I Kor 11 - Sơ̆p Hlabơar Nơ̆r 'Bok Kei-Dei

¹ Na iĕm pơm kiơ̆ inh, thoi inh pơm kiơ̆ Yêsu Krist.

Gah tơdrong akŭm

² Inh bơnê kơ iĕm tơpă yua kơ iĕm 'blŏk hơdơ̆r kơ inh ling-lang lăm tôm tơdrong păng iĕm kư̆m kiơ̆ dôm tơdrong juăt bơngai lui mă inh bơtho đơ̆ng sơ̆.

³ Mă-lei inh wă kơ iĕm hlôh tơdrong âu: Yêsu Krist pơm Yŏng kơ đĭ-đăng drŏ-nglo, drŏ-nglo pơm yŏng kơ akăn sư; na 'Bok Kei-Dei pơm Yŏng kơ Yêsu Krist.

⁴ Na dah drŏ-nglo bu krao khan dah bơtho tơdrong 'Bok Kei-Dei kơplah iĕm oei akŭm, dah sư yơ̆l môk dah yơ̆l kiơ kiơ lei bơngai 'noh dang sư wă pơ'brơh kơ kơ̆l sư kơdih.

⁵ Gah drŏ-kăn bu mă oei krao khan dah bơtho tơdrong 'Bok Kei-Dei kơplah iĕm oei akŭm 'bôh sư kơ̆l hoh ưh kơ yơ̆l kiơ, drŏ-kăn 'noh dang sư wă pơ'brơh kơ kơ̆l sư kơdih mơ̆n păng dang sư yuă sŏk 'ngôch.

⁶ Dah sư kuă kơ yơ̆l kiơ, lei sư athei yuă pơđĭ sŏk sư, lê̆ kơ̆l sư tơ'ngôch kơ̆l hoh. Dah sư khan yuă 'ngôch kơnê̆ ưh kơ 'lơ̆ng ôh, lei sư athei chu yơ̆l.

⁷ Kơplah oei akŭm, drŏ-nglo ưh kơ gơh yơ̆l kiơ ôh yua kơ drŏ-nglo sư hơbŏ thoi 'Bok Kei-Dei. 'Bok Kei-Dei pơjing bơngai drŏ-nglo sư ăn pơgơ̆r lăm tôm tơdrong. Gah bơngai drŏ-kăn 'Bok Kei-Dei pơjao ăn pơm iĕ 'biơ̆ păng chu yom kơ drŏ-nglo pơgơ̆r sư.

⁸ 'Bok Kei-Dei ưh kơ pơjing drŏ-nglo lĕch đơ̆ng drŏ-kăn ôh, Sư pơjing drŏ-kăn lĕch đơ̆ng drŏ-nglo.

⁹ Sơ̆ ưh kơ sĭ 'Bok Kei-Dei pơjing bơngai drŏ-nglo wă tơgŭm bơngai drŏ-kăn ôh, Sư pơjing bơngai drŏ-kăn wă kơ tơgŭm bơngai drŏ-nglo.

¹⁰ Thoi noh na mưh trŏ năr akŭm bơngai drŏ-kăn athei yơ̆l môk dah kiơ kiơ wă tơbăt kơ đe tơdrong sư chu yom kơ klo sư păng sư athei pơm mă 'blep trŏ tơpă yua kơ linh jang 'lơ̆ng đơ̆ng kơpal plĕnh 'bôh sư ling-lang.

¹¹ Mă-lei bơ̆n bơngai lui kơ Kră Yang Yêsu Krist, drŏ-kăn kư̆m gĭt kơ drŏ-nglo, drŏ-nglo kư̆m gĭt kơ drŏ-kăn.

¹² 'Bok Kei-Dei pơjing bơngai drŏ-kăn lĕch đơ̆ng bơngai drŏ-nglo, mă drŏ-nglo kư̆m tơpŭ đơ̆ng bơngai drŏ-kăn mơ̆n. Mă bơngai drŏ-nglo mă bơngai drŏ-kăn mă tôm tơdrong nai lĕch đơ̆ng 'Bok Kei-Dei pơjing ngăl.

¹³ Iĕm tơchĕng lăng: Kơplah bơ̆n oei akŭm lu bơngai drŏ-kăn krao khan kơ 'Bok Kei-Dei kơ̆l hoh ưh kơ yơ̆l kiơ hăm trŏ ưh? Ưh kơ trŏ ôh.

¹⁴ Đĭ-đăng bơngai băt kơ bơngai drŏ-nglo rong sŏk kơjung ưh kơ 'lơ̆ng ôh.

¹⁵ Mă-lei lu bơngai drŏ-kăn rong sŏk kơjung 'lơ̆ng, sư hơbŏ, na 'Bok Kei-Dei pơtĕm ăn kơ sư rong sŏk kơjung thoi noh. Sư ưh kơ wă kơ lu bơngai drŏ-kăn kơ̆l hoh ôh.

¹⁶ Dah bơngai bu oei pơjah gah tơdrong lu drŏ-kăn wă akŭm kơ̆l hoh, bơngai 'noh athei tơchĕng 'biơ̆, yua kơ lu nhôn păng rim hnam akŭm ưh kơ đei bu ăn kơ lu bơngai drŏ-kăn akŭm kơ̆l hoh ôh.

Tơdrong sa et 'blŏk hơdơ̆r kơ Kră Yang Yêsu

¹⁷ Gah tơdrong inh wă bơtho iĕm dang ei dơ̆ng inh ưh kơ lăp đon kơ iĕm pơm thoi âu, inh băt kơ iĕm akŭm dang ei ưh kơ gan yua ôh.

¹⁸ Tơdrong mă mônh thoi âu: Inh kơtơ̆ng ang đơ̆ng đe khan lăm lu iĕm akŭm đei tơklah băl đon đei 'bar pêng khŭl. Đe khan kơ inh thoi noh inh kư̆m lui kơ sư 'biơ̆ mơ̆n.

¹⁹ Iĕm ling-lang juăt kơ tơklah dih băl đon thoi noh iĕm tơchĕng lăng, bu kơ iĕm pơm đon 'lơ̆ng đon kơnê̆.

²⁰ Iĕm akŭm khan wă sa et 'blŏk hơdơ̆r kơ Kră Yang Yêsu, mă-lei iĕm ưh kơ 'blŏk hơdơ̆r kơ Sư tơpă ôh.

²¹ Iĕm oei sŏng sa, iĕm ưh kơ sŏng sa hơdai ôh, iĕm sŏng sa tơmam iĕm kơdih đĕch, ưh kơ asong lu bôl dơnuh ôh. Thoi noh lu mơ'nah sŏng sa ră ưh kơ mah, oei pơngot plơ̆ng đĕch; na lu iĕm mơ'nah sa et rơkah rơkai tơpă truh kơ iĕm mah suai.

²² Dah iĕm wă sa et tơmam iĕm kơdih kuă kơ asong đe, lei iĕm kuă kơ kiơ kơ sa et tơ hnam iĕm kơdih? Kơlih kơ kiơ iĕm wă pơm kơnê̆ tơ lăm hnam 'Bok Kei-Dei păng wă pơjăm lu bơngai dơnuh? Inh 'nao pơma kiơ kơ iĕm dang ei hei, iĕm pơm thoi noh iĕm tơchĕng inh lăp đon kơ iĕm hă? Ưh ôh, inh ưh kơ lăp đon kơ iĕm ôh.

²³ Tơdrong sa et 'blŏk hơdơ̆r kơ Yêsu 'noh, inh kơtơ̆ng đơ̆ng tơ'ngla Yêsu Krist tơpă păng inh kư̆m roi ăn boih kơ iĕm tơdrong 'noh đơ̆ng sơ̆ thoi âu: Măng đe wă rôp Yêsu sơ̆, tơ'ngla Kră Yang Yêsu Krist iŏk 'bĕng mi,

²⁴ krao khan bơnê kơ 'Bok Kei-Dei na phĕ hloi 'bĕng mi 'noh păng khan: “'Bĕng âu boih akâu Inh. Akâu Inh âu boih wă pơchah yua kơ iĕm. Iĕm kư̆m athei pơm thoi âu ling-lang wă 'blŏk hơdơ̆r kơ Inh.”

²⁵ Kư̆m thoi noh mơ̆n đơ̆ng rŏng kơ sŏng sa Sư iŏk minh pôm kơchŏk đak hơmu păng khan: “Kơchŏk đak hơmu âu boih pham Inh wă lĕch tang ăn lu iĕm. Thoi noh na 'Bok Kei-Dei pơklaih iĕm đơ̆ng tơdrong yoch. Rim wơ̆t iĕm huch đak âu wă kơ iĕm 'blŏk hơdơ̆r kơ Inh.”

²⁶ Na đơ̆ng sơ̆ truh năr Sư jur ning-mônh rim wơ̆t bơ̆n huch sa đak păng 'bĕng 'noh, wă khan bơ̆n pơm tơ'bôh kơ đe tơdrong Sư lôch tang bơ̆n.

²⁷ Kơlih kơ thoi noh na bơngai bu huch sa đak păng 'bĕng âu kư̆ kă, bơngai 'noh sư dang wă pơjăm akâu păng pham Yêsu.

²⁸ Thoi noh boih na rim 'nu bơ̆n athei tơchĕng lăng lăm akâu bơ̆n kơdih 'mơ̆i wă kơ băt bơ̆n gơh huch sa đak păng 'bĕng 'noh dah ưh.

²⁹ Dah bơngai bu huch sa kư̆ kă ưh kơ tơchĕng kơ đak păng 'bĕng noh wă khan akâu Yêsu, bơngai 'noh 'Bok Kei-Dei gô ăn kơ sư đei tơdrong chhŭr nuih.

³⁰ Kơlih kơ iĕm pơm thoi noh na dang ei iĕm đei tơdrong chhŭr nuih pơm kơ iĕm jĭ jăn kư̆m đei bơngai mơ'nah lôch hloi.

³¹ Dah bơ̆n tơchĕng lăng lăm jơhngơ̆m bơ̆n hơdrol boih, lei 'Bok Kei-Dei huay kơ ăn kơ bơ̆n đei tơdrong chhŭr nuih kiơ.

³² 'Bok Kei-Dei ăn kơ bơ̆n đei tơdrong chhŭr nuih thoi noh wă kơ bơ̆n tơbral kơdih tơdrong yoch, na Sư huay kơ phak bơ̆n hơdai lu bơngai ala teh âu ning-mônh.

³³ Kơlih kơ thoi noh na mưh trŏ kơ iĕm wă sŏng sa, iĕm athei tơgô băl 'mơ̆i.

³⁴ Bơngai bu năm sŏng sa hơdai hăm iĕm kiơ̆ kơ hơlŏng klak sư kơdih, bơngai 'noh iĕm athei sư brŏk sa tơ hnam sư kơdih đĕch 'lơ̆ng hloh, wă kơ 'Bok Kei-Dei huay kơ ăn kơ iĕm đei tơdrong chhŭr nuih. Gah tơdrong nai mă đêl iĕm jet inh 'noh gô inh năm tơ iĕm dơning dơmônh inh bơtho iĕm.