I Kor 16 - Sơ̆p Hlabơar Nơ̆r 'Bok Kei-Dei

¹ Bĭ gah tơdrong pơyơ̆r jên wă tơgŭm lu bơngai lui tơ dêh Juđê, inh wă kơ iĕm pơm kiơ̆ thoi inh pơkă kơ lu bơngai lui tơ dêh Galati.

² Rim năr mônh, rim 'nu kơ iĕm pơyơ̆r jên kơdih kơdih, kiơ̆ kơ jơhngơ̆m iĕm wă păng kiơ̆ kơ tơmam iĕm đei. Thoi noh lăp inh truh tơ iĕm, na iĕm pơyơ̆r tôm boih, huay pă kăl pơyơ̆r dơ̆ng.

³ Lăp inh truh tơ iĕm, na lu bơngai mă iĕm rơih đơ̆ng lăm lu iĕm 'noh, inh wă wơh lu sư năm ăn tơmam đơ̆ng iĕm pơyơ̆r tơgŭm ăn kơ lu bơngai lui tơ Pơlei Jêrusalem. Inh kư̆m wă chih kơthơ mơ̆n wă ăn kơ lu sư chĕp ba kơ lu kră bơngai lui tơ Pơlei Jêrusalem wă kơ lu sư băt.

⁴ Păng dah kăl kơ tơ'ngla inh wang năm kư̆m bưh mơ̆n, lei đe 'noh năm hơdai hăm inh.

⁵ Đơ̆ng rŏng kơ inh năm tơ dêh Masêđôn, inh wă năm tơ iĕm, yua kơ inh wă năm tơ dêh Masêđôn hơdrol 'mơ̆i.

⁶ Rŏ lăng inh oei hơdai iĕm đunh 'biơ̆, truh đơ̆ng rŏng kơ bơyan puih thâu, na đơ̆ng noh iĕm gơh tơgŭm inh mă năm tơ yơ yơ.

⁷ 'Nâu ưh kơ sĭ inh wă drong ngôi đĕch ôh, inh wă oei hơdai iĕm đunh 'biơ̆ mơ̆n, dah Kră Yang ăn.

⁸ Mă-lei dang ei inh wă oei tơ Pơlei Êphêsô truh kơ Năr Giĕng Pangtơkôt 'mơ̆i na năm tơ iĕm,

⁹ yua kơ tơ Êphêsô âu dang lĕ trong rơwơn pơchoh ăn kơ inh jang 'biơ̆, mă-lei kư̆m đei lơ bơngai wă ayăt kơ nhôn mơ̆n.

¹⁰ Lăp Timôthê năm tơ iĕm, iĕm athei sơng iŏk sư tơpă hŏ, wă kơ sư huay kơ hli dah mơlâu, yua kơ sư jang tơdrong Kră Yang Yêsu Krist kư̆m lei-lăi thoi inh mơ̆n.

¹¹ Iĕm 'nĕ pơdê sư. Lăp sư yak đơ̆ng iĕm wih tơ inh, iĕm athei tơgŭm 'biơ̆ hŏ, wă kơ sư hiôk păng dang ei inh oei chang gô sư hăm đĭ kơ bôl sư wih tơ inh tơ âu.

¹² Gah 'nhŏng bơ̆n Apôlê, inh pơlung sư khŏm khŏm athei sư năm ngôi tơ iĕm hơdai lu 'nhŏng oh bơ̆n ră, mă-lei sư ưh kơ yĕng năm ngôi tơ iĕm dang ei ôh, gô sư wăn ning-mônh na sư năm ngôi.

¹³ Inh athei iĕm kơchăng ling-lang pơkrơ̆ng mă kơjăp tơdrong lui 'nĕ kơdŭn.

¹⁴ Mă dôm tơdrong jang, iĕm athei băt tơchĕng 'mêm mơnat kơ đe.

¹⁵ Iĕm kư̆m băt mơ̆n Sêphanna păng hnam dơnŏ sư, lu sư lui kơ Kră Yang hơdrol kơ đe lăm dêh Grĕk, lu sư adrin tơgŭm lu bơngai lui ling-lang.

¹⁶ Ơ 'nhŏng oh, inh athei iĕm chu yom kơ sư păng đĭ-đăng lu bơngai mă gơh jang thoi sư noh.

¹⁷ Inh chhơp kơ jơhngơ̆m inh tơpă yua kơ inh 'bôh đe Sêphanna, Phơttuna păng Achaikơ đơ̆ng iĕm năm ngôi tơ inh. Inh rơnguơ̆ đĭ-đăng kơ iĕm ră, mă-lei 'bôh lu sư boih, dang 'bôh iĕm mơ̆n.

¹⁸ Lu sư pơm kơ jơhngơ̆m inh hiôk păng pơm kơ jơhngơ̆m iĕm hiôk lei-lăi mơ̆n. Na iĕm athei chu yom kơ dôm lu bơngai mă pơm thoi noh.

¹⁹ Lu khŭl lui kơ 'Bok Kei-Dei tơ dêh Asi đei nơ̆r jet gia iĕm. 'Bok Akila, yă Prisil păng đĭ dôm lu bơngai lui juăt kơ akŭm tơ hnam bre sư kư̆m đei nơ̆r jet gia iĕm mơ̆n yua kơ bơ̆n minh khŭl bơngai lui kơ Kră Yang.

²⁰ Đĭ-đăng kơ 'nhŏng oh bơ̆n mă oei hơdai hăm inh, lu sư đei nơ̆r jet gia pơma dơnuh kơ iĕm. Na apinh iĕm sơng iŏk rôp băl ti wă kơ băt tơdrong 'mêm băl hŏ.

²¹ Kơthơ âu nơ̆r inh pơma, buăl inh chih. Lăp wă jê̆ tôch na ti inh Pôl chih kơdih.

²² Bơngai bu ưh kơ 'mêm kơ Kră Yang Yêsu, bơngai 'noh sư đei tơdrong 'Bok Kei-Dei wă phak sư. Ơ Kră Yang Yêsu, jur bĕ, dah jur tơ nhôn.

²³ Inh apinh Kră Yang Yêsu Krist wei-lăng iĕm lăm tôm tơdrong.

²⁴ Inh 'mêm mơnat kơ iĕm yua kơ bơ̆n 'nhŏng oh lui kơ Kră Yang Yêsu Krist. A-men.