I Pot 21 - Sơ̆p Hlabơar Nơ̆r 'Bok Kei-Dei

Pơgar hơmu Nabôt

¹ Đơ̆ng rŏng kơ lu tơdrong 'noh, đei dơ̆ng tơdrong 'nâu: Nabôt Pơlei Jêsreel, đei minh hlak pơgar hơmu jê̆ hnam Ahap pơtao dêh Samari.

² Ahap khan kơ Nabôt. “Apinh ih ăn kơ inh pơgar hơmu ih 'noh, inh wă pơm pơgar pơtăm hla 'nhot, yua kơ jê̆ hnam inh. Ba tơplih hăm pơgar hơmu inh 'lơ̆ng hloh kơ pơgar hơmu ih 'nâu, dah ih wă tĕch dôm yơ, inh gô ăn kơ ih jên.”

³ Mă-lei Nabôt khan kơ Ahap: “Apinh Kră Yang wei 'nĕ ăn inh ăn kơ ih tơmam đơ̆ng 'bok kơdră inh.

⁴ Ahap mơ̆t tơ lăm hnam jơhngơ̆m ưh kơ hiôk păng sơ'ngon dêh yua kơ nơ̆r Nabôt, bơngai Jêsreel; đei khan kơ pơtao: “Inh ưh kơ gơh ăn kơ ih ôh tơmam đơ̆ng lu 'bok kơdră inh. Ahap mơ̆t 'bĭch tơ giơng tep om ơh sơ'ngon ưh kơ sŏng sa.

⁵ Jêsebel akăn sư năm jê̆ sư păng jet sư: “Yua kơ kiơ ih ơh Sơ'ngon păng ưh kơ sŏng sa?”

⁶ Sư tơl: “Yua kơ inh khan kơ Nabôt bơngai Jêsreel: ‘Tĕch ăn kơ inh mir hơmu ih 'noh inh gô ăn jên dah mă tơplih băl hăm mir hơmu inh nai kư̆m bưh, mă-lei sư khan: ‘Inh ưh kơ gơh ăn kơ ih mir hơmu inh.’ ”

⁷ Jêsebel akăn sư khan kơ sư: “Dang ei hăm trŏ kơ ih pơgơ̆r lu bơngai Isơrael ưh? Jah iung păng sŏng bĕ, chơt hiôk bĕ, Inh gô ăn kơ ih mir hơmu Nabôt, bơngai Jêsreel.”

⁸ Jêsebel chih hla bơar yua hăm anăn pơtao Ahap păng chơ̆m tơdra đơ̆ng pơtao, đơ̆ng noh gơih ăn kơ lu kră pơlei păng lu bơngai đe pơyom oei hơdai hăm pơlei Nabôt.

⁹ Sư chih lăm hla bơar 'noh: “Tơbăt tơtă kơ kon pơlei athei kơ̆m giĕng ơ̆t kơ sŏng sa. Athei ăn kơ Nabôt hơ-oei 'bơ̆t anăp kon pơlei.

¹⁰ Athei ăn 'bar 'nu bơngai pơm kơdranh hơlĕnh hơ-oei 'bơ̆t anăp sư, 'bar 'nu pơm kơdranh hơlĕnh khan. Nabôt hiap Kră Yang 'Bok Kei-Dei păng hiap pơtao. Đang kơ noh athei dui tơlĕch sư tơ jih pơlei klơ̆m pơlôch sư păng tơmo.”

¹¹ Lu bơngai lăm pơlei, kră pơlei păng lu bơngai mă đe pơyom lăm pơlei pơm kiơ̆ kơ nơ̆r Jêsebel pơkă lăm kơthơ chih gơih ăn kơ lu sư.

¹² Lu sư tơbăt tơdrong kơ̆m giĕng ơ̆t kơ sŏng sa păng ăn kơ Nabôt oei 'bơ̆t anăp kon pơlei.

¹³ Đơ̆ng noh ăn 'bar 'nu bơngai hơ-oei 'bơ̆t anăp Nabôt; na jâu sư 'bơ̆t anăp kon pơlei pơla khan: “Nabôt hiap Kră Yang 'Bok Kei-Dei păng hiap pơtao.” Na lu sư dui Nabôt lĕch tơ jih pơlei klơ̆m pơlôch sư păng tơmo.

¹⁴ Na lu sư wơh đe năm roi kơ Jêsebel khan: “Đe klơ̆m bơih Nabôt păng tơmo sư lôch bơih.”

¹⁵ Lăp Jêsebel kơtơ̆ng đe roi khan đe klơ̆m pơlôch Nabôt păng tơmo bơih, sư iung hloi năm khan kơ Ahap klo sư: “Iung bĕ, năm iŏk mir hơmu Nabôt Pơlei Jêsreel mir mă đêl sư ưh kơ wă tĕch ăn kơ ih 'noh, yua kơ Nabôt lôch bơih.”

¹⁶ Lăp Ahap kơtơ̆ng khan Nabôt lôch bơih, sư iung năm hloi tơ mir hơmu Nabôt Pơlei Jêsreel păng iŏk hloi mir 'noh jing mir sư kơdih.

¹⁷ Đơ̆ng noh đei nơ̆r Kră Yang khan kơ Êli pơlei Tisbit:

¹⁸ Iung bĕ jur năm tơ'bơ̆p Ahap pơtao đe Isơrael oei tơ pơlei Samari, dang ei sư oei tơ lăm mir hơmu Nabôt, yua kơ sư iŏk mir hơmu 'noh kơ sư kơdih.

¹⁹ Ih khan kơ sư: “Kră Yang khan: Hăm trŏ kơ ih pơlôch tơ'ngla sư bơih păng tơgar iŏk mir sư?” Ih kư̆m khan kơ sư: Kră Yang khan: ‘Tơ anih mă kŏ liah bơih pham Nabôt, kŏ kư̆m gô liah pham ih.’ ”

²⁰ Ahap khan kơ Êli: “Ơ bơngai ayăt kơ inh, ih rôp tơm măt hă?” Êli tơl: “Inh rôp ih tơm măt boih,” yua kơ ih tĕch akâu ih kơdih wă pơm tơdrong yoch kơnê̆ 'bơ̆t anăp Kră Yang. Na Sư khan:

²¹ ‘Inh gô ăn tơdrong gleh truh kơ ih. Inh gô tơhiong pơtôch lê̆ ih, păng pơrăm pơđĭ hnam Ahap truh tơ đĭ-đăng đĭch dah bơngai rơngei lăm dêh char Isơrael;

²² Inh gô ăn kơ adrĕch hnam ih đei tơdrong răm truh thoi adrĕch hnam Jêrôbôam, kon drŏ-nglo Nêbat păng thoi adrĕch hnam Baasa kon drŏ-nglo Ahija.’ Yua kơ ih pơm tơblĕk wă kơ inh hil păng pơhlŭ bơngai Isơrael pơm yoch.

²³ Kră Yang kư̆m khan gah Jêsebel: ‘Kŏ gô sa sĕch Jêsebel tơ lăm pơlei Jêsreel.’

²⁴ “Bơngai bu adrĕch hnam Ahap, tơdah sư lôch lăm pơlei, kŏ gô sa, bơngai bu lôch tơ bri brah sem păr gô choh sa.”

²⁵ Tơpă, ưh kơ đei bơngai bu thoi Ahap tĕch akâu sư pơm tơdrong yoch kơnê̆ 'bơ̆t anăp Kră Yang, kiơ̆ kơ Jêsebel akăn sư pơhlŭ.

²⁶ Dôm tơdrong sư pơm kơ Kră Yang areh dêh, sư kơkuh kơ rup yang thoi lu bơngai Amôrit kơkuh, lu sư noh kon pơlei pơla mă Kră Yang pơpuh tơlĕch bơih lu sư đơ̆ng anăp lu bơngai Isơrael.

²⁷ Lăp Ahap kơtơ̆ng nơ̆r pơma noh, sư hek ao sư kơdih. Sư iŏk hrŭk ao 'bi păng ơ̆t kơ sŏng sa; sư 'bĭch kơpal 'bi păng chu iŏk đon ala.

²⁸ Kră Yang khan kơ Êli Pơlei Tisbit:

²⁹ “Ih hăm 'bôh Ahap tơjur akâu iŏk đon ala 'bơ̆t anăp Inh ưh? Yua kơ sư tơjur akâu iŏk đon ala 'bơ̆t anăp Inh, na Inh ưh kơ ăn tơdrong pơmat truh, 'bơ̆t chăl sư 'nâu ôh; mă-lei lăm chăl kon drŏ-nglo sư Inh gô ăn tơdrong gleh truh kơ hnam sư.”