I Pot 9 - Sơ̆p Hlabơar Nơ̆r 'Bok Kei-Dei

Kră Yang pơma dơnuh hăm Sôlômôn wơ̆t mă 'bar

¹ Sôlômôn man Hnam akŭm Kră Yang, hnam sư kơdih păng dôm lu hnam mă sư man đang bơih.

² Na Kră Yang tơ'bôh akâu sư ăn kơ Sôlômôn wơ̆t mă 'bar, kư̆m thoi Kră Yang tơ'bôh kơ sư tơ pơlei Gibeôn.

³ Kră Yang khan kơ sư: “Inh kơtơ̆ng bơih dôm nơ̆r ih krao khan apinh 'bơ̆t anăp Inh. Inh 'măn lê̆ pha bơih Hnam 'nâu mă ih pơm wă kơ rơgoh, wă kơ anăn Inh oei lăm noh ling-lang; măt păng jơhngơ̆m Inh gô oei tơ noh ling-lang.

⁴ “Gah ih, tơdah ih yak kiơ̆ trong Inh kư̆m thoi Đawit, 'bă ih yak năm bơih hăm jơhngơ̆m đon rơgoh 'lơ̆ng tơpăt pơm kiơ̆ dôm nơ̆r Inh athei ih, wei răk dôm nơ̆r Inh pơkă tơtă khan kơ ih,

⁵ lei Inh gô ăn kơ ih hơ-oei kơpal tang-dŏ pơtao pơgơ̆r lu bơngai Isơrael kơjăp ling-lang kiơ̆ thoi Inh đei pơkă hăm Đawit 'bă ih: “Ih ưh kơ kơ'bah kơ bơngai hơ-oei kơpal tang-dŏ pơtao pơgơ̆r lu bơngai Isơrael.”

⁶ Mă-lei tơdah ih păng lu kon sâu ih weh tơklah đơ̆ng Inh ưh kơ wă wei răk khôi juăt păng dôm nơ̆r Inh tơtă ăn kơ lu iĕm, na bơ̆jang păng kơkuh kơ rup yang nai,

⁷ lei Inh gô pơpuh tơweh lu sư đơ̆ng dêh char mă Inh ăn bơih kơ lu sư oei; klaih kơ noh inh gô pơrăm hŭt lê̆ Hnam akŭm 'lơ̆ng rơgoh mă Inh 'măn anăn Inh, păng lu bơngai Isơrael đe gô pơrăm che bơle hiĕk achơ̆ kơ lu sư 'bơ̆t anăp kon bơngai lăm teh đak 'nâu.

⁸ Hnam akŭm 'nâu, jing rơ̆m rĕk, rim 'nu bơngai năm rok trong Hnam akŭm 'noh lăng hlĭch, păng apinh tơduă khan; Yua kơ kiơ Kră Yang pơm kơ dêh char 'nâu păng Hnam akŭm 'nâu thoi âu.”

⁹ Đe gô khan: 'Noh yua kơ lu sư weh tơklah đơ̆ng Kră Yang 'Bok Kei-Dei lu sư, Tơ'ngla tơlĕch lu yă 'bok sư đơ̆ng char Êyiptơ, lu sư kiơ̆ yang nai, bơ̆jang păng kơkuh kơ yang 'noh, yua kơ thoi 'noh bơih na Kră Yang ăn kơ lu sư tơdrong truh răm thoi âu.”

Sôlômôn pơm tơdrong nai hai

¹⁰ Lăp 'blep 'bar-jĭt sơnăm kơplah Sôlômôn pơm keh 'bar tŏ Hnam, pơm hnam akŭm păng hnam pơtao sư kơdih.

¹¹ Na kơplah 'noh pơtao Sôlômôn pơjao ăn kơ Hiram pơtao pơlei Tirơ, 'bar-jĭt tŏ pơlei lăm dêh Galilê, yua kơ Hiram ăn kơ pơtao Sôlômôn 'long hơngo, 'long hơngo hla iĕ păng maih, mơ̆ng kơ sư wă dôm yơ.

¹² Hiram năm đơ̆ng Pơlei Tirơ, truh tơ noh wă lăng dôm pơlei mă Sôlômôn ăn kơ sư 'noh, sư ưh kơ lăp jơhngơ̆m ôh.

¹³ Na sư khan: “Ơ 'nhŏng, lu pơlei 'nâu đei kiơ mă ih ăn kơ inh?” Thoi noh đe krao dôm tŏ pơlei noh char Kabula mă truh tơ dang ei.

¹⁴ Hiram gơih ăn kơ Sôlômôn minh-hrĕng 'bar-jĭt talâng jên maih.

¹⁵ 'Nâu tơdrong Sôlômôn chă ra đơ̆ng đĭ-đăng bơngai wă pơm Hnam akŭm Kră Yang păng hnam pơtao sư, pơm milô, păng dur pơlei Jêrusalem, Hasor, pơlei Mêgiđô păng Geser.

¹⁶ Pharaôn, pơtao char Êyiptơ tŏk tơgar blah iŏk pơlei Geser soh pơđĭ pơlei 'noh păng pơlôch đĭ kon bơngai Kanaan 'noh, đơ̆ng noh sư ăn kơ kon drŏ-kăn sư pơlei 'noh jing tơmam sư kơdih, kon drŏ-kăn sư 'noh akăn pơtao Sôlômôn.

¹⁷ Thoi noh, pơtao Sôlômôn tơiung pơjing ming pơlei Geser dơ̆ng, păng pơlei Bêt Hôrôn gah ala.

¹⁸ Pơlei Balat păng pơlei Tamar tơ lăm char 'blach Juđa.

¹⁹ Sôlômôn kư̆m đei pơm pơlei 'măn dôm tơmam, 'măn gre aseh, pơlei ăn kơ lu linh hao aseh oei păng dôm tơdrong Sôlômôn wă pơm lăm pơlei Jêrusalem, lăm char Liban păng đĭ-đăng lăm char sư pơgơ̆r.

²⁰ Đĭ-đăng lu bơngai mă oei arih đơ̆ng lu bơngai Amôrit, bơngai Hêtit bơngai Phêrisit, bơngai Hêwit păng lu bơngai Jêbus, lu sư ưh kơ trŏ kơ bơngai Isơrael ôh.

²¹ Dôm lu kon sâu sư mă oei arih lăm dêh char mă lu bơngai Isơrael ưh kơ kĕ pơlôch pơđĭ 'noh, na Sôlômôn rôp lu sư pơm đĭch bơ̆jang truh tơ dang ei.

²² Mă-lei gah lu bơngai Isơrael, Sôlômôn ưh kơ rôp lu sư pơm đĭch ôh, lu sư pơm linh tơblah, mơ'nah pơm 'bok pơgơ̆r linh, mơ'nah pơm 'bok pơgơ̆r lu yŏng linh, mơ'nah wei-lăng lu bơngai hao gre aseh păng lu bơngai hao aseh.

²³ 'Nâu lu 'bok yŏng wei-lăng tơdrong jang mă Sôlômôn pơjao; lu sư đei pơđăm-hrĕng pơđăm-jĭt 'nu wei-lăng kon pơlei bơ̆jang pơm Hnam akŭm păng pơm hnam pơtao.

²⁴ Lăp kon drŏ-kăn pơtao Pharaôn năm đơ̆ng pơlei Đawit năm tơ hnam pơtao sư kơdih, mă hnam Sôlômôn pơm ăn kơ sư; pơtao kư̆m pơm dur wă găn lu ayăt.

²⁵ Pêng wơ̆t lăm minh sơnăm Sôlômôn juăt kơ pơyơ̆r tơmam soi 'buh păng tơmam pơyơ̆r apinh tơdrong hiôk-hian tơ kơpal chơnang soi mă sư đei pơm ăn kơ Kră Yang păng soh tơmam 'bâu phu hai 'bơ̆t anăp Kră Yang. Sư pơm pơkeh Hnam akŭm.

²⁶ Pơtao Sôlômôn kư̆m pơm lơlap duk thŏng-nan tơ pơlei Êsiôn Gêber oei jê̆ pơlei Êlat tơ đak Dơsĭ 'Brê lăm dêh char Eđôm.

²⁷ Đơ̆ng noh Hiram wơh đĭch đam sư, wă khan lu bơngai hơgei huơ̆r thŏng-nan lăm đak dơsĭ năm tơgŭm hơdai lu đĭch đam Sôlômôn.

²⁸ Lu sư năm tơ dêh char Ôphir, lu sư chă chĕp ba puăn-hrĕng 'bar-jĭt talâng maihb đơ̆ng dêh char 'noh năm ăn kơ pơtao Sôlômôn.