I Kor 4 - Sơ̆p Hlabơar Nơ̆r 'Bok Kei-Dei

¹ Thoi noh nhôn wă kơ iĕm lăng nhôn thoi đĭch đam Yêsu Krist chă bơtho kơ đe tơdrong hrĕp 'Bok Kei-Dei tam mă tơbăt kơ đe.

² Yŏng sư pơjao ăn kơ minh 'nu đam sư chă asong rim 'nu kơ đam sư, na đam mă sư pơjao noh athei kiơ̆ kơ nơ̆r yŏng sư pơkă.

³ Gah inh mă iĕm jô̆ kơ inh bơngai thoi yơ kư̆m bưh mơ̆n; mă dah đe wă sek tơdrong inh thoi yơ, inh huay kơ klai ôh; inh kơdih rai loi, ưh kơ băt tơchĕng tơdrong kơdih thoi yơ.

⁴ Inh lăng inh kơdih khan ưh kơ đei tơdrong kơnê̆ kiơ ră, mă tơpă inh ưh kơ băt tơpă ôh, pôm 'Bok Kei-Dei đĕch gơh băt sek tơdrong inh.

⁵ Thoi noh mă bu bu bơngai thoi yơ bơ̆n 'nĕ chă sek pơma tơdrong sư, gô mơ̆ng kơ Kră Yang jur đĕch, Sư gô tơbăt hơdah ăn tôm tơdrong kon bơngai mă oei ôn pơhrĕp păng tôm tơdrong kon bơngai tơchĕng wă. Hơtai ei kơnh đĭ-đăng rim 'nu kơ bơ̆n mă pơm kiơ̆ kơ Sư wă gô đei nơ̆r Kră Yang bơnê.

⁶ Ơ 'nhŏng oh, dôm tơdrong inh bơtho pơtih gia hei, inh pơma 'bơm anăn inh păng anăn Apôlê đĕch, inh wă kơ iĕm huay kơ pơang kơ kon bơngai mă bu bu kư̆m thoi sơ̆p hla bơar 'Bok Kei-Dei khan. Thoi noh iĕm 'nĕ pơư bơngai âu pơchê bơngai to.

⁷ Bu pôk ih pơm tih hloh kơ đe? 'Bok Kei-Dei ăn kơ ih tôm tĕch tôm-tơ̆l tôm tơdrong ih gĭt ih wă, mă-lei ih oei pơang akâu kơdih thoi noh na ih kư̆m dang lĕ khan dôm tơdrong ih đei noh ih đei kơdih ngăl.

⁸ Iĕm hlôh tôm tơdrong boih hă, na iĕm ưh pă kăl kơ tơdrong nai? Iĕm hơgei dang 'bok pơtao boih hă? Gah nhôn ưh tam hlôh tôm ôh. Dah iĕm hơgei dang 'bok pơtao tơpă, inh kư̆m lăp đon mơ̆n wă kơ nhôn kư̆m hơgei dang 'bok pơtao thoi iĕm.

⁹ Thoi inh chă tơchĕng, 'Bok Kei-Dei ăn kơ khŭl nhôn pơm jơ̆ng 'bang Yêsu lŭch hloh kơ đĭ-đăng bơngai, nhôn dang bơngai đe wă pơlôch đĕch; jơ̆p-jang kơ plĕnh teh, kon bơngai, linh jang 'lơ̆ng 'bôh đe pơm kơ nhôn thoi noh tơpă.

¹⁰ Đe lăng nhôn jang tơdrong Yêsu Krist thoi bơngai kơtul, đe lăng iĕm thoi lĕ bơngai hơgei tôm tơdrong Yêsu Krist. Nhôn bơngai tơrăn, iĕm bơngai pran. Đe pơjĭp pơjăm nhôn, gah iĕm đe ư-ang.

¹¹ Đơ̆ng sơ̆ khơ̆ dang ei, nhôn rơwĕt kơ por, ol kơ đak, iak kơ ao hiah dônh hrŭk hrăi; đe tơhmăi nhôn jĭ kơ lu sư tôn tơbeh teh tơlơ̆, wă ling-lang răm-'băm anih hnam hoh-hoy, hrăn yak rim anih.

¹² Nhôn jang sa păng ti kơdih. Đe oei hiĕk achơ̆ kơ nhôn, nhôn kư̆m krao khan kơ 'Bok Kei-Dei tơgŭm lu sư mơ̆n; đei mơ'nah pơm kơnê̆, nhôn mơ̆ng đĕch;

¹³ đe chă pơchê nhôn ră, mă-lei nhôn tơl tơwih pơ'lơ̆ng đĕch; oei khơ̆ dang ei đĕch tơdrong lu nhôn thoi lĕ kơ 'bruih đe bơngai ala teh.

¹⁴ Inh chih kơ iĕm thoi noh ưh kơ sĭ inh wă kơ iĕm mơlâu ôh. Inh wă bơtho iĕm yua kơ iĕm dang kon inh mă 'mêm kơeng.

¹⁵ Mă iĕm đei mơjĭt-rơbâu 'nu thây bơtho iĕm tơdrong Yêsu Krist, mă-lei iĕm ưh kơ đei 'bă nai ôh, yua kơ inh pơm 'bă pơjing iĕm lui kơ Yêsu Krist păng yua kơ inh bơtho iĕm tơdrong 'nao 'lơ̆ng blŭng-a sơ̆.

¹⁶ Thoi noh na inh wă kơ iĕm pơm kiơ̆ kơ inh.

¹⁷ Yua kơ tơdrong 'noh na inh wơh Timôthê năm tơ iĕm, sư kon inh mă 'mêm kơeng đơ̆ng inh bơtho sư tơdrong Kră Yang. Sư chu kơ nơ̆r inh ling-lang na sư gô tơ'blŏk ăn kơ iĕm dôm tơdrong inh kiơ̆ Yêsu Krist thoi yơ. Dôm tơdrong inh bơtho tơ rim hnam akŭm kư̆m lei-lăi thoi noh mơ̆n.

¹⁸ Đei lăm lu iĕm mơ'nah pơma pơang akâu kơdih kơ đe yua kơ lu sư ngêh kơ inh ưh pă đei năm tơ iĕm boih.

¹⁹ Na inh khan kơ iĕm, dah Kră Yang ăn, ưh pă đunh boih inh wă năm tơ iĕm tơpă, wă kơ băt bơngai pơang akâu sư ei, sư hơgei tơpă dah ưh.

²⁰ Mă-lei gah lu bơngai mă 'Bok Kei-Dei pơgơ̆r ưh kơ sĭ pơma pôm 'bơ̆r đĕch ôh, 'Bok Kei-Dei tơgŭm sư gơh pơm tôm tơdrong.

²¹ Na iĕm wă kơ inh năm tơ iĕm thoi yơ? Iĕm wă kơ inh năm thoi bơngai chĕp sơnguĕt dah wă kơ inh năm thoi lĕ bơngai iŏk tơdrong 'mêm mơnat dih băl đĕch?