I Kor 7 - Sơ̆p Hlabơar Nơ̆r 'Bok Kei-Dei

¹ Gah kơthơ dôm tơdrong iĕm jet inh 'noh, inh wă tơl iĕm dang ei. Bơngai drŏ-nglo ưh kơ iŏk akăn kư̆m 'lơ̆ng mơ̆n.

² Mă-lei tơ pơlei iĕm đei lơ bơngai juăt kơ ngôi pơyô kư̆ kă, na inh wă kơ lu iĕm athei chă kơdih akăn, lu drŏ-kăn athei chă kơdih klo.

³ Klo trŏ tơdrong ngôi kơ akăn sư kơdih, na akăn sư kư̆m chu kiơ̆ kơ đon klo sư wă.

⁴ Gah tơdrong 'noh akăn sư ưh kơ gơh pơm yŏng kơdih ôh, athei gô mơ̆ng kơ klo sư wă. Klo sư kư̆m lei-lăi mơ̆n, gô mơ̆ng kơ akăn sư wă.

⁵ Ưh kơ gơh sơ-ih băl ôh, mă-lei dah klo akăn biĕm pôm đon wă krao khan kơ Kră Yang tơdrong kiơ kiơ na biĕm wă pơdơh kơ tơdrong tơngôi noh, kư̆m bưh mơ̆n. Mă-lei tôch kơ năr biĕm pơkă krao khan noh boih, na biĕm tơngôi băl thoi đêl dơ̆ng, hli kơnh yang Satan pơhlŭ biĕm ngôi pơyô kư̆ kă yua kơ iĕm ưh kơ kĕ gơ̆t.

⁶ Tơdrong âu ưh kơ sĭ inh athei đĭ-đăng bơngai iŏk klo kăn ngăl ôh, inh pơma tơdrong âu yua kơ trŏ kơ tơdrong iĕm dang ei.

⁷ Kiơ̆ thoi inh wă kơ đĭ-đăng bơngai pơm kiơ̆ thoi inh ưh kơ iŏk klo kăn. Mă-lei 'Bok Kei-Dei ăn kơ rim 'nu kon bơngai phara, mơ'nah Sư ăn ngôi hơdrô̆, mơ'nah Sư ăn iŏk klo kăn.

⁸ Inh wă khan kơ lu bơngai ưh kơ đei klo kăn păng lu bơngai drŏ-kăn adro thoi âu: Dah iĕm ngôi hơdrô̆ thoi inh 'lơ̆ng mơ̆n.

⁹ Mă-lei hli kơ iĕm ưh kơ kĕ gơ̆t kơ tơdrong pơm yoch na iĕm athei oei băl klo kăn đĕch 'lơ̆ng hloh kơ iĕm oei hơdrô̆.

¹⁰ Bĭ gah lu bơngai mă đei klo kăn boih inh kư̆m wă khan mơ̆n, mă-lei ưh kơ sĭ đơ̆ng nơ̆r inh kơdih chă khan ôh, đơ̆ng nơ̆r Kră Yang bơ̆n Yêsu Krist pơma sơ̆ thoi âu: Bơngai drŏ-kăn ưh kơ gơh achăng klo sư ôh.

¹¹ Dah sư achăng klo sư, sư athei oei minh 'nu đĕch, 'nĕ pă chă klo dơ̆ng. Dah wă chă klo, sư athei yĕng kơ klo so sư đĕch. Bơngai drŏ-nglo kư̆m lei-lăi ưh kơ gơh achăng tŭk akăn sư ôh.

¹² 'Noh đơ̆ng nơ̆r Kră Yang Yêsu Krist pơma sơ̆. Na dang ei inh wă bơtho iĕm dơ̆ng thoi âu: Dah drŏ-nglo bơngai lui oei kơ drŏ-kăn ưh kơ lui, na akăn sư wă oei kơ sư khŏm khŏm kư̆m bưh mơ̆n, 'nĕ kơ achăng tŭk sư ôh.

¹³ Dah drŏ-kăn bơngai lui oei kơ drŏ-nglo ưh kơ lui, na klo sư wă oei kơ sư khŏm khŏm kư̆m lei-lăi, 'nĕ kơ achăng tŭk sư.

¹⁴ Mă klo sư ưh kơ lui, 'Bok Kei-Dei lăng bre klo kăn noh kư̆m 'lơ̆ng yua kơ akăn sư lui. Kư̆m lei-lăi, klo sư lui mă akăn sư ưh, 'Bok Kei-Dei lăng bre klo kăn noh kư̆m 'lơ̆ng yua kơ klo sư lui boih. Dah 'Bok Kei-Dei lăng bre sư ưh kơ 'lơ̆ng lei Sư kư̆m lăng kon bre sư kư̆m ưh kơ 'lơ̆ng mơ̆n. Mă-lei bơ̆n băt boih 'Bok Kei-Dei lăng kon bre sư 'lơ̆ng. Thoi noh bơ̆n kư̆m băt Sư lăng bre klo kăn noh 'lơ̆ng mơ̆n.

¹⁵ Mă-lei klo dah akăn mă ưh kơ lui wă achăng klo dah akăn sư mă lui, lê̆ sư achăng kư̆m bưh ưh kơ kơ̆m ôh. 'Bok Kei-Dei krao bơ̆n lui kơ Sư, Sư wă kơ bơ̆n pơma pơlung băl mă 'lơ̆ng, ưh kơ sĭ Sư wă kơ bơ̆n hang nuih ôh.

¹⁶ Ơ lu drŏ-kăn lui mă đei klo mă ưh kơ lui, lơliơ iĕm băt khan klo iĕm ning-mônh ưh kơ lui dah iĕm bơtho sư? Lu drŏ-nglo đei akăn mă ưh kơ lui, lơliơ iĕm băt khan akăn iĕm ning-mônh ưh kơ lui dah iĕm bơtho sư?

¹⁷ Rim 'nu kơ bơ̆n athei pơm kiơ̆ gô mơ̆ng kơ 'Bok Kei-Dei asong. Sơ̆ 'Bok Kei-Dei krao bơ̆n lui kơ Sư kơplah bơ̆n oei pơm đĭch đe dah bơngai rơngei dah bơngai thoi yơ, bơ̆n athei kiơ̆ tơdrong 'noh đĕch. Inh bơtho tơ rim hnam akŭm thoi noh ngăl.

¹⁸ Pơtih gia bơngai bu đêl kăt tơdra akar kiơ̆ kơ tơdrong juăt sư na 'Bok Kei-Dei krao sư lui, bơngai 'noh athei lê̆ thoi noh đĕch. Dah bơngai bu đơ̆ng sơ̆ ưh kơ đei pơtơ̆p kăt tơdra akar na 'Bok Kei-Dei krao sư lui, bơngai 'noh 'nĕ pơtơ̆p kăt rok đe mơ̆n.

¹⁹ Tơdrong kăt akar dah ưh kơ kăt akar ưh kơ kăl kiơ ôh, pôm tơdrong pơm kiơ̆ thoi 'Bok Kei-Dei pơkă 'noh đĕch kăl.

²⁰ Rim 'nu kơ bơ̆n athei kiơ̆ thoi kơplah 'Bok Kei-Dei krao bơ̆n sơ̆ đĕch.

²¹ Dah kơplah 'Bok Kei-Dei krao iĕm lui sơ̆ iĕm bơngai đĭch đe, iĕm 'nĕ hăt 'nhĕng kơ đe wă chă tơdrong akâu kơdih rơngei hŏ. Mă-lei dah yŏng iĕm mơnat ăn kơ iĕm rơngei 'noh 'lơ̆ng hloh.

²² Bơngai bu đĭch đe mă-lei Kră Yang krao sư lui, bơngai 'noh kư̆m dang rơngei mơ̆n, yua kơ sư lui kơ Kră Yang Yêsu Krist. Mă bơngai bu ưh kơ đĭch đe, Yêsu Krist krao sư lui, bơngai 'noh kư̆m dang đĭch Yêsu Krist mơ̆n.

²³ 'Bok Kei-Dei huai iŏk bơ̆n păng tơmam gĭt na bơ̆n jing rơngei boih, thoi noh bơ̆n 'nĕ pă pơm tôm tơdrong thoi lĕ đĭch kon bơngai dơ̆ng.

²⁴ Ơ 'nhŏng oh, rim 'nu kơ bơ̆n mơ'nah bơngai thoi yơ, đĭch dah rơngei, dah thoi yơ kơplah 'Bok Kei-Dei krao bơ̆n lui sơ̆, bơ̆n kư̆ pơm kiơ̆ thoi noh đĕch hŏ, wă kơ gơh kiơ̆ 'Bok Kei-Dei khŏm khŏm.

Bơngai oei hơdrô̆

²⁵ Bĭ gah tơdrong lu bơngai oei hơdrô̆, Kră Yang Yêsu Krist ưh kơ đei bơtho pơkă kơ bơ̆n thoi yơ ôh sơ̆. Mă-lei inh wă bơtho iĕm mơ̆n, yua kơ Kră Yang tơgŭm inh bơtho iĕm mă trŏ.

²⁶ Yua kơ dang ei kư̆m đei boih tơdrong gleh truh, na inh tơchĕng athei iĕm oei hơnơ̆ng thoi krô đĕch 'nĕ kơ pơm phara tơdrong kiơ.

²⁷ Dah bơngai bu đei akăn boih, 'nĕ kơ achăng akăn sư; dah bơngai tam mă đei akăn, apinh sư 'nĕ tam hăt chă akăn dang ei.

²⁸ Mă dah lu iĕm tơdăm iŏk akăn dang ei kư̆m ưh kơ đei yoch kiơ ôh. Mă lu adruh dah hăt kơ chă klo kư̆m ưh kơ đei tơdrong yoch kiơ ôh. Mă-lei inh bơtho wă kơ iĕm huay kơ đei tơdrong gleh thoi lu bơngai đei kon akăn.

²⁹ Ơ 'nhŏng oh, inh wă pơma kơ iĕm mă nhên gah tơdrong âu: Năr ei wă jê̆ truh boih na đơ̆ng âu tơ anăp lu bơngai đĭ đei kon akăn athei kiơ̆ tơdrong arih lu bơngai ưh kơ đei kon akăn 'biơ̆, wă kơ gơh adrin jang tơdrong 'Bok Kei-Dei.

³⁰ Lu bơngai nhơ̆m hmoi ơh sơ'ngon dang ei athei pơchĭt lê̆ bĕ tơdrong nhơ̆m hmoi 'noh. Lu bơngai hiôk chơt dêh athei hiơt 'biơ̆ bĕ kơ tơdrong hiôk sư 'noh. Lu bơngai mơdro sa 'nĕ tơchĕng dêh gah tơdrong sư mơdro sa.

³¹ Lu bơngai hăt kơ tơdrong ala teh âu 'nĕ pă tơchĕng dêh gah tơdrong ala teh âu yua kơ đĭ dôm tơdrong ala teh âu gô hiong hiach hach răm tôch đĕch.

³² Inh wă kơ lu iĕm bơngai ngôi hơdrô̆ huay kơ tơchĕng gah tơdrong kon akăn. Bơngai ngôi hơdrô̆, bơngai ei adrin jang tơdrong Kră Yang yua kơ sư wă kơ Kră Yang lăp đon kơ sư.

³³ Mă-lei gah lu bơngai đei kon akăn, sư tơchĕng lơ gah tơdrong ala teh âu wă kơ kon akăn sư lăp đon kơ sư.

³⁴ Na đon sư tơchĕng jing tơklah 'bar trong, minh pah sư wă adrin jang tơdrong Kră Yang, minh pah sư ưh kơhnger achăng kon akăn sư na sư chu jang kiơ̆ kon akăn sư đĕch. Mă-lei lu bơngai drŏ-kăn mă ưh kơ đei klo, sư adrin jang tơdrong Kră Yang, sư wă pơyơ̆r akâu sư kơ Kră Yang đĭ đon tơchĕng, đĭ jơhngơ̆m klơm klak sư. Mă-lei dah bơngai ayơ đei klo boih, sư tơchĕng lơ tơdrong ala teh âu, sư wă kơ klo sư lăp đon kơ sư.

³⁵ Inh bơtho iĕm thoi noh yua kơ inh wă tơgŭm iĕm, ưh kơ sĭ inh wă khă iĕm tơdrong tơoei băl klo kăn ôh. Inh wă kơ iĕm băt kơdih pơm tơdrong 'lơ̆ng tơdrong trŏ, wă kơ iĕm adrin jang tơdrong Kră Yang hăm đĭ jơhngơ̆m klơm klak iĕm.

³⁶ Mă-lei dah bơngai bu đei kon adruh, kon adruh sư đĭ adruh 'lŏ boih, na 'bă sư tơchĕng wă kơ sư oei hơdrô̆ khŏm khŏm ưh kơ trŏ ôh, yua kơ kon sư hăt kơ wă chă klo, 'bă sư athei lê̆ kơ sư chă klo 'noh 'lơ̆ng, ưh kơ đei kơ̆m tơdrong kiơ ôh.

³⁷ Mă-lei dah bơngai bu lăng kon sư oei hơdrô̆ 'lơ̆ng tơpăt na sư pơgơ̆t kon sư kuă ăn iŏk klo, wă kơ kon sư oei hơdrô̆ khŏm khŏm, 'lơ̆ng mơ̆n.

³⁸ Thoi noh boih dah bơngai bu ăn kon adruh sư iŏk klo kư̆m 'lơ̆ng mơ̆n. Mă-lei dah bơngai bu pơgơ̆t kon sư kuă ăn iŏk klo kư̆m bưh mơ̆n, noh 'lơ̆ng hloh.

³⁹ Dah lu drŏ-kăn đei klo boih ưh kơ gơh achăng klo sư ôh. Dah klo sư lôch sư gơh iŏk klo plơ̆ng, gô mơ̆ng kơ sư wă đĕch, mă-lei sư athei iŏk klo tơduă lui kơ Kră Yang Yêsu Krist.

⁴⁰ Mă-lei lăm đon inh tơchĕng dah sư lê̆ pă chă klo, ngôi minh 'nu đĕch noh 'lơ̆ng. Inh tơchĕng Yang Bơhngol 'Lơ̆ng kư̆m wă kơ inh bơtho iĕm thoi noh mơ̆n.