I Pot 8 - Sơ̆p Hlabơar Nơ̆r 'Bok Kei-Dei

Ba tơmơ̆t hom pơgơ̆p lăm hnam Kră Yang

¹ Pơtao Sôlômôn, krao akŭm đĭ lu kră pơgơ̆r, lu yŏng kơdră lăm adrĕch adrung Isơrael năm tơ sư tơ Pơlei Jêrusalem năm sơng Hom Pơgơ̆p Kră Yang đơ̆ng lăm pơlei Đawit tơ Siôn ba tơ Hnam akŭm Kră Yang.

² Kơplah lu sư akŭm pơm phĕt, 'noh lăm khei tơpơh lu sư jô̆ khan khei Êthanim, đĭ-đăng lu bơngai Isơrael wang akŭm hơdai hăm pơtao Sôlômôn.

³ Kơplah lu kră pơlei Isơrael truh, lu 'bok soi tung hloi Hom Pơgơ̆p Kră Yang.

⁴ Lu sư tung ba hloi hnam khăn anih akŭm. Hom Pơgơ̆p chĕp ba dôm tơmam rơgoh năm hloi tơ anih noh; lu 'bok soi păng bơngai Lêwi tung hom pơgơ̆p 'noh.

⁵ Pơtao Sôlômôn păng đĭ-đăng kon pơlei Isơrael minh pôm jơhngơ̆m đon akŭm hơdai, đĭ-đăng dơ̆ng 'bơ̆t anăp Hom Pơgơ̆p; sư 'bet rơmo păng triu lơlap pơm tơmam soi pơyơ̆r, dĭng mah pă kĕ jô̆.

⁶ Lu 'bok soi tơm tung ba Hom Pơgơ̆p Kră Yang tơ anih sư, anih rơgoh hloh lu sư 'măn gah ala pơnăr chêrubim.

⁷ Dôm lu chêrubim bơyar pơnăr kơpal Hom Pơgơ̆p, sư klơ̆p lê̆ Hom Pơgơ̆p păng 'long tơnung tung.

⁸ Dôm lu tơnung tung kơjung na đe lăng 'bôh đơ̆ng anih rơgoh mă truh tơ Anih Rơgoh Hloh, sư kư̆m oei 'bôh mơ̆n. Mă-lei lăng đơ̆ng 'nguaih ưh kơ đei 'bôh, dôm lu tơnung tung noh, mă truh dang ei kư̆m oei đei mơ̆n.

⁹ Lăm Hom Pơgơ̆p 'noh đei 'bar hlak gơ'bang păng tơmo đơ̆ng Môis dan lê̆ đơ̆ng kông Hôrêp; iŏk đơ̆ng năr Kră Yang pơgơ̆p pơkă pơkăm hăm lu bơngai Isơrael kơplah lu sư 'nao lĕch đơ̆ng dêh char Êyiptơ.

¹⁰ Kơplah lu 'bok soi lĕch đơ̆ng anih rơgoh đei hơmơ̆l gom 'bĕnh lăm Hnam Kră Yang.

¹¹ Lu 'bok soi ưh kơ gơh dơ̆ng 'bơ̆t anih noh wă jang, yua kơ tơdrong hơdah rang mơnhal păng hơmơ̆l 'bĕnh kơ Hnam akŭm Kră Yang.

¹² Kơplah noh pơtao Sôlômôn khan; “Kră Yang ih khan ih gô oei lăm hơmơ̆l măng mu.

¹³ Dang ei inh pơm Hnam akŭm 'lơ̆ng rŏ keh bơih; anih wă kơ Ih oei ling-lang.”

¹⁴ Đơ̆ng noh pơtao Sôlômôn sư tơwih muh măt tơ kon pơlei Isơrael, đĭ-đăng kon pơlei Isơrael oei dơ̆ng iung na sư krao khan hơpơi tuh ăn tơdrong pŭn hiôk.

¹⁵ Sư khan: “Bơnê ư-ang kơ Kră Yang; 'Bok Kei-Dei Isơrael pơkeh đơ̆ng Ih pơkă hăm 'bă inh Đawit, yua kơ đơ̆ng ti mơsêh Ih pơsĭt trŏ nơ̆r pơkă 'noh,” Ih kư̆m khan thoi âu dơ̆ng:

¹⁶ ‘Iŏk đơ̆ng năr Ih pơklaih lu bơngai Isơrael đơ̆ng dêh Êyiptơ, Inh ưh kơ đei rơih iŏk ôh khŭl bơngai bu đơ̆ng lăm bơngai Isơrael, pơjing pơm Hnam akŭm wă kơ anăn Inh oei lăm noh. Mă-lei Inh đei iŏk bơih Đawit wă kơ sư pơgơ̆r lu bơngai Isơrael kon pơlei Inh.’

¹⁷ “Lăm jơhngơ̆m 'bă inh Đawit sư kư̆m đei wă pơjing minh pôm Hnam akŭm ăn kơ anăn Kră Yang, 'Bok Kei-Dei lu bơngai Isơrael.

¹⁸ Mă-lei Kră Yang khan kơ 'bă inh Đawit: “Yua kơ ih tơchĕng wă pơm hnam akŭm kơ anăn Inh ih đei jơhngơ̆m 'lơ̆ng dêh.

¹⁹ Mă-lei ih ưh kơ gơh wă pơm ôh. Kon drŏ-nglo mă ih pơjing sư gô pơm Hnam akŭm kơ Inh.’

²⁰ “Dang ei Kră Yang, pơsĭt bơih kơ đêl nơ̆r Sư pơkă. Inh tơplih kơ 'bă inh wă pơgơ̆r hơ-oei kơpal tang-dŏ pơtao wei-lăng lu bơngai Isơrael. 'Blep thoi đơ̆ng nơ̆r Kră Yang pơkă, Inh pơm keh bơih Hnam akŭm kơ anăn Kră Yang, 'Bok Kei-Dei Isơrael.

²¹ Tơ anih 'noh inh đei pơm wă 'măn Hom, pơgơ̆p lăm Hom 'noh đei nơ̆r Kră Yang pơkă pơkăm hăm lu 'bok bơ̆n sơ̆, kơplah Sư pơklaih lu sư đơ̆ng dêh char Êyiptơ.”

²² Đang kơ noh pơtao Sôlômôn dơ̆ng 'bơ̆t anăp chơnang soi Kră Yang 'bơ̆t anăp đĭ-đăng kon pơlei Isơrael. Sư yơ̆r ti tơ kơpal:

²³ Păng khan; “Ơ Kră Yang lu bơngai Isơrael, mă oei tơ kơpal plĕnh ti dah tơ anih âu, ưh kơ đei yang nai thoi Ih, Ih 'mêm mơnat kơ lu đĭch đam Ih păng wei răk dôm nơ̆r Ih đei pơkă pơkăm hăm lu sư. Bu mă đĭ jơhngơ̆m năm păng oei hăm Ih.

²⁴ Ih kư̆m wei răk nơ̆r pơkă Ih hăm đĭch đam Ih Đawit 'bă inh trŏ tơpă tơdrong kiơ mă ti mơsêh mơyang Ih pơm keh hloi dang ei.

²⁵ “Dang ei, ơ Kră Yang 'Bok Kei-Dei Isơrael! Apinh Ih pơm pơkeh bĕ đơ̆ng nơ̆r Ih pơkă hăm 'bă inh Đawit, đĭch đam Ih. Ih đei pơkă khan: “'Bơ̆t anăp Inh ih ưh kơ đei khăi ôh bơngai gô hơ-oei kơpal tang-dŏ pơtao Isơrael tơdah lu kon sâu ih năm rok trong ih mă năm adrol bơih 'bơ̆t anăp Inh.”

²⁶ Thoi noh dang ei ơ Kră Yang 'Bok Kei-Dei bơngai Isơrael, apinh Ih pơsĭt nơ̆r Ih đei pơkă bơih hăm 'bă inh Đawit đĭch đam ih.

²⁷ Mă-lei Kră Yang, tơpă Ih wă oei tơ lăm teh âu? Mă đĭ-đăng lu plĕnh jơ̆p-jang kơpal plĕnh kư̆m tam mă mah kơ oei, pơma kơ kiơ Hnam akŭm âu đơ̆ng inh pơjing ăn kơ Ih.

²⁸ Mă đơ̆ng thoi noh ră, ơ 'Bok Kei-Dei apinh Ih pơđêng đon mơ̆ng nơ̆r đĭch đam Ih krao apinh 'bơ̆t anăp Ih năr âu:

²⁹ Apinh măt Ih măng năr wei-lăng Hnam âu, anih mă Ih khan: Anăn Ih gô oei lăm hnam noh, wă kơ Ih mơ̆ng dôm nơ̆r lu đĭch đam Ih krao khan kơ anih 'nâu.

³⁰ Mơ̆ng bĕ tơdrong kiơ mă lu đĭch đam Ih păng kon pơlei Ih krao khan tơ anih 'nâu, apinh Ih mơ̆ng bĕ đơ̆ng anih Ih oei đơ̆ng plĕnh ti; apinh Ih mơ̆ng mă nhen păng mơnat ăn.

³¹ Tơdah đei bơngai bu mă pơm yoch hăm buôl buăl sư, đe athei sư pơkă tơdah bơngai 'noh năm 'bơ̆t anăp chơnang soi Ih tơ Hnam akŭm âu

³² apinh Ih đơ̆ng kơpal plĕnh mơ̆ng păng tơl tơwih sek tơlang ăn kơ đĭch đam Ih, apinh Ih pơm plơ̆ kơ lu bơngai kơnê̆, đơ̆ng sư chă trong pơm kơnê̆ tuh plơ̆ tơ kơpal kơ̆l sư, apinh Ih tơgŭm bơngai 'lơ̆ng tơpăt. Ih apah bơnê kiơ̆ kơ tơdrong 'lơ̆ng tơpăt sư pơm.

³³ Tơdah lu bơngai Isơrael. Đei pơm yoch hăm Ih, na lu bơngai ayăt blah iŏk. Tơdah lu sư băt wơ̆t wih tơ Ih dơ̆ng, ư-ang kơ anăn Ih păng krao khan hơdrĭ hăm Ih lăm Hnam akŭm âu,

³⁴ Đơ̆ng plĕnh apinh Ih mơ̆ng bĕ, mơnat ăn kơ tơdrong yoch lu kon pơlei Ih Isơrael păng chông ba lu sư wơ̆t brŏk dơ̆ng tơ teh đak mă đơ̆ng Ih ăn kơ 'bok lu sư sơ̆.

³⁵ Mưh plĕnh phang ưh kơ đei đak 'mi yua kơ đơ̆ng lu sư pơm yoch hăm Ih, mă-lei dah lu sư năm tơkan tơ anih âu krao khan hơdrĭ hăm anăn ih, hŭt lê̆ tơdrong yoch lu sư, yua kơ ih phak bơtho lu sư boih.

³⁶ Apinh ih đơ̆ng kơpal plĕnh mơ̆ng nơ̆r lu sư, apinh ih mơnat ăn kơ tơdrong yoch lu sư, đĭch đam Ih lu kon pơlei Isơrael, apinh Ih bơtho pơhrăm lu sư trong 'lơ̆ng wă kơ lu sư rok kiơ̆, ăn kơ lu sư đak 'mi tơ ala teh âu, wă kơ lu sư jang sa đei tôm tơmam.

³⁷ Mưh lăm dêh char âu đei tơdrong truh pơngot rơwĕt, phang-ang, đei lep kơnu, hơdrông, phơ̆k kơmot sa, lôch hơ'buh dah đei lu ayăt truh wang blah lăm pơlei dêh char anih lu sư, dah đei tơdrong gleh truh jĭ jăn.

³⁸ Mưh đei minh 'nu dah đĭ-đăng lu bơngai Isơrael, lu sư băt kơ tơdrong lu sư pơm ưh kơ trŏ, lu sư yơ̆r ti tơklă hnam âu, lu sư krao khan hơdrĭ tơdrong kiơ,

³⁹ apinh Ih đơ̆ng kơpal plĕnh ti, anih mă Ih oei Ih mơ̆ng păng mơnat ăn kơ yoch lu sư, tơgŭm rim 'nu kơ lu sư kiơ̆ kơ tơdrong jang sư pơm, yua kơ Ih băt jơhngơ̆m lu sư, lăp minh 'nu Ih đĕch băt lăm jơhngơ̆m kon bơngai.

⁴⁰ Lei ha apinh Ih ăn kơ lu sư đei jơhngơ̆m băt hli yom kơ Ih ling-lang, kơplah lu sư arih lăm teh đak âu mă Ih ăn kơ 'bok yă lu nhôn.

⁴¹ Gah lu tơmoi nai lu sư ưh kơ lăm lu bơngai Isơrael Ih, mă-lei yua kơ anăn Ih lu sư đơ̆ng dêh ataih truh,

⁴² lu bơngai teh đak 'nguaih lu sư kơtơ̆ng Anăn Ih ti mơsêh mơyang Ih, mưh lu sư krao khan lăm hnam âu.

⁴³ Apinh Ih đơ̆ng kơpal plĕnh anih Ih oei mơ̆ng păng tơl tơwih nơ̆r lu sư krao apinh, wă kơ đĭ-đăng bơngai jơ̆p teh đak, băt kơ anăn ih, hli yom kơ anăn Ih, lei-lăi thoi lu kon pơlei Isơrael wă kơ Ih tơbăt tơ'bôh ăn kơ lu bơngai krao apinh lăm hnam âu, đơ̆ng Inh pơm.

⁴⁴ “Mưh lu kon pơlei đĭch đam ih tơblah hăm lu ayăt, kiơ̆ kơ đơ̆ng Ih wơh; mưh sư krao khan hơdrĭ hăm anăn ih; sư tơwih gah pơlei âu pơlei mă Ih rơih bơih, sư tơkan tơ hnam akŭm mă đơ̆ng inh pơm,

⁴⁵ Apinh ih đơ̆ng kơpal plĕnh mơ̆ng nơ̆r krao khan hơdrĭ lu sư, tơgŭm tơdrong mă lu sư apinh.

⁴⁶ “Mưh đơ̆ng lu sư pơm yoch 'bơ̆t anăp ih, ưh kơ đei bu ưh kơ pơm yoch, Ih blĕk ơh ăn kơ lu sư đei tơdrong gleh oei lăm ti lu bơngai ayăt, tơdah đe rôp ba lu sư tơ dêh char nai, mă đơ̆ng ataih dah jê̆,

⁴⁷ tơdah lu sư oei tơ dêh char nai lu sư tơchĕng tơbral, krao khan hơdrĭ apinh ih: ‘Lu nhôn pơm yoch, pơm tơdrong kơnê̆ pơm lơ tơdrong ưh kơ trŏ.’

⁴⁸ Dah lu sư đĭ jơhngơ̆m đĭ đon tơchĕng, wơ̆t tơbral tơ Ih krao khan apinh Ih, lăm char mă lu ayăt rôp ba lu sư, lu sư 'blŏk kơ dêh mă Ih ăn kơ lu 'bok yă lu sư sơ̆. Anih mă Ih rơih ăn bơih păng Hnam akŭm kơkuh kơ anăn Ih mă inh pơm âu bơih,

⁴⁹ na apinh Ih đơ̆ng kơpal plĕnh đơ̆ng anih mă ih oei mơ̆ng nơ̆r lu sư krao khan hơdrĭ, tơgŭm lu sư tơdrong lu sư apinh Ih,

⁵⁰ mơnat ăn kơ yoch lu sư pơm, lu sư pơm glăi hăm Ih, apinh Ih ăn kơ bơngai mă rôp ba lu sư đei đon mơnat kơ lu sư.

⁵¹ Yua kơ lu sư bơngai Isơrael, noh pơlei pơla Ih, tơmam Ih yua. Ih pơklaih lu sư đơ̆ng char Êyiptơ anih noh nhen thoi anih đe 'buh jôr bơsei.

⁵² “Apinh Ih mơ̆ng nơ̆r lu đĭch đam Ih yua kơ lu sư jing pơlei pơla Isơrael Ih, apinh Ih mơ̆ng nơ̆r lu sư krao khan hơdrĭ 'bơ̆t Ih.

⁵³ Ơ Kră Yang Tih Hloh, Ih klah lê̆ lu sư phara đơ̆ng lăm khŭl kon bơngai lăm teh đak âu, ih wă ăn kơ lu sư jing tơmam Ih, trŏ 'blep thoi Ih đei khan kơ 'bok Môis đĭch đam Ih sơ̆, đơ̆ng năr Ih pơklaih lu 'bok yă nhôn đơ̆ng lăm dêh char Êyiptơ.”

⁵⁴ Lăp pơtao Sôlômôn krao khan kơ Kră Yang đang bơih; sư iung dơ̆ng tơ anăp chơnang soi Kră Yang, 'bơ̆t anih sư pơtăm kŭl-tăng sư iung yơ̆r ti tơ kơpal plĕnh.

⁵⁵ Sư iung krao khan hơpơi tơdrong pŭn hiôk ăn kơ đĭ-đăng kon pơlei Isơrael khan:

⁵⁶ “Bơnê kơkuh ư-ang kơ Kră Yang mă ăn tơdrong hiôk hơđơ̆ng kơ lu bơngai Isơrael, kiơ̆ thoi dôm nơ̆r ih pơkă! Nơ̆r 'lơ̆ng tơpăt, mă ih yua 'bơ̆r Môis đĭch đam Ih bơtho, Ih khan ưh kơ đei nơ̆r ayơ mă ưh kơ đei pơm pơkeh.

⁵⁷ Apinh Kră Yang 'Bok Kei-Dei apinh Sư oei hơdai lu bơ̆n thoi lĕ Sư oei hơdai lu 'bok bơ̆n sơ̆, 'nĕ ăn kơ Sư hŭt achăng lê̆ lu bơ̆n.

⁵⁸ Apinh Sư tơgŭm bơ̆n năm jê̆ Sư wă kơ lu bơ̆n năm kiơ̆ trong Sư, wei răk nơ̆r sư tơtă, tơdrong juăt Sư păng nơ̆r Sư bơtho tơtă, mă Sư bơtho kơ lu 'bok bơ̆n sơ̆.

⁵⁹ Hơpơi rŏ kơ nơ̆r inh krao khan bơih, 'bơ̆t anăp Kră Yang, oei lăm Kră Yang 'Bok Kei-Dei bơ̆n măng năr păng tơgŭm dôm tơdrong đĭch đam Sư jang păng kư̆m tơgŭm tơdrong kon pơlei pơla Isơrael Sư jang sa rim năr kiơ̆ thoi tơdrong lu sư kăl yua.

⁶⁰ Wă kơ lu kon pơlei pơla lăm ala teh đak băt kơnăl kơ Sư Kră Yang 'Bok Kei-Dei, 'nguaih kơ Sư ưh pă đei yang nai bơih.

⁶¹ Thoi noh lu iĕm athei iŏk jơhngơ̆m đon 'lơ̆ng, chu yom pơm kiơ̆ Kră Yang 'Bok Kei-Dei lu bơ̆n pơkă, tơdrong juăt sư păng nơ̆r sư tơtă kư̆m thoi lu iĕm oei pơm dang ei.”

⁶² Pơtao Sôlômôn, hăm đĭ-đăng lu bơngai Isơrael, oei hăm sư, pơyơ̆r tơmam soi 'bơ̆t anăp Kră Yang.

⁶³ Pơtao Sôlômôn sư, pơyơ̆r tơmam soi kơ Kră Yang, đei 'bar-jĭt 'bar-rơbâu tŏ rơmo tơno, đei minh-hrĕng 'bar-rơbâu tŏ triu, păng bơbe. Đĭ-đăng lu kon pơlei hăm pơtao Sôlômôn chơt hiôk pơyơ̆r pơm keh hnam akŭm Kră Yang.

⁶⁴ Lăm năr 'noh pơtao Sôlômôn sư klah sư 'măn lê̆ minh anih tŏk-bŏk cham 'bơ̆t anăp, Hnam akŭm Kră Yang; tơ anih 'noh sư wă pơyơ̆r tơmam soi 'buh, tơmam soi pơyơ̆r phe 'ba, păng tơmam soi rơmă tơmam soi 'blŏk bơnê, yua chơnang pơm hăm kong noh iĕ, ưh kơ mah wă dan đĭ dôm lu tơmam soi 'buh, tơmam soi pơyơ̆r phe 'ba, lu rơmă tơmam soi 'blŏk bơnê.

⁶⁵ Kơplah noh đĭ-đăng kon pơlei pơla Isơrael akŭm hơdai hăm pơtao Sôlômôn, akŭm minh anih să iŏk đơ̆ng trong mơ̆t pơlei Hamat truh tơ thong đak Êyiptơ, akŭm 'bơ̆t anăp Kră Yang 'Bok Kei-Dei, lăm tơpơh năr.

⁶⁶ Lăm năr mă tơhngam pơtao ăn kơ kon pơlei pơla brŏk; kon pơlei kư̆m krao khan hơpơi pŭn hiôk kơ pơtao kơplah lu sư brŏk tơ anih lu sư, lu sư chơt hiôk 'nă hal lăm jơhngơ̆m, yua kơ Kră Yang wei-lăng đĭch đam Sư Đawit hăm đĭ-đăng lu bơngai Isơrael, kon pơlei pơla Sư rơih.