I Pot 11 - Sơ̆p Hlabơar Nơ̆r 'Bok Kei-Dei

¹ 'Nguaih kơ kon hơdruh Pharaôn, pơtao Sôlômôn hưch kơ lơ adruh bơngai tơmoi nai. Noh lu drŏ-kăn bơngai Môap, Ammôn, Eđôm, Siđôn păng Hêlit.

² Lu adrĕch adrung bơngai noh. Kră Yang khan bơih kơ lu bơngai Isơrael: Iĕm ưh kơ gơh iŏk klo dah iŏk akăn đơ̆ng adrĕch adrung bơngai 'noh; yua kơ lu sư gô pơhlŭ pơlung lu iĕm kiơ̆ kơkuh kơ rup yang lu sư. Mă-lei Sôlômôn oei hưch kơ drŏ-kăn bơngai 'noh.

³ Sư đei tơpơh-hrĕng akăn oei kơ kon adruh pơtao păng đei pêng-hrĕng akăn kơnhŏng, lu sư pơhlŭ pơlung jơhngơ̆m đon Sôlômôn weh đơ̆ng Kră Yang.

⁴ Truh tơ Sôlômôn kră pă kĕ lu akăn sư pơhlŭ pơlung sư kiơ̆ yang lu sư; jơhngơ̆m sư ưh pă chu yom kơ Kră Yang 'Bok Kei-Dei thoi jơhngơ̆m đon Đawit 'bă sư.

⁵ Yua kơ Sôlômôn kơkuh kơ Astoret yang drŏ-kăn yang lu bơngai Siđôn păng chu kiơ̆ kơ Milkôm yang lu bơngai Ammôn yang kơnê̆ dêh.

⁶ Thoi noh Sôlômôn pơm tơdrong yoch kơnê̆ 'bơ̆t anăp Kră Yang păng sư ưh kơ wă chu kiơ̆ Kră Yang hăm đĭ jơhngơ̆m klơm klak thoi Đawit 'bă sư chu yom bơih.

⁷ Kơpal groi gah hơlĕch kơ pơlei Jêrusalem Sôlômôn man minh pôm hnam kơ Kêmôs yang lu bơngai Môap păng kơ yang Môlek yang lu bơngai Ammôn.

⁸ Sư pơm ăn kơ đĭ lu akăn sư bơngai tơmoi thoi noh, na đĭ-đăng lu sư soh tơmam 'bâu phu păng soi kơkuh kơ yang lu sư.

⁹ Kră Yang hil dêh kơ Sôlômôn, yua kơ jơhngơ̆m đon sư weh tơklah đơ̆ng Kră Yang 'Bok Kei-Dei Isơrael, Tơ'ngla mă đei tơ'bôh ăn kơ sư akâu 'bar 'măng bơih.

¹⁰ Khan kơ sư bơih ih 'nĕ kơ kiơ̆ lu yang nai; mă-lei sư ưh kơ chu kiơ̆ nơ̆r Kră Yang tơtă.

¹¹ Na Kră Yang khan kơ Sôlômôn: “Yua kơ ih pơm tơdrong 'nâu, ih ưh kơ wei răk tơdrong Inh pơgơ̆p păng tơdrong juăt Inh tơtă kơ ih, na Inh gô hek lê̆ teh đak mă ih pơgơ̆r 'nâu, asong ăn kơ đĭch đam ih.

¹² Mă-lei yua kơ Đawit 'bă ih, na Inh ưh kơ pơm ôh tơdrong 'nâu kơplah chăl ih dang ei, Inh gô hek teh đak 'nâu đơ̆ng tơpang ti kon drŏ-nglo ih.

¹³ Mă-lei Inh ưh kơ hek asong pơđĭ hloi ôh; mă-lei Inh gô 'măn lê̆ minh adrĕch adrung ăn kơ sư yua kơ Đawit đĭch đam Inh păng yua kơ pơlei Jêrusalem, pơlei mă Inh đei rơih.”

Lu bơngai blah Sôlômôn

¹⁴ Kră Yang atŏk minh 'nu bơngai ayăt tơblah hăm Sôlômôn, 'noh Hađat bơngai Eđôm; sư bơngai adrĕch adrung pơtao Eđôm.

¹⁵ Kơplah Đawit 'nao oei lăm Eđôm na Jôap yŏng linh tŏk năm 'bŭ lu bơngai lôch, đei pơlôch pơđĭ lu bơngai drŏ-nglo lăm char Eđôm.

¹⁶ Jôap păng bơngai Isơrael oei tơ noh tơdrâu khei, dĭng mă lu sư pơlôch pơđĭ lu bơngai drŏ-nglo lăm char Eđôm.

¹⁷ Mă-lei, Hađat hơdai hăm lu bơngai Eđôm đĭch đam 'bă sư kơdâu klĕnh tơ char Êyiptơ kơplah 'noh Hađat oei 'lơ̆p.

¹⁸ Lu sư lĕch đơ̆ng char Midian năm tơ char Paran; lu sư rôp chông ba bơngai Paran năm tơ char Êyiptơ tơ'bơ̆p pơtao Pharaôn. Pơtao Pharaôn ăn kơ sư hnam oei, tơmam sa păng mir chŭn.

¹⁹ Pơtao Pharaôn mơnat kơ Hađat tih dêh, na sư ăn kơ Hađat oei kơ oh akăn sư, wă khan oh yă Tahpênes akăn pơtao Pharaôn.

²⁰ Oh yă Tahpênes tơpŭ ăn kơ sư kon drŏ-nglo anăn sư Gênubat, dĭng Gênubat ưh pă mŏm bơih na Tahpênes iŏk rong sư tơ lăm hnam pơtao. Tơ noh Gênubat wơ̆ 'lŏ oei hơdai hăm lu kon pơtao Pharaôn.

²¹ Kơplah Hađat oei tơ dêh Êyiptơ kơtơ̆ng ang Đawit lôch năm oei hơdai hăm lu 'bok kơdră sư, păng Jôap yŏng linh kư̆m đĭ lôch bơih, na sư khan kơ pơtao Pharaôn: Apinh ih ăn kơ inh brŏk tơ dêh char inh kơdih,

²² “Mă-lei Pharaôn tơl sư: Ih oei hơdai inh tơ âu hăm đei kơ'bah tơdrong kiơ na ih 'maih brŏk tơ dêh char ih kơdih? Na sư tơl: “Huay kơ'bah tơdrong kiơ ră.” Mă-lei apinh ih ăn kơ inh brŏk tơ dêh char inh kơdih.

²³ Kră Yang 'Bok Kei-Dei ăn minh 'nu ayăt hăm sư, bơngai nai dơ̆ng anăn sư Rêson kon drŏ-nglo Êliađa, kơdâu klĕnh đơ̆ng yŏng sư Hadadêser pơtao char Sôba.

²⁴ Kơplah Đawit pơlôch linh pơtao Sôba, na Rêson krao akŭm lơ bơngai kiơ̆ sư, na sư pơm yŏng pơgơ̆r lu linh tơklah 'noh, năm truh tơ pơlei Đamas oei tơ noh na pôk sư kơdih pơm pơtao plei Đamas.

²⁵ Rêson minh 'nu bơngai ayăt hăm lu bơngai Isơrael truh đĭ chăl pơtao Sôlômôn pơgơ̆r păng pơm dôm tơdrong kơnê̆ thoi Hađat đei pơm; sư pơgơ̆r dêh char Aram păng sư blah bơngai Isơrael.

Jêrôbôam iung blah Sôlômôn.

²⁶ Jêrôbôam kon drŏ-nglo Nêbat, bơngai Êphraim oei tơ pơlei Sêrêđa, sư đĭch đam Sôlômôn; mĕ sư adro, anăn Sêrua; sư wă iung blah pơtao Sôlômôn mơ̆n.

²⁷ 'Nâu tơdrong yua kơ kiơ mă sư iung blah pơtao: Sôlômôn man tơiung dur găn păng hơmet ming dur mă hlôh pơchah lăm pơlei Đawit 'bă sư.

²⁸ Jêrôbôam sư minh 'nu bơngai pran hơgei; Sôlômôn 'bôh minh 'nu bơngai tơdăm pơnam hơgei bơ̆jang, na Sôlômôn ăn kơ sư pơm yŏng pơgơ̆r lu bơngai jang apah lăm adrĕch Jôsep.

²⁹ Kơplah 'noh Jêrôbôam lĕch đơ̆ng pơlei Jêrusalem rok trong, Ahija bơngai khan lê̆ adrol pơlei Silô tơ'bơ̆p sư, Ahija hrŭk minh blah ao tai 'nao, 'bar 'nu măr sư đĕch oei tơ 'noh.

³⁰ Ahija iŏk ao tai 'nao mă sư oei hrŭk 'noh hek pơm mơjĭt-'bar hlak.

³¹ Đơ̆ng noh sư khan kơ Jêrôbôam: “Iŏk bĕ kơ ih mơjĭt hlak, Kră Yang 'Bok Kei-Dei Isơrael đei khan: 'Nâu, Inh gô iŏk hek lê̆ dêh char 'nâu đơ̆ng ti Sôlômôn, gô ăn kơ ih mơjĭt adrĕch adrung.

³² Mă-lei yua kơ Đawit đĭch đam Inh păng Jêrusalem pơlei mă Inh rơih iŏk boih, đơ̆ng rim adrĕch adrung Isơrael Inh gô lê̆ kơ sư minh adrĕch.

³³ Inh pơm thoi noh yua kơ sư achăng lê̆ Inh năm kơkuh kơ Astoret yang drŏ-kăn lu bơngai Siđôn, Kêmôs yang lu bơngai Môap, Milkôm yang lu bơngai Ammôn, sư ưh pă năm kiơ̆ trong Inh, ưh pă pơm 'lơ̆ng 'bơ̆t anăp Inh, păng kư̆m ưh kơ wă răk tơdrong juăt Inh păng nơ̆r Inh tơtă thoi Đawit, 'bă sư đei pơm.

³⁴ “Mă-lei ră Inh ưh kơ iŏk đĭ ôh teh đak đơ̆ng tơpang ti Sôlômôn, lê̆ kơ sư oei pơgơ̆r đĭ chăl arih sư, yua kơ Đawit đĭch đam Inh, Inh rơih iŏk boih, sư boih wei răk nơ̆r Inh tơtă păng pơm kiơ̆ dôm tơdrong juăt Inh.

³⁵ Mă-lei inh gô iŏk teh đak đơ̆ng kon drŏ-nglo sư, na ăn kơ ih pơgơ̆r mơjĭt adrĕch adrung.

³⁶ Inh gô ăn minh adrĕch adrung kơ kon drŏ-nglo sư wă kơ Đawit đĭch đam Inh oei đei minh pôm ŭnh kơđeng ling-lang 'bơ̆t anăp Inh, lăm pơlei Jêrusalem, pơlei mă Inh rơih iŏk wă 'măn Anăn Inh lăm noh.

³⁷ Inh rơih iŏk ih, ăn kơ ih pơm pơtao pơgơ̆r lu bơngai Isơrael, ih gô pơgơ̆r đĭ-đăng kiơ̆ kơ jơhngơ̆m ih wă.

³⁸ Tơdah ih chu kiơ̆ nơ̆r Inh pơkă, năm lăm trong Inh, pơm 'lơ̆ng tơpăt 'bơ̆t anăp Inh, hăm wei răk khôi juăt Inh păng nơ̆r Inh tơtă thoi Đawit đĭch đam Inh đei pơm, lei Inh gô oei hơdai ih. Inh gô pơm kơ adrĕch hnam ih kơjăp thoi Inh đei pơm kơ Đawit păng Inh gô ăn bơngai Isơrael kơ ih.

³⁹ Thoi ei na inh gô phak lu adrĕch adrung Đawit mă-lei ưh kơ ling-lang ôh.”

⁴⁰ Băt thoi noh Sôlômôn chă hloi wă pơlôch Jêrôbôam mă-lei Jêrôbôam iung hăt hot kơdâu ôn tơ dêh Êyiptơ, năm tơ Sisak pơtao Êyiptơ; păng oei hloi tơ pơtao Êyiptơ dĭng truh tơ Sôlômôn lôch.

Sôlômôn lôch

⁴¹ Dôm tơdrong jang nai Sôlômôn pơm, đĭ-đăng tơdrong kiơ pơtao Sôlômôn pơm păng tơdrong gơh hơgei pơtao đe đei chih răk bơih lăm sơ̆p hla bơar hơ'mon Sôlômôn?

⁴² Sôlômôn pơgơ̆r oei tơ pơlei Jêrusalem, pơgơ̆r đĭ-đăng bơngai Isơrael lăm puăn-jĭt sơnăm.

⁴³ Đơ̆ng noh sư lôch sư năm oei hơdai hăm lu 'bok kơdră sư păng đe 'bŭ sư lăm pơlei Đawit, 'bă sư, Rôbôam kon drŏ-nglo sư pơgơ̆r pơtrơp sư.