I Pet 3 - Sơ̆p Hlabơar Nơ̆r 'Bok Kei-Dei

¹ Kư̆m lei-lăi thoi noh, lu bơngai drŏ-kăn, iĕm athei chu yom kơ klo iĕm. Dah klo iĕm ưh kơ lui kơ nơ̆r 'Bok Kei-Dei, iĕm kư̆m athei pơm 'lơ̆ng kơ sư ling-lang; khŏm khŏm sư kư̆m lui mơ̆n mă khan ưh kơ đei bu bơtho.

² Sư 'bôh tơdrong iĕm lui kơ 'Bok Kei-Dei hăm pơm 'lơ̆ng, sư gô pơm kiơ̆.

³ Dah iĕm wă kơ đe băt kơ iĕm bơngai 'lơ̆ng, ưh kơ kăl kơ iĕm pơm sŏk pơ'lơ̆ng ôh, ưh kơ kăl iĕm 'bot pơrŏ tơkhiĕn maih, 'băk anam, dah hrŭk hơbĕn ao kăp jên.

⁴ Bơ̆n wă kơ đe băt kơ bơ̆n bơngai 'lơ̆ng, bơ̆n athei ming jơhngơ̆m đon bơ̆n đĕch. Tơ̆ng jơhngơ̆m đon bơ̆n dim gơh găt hăm đe, noh kư̆m dang bơ̆n pơguăng akâu bơ̆n hăm tơmam mơ̆n. Tơmam thoi noh huay kơ hach răm, pơguăng akâu thoi noh 'Bok Kei-Dei lăp đon.

⁵ Lu bơngai drŏ-kăn kră sơ̆, lu sư pơguăng akâu thoi noh, lui gơnang kơ 'Bok Kei-Dei đĭ jơhngơ̆m, chu yom kơ klo sư, dôm noh đĕch mă-lei đe băt kơ sư bơngai 'lơ̆ng boih.

⁶ Yă Sara sơ̆ kư̆m thoi noh, sư chu yom kơ klo sư Abraham păng anăn Abraham yŏng tơ'ngla sư. Dah iĕm pơm 'lơ̆ng thoi sư, iĕm huay kơ hli kơ đe jô̆ kơ iĕm bơngai kơnê̆ ôh păng iĕm kư̆m dang kon sâu yă Sara mơ̆n.

⁷ Lu bơngai drŏ-nglo kư̆m lei-lăi, iĕm athei pơm 'lơ̆ng kơ akăn iĕm, iĕm athei mơnat kơ sư 'biơ̆ yua kơ sư bơngai drŏ-kăn tơrăn hloh kơ iĕm; yua kơ tơdrong arih 'Bok Kei-Dei ăn tôm biĕm arih, ưh kơ sĭ ăn pôm drŏ-nglo đĕch ôh. Dah iĕm ưh kơ chu thoi noh tơdrong iĕm krao khan kơ 'Bok Kei-Dei ưh kơ yua kiơ boih.

'Mêm băl thoi 'nhŏng oh

⁸ Đơ̆ng âu tơ anăp đĭ-đăng kơ bơ̆n athei pơgơ̆p băl minh jơhngơ̆m minh đon, băt 'mêm mơnat dih băl, iŏk jơhngơ̆m đon dim hơlăng băl, 'nĕ pơang băl.

⁹ Mă đe pơm kơnê̆ kơ bơ̆n, bơ̆n 'nĕ pơm tơwih kơ đe; mă đe pơma kơnê̆ kơ bơ̆n, bơ̆n 'nĕ pơma tơwih kơ đe, bơ̆n rai krao khan apinh 'Bok Kei-Dei mơnat kơ sư dơ̆ng. Bĭ 'Bok Kei-Dei kư̆m mơnat kơ bơ̆n na Sư krao iŏk bơ̆n jing kon Sư.

¹⁰ Tơdrong noh trŏ thoi đe chih lăm sơ̆p hla bơar Sư thoi âu: “Bơngai bu wă kơ arih hiôk jơnap, bơngai noh athei gơ̆t 'bơ̆r sư pơma kơnê̆, 'nĕ kơ pơma hơlĕnh;

¹¹ 'nĕ pă pơm dôm tơdrong kơnê̆, athei pơm tơdrong 'lơ̆ng ling-lang đĕch, adrin pơhiôk dih băl mă hơiă.

¹² Yua kơ 'Bok Kei-Dei wei-lăng lu bơngai 'lơ̆ng ling-lang, păng mơ̆ng tơdrong lu sư krao khan; gah lu bơngai pơm kơnê̆, 'Bok Kei-Dei hil dêh.”

¹³ Dah bơ̆n pơm 'lơ̆ng ling-lang, ưh kơ đei bu pơm kơnê̆ kơ bơ̆n ôh.

¹⁴ Dah đe pơm kơnê̆ kơ bơ̆n yua kơ bơ̆n pơm 'lơ̆ng, noh bơ̆n rai hiôk hloh. Iĕm 'nĕ kơ hli kơ tơdrong lu sư pơm, iĕm 'nĕ kơ tơrơ kơ tơdrong lu sư ngơ̆r.

¹⁵ Mă-lei gah Yêsu Krist bơ̆n athei chu yom kơ Sư yua kơ Sư Kră Yang bơ̆n. Păng bơ̆n athei kơchăng ling-lang wă kơ gơh tơl tơwih kơ đe dôm tơdrong đe wă jet bơ̆n yua kơ kiơ bơ̆n lui. Mă-lei bơ̆n athei tơl tơwih kơ sư mă 'lơ̆ng mă hiôk.

¹⁶ Thoi noh bơ̆n athei pơm 'lơ̆ng tơpăt ling-lang, wă kơ lu bơngai mă pơjăm bơ̆n kiơ̆ tơdrong Yêsu, sư jing mơlâu yua kơ sư ưh kơ 'bôh tơdrong bơ̆n pơm yoch kiơ.

¹⁷ Phŏ phŏ 'Bok Kei-Dei wă kơ bơ̆n pơmat mơ̆n mă khan bơ̆n pơm 'lơ̆ng. Na tơ̆ng đe pơmat bơ̆n yua kơ bơ̆n pơm 'lơ̆ng, noh bơ̆n hiôk hloh kơ tơdrong đe pơmat bơ̆n yua kơ bơ̆n pơm kơnê̆.

¹⁸ Yua kơ Yêsu Krist sơ̆ Sư kư̆m lôch pơmat yua kơ tơdrong yoch bơ̆n thoi noh mơ̆n wă kơ bơ̆n klaih đơ̆ng tơdrong yoch gơh oei hăm 'Bok Kei-Dei. Sư 'lơ̆ng dêh ưh kơ đei yoch kiơ, mă Sư lôch tang bơ̆n bơngai kơnê̆. Mă Sư lôch minh 'măng noh boih ưh pă layơ wă lôch dơ̆ng. Đe pơlôch akâu Sư, mă bơhngol Sư ưh kơ lôch ôh.

¹⁹ Na bơhngol Sư năm bơtho bơhngol lu bơngai lôch mă 'Bok Kei-Dei oei phak.

²⁰ Lu bơngai noh sơ̆ lu sư ưh kơ chu lui kơ 'Bok Kei-Dei kơplah Nôê oei pơm duk sơ̆. 'Bok Kei-Dei chang gô lu sư lui ră, mă-lei lu sư kuă kơ lui. Lăp tơhngam 'nu đĕch lui kơ 'Bok Kei-Dei, lu sư mơ̆t lăm duk na huay kơ lôch kơ đak lơ̆p.

²¹ Dang ei kư̆m lei-lăi thoi noh, bơ̆n gơnang kơ Yêsu Krist iung arih đơ̆ng lôch păng bơ̆n iŏk 'batem tơ đak wă kơ klaih đơ̆ng tơdrong phak. Ưh kơ sĭ bơ̆n iŏk 'batem wă ôp 'nhao rơgoh akâu bơ̆n mơgrĭ ôh. Bơ̆n iŏk 'batem wă pơtih gia kơ tơdrong bơ̆n apinh 'Bok Kei-Dei ăn kơ bơ̆n lê̆ đĭ tơdrong yoch jing bơngai 'lơ̆ng.

²² Yêsu Krist iung arih tŏk tơ plĕnh oei gah 'ma kơ 'Bok Kei-Dei. Sư pơgơ̆r đĭ lu linh jang, lu yŏng pơgơ̆r lu linh jang, đĭ lu yang nai.