Biblia Todo Logo
Bìoball air-loidhne

- Sanasan -

I Pot 20 - Sơ̆p Hlabơar Nơ̆r 'Bok Kei-Dei


Ben Hadat blah Pơlei Samari

1 Ben Hadat pơtao dêh char Siri, sư krao akŭm đĭ-đăng lu linh sư; đei pêng-jĭt 'bar 'nu pơtao kiơ̆ sư. Aseh păng gre aseh kư̆m lơ, lu sư tŏk năm wang Pơlei Samari păng blah.

2 Sư wơh đam sư năm mơ̆t lăm pơlei tơ'bơ̆p Ahap pơtao đe Isơrael, na khan: “'Nâu nơ̆r Ben Hadat khan:

3 ‘Hu maih ih 'noh tơmam inh; đĭ-đăng lu kon akăn ih mă 'lơ̆ng hloh noh tơmam inh ngăl bơih.’ ”

4 Pơtao Isơrael tơl: “Ơ yŏng pơtao inh, kiơ̆ thoi nơ̆r ih khan, inh păng dôm tơmam inh đei 'noh tơmam ih ngăl.”

5 Lu bơngai mă pơtao wơh năm dơ̆ng păng khan: “Ben Hadat khan: ‘Inh wơh bơngai năm khan tơbăt kơ ih: Ih athei jao ăn kơ inh hu maih, lu akăn ih păng lu kon ih.

6 Thoi noh, pơgê dơning lăm jơ 'nâu inh gô wơh đĭch đam inh năm truh tơ hnam ih, lu sư gô chă yuih lăng dôm tơmam kiơ mă lu sư kăl lăm hnam ih păng lăm hnam đĭch đam ih, lu sư iŏk chĕp ba pơđĭ.’ ”

7 Pơtao đe Isơrael kơtơ̆ng thoi noh bơih na sư krao akŭm đĭ-đăng lu 'bok kră lăm dêh char păng khan: “Lu iĕm lăng deh thoi yơ bơngai 'nâu chă đon wă pơrăm lu bơ̆n, yua kơ sư đei wơh boih lu đĭch đam sư wă athei inh pơjao ăn kon akăn inh păng lu hu maih inh kơ sư, inh kư̆m ưh pă gơh sơngah bơih.”

8 Lu đe kră păng đĭ-đăng kon pơlei pơla khan: “Pơtao, ih 'nĕ kơ mơ̆ng nơ̆r sư păng 'nĕ kơ chu sư.”

9 Thoi noh na Ahap khan kơ lu bơngai mă pơtao 'Ben Hadat wơh: “Iĕm athei khan kơ yŏng inh: Dôm tơdrong ih apinh đơ̆ng inh mă adrol 'noh inh gô pơm; mă-lei wơ̆t 'nâu inh ưh kơ gơh pơm ôh?” Lu bơngai mă đơ̆ng Ben Hadat wơh 'noh brŏk roi dôm nơ̆r 'noh.

10 Ben Hadat wơh bơngai nai dơ̆ng tơ'bơ̆p Ahap khan: “Apinh lu yang phak inh mă trăp tơdah 'mui teh tơ Samari tôm mah kơ rim tơpang ti lu linh lăm minh 'nu minh chup.”

11 Na Ahap tơl: “Brŏk khan kơ sư: ‘Bơngai hrŭk ao mam 'nĕ kơ pơang akâu kơdih thoi bơngai mă plôh lê̆ ao.’ ”

12 Ben Hadat oei et tơdrô hơdai hăm lu pơtao lăm kơđông, lăp sư kơtơ̆ng dôm nơ̆r 'noh, na khan hloi kơ lu linh sư: “Iĕm athei hơmet năm blah.” Đơ̆ng noh lu linh năm hloi wă blah pơlei 'noh.


Blah Ben Hadat jei

13 Đei minh 'nu bơngai khan lê̆ adrol năm tơ'bơ̆p Ahap, pơtao đe Isơrael păng khan: “Kră Yang khan: ‘Ih hăm 'bôh ưh minh khŭl linh lơlap 'nâu? Năr 'nâu Inh gô pơjao lu sư lăm tơpang ti ih, wă kơ ih băt Inh bơih Kră Yang.’ ”

14 Ahap jet dơ̆ng: “Bu gô pơm tơdrong 'nâu?” 'Bok khan lê̆ adrol tơl. “'Nâu Kră Yang khan: “Ih athei yua lu bơngai tơdăm bơ̆jang ala kơ lu 'bok pơgơ̆r tơring char gô pơm.’ ” Ahap apinh dơ̆ng. “Lei bu wă pơtơm năm tơblah?” 'Bok khan lê̆ adrol tơl: “Ih bơih.”

15 Na Ahap krao akŭm đĭ-đăng lu bơngai tơdăm bơ̆jang ala kơ lu 'bok pơgơ̆r tơring, đei 'bar-hrĕng pêng-jĭt 'bar 'nu. Sư kư̆m krao akŭm đĭ-đăng lu bơngai Isơrael đei tơpơh-rơbâu 'nu dơ̆ng.

16 Lu Sư lĕch năm 'bơ̆t tŏk-bŏk 'năr dơ̆ng kơplah Ben Hadat hơdai hăm pêng-jĭt 'bar 'nu pơtao buăl dơ̆ng sư et tơdrô suai lăm kơđông.

17 Lu bơngai tơdăm bơ̆jang ala lu 'bok pơgơ̆r tơring char lĕch adrol: 'Ben Hadat wơh bơngai năm chop lăng lu sư; wih roi kơ Ben Hadat. “Đei bơngai lĕch đơ̆ng Pơlei Samari.”

18 Sư khan: “Tơdah lu sư năm tơ âu apinh tơdrong hiôk-hian, lei iĕm athei rong arih; dah mă lu sư năm tơ âu wă tơblah iĕm kư̆m athei rôp arih mơ̆n.”

19 Lu bơngai tơdăm bơ̆jang ala kơ lu 'bok pơgơ̆r tơring char lĕch hlôi kơ pơlei tih boih păng lu linh kiơ̆ đơ̆ng rŏng lu sư.

20 Lu sư pơlôch lu bơngai ayăt 'noh mơ̆ng kơ tơ'bơ̆p 'bơ̆t anăp. Đĭ-đăng lu linh Siri kơdâu tơklah tơklang na lu linh Isơrael druh 'moi. Ben Hadat klaih, kơdâu hao seh hơdai hăm minh 'bar 'nu lu linh hao seh.

21 Pơtao đe Isơrael năm blah lu linh hao aseh, pơlôch lu bơngai Siri lơ dêh.

22 Kơplah noh 'bok khan lê̆ adrol năm dơ̆ng jê̆ pơtao đe Isơrael păng khan: “Ih athei năm pơjing ming lu linh ih mă pran kơtang đơ̆ng, ih athei lăng hơmet mă hơlen tơdrong kiơ wă pơm, yua kơ bơyan puih sơnăm anăp kơnh pơtao Siri gô năm blah ih dơ̆ng.

23 Lu đam Siri bơ̆jang kơ pơtao siri khan kơ pơtao sư: “Yang lu sư 'noh yang kông, thoi noh na lu sư pran hloh kơ bơ̆n. Mă-lei tơdah bơ̆n tơblah hăm lu sư tơ lăm thŭng dơnă, lei sĭt bơ̆n pran hloh kơ lu sư.

24 Apinh pơtao athei pơm thoi âu: Tơjur đĭ lu pơtao 'noh đơ̆ng anih lu sư pơgơ̆r linh, na pôk atŏk lu yŏng linh pơgơ̆r tơplih lu sư.

25 Păng ih athei chă tơmơ̆t linh mă tôm dôm linh ih mă hiong adrol 'noh, chă aseh păng gre aseh kư̆m tôm lei-lăi thoi so; đơ̆ng noh lu bơ̆n gô tơblah hăm lu sư tơ lăm thŭng dơnă. Sĭt lu bơ̆n gô pran hloh kơ lu sư.” Pơtao đe Siri mơ̆ng păng pơm kiơ̆ hloi thoi noh.

26 Lăm sơnăm đơ̆ng rŏng Ben Hadat krao akŭm lu linh Siri tŏk năm tơ Pơlei Aphek wă tơblah hăm lu bơngai Isơrael.

27 Bơngai Isơrael kư̆m krao akŭm đĭ-đăng, hơmet tơmam sa wă tơblah. Kon pơlei Isơrael pơm kơđông lu sư 'bơ̆t anăp tơklă kon pơlei Siri thoi 'bar khŭl bơbe tŏ-ĕt, gah lu linh bơngai Siri lơ dêh 'bĕnh-'bang kơ tơring char.

28 Đei minh 'nu bơngai Kră Yang 'Bok Kei-Dei yua năm jê̆ pơtao Isơrael păng khan: “Kră Yang khan: Yua kơ kon pơlei Siri khan kơ Kră Yang noh yang kông, ưh kơ trŏ kơ yang thŭng dơnă ôh. Thoi noh na inh gô pơjao lu linh lơlap 'nâu lăm tơpang ti ih păng iĕm gô băt Inh bơih Kră Yang.”

29 'Bar khŭl sư tơdơ̆ng tơklă băl lăm tơpơh năr. Năr mă tơpơh lu sư tơblah băl; lăm minh năr lu linh Isơrael pơlôch lu linh Siri yak jơ̆ng hloh minh-hrĕng rơbâu 'nu.

30 Dôm lu bơngai klaih đơ̆ng anih tơblah 'noh kơdâu ôn tơ lăm Pơlei Aphek, mă-lei dur pơlei pơchah kơtĭt lu sư lôch đei 'bar-jĭt tơpơh 'nu. Ben Hadat kư̆m kơdâu mơ̆t lăm pơlei, sư ôn tơ minh anih hlơp.

31 Lu bơngai jang kơ pơtao khan kơ pơtao: “Lu nhôn kơtơ̆ng đe khan pơtao đe Isơrael đei tơdrong mơnat. Dang ei apinh ih ăn kơ nhôn tơ̆n 'bi tơ kơiĕng păng pơ̆n tơlei tơ kơ̆l đơ̆ng noh yơ̆r ti năm tơ'bơ̆p pơtao đe Isơrael. Rŏ lăng sư kư̆m ăn kơ ih arih mơ̆n.”

32 Thoi noh lu sư tơ̆n 'bi tơ kơiĕng păng pơ̆n tơlei tơ kơ̆l lu sư lĕch yơ̆r ti chu thuơ kơ pơtao Isơrael păng khan: “Ben Hadat đĭch đam ih khan: ‘Apinh ih ăn kơ inh arih.’ ” Ahap jet: “Sư oei arih hă? Sư 'noh 'nhŏng oh inh.”

33 Lu bơngai 'noh mơ̆ng nơ̆r pơtao Ahap pơma 'noh 'lơ̆ng tơpă na lu sư lui hloi, khan: “Ben Hadat 'noh 'nhŏng oh ih tơpă.” Ahap khan dơ̆ng: “Lu iĕm năm iŏk sư tơ âu.” Na 'Ben Hadat năm tơ'bơ̆p Ahap. Pơtao Ahap pơtơm 'Ben Hadat hao gre aseh sư.

34 Ben Hadat khan kơ Ahap: “Inh gô pơdrâu ăn kơ ih dôm lu pơlei mă 'bă inh tơgar iŏk đơ̆ng 'bă ih. Ih gô pơm hnam mơdro sa tih tơ lăm Pơlei Đamas, kư̆m thoi 'bă inh đei pơm bơih tơ lăm Pơlei Samari.” Ahap tơl: “Gah inh, gô drơ̆ng ăn kơ ih brŏk kiơ̆ thoi nơ̆r ih pơkă 'nâu.” Thoi noh Ahap pơkă pơkăm pơgơ̆p hăm 'Ben Hadat, đơ̆ng noh ăn kơ Ben Hadat brŏk.


'Bok khan lê̆ adrol khan kơ Ahap

35 Chu nơ̆r Kră Yang, đei minh 'nu lăm lu bơngai khan lê̆ adrol khan kơ buăl sư: “Apinh ih teh inh,” Mă-lei buăl sư ưh kơ teh sư.

36 Na sư khan: “Yua kơ ih ưh kơ chu nơ̆r Kră Yang, na lăp ih weh đơ̆ng inh kơnh dăm-brang gô châu pơlôch ih.” Lăp sư weh, đei minh pôm Dăm-brang châu sư lôch hloi.

37 Đơ̆ng noh bơngai khan lê̆ adrol tơ'bơ̆p bơngai nai dơ̆ng, na sư khan: “Apinh ih teh inh.” Bơngai 'noh teh hloi bơngai khan Lê̆ adrol truh đei rơka.

38 Đơ̆ng noh bơngai khan lê̆ adrol 'noh năm ngôi 'bơ̆t trong gô pơtao. Sư gom muh măt sư hăm che pơm bơngai nai.

39 Lăp pơtao năm brih trong 'noh sư ôr apinh pơtao: “Đĭch đam ih oei lăm anih tơblah; na đei minh 'nu năm ba kơ inh minh 'nu bơngai bơnă păng khan kơ inh: ‘Ih athei wei bơngai 'nâu; tơdah sư kơdâu klĕnh tơ nai, lei tơdrong arih ih gô tơplih kơ sư 'noh, dah mă ih duh minh talâng hu.’

40 Mă-lei kơplah đĭch đam ih oei hăt kơ tơdrong jang 'nâu tơdrong jang to, na bơngai bơnă 'noh kơdâu klĕnh.” Pơtao Isơrael khan kơ sư: “Tơdrong 'noh, kơdih ih gô pŭ iŏk tơdrong sek tơlang.”

41 Đơ̆ng noh sư pơih lê̆ che đơ̆ng gom muh măt sư 'noh na pơtao Isơrael kơnăl sư 'noh bơngai khan lê̆ adrol.

42 Bơngai khan lê̆ adrol 'noh khan kơ pơtao Isơrael: “Kiơ̆ thoi nơ̆r Kră Yang khan: ‘Yua kơ ih achăng bơngai mă Inh jao ăn kơ ih wă kơ ih pơlôch sư. Na tơdrong arih ih gô tơplih tơdrong arih sư, păng tơdrong arih lu kon pơlei ih gô tơplih tơdrong arih lu kon pơlei pơla sư.’ ”

43 Pơtao Isơrael brŏk tơ hnam sư kơdih, lăm char Samari, jơhngơ̆m sư blĕk ơh hơ'ngon ưh pă băt dang yơ.

©Bahnar Bible Association. All rights reserved.

Lean sinn:



Sanasan