I Pot 10 - Sơ̆p Hlabơar Nơ̆r 'Bok Kei-Dei

¹ Wă yă pơtao dêh char Sêba kơtơ̆ng đe ư-ang kơ pơtao Sôlômôn đơ̆ng anăn Kră Yang, sư năm tơ noh wă pơlong lăng tơdrong hơgei Sôlômôn hăm tơdrong pơpơn tơnat.

² Yă pơtao sư truh tơ pơlei Jêrusalem hơdai hăm lơ bơngai lơ aseh lăk-đa chơ pơgang 'bâu phu, đei maih lơ păng lu tơmo gĭt kư̆m lơ. Lăp sư năm truh tơ Sôlômôn bơih, sư roi kơ pơtao Sôlômôn dôm đon sư tơchĕng wă jet 'noh.

³ Sôlômôn tơl tơwih dôm nơ̆r sư jet 'noh. Ưh kơ đei nơ̆r jet ayơ hlơp mă Sôlômôn ưh kơ băt tơl tơwih ăn kơ sư.

⁴ Lăp yă pơtao dêh char Sêba 'bôh dôm tơdrong gơh hơgei Sôlômôn păng hnam pơtao sư đei pơm,

⁵ tơmam sŏng sa kơpal gơ'bang, tang-dŏ lu bơngai jang sư hơ-oei, tơdrong jang lu đĭch đam sư, hơbĕn ao lu sư hrŭk, lu bơngai năm ba kơchŏk đak nhă pơtao păng dôm tơmam soi pơyơ̆r lăm Hnam kơkuh kơ Kră Yang, yă pơtao ưh pă gơh pơma kiơ.

⁶ Sư khan kơ pơtao Sôlômôn: “Dôm tơdrong inh kơtơ̆ng đe roi lăm char inh gah nơ̆r pơma păng tơdrong gơh hơgei ih trŏ tơpă bơih.

⁷ Kơplah inh tam mă truh tơ âu păng măt inh ưh tam mă 'bôh inh ưh kơ lui ôh dôm tơdrong mă đe roi 'noh; tơdrong mă inh kơtơ̆ng lăp minh puăt tơdrong gơh hơgei păng tơdrong mơdrŏng ih oei hloh kơ dôm tơdrong inh kơtơ̆ng.

⁸ Pŭn hiôk tih tơpă kơ lu đĭch đam ih bơngai mă oei hơdai ih! Lu bơngai mă oei awih awăn 'bơ̆t anăp ih ling-lang păng kơtơ̆ng dôm tơdrong gơh hơgei ih.

⁹ Kơkuh bơnê kơ Kră Yang 'Bok Kei-Dei ih, yua kơ Sư lăp đon kơ ih ăn kơ ih hơ-oei kơpal tang-dŏ pơtao lu bơngai Isơrael! Yua kơ Kră Yang 'mêm kơ Isơrael ling-lang, thoi noh na Sư ăn kơ ih pơm pơtao wei-lăng wă kơ ih pơm tơdrong trŏ păng 'lơ̆ng tơpăt.

¹⁰ Yă pơtao ăn kơ pơtao Sôlômôn minh-hrĕng 'bar-jĭt talâng (kĭ) maih, ăn lơ 'long pơgang 'bâu phu păng lu tơmo gĭt. Ưh tam đei bu chĕp 'long pơgang 'bâu phu lơ dang yă pơtao dêh Sêba chĕp ba ăn kơ pơtao Sôlômôn.

¹¹ Kŭm đei duk Hiram chơ ba maih đơ̆ng dêh char Ôphir, sư kư̆m chơ ba 'long kơte păng tơmo gĭt lơlap.

¹² Pơtao yua 'long kơte pơm jrăng tơm Hnam Kră Yang păng hnam pơtao, păng lu brŏ dung, tĭng-nĭng ăn kơ lu bơngai hơri. Đơ̆ng năr noh truh dang ei ưh kơ đei bu chơ ba 'long kơte lơ dang noh.

¹³ Pơtao Sôlômôn ăn kơ yă pơtao dêh Sêba dôm tơmam kiơ sư wă, dôm tơmam sư apinh, ưh kơ jô̆ dôm tơmam mă pơtao Sôlômôn juăt ăn kơ sư adrol. Đơ̆ng noh yă pơtao păng lu đĭch đam sư wih brŏk tơ dêh sư kơdih.

Sôlômôn mơdrŏng tih

¹⁴ Lăm rim sơnăm Sôlômôn sư ra maih đei 'bar-jĭt 'bar-rơbâu pơđăm-hrĕng kĭ.

¹⁵ Ưh kơ jô̆ maih iŏk đơ̆ng lu bơngai mơdro păng đơ̆ng lu anih tĕch mơdro hăm lu teh đak 'nguaih, đơ̆ng đĭ lu pơtao dêh Arơ̆p păng đơ̆ng lu yŏng pơgơ̆r tơ rim char chĕp ba ăn kơ sư.

¹⁶ Pơtao Sôlômôn pơm 'bar-hrĕng tŏ khêl tih păng maih hling hơtăng. Lăm rim kơ minh hlak khêl noh yua dang puăn kĭ maih.

¹⁷ Pơtao kư̆m pơm pêng-hrĕng hlak khêl iĕ păng maih hling hơtăng, lăm rim kơ minh hlak khêl noh yua dang tơ 'bar kĭ. Pơtao tah 'măn khêl 'noh lăm hnam Bri char Liban.

¹⁸ Pơtao kư̆m đei pơm minh pôm tang-dŏ tih hăm bơla rôih, bah maih se.

¹⁹ Tang-dŏ 'nâu đei tơdrâu kơnao, mă kơjung hloh 'bơ̆t gơning rŏng sư wĭl đei pơm hơgơn ti 'bar pah tang-dŏ păng 'bơ̆t cheng hơgơn ti đei 'bar tŏ rup dăm-brang.

²⁰ Kŭm đei mơjĭt-'bar to rup dăm-brang nai dơ̆ng, 'bơ̆t rim kơ̆l tơdrâu kơ 'nao: Ưh tam đei dêh char ayơ mă pơm tang-dŏ pơtao thoi noh.

²¹ Đĭ-đăng kơchŏk pơnhan wă nhă tă kơ pơm hăm maih ngăl păng đĭ-đăng dôm tơmam yua lăm hnam pơtao tơ Bri char Liban tă kơ pơm păng maih rơgoh, ưh kơ đei tơmam kiơ pơm păng hu. Lăm chăl pơtao Sôlômôn, hu ưh kơ gĭt ôh.

²² Yua kơ pơtao đei lơ duk đơ̆ng Tarsis lăm đak dơsĭ hơdai hăm duk Hiram, lăm pêng sơnăm minh 'măng brŏk chơ ba maih, hu, bơla rôih, kuĕnh păng hơmră.

²³ Pơtao Sôlômôn bơih mơdrŏng păng gơh hơgei đe ư-ang hloh kơ đĭ-đăng pơtao lăm teh đak 'nâu.

²⁴ Đĭ-đăng kon bơngai lăm teh đak 'nâu chă wă 'maih tơ'bơ̆p Sôlômôn, wă mơ̆ng tơdrong gơh hơgei đơ̆ng Kră Yang 'Bok Kei-Dei ăn kơ sư.

²⁵ Rim sơnăm, bu năm kư̆m chĕp ba tơmam pơyơ̆r ăn kơ pơtao, mơ'nah pơm păng hu mơ'nah pơm păng maih, hơbĕn ao, đao hơlă, đak pơgang 'bâu phu, aseh, aseh iĕ.

²⁶ Pơtao Sôlômôn akŭm pơđĭ gre aseh păng aseh, minh-rơbâu puăn-hrĕng gre aseh păng mơjĭt-'bar rơbâu aseh. Sư 'măn gre aseh lăm lu pơlei lu linh đei lu gre aseh jê̆ pơtao tơ Pơlei Jêrusalem.

²⁷ Pơtao Sôlômôn pơm kơ hu đe lăng ưh kơ gĭt thoi tơmo hmă đĕch lăm pơlei Jêrusalem păng 'long hơngo lơ thoi 'long hơra chăt tơ jơ̆ng kông groi.

²⁸ Pơtao Sôlômôn chă aseh đơ̆ng dêh char Êyiptơ păng char Kue; lu bơngai mă pơtao Sôlômôn yua wă mơdro ăn kơ sư năm tơ char Kue chă răt lu sư răt huay kơ kăp dêh.

²⁹ Đe răt minh pôm gre aseh đơ̆ng char Êyiptơ dang tơpơh kĭ hu, minh pôm aseh đe răt dang minh kĭ tơpơh lang hu. Lu bơngai mă pơtao Sôlômôn pơjao tơdrong jang mơdro mơchan noh tĕch đơ̆ng tơ pơtao bơngai Hêtit păng pơtao Aram.