I Kor 2 - Sơ̆p Hlabơar Nơ̆r 'Bok Kei-Dei

¹ Ơ 'nhŏng oh, kơplah inh năm bơtho iĕm tơdrong 'Bok Kei-Dei sơ̆ inh ưh kơ đei bơtho kiơ̆ kơ 'bơ̆r đon inh hơgei ôh.

² Kơplah noh sơ̆ inh bơtho iĕm gah tơdrong Yêsu đĕch păng gah tơdrong Sư lôch tơ 'long pơglang, ưh kơ đei tơdrong nai ôh.

³ Kơplah inh oei bơtho tơ anăp iĕm inh hli tơtey dêh.

⁴ Mă-lei inh ưh kơ bơtho kiơ̆ kơ 'bơ̆r đon inh hơgei ôh. Đơ̆ng Yang Bơhngol 'Lơ̆ng 'Bok Kei-Dei tơgŭm inh bơtho na iĕm gơh lui hloi.

⁵ Thoi noh na iĕm băt tơdrong lui iĕm noh ưh kơ trŏ lĕch đơ̆ng kon bơngai ôh, lĕch đơ̆ng Yang Bơhngol 'Lơ̆ng 'Bok Kei-Dei.

Pôl ưh kơ bơtho kiơ̆ kơ tơdrong hơgei ala teh âu

⁶ Gah lu bơngai lui kơjăp boih inh bơtho mơ̆n kiơ̆ kơ tơdrong hơgei, mă-lei ưh kơ sĭ kiơ̆ kơ tơdrong hơgei ala teh âu, dah kiơ̆ kơ lu 'bok pơgơ̆r ala teh âu ôh, yua kơ lu sư rai wă tôch boih.

⁷ Nhôn bơtho tơdrong 'Bok Kei-Dei, tơdrong mă Sư ưh tam mă tơbăt ăn kơ kon bơngai kơtơ̆ng, tơdrong 'noh đơ̆ng blŭng-a 'Bok Kei-Dei ưh tam mă pơjing plĕnh păng teh sơ̆ na Sư pơkă khan wă tơbăt ăn kơ lu bơngai lui bơ̆n băt tơdrong 'noh wă kơ bơ̆n chơt hiôk.

⁸ Tơdrong 'noh lu bơngai pơgơ̆r ala teh âu lu sư ưh kơ đei bu băt; dah lu sư băt sơ̆ lei lu sư ưh kơ pơ̆ng pơlôch Kră Yang mơsêh tih-tin tơ 'long pơglang ôh.

⁹ Mă sơ̆p hla bơar 'Bok Kei-Dei kư̆m đei chih khan: “Klong măt kon bơngai ưh kơ 'bôh, đon ưh kơ kơtơ̆ng, jơhngơ̆m đon kon bơngai ưh kơ đei tơchĕng iŏk, tơdrong 'noh boih 'Bok Kei-Dei hơmet ăn kơ lu bơngai mă 'mêm kơ Sư.”

¹⁰ Mă-lei 'Bok Kei-Dei ăn kơ bơ̆n Yang Bơhngol 'Lơ̆ng tơbăt ăn kơ bơ̆n tơdrong 'noh, yua kơ Yang Bơhngol 'Lơ̆ng băt tôm tơdrong 'Bok Kei-Dei mă jrŭ dang yơ.

¹¹ Kon bơngai ưh kơ đei bu băt tôm tơdrong tơchĕng tơduă kon bơngai, pôm tơ'ngla bơ̆n kơdih đĕch băt tôm tơdrong bơ̆n tơchĕng kơdih; kư̆m thoi noh mơ̆n kon bơngai bơ̆n ưh kơ đei bu băt tôm tơdrong tơchĕng 'Bok Kei-Dei ôh, pôm Yang Bơhngol 'Lơ̆ng đĕch băt tôm tơdrong tơchĕng 'Bok Kei-Dei.

¹² Mă-lei bơ̆n bơngai lui ưh kơ wă iŏk ôh tơdrong tơchĕng ala teh âu. Bơ̆n đei Yang Bơhngol 'Lơ̆ng jur tơ bơ̆n, wă kơ bơ̆n băt tôm tơdrong 'Bok Kei-Dei pơkă khan wă ăn kơ bơ̆n.

¹³ Tôm tơdrong bơtho ưh kơ sĭ nhôn pơhrăm đơ̆ng lu bơngai hơgei ala teh âu ôh, nhôn pơhrăm đơ̆ng Yang Bơhngol 'Lơ̆ng bơtho nhôn. Nhôn bơtho tơblơ̆ tơblang kiơ̆ kơ Yang Bơhngol 'Lơ̆ng bơtho mơ̆n.

¹⁴ Lu bơngai kiơ̆ kơ sĕch akar wă khan lu ưh kơ lui, lu sư ưh kơ iŏk ôh dôm tơdrong đơ̆ng Yang Bơhngol 'Lơ̆ng 'Bok Kei-Dei, yua kơ lu sư ưh kơ đei Yang Bơhngol 'Lơ̆ng bơtho. Na lu sư ưh kơ hlôh, lu sư lăng dôm tơdrong 'noh nhen lĕ tơdrong kơtul đĕch.

¹⁵ Lu bơngai mă đei Yang Bơhngol 'Lơ̆ng, lu sư hlôh băt tôm tơdrong trŏ glăi; gah lu bơngai mă ưh kơ đei Yang Bơhngol 'Lơ̆ng, lu sư ưh kơ hlôh minh tơdrong trŏ glăi gah lu bơ̆n thoi yơ.

¹⁶ Mă sơ̆p hla bơar 'Bok Kei-Dei kư̆m đei chih khan: “Dah bơngai bu hlôh băt tôm tơdrong 'Bok Kei-Dei, lei kuă kơ kiơ bơtho 'Bok Kei-Dei dơ̆ng?” Gah bơ̆n, Yang Bơhngol 'Lơ̆ng ăn kơ bơ̆n hlôh tơdrong Yêsu Krist.