I Kor 5 - Sơ̆p Hlabơar Nơ̆r 'Bok Kei-Dei

¹ Nhôn kơtơ̆ng ang minh 'nu bơngai lăm lu iĕm pơm kư̆ kă dêh pơm hloh kơ đe, mă lu bơngai ưh kơ lui kư̆m ưh kơ lah mah pơm thoi noh mơ̆n; na bơngai noh đe khan sư oei kơ duch sư đêl akăn 'bă sư.

² Sư pơm thoi noh, liơ lu iĕm mơ'nah oei pơma pơang kơ đe khan iĕm oei lui kơjăp? Sư pơm thoi noh trŏ kơ iĕm ơh klai tơpă. Wă kơ mă trŏ iĕm athei pơpuh sư weh tơ nai đĕch 'lơ̆ng hloh.

³ Akâu inh ataih đơ̆ng iĕm ră, mă-lei lăm jơhngơ̆m đon inh oei hơdai hăm iĕm, na inh tang măt Kră Yang Yêsu sek tơlang boih tơdrong bơngai mă pơm yoch 'noh.

⁴ Mă iĕm akŭm tơ noh dang akŭm hơdai hăm inh mơ̆n, đei Kră Yang Yêsu pơgơ̆p jơhngơ̆m đon bơ̆n hơdai, yua kơ bơ̆n jang tơdrong Sư.

⁵ Na bơ̆n athei pơjao kơ yang Satan ăn tơdrong gleh kơ bơngai mă pơm yoch noh, wă kơ bơngai noh tơbral kơdih tơdrong yoch wă kơ 'Bok Kei-Dei iŏk sư kơplah năr Yêsu jur ning-mônh.

⁶ Tơdrong iĕm pơang akâu kơdih ưh kơ 'lơ̆ng ôh. Iĕm ưh kơ băt ôh hă, tơdrong yoch thoi lĕ kơ 'buih pông? Bơ̆n pơjrâu kơ bre sư 'bĕng tơpŭng lăp tŏ sĕt đĕch mă-lei sư pông đĭ kơ 'bĕng tơpŭng.

⁷ Iĕm athei hŭt đĭ tơdrong yoch wă kơ jing thoi 'bĕng tơpŭng 'nao tam mă pơjrâu 'buih, yua kơ 'Bok Kei-Dei pơklaih đĭ boih tơdrong yoch iĕm. Yêsu Sư thoi triu đe 'bet sa pơm Giĕng Năm Brih wă 'blŏk hơdơ̆r kơ tơdrong 'Bok Kei-Dei pơklaih đơ̆ng dêh Êyiptơ, na Yêsu boih pơklaih bơ̆n.

⁸ Thoi noh bơ̆n athei 'blŏk hơdơ̆r kơ năr giĕng đe sŏng sa 'Bĕng Ưh Kơ Đei 'Buih Pông, 'nĕ pă pơm dôm tơdrong so, tơdrong kơnê̆ yoch thoi lĕ kơ 'bĕng mă đei 'buih pông 'noh, bơ̆n athei pơm 'lơ̆ng tơpăt thoi 'bĕng ưh kơ đei 'buih đĕch.

⁹ Kơthơ inh chih ăn kơ iĕm ki, inh khă kuă ăn iĕm tơbôl păng bơngai pơm kư̆ kă.

¹⁰ Ưh kơ sĭ inh khă kuă ăn iĕm tơbôl păng bơngai ưh kơ lui ala teh mă juăt kơ ngôi pơyô kư̆ kă, lu bơngai 'nhĕng kơ mŭk tơmam đe, dah lu bơngai tơtông, lu bơngai kơkuh kơ rup yang ôh. Dah iĕm kuă kơ tơbôl păng lu bơngai thoi noh lei iĕm athei jăk đơ̆ng ala teh âu đĕch wă huay kơ 'bôh sư.

¹¹ Kơthơ inh chih kơ iĕm ki, inh khă kuă ăn iĕm tơbôl păng bơngai mă lui ră, mă sư ưh kơ kiơ̆ tơdrong lui tơpă. Sư oei pơm pơyô kư̆ kă, sư oei 'nhĕng kơ mŭk tơmam đe, sư kơkuh kơ rup yang, sư oei hiĕk achơ̆ kơ đe ling-lang, sư oei et sik suai, sư oei tơtông mŭk tơmam đe; dôm lu bơngai thoi noh inh kuă ăn iĕm tơbôl păng kuă ăn sŏng sa hơdai.

^12-13 Inh ưh kơ trŏ kơ bơngai chă sek tơdrong lu bơngai 'ngoaih mă ưh kơ lui ôh. 'Bok Kei-Dei đĕch gô sek tơlang kơ sư. Mă-lei bơ̆n gơh sek tơ lăm tơduă lu bơ̆n bơngai lui, na iĕm athei sek tơdrong buăl bơ̆n mă pơm kơnê̆ kư̆ kă oei kơ duch sư noh. Pơpuh tơjăk sư 'nĕ pă ăn kơ sư oei hơdai iĕm.