I Kor 9 - Sơ̆p Hlabơar Nơ̆r 'Bok Kei-Dei

¹ Dah inh wă, inh gơh pơm tôm tơdrong kiơ̆ thoi iĕm mơ̆n. Inh boih jơ̆ng 'bang Yêsu; inh 'bôh Sư tơpă, Sư Yang pơm Yŏng pơgơ̆r bơ̆n; păng iĕm lui kơ Sư đơ̆ng Sư tơgŭm inh bơtho iĕm.

² Mă đe nai khan inh bơngai ưh kơ trŏ kơ jơ̆ng 'bang Yêsu kư̆m bưh mơ̆n, mă-lei gah iĕm, iĕm băt kơ inh bơngai jơ̆ng 'bang Yêsu tơpă, yua kơ iĕm lui kơ Sư đơ̆ng inh bơtho iĕm.

³ Rim kơ đe jô̆ kơ inh khan ưh kơ trŏ kơ jơ̆ng 'bang Yêsu Krist krô inh kư̆m khan kơ lu sư thoi noh hei mơ̆n.

⁴ Nhi 'Barna'ba bơngai jang tơdrong 'Bok Kei-Dei ưh kơ gơh apinh tơmam sa iĕm ôh hă?

⁵ Dah nhi đei akăn kư̆m bơngai lui, na juăt kơ anhăk thoi đe Pêtrôs, thoi lu đe oh Yêsu, thoi lĕ lu jơ̆ng 'bang Yêsu nai, lê̆ kơ lu bơngai lui 'me sa sư, kư̆m gơh mơ̆n dah kiơ?

⁶ Dah lê̆ kơ nhi 'me sa kơdih đĕch?

⁷ Lu bơngai pơm linh ưh kơ biơh layơ 'me sa kơdih ôh. Yŏng sư apah jên rim khei. Bơngai jang mir, bơngai 'noh gô sa tơmam đơ̆ng mir sư mơ̆n. Lu bơngai rong kon triu, lu sư sa đak toh kon triu.

⁸ Inh khan thoi noh ưh kơ sĭ inh pơma kiơ̆ kơ đon kon bơngai đĕch ôh, tơ lăm sơ̆p hla bơar tơdrong juăt Môis kư̆m bơtho khan thoi noh mơ̆n.

⁹ Tơ lăm sơ̆p hla bơar tơdrong juăt Môis đei chih thoi âu: “Iĕm 'nĕ kơ trôp 'bơ̆r rơmo kơplah sư oei jang juă hơnong 'ba.” 'Bok Kei-Dei pơma thoi noh Sư pơma gah tơdrong Sư mơnat kơ rơmo,

¹⁰ dah Sư pơma pơtih gia tơdrong Sư mơnat kơ kon bơngai bơ̆n? Sư pơma thoi noh pơtih gia tơdrong Sư mơnat kơ kon bơngai bơ̆n. Lu bơngai pơtăm 'ba, sư gô hơmĕng kơ đei 'ba 'noh tơpă, lu bơngai kĕch 'ba sư hơmĕng kơ đei sa 'ba 'noh tơpă.

¹¹ Nhôn thoi lĕ lu bơngai pơtăm 'ba, wă khan nhôn bơtho iĕm tơdrong 'Bok Kei-Dei. Dah nhôn bơngai bơtho iĕm tơpă, nhôn ngêh kơ tơmam đơ̆ng iĕm apah păng nhôn gơh iŏk tơmam iĕm 'noh wă 'me sa nhôn.

¹² Iĕm 'me sa lu bơngai nai mă bơtho iĕm, iĕm tơchĕng khan trŏ. Tơdrong 'noh dah nhôn truh tơ iĕm, iĕm 'me nhôn kư̆m trŏ loi mơ̆n. Mă-lei đơ̆ng sơ̆ nhôn ưh kơ đei athei iĕm 'me nhôn ôh, nhôn adrin jang sa kơdih đĕch, wă kơ iĕm huay ơh sơ'ngon kơ tơdrong nhôn bơtho iĕm gah tơdrong 'nao 'lơ̆ng Yêsu Krist.

¹³ Iĕm kư̆m băt mơ̆n dôm lu bơngai jang tơ lăm hnam akŭm 'Bok Kei-Dei tơm, lu sư sa tơmam đơ̆ng lăm hnam akŭm 'noh. Lu sư sa dôm lu tơmam đe pơyơ̆r kơ 'Bok Kei-Dei păng dôm lu tơmam đe ăn wă sơmah kơ 'Bok Kei-Dei.

¹⁴ Kră Yang Yêsu Krist kư̆m athei bơ̆n 'me sa lu bơngai jang tơdrong 'nao 'lơ̆ng Sư mơ̆n.

¹⁵ Mă-lei gah inh đơ̆ng sơ̆ ưh kơ ăn iĕm 'me inh ôh. Mă inh chih kơ iĕm kơthơ âu ưh kơ sĭ inh wă iĕm 'me inh ôh. Inh lôch kơ rơwĕt kư̆m bưh, inh ưh kơ layơ wă kơ đe 'me inh. Inh pôm wă kơ đe băt kơ inh gơh jang sa 'me akâu kơdih khŏm khŏm đĕch.

¹⁶ Ưh kơ sĭ inh wă kơ đe ư-ang kơ inh chă bơtho tơdrong 'nao 'lơ̆ng Sư ôh. Inh bơtho tơdrong 'nao 'lơ̆ng Sư yua kơ đơ̆ng Sư wơh inh. Dah inh ưh kơ chu chă bơtho tơdrong 'nao 'lơ̆ng Sư, inh đei tơdrong pơmat-tat dêh.

¹⁷ Dah inh jang bơtho đe yua kơ inh wă kơdih đĕch, lei inh gơh iŏk jên đe apah. Mă-lei inh ưh kơ gơh iŏk, yua kơ Kră Yang wơh inh jang, na inh athei jang ăn kơ Sư đĕch.

¹⁸ Na iĕm hăm băt inh gô đei tơdrong apah kiơ? Inh jang bơtho tơdrong 'nao 'lơ̆ng Sư mă-lei kuă kơ iŏk sa jên đơ̆ng đe apah, dah inh iŏk trŏ ră mơ̆n. Tơdrong apah inh wă khan tơdrong inh hiôk lăm jơhngơ̆m gơh bơtho đe, đe huay kơ kăl kơ 'me sa inh.

¹⁹ Mă tơpă inh bơngai rơngei, ưh kơ đei đĭch bu ôh, mă-lei inh dang pơm đĭch kơ đĭ-đăng bơngai yua kơ inh wă pơlung lơ bơngai lui kơ Yêsu Krist.

²⁰ Kơplah inh chă bơtho lu bơngai Juđê, inh kư̆m pơm kiơ̆ tơdrong juăt lu sư mơ̆n wă kơ gơh pơlung lu sư lui. Đơ̆ng sơ̆ inh ưh pă gơnang kơ tơdrong juăt Môis ră, mă-lei kơplah inh chă bơtho lu bơngai mă kiơ̆ tơdrong juăt Môis, inh kư̆m pơm kiơ̆ mơ̆n wă kơ inh gơh pơlung lu sư lui kơ Yêsu Krist.

²¹ Inh kư̆m đei năm chă bơtho lu bơngai mă ưh kơ kiơ̆ tơdrong juăt Môis, inh kư̆m pơm thoi lu sư mơ̆n wă kơ gơh pơlung lu sư lui kiơ̆ Yêsu Krist, mă-lei inh kư̆m ưh kơ hŭt lê̆ dôm tơdrong 'Bok Kei-Dei pơkă ôh, inh oei kiơ̆ khŏm khŏm đĕch yua kơ tơdrong noh đơ̆ng Yêsu Krist pơkă ăn kơ bơ̆n boih.

²² Kơplah inh chă bơtho kơ lu bơngai ưh kơ gan hlôh tôm tơdrong 'Bok Kei-Dei, inh kư̆m pơm thoi sư mơ̆n wă kơ pơlung sư lui kơjăp. Inh druh kiơ̆ rim đon kon bơngai wă kơ gơh pơlung lu sư lui kơ Yêsu Krist na klaih đơ̆ng dôm tơdrong yoch.

²³ Inh adrin druh rim đon kon bơngai thoi noh, yua kơ wă bơtho tơdrong 'nao 'lơ̆ng Yêsu Krist kơ lu sư na bơ̆n gơh oei hơdai hăm 'Bok Kei-Dei ling-lang ning-mônh.

²⁴ Iĕm kư̆m băt mơ̆n tơdrong lu bơngai pơđuơ kơdâu pơjei băl, đei lơ bơngai kơdâu ră mă-lei tơdrong apah lăp minh 'nu đĕch. Na bơ̆n kư̆m adrin tôch bơneh thoi lĕ lu bơngai pơđuơ kơdâu wă kơ bơ̆n đei tơdrong apah đơ̆ng 'Bok Kei-Dei.

²⁵ Lu bơngai mă wă pơđuơ băl kơdâu lu sư adrin pơm jơhngơ̆m chơ̆n pơtơ̆p rim năr 'mơ̆i na wă kơ kơdâu pran đei tơdrong apah agăl pơkao mă đe pơyơ̆l tơ kơ̆l yua kơ jei sư, dơning dơmônh kư̆m jô kro. Mă-lei gah bơ̆n athei adrin jang chă tơdrong apah mă ưh kơ layơ hiong tôch.

²⁶ Thoi noh na inh adrin kơdâu tơng-lơ̆ ưh kơ đei weh-woh tơ̆p truh tơ anih đêl đe pơkă 'mơ̆i. Păng inh ưh kơ sĭ thoi lu bơngai mă chok ưh kơ 'bơm ôh.

²⁷ Inh adrin pơm jơhngơ̆m chơ̆n kuă ăn akâu inh pơm yoch, hli kơ inh bơtho đe, đe lui mơ̆n, mă akâu inh kơdih hiong tơdrong apah.