I Pot 15 - Sơ̆p Hlabơar Nơ̆r 'Bok Kei-Dei

Abijam pơm pơtao đe Juđa

¹ Lăm sơnăm mă mơjĭt-tơhngam chăl Jêrôbôam kon drŏ-nglo Nêbat pơgơ̆r, Abijam pơtơm pơm pơtao pơgơ̆r dêh char Juđa.

² Sư pơgơ̆r pêng sơnăm lăm Pơlei Jêrusalem. Mĕ sư anăn Maaka kon drŏ-kăn Abisalom.

³ Sư năm kiơ̆ đĭ trong tơdrong yoch mă 'bă sư đei pơm bơih adrol kơ sư; lăm jơhngơ̆m sư ưh kơ pơm tơdrong 'lơ̆ng tơpăt 'bơ̆t anăp Kră Yang 'Bok Kei-Dei sư, thoi jơhngơ̆m 'bok kơdră sư pơm.

⁴ Mă-lei yua kơ Đawit, na Kră Yang 'Bok Kei-Dei ăn kơ sư minh pôm ŭnh kơđeng lăm pơlei Jêrusalem, ăn kơ kon drŏ-nglo sư pơgơ̆r pơtrơp sư, pơm ăn kơ pơlei Jêrusalem oei kơjăp,

⁵ yua kơ Đawit đei pơm bơih 'lơ̆ng tơpăt 'bơ̆t anăp Kră Yang, sư pơm kiơ̆ tôm tơdrong mă Kră Yang tơtă kơ sư lăm đĭ chăl arih sư, lăp minh tơdrong pơm glăi hăm Uri bơngai Hêtit đĕch.

⁶ Rôbôam păng Jêrôbôam tơblah băl ling-lang dĭng đĭ chăl Abijam pơgơ̆r.

⁷ Lu tơdrong jang păng tơdrong Abijam đei pơm bơih, đe chih răk lê̆ lăm sơ̆p hla bơar hơ'mon lu pơtao đe Juđa? Abijam păng Jêrôbôam kư̆m tơblah băl.

⁸ Abijam lôch năm oei hơdai hăm 'bok kơdră sư; đe 'bŭ sư lăm pơlei Đawit. Asa kon drŏ-nglo sư pơgơ̆r pơtrơp sư.

Asa pơm pơtao đe Juđa

⁹ Lăm sơnăm mă 'bar-jĭt chăl Jêrôbôam pơm pơtao đe Isơrael, Asa tŏk pơm pơtao pơgơ̆r char Juđa.

¹⁰ Sư pơgơ̆r puăn-jĭt mônh sơnăm lăm pơlei Jêrusalem. Yă tơm gah 'bă sư anăn Maaka kon drŏ-kăn Abisalom.

¹¹ Asa pơm 'lơ̆ng tơpăt 'bơ̆t anăp Kră Yang, thoi Đawit 'bok kơdră sư đei pơm.

¹² Sư pơpuh tơlĕch lu bơngai drŏ-nglo ngôi kư̆ kă pơm đi đơ̆ng lăm char sư pơgơ̆r păng teh pơchah pơđĭ lu rup yang mă đêl lu 'bok kơdră sư pơm.

¹³ Sư kư̆m plôh tơlĕch yă sư Maaka đơ̆ng pơm yă pơtao lăm hnam pơtao, yua kơ yă sư man gơ̆ng rup yang Asêra drŏ-kăn mă kơnê̆ krưp dêh. Asa kư̆m teh tơpăk lê̆ gơ̆ng pôm yang păng soh rŭk lê̆ tơ lăm thŭng Kidrôn.

¹⁴ Sư ưh kơ yuih hŭt lê̆ ôh lu anih kơjung đe pơm yang, mă-lei jơhngơ̆m Asa pơm 'lơ̆ng 'bơ̆t anăp Kră Yang truh đĭ chăl arih sư.

¹⁵ Sư chĕp ba tah lăm hnam Kră Yang hu, maih păng dôm tơmam kăl đơ̆ng 'bă sư păng đơ̆ng sư kơdih pơyơ̆r.

¹⁶ Asa pơtao đe Juđa, Baasa pơtao đe Isơrael, bre sư tơblah băl hơnơ̆ng truh đĭ chăl arih bre sư.

¹⁷ Baasa pơtao Isơrael tŏk blah char Juđa, đơ̆ng noh sư pơm kơđông pơlei Rama, mă kơjăp wă găn bơngai Juđa kuă ăn lĕch dah mơ̆t tơ dêh char Asa pơtao Juđa.

¹⁸ Kơplah noh, Asa iŏk đĭ hu, maih đơ̆ng lăm Hnam Kră Yang păng đơ̆ng hnam pơtao, pơjao ăn kơ đĭch đam sư păng wơh lu sư năm tơ Ben Hadat kon drŏ-nglo Tabrimmôn, sâu Hêsiôn, pơtao Siri, oei pơgơ̆r tơ pơlei Đamas păng khan:

¹⁹ “Ba athei pơgơ̆p băl, thoi 'bă ba đei pơgơ̆p băl sơ̆; 'nâu tơmam hu, maih inh pơyơ̆r gơih ăn kơ ih. Dang ei ih athei sut lê̆ đĭ đêl ih pơgơ̆p hăm Baasa pơtao Isơrael, wă kơ sư weh ataih đơ̆ng inh.”

²⁰ Ben Hadat chu nơ̆r pơtao Asa, athei lu linh sư năm tơblah hăm lu kon pơlei Isơrael. Sư blah iŏk pơlei Ijôn, pơlei Đan, pơlei Abel Bet Maaka, đĭ char Kinêrot păng đĭ kơ char Naptali.

²¹ Baasa kơtơ̆ng tơdrong 'nâu, sư pơdơh hloi ưh pă pơm kơđông pơlei Rama dơ̆ng păng brŏk oei tơ pơlei Tirsa.

²² Đơ̆ng noh pơtao Asa pơkă kơ đĭ-đăng bơngai Juđa, ưh kơ lê̆ minh 'nu bơngai bu, lu sư pŭ iŏk lu tơmo păng lu 'long tơ̆r mă đêl Baasa yua pơm kơđông pơlei Rama; đơ̆ng noh pơtao Asa yua tơmam 'noh pơm pơlei Gêba lăm char Bênjamin, păng pơlei Mispa.

²³ Tơdrong jang nai mă Asa pơm păng tơdrong pơgơ̆r đei yua, dôm tơdrong sư đei pơm păng dôm lu pơlei sư đei tơiung pơjing đei chih răk lê̆ lăm sơ̆p hla bơar lu pơtao đe Juđa. Kơplah sư đĭ kră bơih, sư jĭ jơ̆ng.

²⁴ Asa lôch năm oei hơdai hăm lu 'bok kơdră sư; păng đe 'bŭ sư hơdai hăm lu 'bok kơdră sư tơ pơlei Đawit 'bok sư. Jêhôsaphat kon drŏ-nglo sư pơgơ̆r pơtrơp sư.

Nađap pơm pơtao đe Isơrael

²⁵ Lăm sơnăm mă 'bar chăl Asa pơm pơtao đe Juđa, Nađap kon drŏ-nglo Jêrôbôam pơm pơtao pơgơ̆r lu bơngai Isơrael, sư pơgơ̆r lăm 'bar sơnăm.

²⁶ Sư pơm tơdrong yoch kơnê̆ 'bơ̆t anăp Kră Yang, năm kiơ̆ trong pơm yoch thoi 'bă sư đei pơm bơih, pơm kơ lu bơngai Isơrael pơm yoch kiơ̆.

²⁷ Baasa kon drŏ-nglo Ahija adrĕch hnam Isakar chă đon wă pơm kơnê̆ kơ sư, lăm kơplah Nađap păng lu bơngai Isơrael wang blah iŏk pơlei Gibêthôn, pơlei lu bơngai Philistin. Na Baasa pơlôch sư.

²⁸ Sơnăm mă pêng lăm chăl Asa pơm pơtao đe Juđa Baasa pơlôch Nađap păng pơm pơtao pơgơ̆r tơplih hloi.

²⁹ Lăp sư 'nao pơm pơtao, sư pơlôch pơđĭ lu bơngai gah adrĕch hnam Jêrôbôam, ưh kơ lê̆ minh 'nu bơngai bu arih, lăm hnam dơnŏ Jêrôbôam sư kư̆m pơlôch pơđĭ kiơ̆ thoi nơ̆r Kră Yang yua 'bơ̆r Ahija đĭch đam Sư pơlei Silô.

³⁰ Tơdrong noh yua kơ đơ̆ng tơdrong yoch Jêrôbôam pơm kơ lu bơngai Isơrael dai pơm yoch păng pơm tơblĕk Kră Yang 'Bok Kei-Dei đe Isơrael.

³¹ Tơdrong jang nai păng dôm tơdrong jang mă Nađap đei pơm đe đei chih lê̆ bơih lăm sơ̆p hla bơar hơ'mon lu pơtao đe Isơrael?

³² Asa pơtao đe Juđa păng Baasa pơtao Isơrael tơblah băl hơnơ̆ng truh đĭ chăl arih bre sư.

Baasa pơm pơtao đe Isơrael

³³ Lăm sơnăm mă pêng lăm chăl Asa pơm pơtao đe Juđa, Baasa kon drŏ-nglo Ahija pơm pơtao pơgơ̆r đĭ-đăng bơngai Isơrael tơ pơlei Tirsa păng sư pơgơ̆r 'bar-jĭt puăn sơnăm.

³⁴ Sư pơm tơdrong yoch kơnê̆ 'bơ̆t anăp Kră Yang, sư năm kiơ̆ trong Jêrôbôam păng tơdrong yoch sư, sư kư̆m pơm ăn kơ bơngai Isơrael dai wang pơm yoch kiơ̆.