ưh kơ roi kơ 'bă sư băt.

² Kơplah 'noh, Sôl oei tơ 'nguaih kơ pơlei Gibêah, ala kơ tơm 'long plei gărnăt, tơ pơlei Migrôn, na lu linh kiơ̆ sư dang tơdrâu-hrĕng 'nu.

³ Ahija, kon drŏ-nglo Ahitup, 'nhŏng Ikabôt, kon drŏ-nglo Phinêhas, kon Hêli, pơm 'bok soi kơ Kră Yang tơ Silô kon pơlei ưh kơ băt kơ Jônathan năm.

⁴ Jônathan adrin năm wă kơ truh tơ kơđông Philistin, na athei năm rok trong kuĕl sơlam 'bar pah kông tơmo gah âu anăn kông Bôses,a na gah to anăn kông Sêne.b

⁵ Kông kơjung tơ gah yă-nơ̆m, tơklă pơlei Mĭkmas, na kông tơ gah gơal, tơklă pơlei Gêba.

⁶ Jônathan khan hăm bơngai chĕp tơmam tơblah sư: Bĕ ba khŏm năm truh tơ kơđông lu bơngai ưh kơ kăt tơdra akar 'noh.c Băt Kră Yang gô tơgŭm kơ ba; ưh kơ đei tơdrong kiơ găn Kră Yang ăn kơ jei bơ̆n mă bơ̆n tŏ sĕt dah lơ.

⁷ Bơngai chĕp tơmam tơblah sư khan: Pơm bĕ tơdrong ih hơpơi, inh gô kiơ̆ ih tơ 'noh.

⁸ Jônathan khan dơ̆ng: 'Nâu, ba athei năm tơ lu bơngai 'noh, tơ'bôh akâu ba ăn kơ lu sư.

⁹ Tơdah lu sư khan: Pơ̆ng tơ noh gô nhôn năm tơ măr iĕm, lei ba gô dơ̆ng 'bơ̆t anih ba ưh kơ năm tơ lu sư.

¹⁰ Na dah lu sư pơma khan: Năm tơ nhôn bĕ; lei ba gô năm; noh băt tơdra kơ Kră Yang gô pơjao lu sư tơ lăm ti ba boih.

¹¹ Thoi noh na măr sư năm tơ kơđông bơngai Philistin, tơ'bôh akâu bre sư. Bơngai Philistin pơma tơduă: Lăng to lu bơngai Hêbrơ lĕch đơ̆ng hơgơp tơmo anih mă lu sư ôn.

¹² Linh lăm kơđông pơma kơ Jônathan hăm bơngai chĕp tơmam tơblah sư 'noh khan: Năm tơ âu bĕ, nhôn tơ'bôh ăn kơ măr iĕm, băt tơdrong Jônathan pơma hăm bơngai chĕp tơmam tơblah sư khan: Kiơ̆ mă jê̆ inh, yua kơ Kră Yang pơjao lu sư tơ lăm ti bơngai Isơrael boih.

¹³ Jônathan yua jơ̆ng ti sư hao tŏk tơ kơpal păng bơngai chĕp tơmam tơblah sư tŏk kiơ̆ Jônathan teh bơngai Philistin pơ̆k 'bơ̆t anăp Jônathan păng bơngai chĕp tơmam tơblah sư pơlôch lu sư đĭ.

¹⁴ 'Bơ̆t tơblah 'măng blŭng 'nâu, bre Jônathan pơlôch dang 'bar-jĭt 'nu, lăm anih teh să dang pêng-hrĕng tơdrâu-jĭt hlŏk wơ̆t tor.

¹⁵ Đĭ-đăng linh lăm kơđông dah tơ 'nguaih hli tơrơ ngăl. Linh lăm lu kơđông nai păng lu bơngai chă blah tơgar iŏk kư̆m hli tơrơ; đei teh tơdrŏ, noh rai pơm kơ đe hli tơrơ noh đơ̆ng Kră Yang 'Bok Kei-Dei.

¹⁶ Lu linh gak pơtao Sôl tơ pơlei Gibêah lăm dêh Bênjamin, dai 'bôh kon pơlei Philistin kơdâu tơklah tơklang bơsuơ̆t bơsuăt.

¹⁷ Sôl khan kơ lu linh oei hơdai sư: Chă lăng lăng đe bu mă weh đơ̆ng anih bơ̆n, lu sư chơchă lăng lăng 'bôh ưh kơ tơm, bre Jônathan hăm bơngai chĕp tơmam tơblah sư.

¹⁸ Sôl khan kơ Ahija 'bok soi: Chĕp ba Hom Pơgơ̆p Kră Yang 'Bok Kei-Dei tơ âu. Kơplah noh Hom Pơgơ̆p Kră Yang 'Bok Kei-Dei oei tơ noh hăm bơngai Isơrael.

¹⁹ Lăm kơplah Sôl oei pơma hăm 'bok soi, lăm kơđông linh Philistin rai tơjrông tơjrang. Sôl khan kơ 'bok soi: 'Nĕ tam mă chĕp.

²⁰ 'Bơ̆t noh, Sôl akŭm đĭ-đăng lu linh oei hơdai sư, năm tơ anih tơblah, na 'bôh bơngai Philistin toh đao pơlôch dih băl bơsuơ̆t bơsuăt krưp dêh.

²¹ Lu bơngai Hêbrơ sơ̆ kiơ̆ chu jang kơ bơngai Philistin păng kiơ̆ pơm linh lu sư 'nâu wih akŭm minh đon hăm bơngai Isơrael kiơ̆ Sôl păng Jônathan.

²² Kơplah 'noh đĭ-đăng bơngai Isơrael oei ôn lăm groi kông Êphraim, kơtơ̆ng khan bơngai Philistin thuơ kơdâu, kư̆m wang druh blah lu linh ayăt 'noh.

²³ Kră Yang dŏng pơklaih bơngai Isơrael lăm năr 'noh; tơdrong tơblah lanh truh tơ Bêt Awen.

²⁴ Kŭm lăm năr 'noh, bơngai Isơrael lap pă kĕ boih yua kơ Sôl athei 'blŏk nơ̆r đei pơkă pơkăm: Trŏ kơ hiap pơtê̆ bơngai ayơ mă sa tơmam kiơ adrol kơ 'năr kơsơ̆ huơ huĭnh wă măng, đang adrol kơ inh blah lu bơngai ayăt kơ inh! Yua kơ noh, na đĭ-đăng kon pơlei kơ̆m kơ pơ̆n sa tơmam kiơ hloi.

²⁵ Lăp kon pơlei nơnăm lăm bri đei sal sut kơpal teh.

²⁶ Kơplah, kon pơlei mơ̆t lăm bri, 'bôh sal sut đei đak sut ro tơ teh ră; kơbĭ bu pơ̆n tôt hơnglâu ti liah tơ 'bơ̆r, yua kơ hli kơ nơ̆r pơkă.

²⁷ Mă-lei Jônathan ưh kơ băt kơ nơ̆r 'bă sư đei pơkă boih hăm kon pơlei, na sư tôt hăm 'long jra sư tơ sal sut đơ̆ng noh iŏk hăm ti sư liah tơ 'bơ̆r, na măt sư 'blêr rai hơdah.

²⁸ Đei bơngai lăm kon pơlei khan: 'Bă ih đei pơkă hăm kon pơlei: Trŏ kơ hiap pơtê̆ bơngai bu mă sa tơmam kiơ lăm năr âu. Na kon pơlei rơmơ̆n pă kĕ kơ pơngot.

²⁹ Jônathan tơl khan: 'Bă inh pơm ăn kơ kon pơlei hơ'ngon; athei lăng măt inh hơdah hơdong dang yơ, yua kơ đơ̆ng inh liah tŏ sĕt đak sut âu.

³⁰ Ăn dah năr âu kon pơlei mă gơh sa tơmam mă bơ̆n đei tơblah iŏk đơ̆ng bơngai ayăt kơ bơ̆n, lei tơdrong tơblah hăm bơngai Philistin jei bơ̆n hloh loi kơ 'nâu dơ̆ng.

³¹ Na năr 'noh, bơngai Isơrael blah pơrăm bơngai Philistin đơ̆ng pơlei Mikmas truh tơ Aijalôn.

³² Kon pơlei pă kĕ kơ pơngot dêh, yoh rôp hloi bơ̆n triu, rơmo, kon rơmo pơlôch đơ̆ng noh sa 'nhĕm hrâu hăm pham 'bơ̆t oei pai.

³³ Đei bơngai năm roi kơ Sôl: Kon pơlei pơm yoch hăm Kră Yang, sa 'nhĕm hrâu hăm pham. Sư tơl: 'Noh boih minh tơdrong yoch trăp dêh hăm Kră Yang: Athei jah tơlơ̆ hloi tơmo tih ăn tơ jê̆ inh.

³⁴ Sư khan dơ̆ng: Athei năm jơ̆p kơ khŭl lu linh roi tơbăt kơ rim 'nu athei anhăk ba triu rơmo sư tơ inh păng pơlôch tơ âu. Sa 'nhĕm 'noh 'nĕ kơ sa 'nhĕm oei pham pơm yoch hăm Kră Yang. Lăm măng 'noh rim 'nu anhăk ba sem dơrong đơ̆ng kơdih sư păng pơlôch 'bơ̆t kơpal tơmo.

³⁵ Na Sôl pơdơ̆ng hloi minh pơm chơnang soi kơ Kră Yang 'nâu mă blŭng-a mă sư pơm chơnang soi wă kơkuh kơ Kră Yang.

³⁶ Đơ̆ng 'noh Sôl khan: Bơ̆n athei jur druh bơngai Philistin lăm kơmăng âu, blah tơgar pơrăm lu sư dĭng truh pơgê hơdah păng 'nĕ kơ ăn đei minh 'nu bơngai arih. Lu sư khan: Pơm bĕ dôm tơdrong ih khan trŏ. 'Bok soi khan: Bơ̆n athei năm apinh Kră Yang 'Bok Kei-Dei.

³⁷ Sôl krao apinh Kră Yang 'Bok Kei-Dei: Inh hăm gơh jur druh lu bơngai Philistin ưh? Ih hăm pơjao lu sư lăm ti bơngai Isơrael ưh? Mă-lei Kră Yang 'Bok Kei-Dei ưh kơ đei tơl lăm năr noh.

³⁸ Sôl khan: Ơ lu 'bok tih mă wei pơgơ̆r kon pơlei, đĭ-đăng athei năm jê̆ tơ âu, chă lăng tơdrong yoch đei pơm lăm năr 'nâu thoi yơ.

³⁹ Inh yua anăn Kră Yang arih ling-lang, dŏng pơklaih Isơrael, inh pơkă khan bơngai bu đei pơm yoch, mă Jônathan, kon drŏ-nglo inh kơdih, kư̆m trŏ kơ lôch! Lăm đĭ-đăng kon pơlei ưh kơ đei bu tơl nơ̆r sư.

⁴⁰ Sư khan hloi kơ đĭ-đăng bơngai Isơrael: Iĕm athei dơ̆ng gah âu; inh păng Jônathan, kon drŏ-nglo inh, gô dơ̆ng gah to. Kon pơlei tơl. Pơm bĕ tơdrong ih khan 'lơ̆ng trŏ kơ pơm.

⁴¹ Sôl krao apinh: Ơ Kră Yang 'Bok Kei-Dei Isơrael: Liơ Ih ưh kơ tơl tơwih nơ̆r inh năr âu? Apinh Ih tơ'bôh ăn tơdrong tơpă. Jônathan kon inh pơm yoch dah inh pơm yoch. Apinh Ih ăn kơ Urim; dah kon pơlei pơm yoch Ih ăn thu minh lai Sôl păng Jônathan đei tơhlâu lê̆ boih, mă-lei kon pơlei ưh kơ đei 'bơm.

⁴² Sôl khan: Athei hlang lăng bĕ wă kơ băt inh dah Jônathan kon drŏ-nglo inh trŏ kơ Jônathan.

⁴³ Sôl jet Jônathan: Roi bĕ kơ inh băt ih đei pơm kiơ. Jônathan roi tơpăt: Inh đei tôt tơ sal sut hăm 'long jra inh na liah tŏ sĕt; na inh âu trŏ kơ lôch.

⁴⁴ Sôl pơkă: Ơ Jônathan, dah ih ưh kơ lôch, apinh Kră Yang tơjur tơdrong truh trăp dêh kơpal inh!

⁴⁵ Mă-lei kon pơlei tơl Sôl khan: Ưh ôh! Jônathan jơ̆ bơngai pơm ăn boih kơ bơngai Isơrael kĕ jei dang 'noh, liơ mă gơh trŏ kơ lôch? Tơdrong 'noh ưh kơ gơh! Nhôn apinh Kră Yang arih na pơm kơdranh kơ bơ̆n pơkă khan mă minh ioi sŏk kơpal kơ̆l sư kư̆m ưh kơ đei hơlŭng tơ teh; sư mă gơh kĕ jei năr âu noh đơ̆ng Kră Yang 'Bok Kei-Dei tơgŭm sư. Thoi noh kon pơlei dŏng Jônathan klaih đơ̆ng tơdrong wă pơlôch.

⁴⁶ Sôl wih brŏk, ưh kơ đei druh bơngai lu Philistin dơ̆ng; păng bơngai Philistin wơ̆t brŏk tơ dêh sư kơdih.

⁴⁷ Đơ̆ng rŏng kơ Sôl pơm pơtao pơgơ̆r teh đak Isơrael, na sư tơblah hăm bơngai ayăt kơ sư puăn pah, wă khan sư tơblah hăm bơngai Môap, Ammôn, Eđôm, lu pơtao Sôba păng hăm bơngai Philistin; sư tơblah tơ yơ, kư̆m jei sư ngăl.

⁴⁸ Sư nuih kơtang tơblah bơngai Amalek păng dŏng pơklaih Isơrael đơ̆ng ti bơngai chă blah tơgar iŏk.

⁴⁹ Pơtao Sôl đei pêng 'nu kon drŏ-nglo Jônathan, Iswi păng Malkisua, sư kư̆m đei 'bar 'nu kon drŏ-kăn; 'lŏ anăn Mêrap, 'lơ̆p anăn Mikal;

⁵⁰ Akăn Sôl anăn Ahinôam, kon drŏ-kăn Ahimaas. Yŏng lu linh anăn Apner, kon drŏ-nglo Nêr, sư 'noh ma 'bok Sôl.

⁵¹ Kis, 'bă Sôl păng Nêr 'bă Apner kon drŏ-nglo Abiel.

⁵² Đĭ chăl arih Sôl đei tơdrong tơblah tih hơnơ̆ng hăm bơngai Philistin; dah Sôl 'bôh bơngai pran păng nuih kơtang, sư rôp iŏk bơngai 'noh kiơ̆ sư păng jang hăm sư.