I Pot 14 - Sơ̆p Hlabơar Nơ̆r 'Bok Kei-Dei

Ahija khan lê̆ adrol blah Jêrôbôam

¹ Kơplah 'noh Ahija kon drŏ-nglo Jêrôbôam jĭ

² Na Jêrôbôam khan kơ akăn sư. “Ih pơm thoi bơngai nai, wă kơ đe ưh kơ băt ih akăn inh. Na năm tơ Pơlei Silô, Ahija bơngai khan Lê̆ adrol oei tơ noh, sư đei khan lê̆ adrol gah inh gô pơm pơtao lu kon pơlei pơla 'nâu.

³ Ih chĕp ba mơjĭt tŏ 'bĕng mi dôm tŏ 'bĕng 'ngam păng chĕp ba minh pôm get đak sut, na ih năm tơ noh tơ'bơ̆p sư. Sư roi ăn kơ ih gô đei tơdrong kiơ truh kơ kon ba.”

⁴ Akăn Jêrôbôam pơm kiơ̆ thoi noh. Sư iung, năm truh tơ hnam Ahija Pơlei Silô. Măt Ahija ưh kơ bang yua kơ sư đĭ kră bơih.

⁵ Kră Yang khan kơ Ahija: “To akăn Jêrôbôam năm jet ih gah kon drŏ-nglo sư jĭ, na ih athei khan kơ sư păng tơl sư thoi âu. Mưh sư truh, sư pơm bơngai nai.”

⁶ Lăp akăn Jêrôbôam truh 'bơ̆t 'măng, na Ahija kơtơ̆ng re jơ̆ng sư nơnăm na khan kơ sư: “Ơ akăn Jêrôbôam mơ̆t bĕ. Yua kơ kiơ ih pơm bơngai nai? Đei nơ̆r tơtă kơ inh athei inh khan tơbăt kơ ih minh tơdrong sơ'ngon tih krưp.

⁷ Roi bĕ kơ Jêrôbôam 'nâu Kră Yang 'Bok Kei-Dei Isơrael khan: “Inh pôk atŏk ih đơ̆ng lăm kon pơlei pơla, ăn kơ ih pơm pơtao Isơrael kon pơlei pơla inh.

⁸ Inh iŏk lê̆ teh đak đơ̆ng hnam Đawit na pơjao ăn kơ ih; mă-lei ih ưh kơ pơm rok kiơ̆ Đawit đĭch đam Inh, sư wei răk tơdrong juăt Inh păng kiơ̆ nơ̆r Inh tơtă hăm đĭ jơhngơ̆m, sư pơm tơdrong 'lơ̆ng tơpăt 'bơ̆t anăp Inh.”

⁹ Ih pơm kơnê̆ dêh hloh kơ đĭ-đăng lu bơngai adrol kơ ih, pơm kơdih yang plơ̆ng man lu rup yang, wă kơ Inh hil păng hŭt lê̆ Inh tơ rŏng.

¹⁰ Yua kơ tơdrong 'noh na Inh gô ăn tơdrong truh pơmat kơ hnam adrĕch Jêrôbôam, Inh gô pơlôch đĭ lu bơngai drŏ-nglo, mă bơngai rơngei dah đĭch lăm khŭl Isơrael, Inh gô soh hơpuih pơgoh hnam adrĕch Jêrôbôam, thoi đe soh tơmam 'mê̆ dĭng mă goh.

¹¹ Bơngai bu lăm hnam dơnŏ Jêrôbôam, dah sư lôch lăm pơlei kŏ gô hek sa, dah sư lôch tơ bri, sem păr gô choh sa, yua kơ Kră Yang khan thoi noh.

¹² Thoi noh, iung brŏk bĕ, lăp ih wă mơ̆t tơ pơlei kon ih gô lôch.

¹³ Đĭ-đăng lu kon pơlei Isơrael gô nhơ̆m hmoi păng 'bŭ sư; lăm hnam dơnŏ Jêrôbôam lăp minh 'nu đĕch 'bŭ lăm bơsat, yua kơ lăm hnam Jêrôbôam lăp minh 'nu sư đĕch đei jơhngơ̆m 'lơ̆ng 'biơ̆ hăm Kră Yang 'Bok Kei-Dei Isơrael.

¹⁴ Kră Yang Sư kơdih gô tơiung kơ minh 'nu pơm pơtao pơgơ̆r Isơrael, sư gô pơlôch pơđĭ hnam dơnŏ Jêrôbôam lăm năr 'nâu hloi? Tơpă năr 'nâu hloi.

¹⁵ Kră Yang gô teh pơrăm lu bơngai Isơrael thoi 'nhĕt trang gơlăr hoch lăm đak, sư gô buch lê̆ đơ̆ng rơh lu bơngai Isơrael đơ̆ng lăm char 'lơ̆ng rŏ, mă Kră Yang ăn kơ 'bok kơdră lu sư păng pơm kơ lu sư tơklah tơklang tơ pah to đak krong Ơphrat, yua kơ lu sư pơm gơ̆ng rup yang Asera wă tơblĕk Kră Yang.

¹⁶ Yua kơ Jêrôbôam pơm yoch păng pơm ăn kơ lu bơngai Isơrael jing yoch na Kră Yang achăng hŭt lu sư.”

¹⁷ Akăn Jêrôbôam iung brŏk tơ pơlei Tirsa Lăp sư 'nao truh 'bơ̆t 'măng hnam sư, 'bôh kon drŏ-nglo sư lôch bơih.

¹⁸ Đe 'bŭ sư, đĭ-đăng Isơrael nhơ̆m hmoi kơ sư, 'blep thoi nơ̆r Kră Yang yua 'bơ̆r Ahija 'bok khan lê̆ adrol đei khan bơih noh.

¹⁹ Dôm tơdrong jang nai mă Jêrôbôam đei pơm, tơdrong sư tơblah păng tơdrong sư pơgơ̆r, đei chih bơih lăm sơ̆p hla bơar hơ'mon lu pơtao Isơrael.

²⁰ Jêrôbôam pơgơ̆r 'bar-jĭt 'bar sơnăm, đơ̆ng noh sư lôch năm oei hơdai hăm lu 'bok kơdră sư, kon drŏ-nglo sư anăn Nađap tŏk pơgơ̆r pơtrơp sư.

Chăl Rôhôbôam pơgơ̆r Juđa

²¹ Rôbôam kon drŏ-nglo Sôlômôn pơgơ̆r lăm dêh char Juđa; kơplah sư tŏk pơgơ̆r, sư puăn-jĭt mônh sơnăm bơih; sư pơgơ̆r mơjĭt-tơpơh sơnăm tơ Pơlei Jêrusalem, pơlei mă Kră Yang rơih đơ̆ng lăm rim adrĕch adrung Isơrael, wă 'măn Anăn Sư tơ noh. Mĕ pơtao anăn Naama bơngai Ammôn.

²² Khŭl bơngai Juđa pơm yoch kơnê̆ 'bơ̆t anăp Kră Yang. Lu sư pơm yoch tơblĕk Kră Yang hloh kơ lu 'bok yă lu sư pơm sơ̆.

²³ Lu bơngai Juđa kư̆m dai pơm ăn kơ lu sư kơdih hnam kơkuh kơ lu rup yang tơ anih kơjung, pơm gơ̆ng soi păng tơmo, lu gơ̆ng rup yang Asêrim yang drŏ-kăn tơ anih groi kơjung tơ ala rim tơnơm 'long.

²⁴ Đei lu drŏ-kăn ngôi kư̆ kă pơm đi oei tơ lăm char 'noh, lu sư pơm tơdrong yoch kơnê̆ krưp dêh thoi lu adrĕch adrung mă Kră Yang areh pơpuh tơweh lê̆ bơih đơ̆ng anăp lu bơngai Isơrael.

²⁵ Lăm sơnăm mă pơđăm lăm chăl Rôbôam pơgơ̆r, pơtao Êyiptơ anăn Sisak, sư tŏk blah pơlei Jêrusalem.

²⁶ Pơtao noh blah iŏk đĭ tơmam yua đơ̆ng lăm hnam Kră Yang păng đơ̆ng lăm hnam pơtao. Sư kư̆m chĕp ba pơđĭ lu khêl mă Sôlômôn pơm păng maih 'noh.

²⁷ Pơtao Rôbôam wơh bơngai pơm khêl păng kong tơplih kơ khêl 'noh, sư pơjao ăn kơ lu yŏng linh gak 'măng jang hnam pơtao.

²⁸ Rim wơ̆t pơtao năm mơ̆t lăm Hnam Kră Yang, lu bơngai gak kiơ̆ chĕp khêl 'noh, đang bơih lu sư năm ming pơdrâu tơ lăm anih lu bơngai gak noh dơ̆ng.

²⁹ Pôm lu tơdrong jang mă Rôbôam đei pơm păng dôm tơdrong jang nai mă sư pơm bơih, đe đei chih răk lê̆ bơih lăm sơ̆p hla bơar hơ'mon kơ lu pơtao Juđa.

³⁰ Rôbôam hăm Jêrôbôam bre sư tơblah băl ling-lang ưh kơ pơdơh.

³¹ Rôbôam lôch năm oei hơdai hăm lu 'bok kơdră sư. Đe 'bŭ sư hơdai hăm lu 'bok kơdră sư tơ pơlei Đawit. Mĕ sư anăn Naama, bơngai Ammôn. Abijam kon drŏ-nglo sư pơgơ̆r pơtrơp sư.