I Kor 10 - Sơ̆p Hlabơar Nơ̆r 'Bok Kei-Dei

¹ Ơ 'nhŏng oh, gah tơdrong lu yă 'bok bơ̆n sơ̆, 'Bok Kei-Dei tơgŭm lu sư tơpă. 'Bok Kei-Dei ăn hơmơ̆l wei-lăng lu sư păng 'Bok Kei-Dei kư̆m tơgŭm lu sư tŏk găn đak dơsĭ huay kơ đei tơdrong kiơ.

² Đak dơsĭ păng hơmơ̆l 'noh pơtih gia dang lu sư iŏk 'batem, wă tơbăt kơ đe tơdrong lu sư kiơ̆ Môis tơpă.

³ Lu sư đei tơmam sa đơ̆ng 'Bok Kei-Dei ăn đơ̆ng plĕnh,

⁴ păng đak nhă lu sư đơ̆ng 'Bok Kei-Dei ăn mơ̆n. Đak lĕch đơ̆ng tơmo. Tơmo 'noh kiơ̆ bơwei lu sư khŏm khŏm. Tơmo 'noh wă khan 'Bok Krist.

⁵ 'Bok Kei-Dei tơgŭm lu sư dang noh ră mă-lei lu sư ưh kơ lui tơpă ôh, na 'Bok Kei-Dei ưh kơ lăp đon kơ lu sư. Thoi noh na 'Bok Kei-Dei ăn kơ lu sư lôch rah kơplah lu sư oei tơ char glă.

⁶ 'Bok Kei-Dei phak lu sư dang noh, Sư wă kơ bơ̆n huay kơ tơchĕng pơm tơdrong kơnê̆ thoi lu yă 'bok bơ̆n sơ̆.

⁷ Thoi noh na bơ̆n 'nĕ kơkuh kơ yang nai thoi lu yă 'bok bơ̆n mơ'nah sơ̆. Sơ̆p hla bơar 'Bok Kei-Dei roi tơdrong lu sư sơ̆ thoi âu: “Lu kon pơlei pơla sa et măk ai, kư̆m pơm suang pơrŏ kơ yang lu sư.”

⁸ Bơ̆n 'nĕ pơm pơyô kư̆ kă thoi lu sư mơ'nah sơ̆; yua kơ lu sư pơm pơyô kư̆ kă, na 'Bok Kei-Dei pơrăm lu sư lôch lăm minh năr đei 'bar-jĭt pêng-rơbâu 'nu.

⁹ Bơ̆n 'nĕ pơm pơhloh kơ Kră Yang thoi lu yă 'bok bơ̆n mơ'nah sơ̆, na 'Bok Kei-Dei pơrăm lu sư ăn kơ 'bih choh pơlôch.

¹⁰ Bơ̆n 'nĕ ơh kơ 'Bok Kei-Dei thoi lu yă 'bok bơ̆n sơ̆; lu sư ơh kơ 'Bok Kei-Dei na 'Bok Kei-Dei pơrăm lu sư, ăn linh jang 'lơ̆ng jur pơlôch.

¹¹ Đe chih roi dôm tơdrong lu yă 'bok bơ̆n pơm ưh kơ lăp kơ 'Bok Kei-Dei, na 'Bok Kei-Dei pơrăm lu sư dang noh sơ̆, 'Bok Kei-Dei Sư wă kơ lu bơ̆n mă kon sâu se lu sư mă hơtuch dang ei băt kơ hli, huay pă pơm kơnê̆, thoi lu yă 'bok bơ̆n mă pơm kơnê̆ kơ 'Bok Kei-Dei sơ̆.

¹² Thoi noh boih na bơngai bu ngêh kơ tơ'ngla sư lui kơjăp, bơngai 'noh athei kơchăng hli kơ sư jing rơdu pơm yoch.

¹³ Gah tơdrong đe pơhlŭ wă kơ iĕm kiơ̆ sư pơm yoch, lu 'nhŏng oh bơ̆n nai đe kư̆m pơhlŭ mơ̆n. Mă-lei 'Bok Kei-Dei wei-lăng bơ̆n, Sư ưh kơ ăn đe pơhlŭ bơ̆n truh tơ bơ̆n pơm tơdrong yoch ôh, Sư gô tơgŭm bơ̆n tơpă wă kơ bơ̆n huay kơ lui kơ đe pơhlŭ.

Bơ̆n 'nĕ kiơ̆ đe sa et tơmam đe sơmah kơ yang kơnê̆

¹⁴ Yua kơ thoi noh na ơ lu 'nhŏng oh mă inh 'mêm kơeng, iĕm athei tŭk lê̆ đĭ dôm tơdrong yang kơnê̆ hŏ, 'nĕ pă kiơ̆ sư.

¹⁵ Inh băt kơ iĕm bơngai hlôh wao, na dang ei iĕm gô mơ̆ng păng tơchĕng tơdrong inh pơma:

¹⁶ Kơplah năr bơ̆n akŭm krao khan 'blŏk hơdơ̆r gah tơdrong Yêsu, bơ̆n iŏk kơchŏk đak hơmu huch, 'noh dang bơ̆n huch pham Yêsu; păng bơ̆n iŏk phĕ sa 'bĕng mi, 'noh dang bơ̆n iŏk sa akâu Sư.

¹⁷ Lăp minh pôm 'bĕng mi noh đĕch, mă-lei đei lơ bơngai sa, 'noh pơtih gia kơ lu bơ̆n bơngai lơlap lơlang pơgơ̆p jing dang minh 'nu bơngai minh jơhngơ̆m minh đon hăm Yêsu Krist.

¹⁸ Lu bơngai Isơrael kư̆m lei-lăi thoi bơ̆n mơ̆n, lu mă trŏ kơ sa et tơmam sơmah kơ 'Bok Kei-Dei, bơ̆n 'bôh lu sư pơm tơdrong 'noh bơ̆n băt lu sư pôm đon hăm 'Bok Kei-Dei.

¹⁹ Iĕm hăm hlôh inh pơma gah tơdrong kiơ? Păng iĕm 'nĕ tơchĕng gah tơdrong inh pơma gah tơdrong rup yang kơnh iĕm ngêh inh khan 'noh yang tơpă, ưh ôh. Păng tơmam đe sơmah 'noh kơnh iĕm ngêh inh khan 'noh tơmam rup yang tơpă, ưh ôh.

²⁰ Inh wă khan thoi âu: Tơmam lu bơngai kiơ̆ yang kơnê̆, lu sư sơmah kơ yang kơnê̆, 'noh ưh kơ sĭ lu sư sơmah kơ 'Bok Kei-Dei ôh. Na inh kuă ăn iĕm sa tơmam 'noh, dah iĕm sa dang iĕm pôm đon hăm yang kơnê̆ mơ̆n.

²¹ Bơ̆n 'nĕ sa et 'bar pang, sa et kơchŏk 'blŏk kơ Yêsu boih, na sa et dơ̆ng kơchŏk đe sơmah kơ yang kơnê̆. Sa et tơ gơ'bang Yêsu boih, na sa et dơ̆ng tơ anih đe sơmah kơ yang kơnê̆.

²² Dah bơ̆n oei kiơ̆ đe sa et tơmam đe sơmah kơ yang kơnê̆, 'noh dang bơ̆n pơlong Kră Yang hăm 'mêm kơ bơ̆n păng tơgar iŏk bơ̆n đơ̆ng yang kơnê̆ dah ưh. Iĕm tơchĕng bơ̆n pran tih dang yơ na mă pơlong 'Bok Kei-Dei thoi noh?

²³ Đe khan: “Bơngai lui gơh pơm tôm tơdrong kư̆m bưh, ưh kơ đei kơ̆m ôh.” Mă-lei kư̆m đei tơdrong ưh kơ pơyua kơ bôl buăl wă kơ sư kiơ̆ kơ 'Bok Kei-Dei.

²⁴ Bơ̆n 'nĕ tơchĕng kiơ̆ kơ akâu bơ̆n kơdih, bơ̆n athei tơchĕng 'mêm mơnat kơ bôl buăl bơ̆n.

²⁵ Tơdah iĕm năm tơ kơchơ wă răt 'nhĕm sa, iĕm 'nĕ apinh bơngai mă tĕch 'nhĕm 'noh: “'Nhĕm ih hăm sơmah ưh?” Iĕm kư̆ kơ răt đĕch,

²⁶ yua kơ lăm sơ̆p hla bơar 'Bok Kei-Dei đe chih khan thoi âu: “Plĕnh teh păng dôm tơmam lăm plĕnh teh, tơmam 'Bok Kei-Dei ngăl.”

²⁷ Dah lu 'nhŏng oh bơ̆n mă tam lui kơ 'Bok Kei-Dei, sư krao bơ̆n tŏk sŏng por tơ hnam sư, mă sư pôk kơ bơ̆n 'nhĕm 'nhot kiơ kiơ, bơ̆n kư̆ kơ sa đĕch, 'nĕ kơ jet sư: “'Nhĕm iĕm hăm sơmah ưh?”

²⁸ Mă-lei dah đei bơngai lui 'bơ̆t noh sư khan: “'Nhĕm 'noh 'nhĕm sư sơmah kơ yang.” Dah iĕm kơtơ̆ng thoi noh lei iĕm 'nĕ pă sa, yua kơ bôl bơ̆n tơchĕng yoch dah bơ̆n sa.

²⁹ Iĕm tơchĕng khan huay kơ kơ̆m ră, mă-lei bôl bơ̆n khan kơ̆m; 'noh iĕm 'nĕ pă sa. Na pơtih gia iĕm jet inh khan: “Dah bơ̆n tơchĕng khan huay kơ kơ̆m kư̆ kơ sa đĕch, lei yua kơ kiơ bơ̆n wă chu bôl?

³⁰ Hơdrol kơ wă sa bơ̆n kư̆m krao khan bơnê kơ 'Bok Kei-Dei ăn kơ bơ̆n tơmam sa boih, mă-lei yua kơ kiơ bôl bơ̆n mă lui 'noh khă kuă ăn sa tơmam 'nhĕm 'nhot mă bơ̆n krao khan kơ 'Bok Kei-Dei boih 'noh?”

³¹ Na inh tơl iĕm thoi âu: Mă tôm tơdrong bơ̆n sŏng sa nhă đak, mă tôm tơdrong bơ̆n jang pơm tơdrong kiơ, bơ̆n athei băt pơư pơang anăn 'Bok Kei-Dei lăm tôm tơdrong 'noh.

³² Mă tôm tơdrong bơ̆n jang pơm tơdrong kiơ bơ̆n athei kơchăng hŏ, hli kơ bơ̆n pơơh đe, mă sư bơngai Juđê, mă sư bơngai dêh nai, mă tơduă bơngai lui kơ 'Bok Kei-Dei.

³³ Gah inh ling-lang pơm 'lơ̆ng tơpăt wă kơ đĭ-đăng bơngai lăp đon kơ inh lăm tôm tơdrong. Inh ưh kơ wă tơchĕng tơgŭm gah akâu inh kơdih ôh, inh wă tơgŭm pơyua lu bôl buăl wă kơ lơ bơngai lui kơ Yêsu Krist na klaih đơ̆ng tơdrong yoch.