I Sam 12 - Sơ̆p Hlabơar Nơ̆r 'Bok Kei-Dei

Nơ̆r Samuel bơtho khan tuch-luch

¹ Samuel khan kơ đĭ-đăng bơngai Isơrael: Inh chu kiơ̆ dôm nơ̆r lu iĕm apinh inh; inh đei pơk minh 'nu pơtao wă pơgơ̆r lu iĕm.

² Đơ̆ng năr âu pơtao noh gô pơgơ̆r lu iĕm. Gah inh đĭ kră bơih, sŏk ko bơih, mă-lei lu kon drŏ-nglo inh oei hơdai lu iĕm. Inh đei pơgơ̆r lu iĕm đơ̆ng inh oei tơdăm sơ̆ khơ̆ dang ei.

³ Âu inh dơ̆ng 'bơ̆t anăp lu iĕm, 'bơ̆t anăp Kră Yang păng 'bơ̆t anăp pơtao mă Kră Yang đei tuh đak rơmă pơk pơm pơtao, wă kơ lu iĕm roi pơdah ăn. Inh hăm đei rôp rơmo bu ưh? Hăm rôp aseh đe bu ưh? Inh hăm hơlĕnh đe bu ưh? Pơm kơnê̆ tôn teh đe bu ưh? Inh hăm pơgâm sa đe wă bơbĭt lê̆ măt đe lăm dôm tơdrong jang kiơ ưh? Tơdah đei pơm thoi noh, gô pơdrâu đĭ kơ iĕm.

⁴ Lu sư tơl: Ih ưh kơ đei hơlĕnh lu nhôn ôh, ưh kơ đei tôn teh lu nhôn păng ưh kơ đei iŏk sa pơgâm đơ̆ng ti đe bu ôh.

⁵ Sư khan dơ̆ng: Kră Yang pơm kơdranh kơ iĕm; bơngai mă Sư tuh đak rơmă kư̆m pơm kơdranh kơ iĕm ưh kơ đei 'bôh kiơ lăm ti inh. Lu sư tơl: Hơpơi kơ Kră Yang pơm kơdranh kơ bơ̆n.

⁶ Samuel khan kơ kon pơlei pơla: Kră Yang jơ̆ Tơ'ngla rơih Môis păng Arôn, chông ba yă 'bok lu iĕm lĕch đơ̆ng dêh Êyiptơ.

⁷ Na dang ei, năm bĕ 'bơ̆t anăp Kră Yang, lê̆ inh gô sek tơlang lu iĕm lăm dôm tơdrong 'lơ̆ng tơpăt Kră Yang đei pơm tơgŭm lu iĕm păng yă 'bok lu iĕm.

⁸ Đơ̆ng rŏng kơ Jakôp truh tơ Êyiptơ, yă 'bok lu iĕm đei krao apinh Kră Yang; Kră Yang wơh Môis păng Arôn chông anhăk yă 'bok iĕm sơ̆ lĕch đơ̆ng dêh char Êyiptơ, na ăn kơ lu sư oei tơ dêh char âu.

⁹ Mă-lei lu sư hiơt kơ Kră Yang 'Bok Kei-Dei lu sư, na Sư ăn lu sư kơ Sisêra, yŏng lu linh kơ pơtao đe Hasor, ăn lu sư lăm ti đe Philistin păng ăn kơ pơtao Môap; lu đe noh tơblah pơrăm lu sư.

¹⁰ Lu sư ôr krao apinh Kră Yang: Lu nhôn đei pơm yoch, yua kơ lu nhôn achăng lê̆ Kră Yang, na kơkuh kơ yang Baal păng yang Astarôt; dang ei, apinh Ih dŏng pơklaih nhôn đơ̆ng ti bơngai ayăt hăm nhôn, na lu nhôn gô chu kiơ̆ kơ Ih.

¹¹ Kră Yang wơh hĭ Jêrup Baal, Barak, Jeptha păng Samuel; lu sư dŏng pơklaih lu iĕm đơ̆ng ti lu ayăt tăp dăr kơ lu iĕm, ăn kơ lu iĕm oei arih hiôk-hian.

¹² Mă-lei kơplah iĕm 'bôh Nahas, pơtao đe Ammôn, năm blah lu iĕm, lu iĕm năm khan kơ inh: Ưh ôh; lu nhôn athei đei minh 'nu pơtao pơgơ̆r lu nhôn; mă tơpă sư lăm noh Kră Yang 'Bok Kei-Dei bơih pơm pơtao lu iĕm.

¹³ Dang ei, 'nâu pơtao lu iĕm mă đei rơih iŏk păng đei apinh. Kră Yang ăn kơ lu iĕm pơtao wă pơgơ̆r lu iĕm.

¹⁴ Tơdah lu iĕm hli yom kơ Kră Yang, kơkuh kơ Sư, chu dôm nơ̆r Sư pơma, ưh pă kơchu hăm nơ̆r Sư tơtă athei; tơdah lu iĕm păng pơtao mă pơgơ̆r lu iĕm chu yom Kră Yang 'Bok Kei-Dei lu iĕm, lei tơpă iĕm gô đei tơdrong pŭn hiôk.

¹⁵ Mă-lei tơdah lu iĕm ưh kơ chu kiơ̆ dôm nơ̆r Kră Yang, ưh kơ chu nơ̆r sư tơtă athei, na ti Kră Yang gô ăn kơ tơdrong răm rai kơ lu iĕm kư̆m thoi sư ăn kơ yă 'bok iĕm sơ̆.

¹⁶ Na dang ei iĕm dơ̆ng hreh bĕ, lăng tơdrong tih dêh mă Kră Yang wă pơm 'bơ̆t anăp lu iĕm.

¹⁷ Năr âu, hăm trŏ kơ bơyan kĕch 'ba mi dah kiơ? Inh gô krao khan kơ Kră Yang tơpă đơ̆ng lăm jơhngơ̆m; Sư gô ăn 'mi grơ̆m glaih, wă kơ lu iĕm băt păng 'bôh kơdih iĕm đei pơm yoch tih 'bơ̆t anăp Kră Yang, yua kơ iĕm apinh bơih minh 'nu pơtao.

¹⁸ Wă Samuel krao khan kơ Kră Yang; lăm năr noh Kră Yang ăn 'mi grơ̆m glaih; đĭ-đăng kon pơlei hli tơrơ dêh kơ Kră Yang păng Samuel.

¹⁹ Đĭ-đăng lu sư khan kơ Samuel: Apinh ih krao khan apinh Kră Yang 'Bok Kei-Dei ih ăn kơ lu nhôn, wă kơ lu nhôn huay kơ lôch; lu nhôn đei apinh wă kơ đei pơtao noh nhôn pơthim ăn tơdrong yoch kơ lu nhôn.

²⁰ Samuel tơl kon pơlei: 'Nĕ kơ hli. Tơpă iĕm đei pơm dôm tơdrong yoch âu; mă-lei 'nĕ kơ achăng Kră Yang, athei đĭ jơhngơ̆m chu kiơ̆ kơ Kră Yang.

²¹ 'Nĕ kơ achăng Kră Yang chă kơkuh kơ rup yang hiong răm đĕch, ưh kơ đei yua kiơ, ưh kơ băt pơklaih; yua kơ rup yang jơ̆ hiong răm đĕch.

²² Kră Yang yua kơ anăn Sư tih dêh, na Sư ưh kơ achăng lê̆ kon pơlei Sư: Sư wă kơ lu iĕm pơm kon pơlei Sư.

²³ Gah inh, inh ưh kơ pơdơh kơ krao khan kơ iĕm. Wă kơ inh huay kơ pơm yoch hăm Kră Yang. Inh gô bơtho tơ'bôh lu iĕm băt kơ trong 'lơ̆ng păng tơpăt.

²⁴ Athei băt hli yom kơ Kră Yang đĕch, đĭ jơhngơ̆m bơ̆jang kơ Sư; lu iĕm athei 'blŏk dôm tơdrong Sư pơm tih dêh kơ lu iĕm ưh kơ băt dang yơ!

²⁵ Mă-lei tơdah lu iĕm hrăn oei pơm kơnê̆ ling-lang, lei lu iĕm păng pơtao lu iĕm tơpă gô hiong răm.