I Kor 6 - Sơ̆p Hlabơar Nơ̆r 'Bok Kei-Dei

¹ Tơduă bơngai lui đei tơdrong wă jâu băl, liơ iĕm chă kră ưh kơ lui sek tơlang kơ iĕm, kuă kơ kiơ kơ chă kră bơngai lui sek ăn?

² Lu bơngai lui gô sek tơdrong lu bơngai ưh kơ lui ning-mônh. Dah iĕm gơh sek tơdrong bơngai ưh kơ lui ning-mônh, lei iĕm kư̆m gơh sek tơdrong buăl iĕm iĕ ioch dang ei mơ̆n.

³ Ning-mônh bơ̆n gơh sek tơdrong linh jang. Dah bơ̆n gơh sek tơdrong linh jang ning-mônh lei bơ̆n kư̆m gơh sek tơdrong bơngai ala teh âu 'bônh loi.

⁴ Tơdah tơduă bơngai lui đei tơdrong wă jâu băl, liơ iĕm chă kră bơngai mă ưh kơ lui sek ăn kơ iĕm, kuă kơ kiơ chă kră bơngai lui sek ăn? Kră bơngai ưh kơ lui, sư ưh kơ băt ôh kơ tơdrong bơngai lui.

⁵ Inh pơma thoi noh wă kơ iĕm mơlâu. Lơliơ, đĭ dôm kơ iĕm ưh kơ đei bu hơgei gơh sek tơlang tơdrong dah kiơ,

⁶ na iĕm ling-lang mă nŏng kơ chă lu kră ưh kơ lui sek ăn tơdrong iĕm?

⁷ Iĕm tơkêng sa băl tŏk tơ kră sek tơlang thoi noh ưh kơ trŏ ôh, 'noh inh băt kơ tơdrong lui iĕm oei rơdu iĕ tơpă. Dah tơduă iĕm bơngai lui pơm ưh kơ 'lơ̆ng dih băl, dah tơtông băl tơmam, iĕm 'nĕ kơ jâu sư, 'noh 'lơ̆ng hloh.

⁸ Mă-lei iĕm ưh kơ wă pơm 'lơ̆ng thoi noh ôh. Iĕm wă pơm ưh kơ 'lơ̆ng dih băl păng tơtông tơmam tơduă 'nhŏng oh lu bơngai lui.

⁹ Iĕm ưh kơ băt ôh hă lu bơngai pơm kơnê̆ ưh kơ gơh tŏk oei tơ dêh char 'Bok Kei-Dei ôh? Lu bơngai ngôi pơyô kư̆ kă, lu bơngai kơkuh kơ rup yang, lu bơngai plah klo kăn đe, lu bơngai tơduă drŏ-nglo tơngơ̆r băl,

¹⁰ lu bơngai tơtông, lu bơngai 'nhĕng kơ mŭk tơmam đe, lu bơngai et sik suai, lu bơngai oei hiĕk achơ̆ kơ đe, iĕm 'nĕ ngêh lu sư gơh tŏk oei tơ dêh char 'Bok Kei-Dei ôh.

¹¹ Lu iĕm mơ'nah pơm thoi noh tơpă mơ̆n sơ̆, mă-lei dang ei 'Bok Kei-Dei ôp rơgoh tơdrong yoch iĕm boih, iĕm jing kon Sư 'lơ̆ng tơpăt boih, Sư jô̆ iĕm bơngai 'lơ̆ng yua kơ Kră Yang Yêsu Krist păng Yang Bơhngol 'Lơ̆ng 'Bok Kei-Dei tơgŭm bơ̆n.

'Nĕ pơm kư̆ kă

¹² Đe khan: “Bơngai lui gơh pơm tôm tơdrong kư̆m bưh, ưh kơ đei kơ̆m ôh.” Trŏ mơ̆n, mă-lei kư̆m đei tơdrong ưh kơ pơyua kơ bôl buăl dah 'Bok Kei-Dei ôh. Bơ̆n kư̆m kuă pơm thoi noh kơnh pơmat kơdih đĕch.*

¹³ Tơpă mơ̆n 'Bok Kei-Dei pơjing tơmam sa wă 'me klak bơ̆n, 'Bok Kei-Dei pơjing klak bơ̆n wă mong tơmam sa, mă-lei ning-mônh sư wă pơrăm đĭ 'bar anăn 'noh, kơlih kơ ưh pă yua boih năr noh kơnh. Mă-lei gah akâu bơ̆n ưh kơ sĭ 'Bok Kei-Dei pơjing akâu bơ̆n wă kơ bơ̆n ngôi pơyô kư̆ kă ôh. Sư pơjing akâu bơ̆n wă kơ bơ̆n jang tơdrong Yŏng bơ̆n Yêsu Krist na Yŏng bơ̆n wei-lăng akâu bơ̆n.

¹⁴ 'Bok Kei-Dei tơiung arih Yŏng bơ̆n đơ̆ng lôch, na Sư kư̆m wă tơiung arih akâu bơ̆n hăm tơdrong mơsêh Sư mơ̆n.

¹⁵ Iĕm ưh kơ băt ôh hă rim 'nu kơ bơ̆n gơh pơgơ̆p minh chăl lăm akâu Yêsu Krist? Na iĕm wă kơ bơ̆n pơgơ̆p dơ̆ng minh chăl tơ akâu drŏ-kăn đi dơ̆ng hă? Ưh ôh.

¹⁶ Bơngai bu ngôi hăm drŏ-kăn đi, bơngai 'noh dang lĕ minh sĕch minh akar hăm đi mơ̆n, kư̆m thoi sơ̆p hla bơar 'Bok Kei-Dei chih khan: “Bre sư jing minh sĕch minh akar.”*

¹⁷ Dah bơngai bu lui kơ Kră Yang Yêsu, bơngai 'noh dang minh jơhngơ̆m minh đon hăm Yêsu.

¹⁸ Thoi noh iĕm athei weh bĕ đơ̆ng tơdrong ngôi pơyô kư̆ kă. Tơdrong ngôi pơyô kư̆ kă jing pơrăm akâu kơdih. Dôm tơdrong yoch nai ưh kơ pơrăm akâu kơdih dang tơdrong yoch noh ôh.

¹⁹ Akâu bơ̆n jing hnam Yang Bơhngol 'Lơ̆ng đơ̆ng 'Bok Kei-Dei ăn Sư oei lăm akâu bơ̆n. Na akâu bơ̆n ưh pă jing thoi lĕ tơmam bơ̆n ôh, dang jing tơmam 'Bok Kei-Dei boih,a

²⁰ yua kơ 'Bok Kei-Dei huai iŏk bơ̆n păng tơmam gĭt Sư tơpă. Thoi noh na bơ̆n dah pơyơ̆r bĕ akâu bơ̆n kơ Sư wă pơư pơang anăn Sư.