I Pot 19 - Sơ̆p Hlabơar Nơ̆r 'Bok Kei-Dei

Êli kơdâu ôn tơ kông Hôrep.

¹ Ahap roi kơ yă Jêsebel dôm tơdrong Êli đei pơm boih păng thoi yơ tơdrong sư yua đao gưm pơlôch lu bơngai khan lê̆ adrol gah Baal hăm.

² Na yă Jêsebel athei đe năm khan kơ Êli: “Năr dơning lăm jơ 'nâu, tơdah inh ưh kơ pơrăm tơdrong arih ih, thoi ih pơrăm tơdrong arih minh 'nu lăm lu sư, lei apinh lu yang phak inh mă trăp.”

³ Thoi noh Êli hli, sư iung kơdâu weh wă pơklaih tơdrong arih sư. Sư năm truh tơ Pơlei Bêrsêba lăm char Juđa, lê̆ lu đam sư oei tơ noh.

⁴ Gah Êli, sư năm tơ char glă dang minh năr kơ trong, sư hơ-oei ngôi 'bơ̆t yơ̆p tơm 'long hơngo, sư apinh 'maih wă kơ jah lôch. “Hrăp bơih, dang ei ơ Kră Yang! Jah iŏk bĕ tơdrong arih inh, yua kơ inh ưh kơ đei kiơ 'lơ̆ng hloh kơ lu 'bok kơdră inh.”

⁵ Na sư 'bĭch 'bơ̆t ala tơm 'long 'noh tep. Blư đei minh 'nu linh jang 'lơ̆ng râu sư, khan: “Iung sa bĕ.”

⁶ Sư iung lăng 'bôh minh tơpei 'bĕng 'bơ̆t kơ̆l anih sư 'bĭch oei 'buh kơpal tơmo ŭnh păng minh pôm get đak, sư iŏk sa păng nhă đak 'noh đơ̆ng noh sư 'bĭch dơ̆ng.

⁷ Linh jang 'lơ̆ng năm tơ sư dơ̆ng wơ̆t mă 'bar râu sư khan: “Iung sa bĕ, yua kơ trong oei ataih dêh.”

⁸ Na sư iung sa păng nhă, sư đei jơhngơ̆m pran hloi đơ̆ng tơmam sa 'noh, đơ̆ng noh sư năm puăn-jĭt năr puăn-jĭt măng dĭng truh tơ Hôrêp kông Kră Yang 'Bok Kei-Dei.

⁹ Truh tơ noh, sư mơ̆t tơ hơgơp tơmo, 'bĭch tep lăm noh minh măng. Đei nơ̆r Kră Yang khan kơ sư: “Ơ Êli ih pơm kiơ tơ âu?”

¹⁰ Sư tơl: “Jơhngơ̆m inh oei adrin yua kơ Kră Yang 'Bok Kei-Dei Tih Hloh, yua kơ bơngai Isơrael sơngah bơih kơ tơdrong pơgơ̆p Ih, pơrăm lê̆ chơnang soi ih, păng iŏk đao gưm pơlôch lu bơngai khan lê̆ adrol mă Ih yua. Pă minh 'nu inh oei arih, na dang ei lu sư kư̆m oei chă wă pơlôch inh.”

¹¹ Kră Yang khan: “Lĕch bĕ păng dơ̆ng 'bơ̆t anăp Kră Yang tơ kơpal kông, yua kơ Kră Yang wă năm trong 'noh.” Đei hloi kial tih tơthu kơtang 'bơ̆t anăp Kră Yang, kial tơthu pơm kơ kông 'noh đah lang păng lu tơmo pơchah đĭ, mă-lei Kră Yang ưh kơ đei lăm kial 'noh. Đơ̆ng rŏng kơ kial hơbŭt 'noh đei teh tơdrŏ, mă-lei Kră Yang kư̆m ưh kơ đei lăm teh tơdrŏ.

¹² Đơ̆ng rŏng kơ teh tơdrŏ đei pla ŭnh; mă-lei Kră Yang kư̆m ưh kơ oei lăm pla ŭnh. Đơ̆ng rŏng kơ pla ŭnh đei nơ̆r hơbôn pơma hơdar.

¹³ Lăp Êli kơtơ̆ng nơ̆r pơma 'noh sư iŏk ao tai gom muh măt sư, păng lĕch dơ̆ng 'bơ̆t 'măng hơgơp tơmo. Đei nơ̆r khan kơ sư, “Ơ Êli, ih pơm kiơ tơ âu?”

¹⁴ Êli tơl: “Jơhngơ̆m inh oei adrin dêh yua kơ Kră Yang 'Bok Kei-Dei Tih Hloh, yua kơ bơngai Isơrael sơngah bơih kơ tơdrong pơgơ̆p Ih, pơrăm lê̆ chơnang soi Ih pơlôch lu bơngai khan lê̆ adrol hăm đao gưm pă minh 'nu inh oei arih, dang ei lu sư kư̆m oei chă wă pơlôch inh.

¹⁵ Kră Yang khan kơ sư: “Ih brŏk hơlơ̆k bĕ trong đêl ih năm 'noh truh tơ Pơlei Đamas. Mưh ih truh tơ noh bơih ih tuh đak rơmă 'bâu phu kơ Hasael pơm pơtao char Siri.

¹⁶ Păng tuh đak rơmă 'bâu phu kơ Jêhu kon drŏ-nglo Nimsi pôk sư pơm pơtao đe Isơrael; đơ̆ng noh ih athei tuh đak rơmă 'bâu phu kơ Êlisê kon drŏ-nglo Saphat đơ̆ng Pơlei Abel Mêhôla jing bơngai khan lê̆ adrol tơplih ih.

¹⁷ Bơngai bu klaih đơ̆ng đao gưm Hasael, Jêhu gô pơlôch sư; bu klaih đơ̆ng đao gưm Jêhu Êlisê gô pơlôch sư.

¹⁸ Gah Inh đei rơih iŏk tơpơh-rơbâu 'nu bơngai Isơrael ưh kơ hơtơ̆p kŭl-tăng 'bơ̆t anăp yang Baal, 'bơ̆r lu sư tam lah chŭm sư ôh.”

Kră Yang krao Êlisê.

¹⁹ Na Êli năm đơ̆ng anih 'noh tơ'bơ̆p hloi Êlisê, kon drŏ-nglo Saphat oei rơuơ chŭn hơdai hăm mơjĭt-'bar đôi rơmo rơuơ nai, sư choh rơuơ đôi rơmo mă mơjĭt-'bar. Êli năm jê̆ sư păng klơ̆m ăn kơ sư ao tai.

²⁰ Êlisê achăng lê̆ rơmo choh sư 'noh kơdâu kiơ̆ Êli, păng khan: “Apinh ih ăn kơ inh brŏk tơ'bơ̆p chŭm mĕ 'bă inh 'mơ̆i, đơ̆ng noh inh gô kiơ̆ ih hloi.” Êli tơl: “Năm brŏk đơ̆ng noh hơlơ̆k tơ âu dơ̆ng, inh đei ưh kơ đei pơm kiơ kơ ih ôh.”

²¹ Êlisê tơklah đơ̆ng Êli brŏk, sư rôp 'bet sa minh đôi rơmo, đơ̆ng noh iŏk 'long rơuơ blah pơm 'long ŭnh 'buh pai 'nhĕm rơmo, đơ̆ng noh pai ăn kơ lu đam sa. Đang boih sư iung năm kiơ̆ Êli pơm jơ̆ng 'bang păng bơ̆jang kơ sư.