I Sam 13 - Sơ̆p Hlabơar Nơ̆r 'Bok Kei-Dei

Iung blah bơngai Philistin

¹ Kơplah Sôl pơm pơtao, sư 'nao pêng-jĭt sơnăm. Sư đei pơgơ̆r đe Isơrael 'bar sơnăm bơih,

² Na sư rơih iŏk pêng-rơbâu 'nu, đơ̆ng lăm bơngai Isơrael 'bar-rơbâu 'nu wă kơ oei hơdai sư tơ Mikmas păng tơ groi kông Bethel, oei pă minh-rơbâu 'nu noh oei hăm Jônathan tơ Gibêah lăm dêh Bênjamin. Kon pơlei mă oei oei dôm yơ noh, sư ăn brŏk, rim 'nu brŏk tơ bơsŭn lu sư kơdih.

³ Jônathan blah kơđông pơlôch yŏng Philistin kơtơ̆ng tơ Gêba. Kon pơlei Philistin băt tơdrong noh. Sôl athei đe hlôm keng jơ̆p kơ tơring, na khan: Kon pơlei Hêbrơ mơ̆ng bĕ!

⁴ Wă đĭ-đăng bơngai Isơrael kơtơ̆ng bơih kơ Sôl blah kơđông pơlôch yŏng Philistin păng băt kơ Philistin areh ayăt kơ Isơrael. Kơplah ei, Sôl krao akŭm đĭ kon pơlei pơla tơ Gilgal.

⁵ Bơngai Philistin kư̆m akŭm pơpôi băl wă blah bơngai Isơrael: Lu sư đei pêng-jĭt rơbâu gre, aseh tơdrâu-rơbâu linh hao aseh păng linh yak jơ̆ng lơ thoi lĕ kơ chuơh tơ đak dơsĭ. Lu sư tŏk năm blah, lu sư pơm kơđông 'bơ̆t Mikmas, tơ gah hơlĕch kơ Bêt Awen.

⁶ Đe Isơrael mơn 'bôh lu sư hli hơmơt dêh. Yua kơ lu bơngai ayăt tŭn gơhret rai jê̆ bơih. Na lu đe Isơrael kơdâu ôn tơ lăm hơgơp tơmo, lăm bri kơdrơ̆ng lăm sơlŭng păng lăm trôm teh.

⁷ Kŭm đei Lu bơngai Hêbrơ tŏk găn kơ đak Krong Jôrđăn, truh tơ tơring Gat păng Gileat. Mă-lei Sôl sư oei kơtă tơ Gilgal, đĭ-đăng kon pơlei kiơ̆ sư hli tơtey ngăl.

⁸ Sôl gô truh tơpơh năr, kiơ̆ kơ nơ̆r Samuel pơkă; mă-lei yua kơ Samuel ưh tam truh tơ Gilgal, na kon pơlei tơklah tơklang.

⁹ Sôl khan: Athei ba kơ inh tơmam soi 'buh păng tơmam soi 'blŏk bơnê; na sư pơyơ̆r tơmam soi 'buh.

¹⁰ Lăp kơ sư đang kơ pơyơ̆r na blư kơ Samuel truh. Sôl sư kơdâu lĕch wă sơng kơkuh kơ sư.

Samuel chrih kơ Sôl

¹¹ Samuel jet sư: Ih pơm kiơ boih? Sôl tơl: Inh 'bôh kon pơlei tơklah tơklang achăng lê̆ inh ih ưh kơ năm 'blep kơ năr ih pơkă, bơngai Philistin đĭ hơdrŭm 'bơ̆t Mikmas bơih,

¹² na inh hli: Tơpă đe Philistin wă blah inh tơ Gilgal păng inh kư̆m tam mă krao apinh Kră Yang. Yua kơ thoi ei, na inh athei khŏm pơyơ̆r tơmam soi 'buh.

¹³ Samuel khan kơ Sôl: Ih ưh kơ wao tơpă, ưh kơ chu nơ̆r Kră Yang 'Bok Kei-Dei ih đei tơtă khan lê̆ bơih. Tơdah ih đei chu kiơ̆ nơ̆r Sư, lei Kră Yang gô pơjing dêh char ih kơjăp ling-lang lăm Isơrael;

¹⁴ Mă-lei dang ei, dêh char ih ưh kơ kơjăp ôh. Kră Yang đei rơih iŏk ăn kơ Sư kơdih minh 'nu bơngai kiơ̆ kơ jơhngơ̆m Sư, ăn bơngai noh pơgơ̆r kon pơlei Sư, yua kơ ih ưh kơ wei nơ̆r Kră Yang tơtă.

¹⁵ Samuel iung, lê̆ Gilgal năm truh tơ Gibêah lăm tơring Bênjamin, na Sôl jơ̆ lăng kon pơlei oei hăm sư, dang pă tơdrâu-hrĕng 'nu.

¹⁶ Sôl păng Jônathan, kon drŏ-nglo sư, hăm lu linh kiơ̆ sư năm oei tơ Gibêah lăm tơring Bênjamin, mă-lei đe Philistin pơm kơđông oei tơ Mikmas.

¹⁷ Đơ̆ng lăm kơđông Philistin đei minh khŭl linh blah tơgar lĕch klah song pêng khŭl, Minh khŭl năm tơ gah Ophra, lăm dêh Sual,

¹⁸ khŭl mă 'bar năm tơ gah pơlei Bêt Hôrôn; mă-lei khŭl mă pêng năm rok trong sơlam, trong noh năm tơ gah kơpal groi tơmang 'bôh tơ thŭng Sêbôim, păng char glă.

¹⁹ Kơplah noh lăm đĭ dêh char Isơrael ưh kơ đei bơngai hơjơ̆m, yua kơ đe Philistin khan bơih: Athei 'nĕ ăn kơ bơngai Hêbrơ hơjơ̆m đao păng hơlă.

²⁰ Đĭ-đăng bơngai Isơrael mưh wă kơ pla 'nhik rơmo, 'nhik choh, sung, wăng săng tơgăk, athei năm chă jang kơ đe Philistin,

²¹ păng layơ mă 'nhik, sung, wăng, chơkrơ ưh pă han bơih lu sư năm hơmet tơter tơ bơngai Philistin ngăl. Tơter pat 'nhik rơmo dah 'nhik apah tơhngam gram hu. Pat tơter 'nhik chơkrơ sung, sơnguĕt puh rơmo puăn gram hu.

²² Lei na lăm năr tơblah, kon pơlei mă kiơ̆ Sôl păng Jônathan ưh kơ đei đao păng hơlă, lăp Sôl păng Jônathan, kon drŏ-nglo sư đĕch đei.

²³ Minh khŭl linh đe Philistin năm jur tơ trong kuĕl Mikmas.