I Kor 1 - Sơ̆p Hlabơar Nơ̆r 'Bok Kei-Dei

Pơih nơ̆r pơma

¹ Inh Pôl bơngai mă 'Bok Kei-Dei rơih pơm jơ̆ng 'bang Yêsu Krist, na nhi 'nhŏng bơ̆n Sôten,

² chih hơpong kơ lu 'nhŏng oh bơngai lui tơ pơlei iĕm Kôrintô. 'Bok Kei-Dei rơih iŏk iĕm jing kon Sư, iĕm jing bơngai tơpăt yua kơ iĕm lui kơ Yêsu Krist, noh kư̆m thoi lĕ đĭ-đăng bơngai mă krao khan kơ Yŏng bơ̆n Yêsu Krist jơ̆p kơ anih; Sư Kră Yang đĭ-đăng kơ bơ̆n.

³ Nhôn apinh 'Bă tơm bơ̆n 'Bok Kei-Dei hăm Kră Yang bơ̆n Yêsu Krist wei-lăng iĕm tôm tơdrong wă kơ Sư ăn kơ iĕm hiôk-hian ling-lang.

'Bok Kei-Dei pơgơ̆p ăn Kon Sư hăm kon bơngai

⁴ Inh ling-lang bơnê kơ 'Bok Kei-Dei 'mêm kơ iĕm, Sư tơgŭm iĕm, yua kơ Sư mơnat đơ̆ng iĕm lui kơ Yêsu Krist.

⁵ Yua kơ đơ̆ng tơdrong iĕm lui na iĕm jing băt tôm tơdrong, iĕm hơgei kơ bơtho, iĕm kư̆m hlôh tơdrong Sư mơ̆n.

⁶ Tôm tơdrong bơtho gah tơdrong Yêsu Krist, iĕm băt kơ trŏ tơpă na iĕm oei lui kơjăp truh dang ei.

⁷ Yua kơ thoi noh na 'Bok Kei-Dei ăn kơ iĕm tôm tơdrong mah ngăl wă jang tơdrong Sư kơplah iĕm oei chang gô Kră Yang bơ̆n Yêsu Krist.

⁸ Sư ăn kơ iĕm oei lui kơjăp truh năr tôch, wă kơ iĕm oei 'lơ̆ng tơpăt huay kơ đei tơdrong yoch kiơ kơplah năr Kră Yang Yêsu Krist jur.

⁹ 'Bok Kei-Dei ling-lang pơm trŏ thoi Sư pơkă, na Sư gô tơgŭm iĕm tơpă păng Sư boih rơih iŏk iĕm pơgơ̆p hăm Kon Sư Yêsu Krist Kră Yang bơ̆n.

Lu bơngai lui pơjah băl

¹⁰ Ơ 'nhŏng oh, inh wă bơtho iĕm thoi âu: Đĭ-đăng kơ bơ̆n minh khŭl lui kơ Kră Yang Yêsu Krist, bơ̆n athei tơguăt băl minh jơhngơ̆m, pơm pôm 'bơ̆r đon mă hơnơ̆ng wă kơ bơ̆n huay kơ tơklah băl.

¹¹ Ơ 'nhŏng oh, inh bơtho khan kơ iĕm thoi noh yua kơ inh kơtơ̆ng đơ̆ng hnam dơnŏ yă Klôwê roi kơ inh tơdrong iĕm đei pơjah băl.

¹² Inh wă roi thoi nơ̆r iĕm khan: “Inh wă kiơ̆ Pôl.” Mơ'nah khan: “Inh wă kiơ̆ Apôlê.” Mơ'nah khan: “Inh wă kiơ̆ Pêtrôs.” Mơ'nah dơ̆ng khan: “Inh wă kiơ̆ Yêsu Krist.”

¹³ Lu bơngai lui kơ Yêsu Krist wă tơklah jing lơ khŭl boih hă? Pôl dah bu lôch tang iĕm tơ 'long pơglang 'noh? Đe iŏk 'batem hăm anăn inh mơ̆n dah kiơ? Ưh ôh.

¹⁴ Inh bơnê kơ 'Bok Kei-Dei yua kơ inh ưh kơ đei pơm kơ iĕm 'batem ôh sơ̆. Hơtai ei sơ̆ inh pơm kơ bre Kripơ hăm Guơs đĕch đơ̆ng lu khŭl iĕm.

¹⁵ Thoi noh na inh ưh kơ wă ôh iĕm pơm khan iĕm iŏk 'batem hăm anăn inh.

¹⁶ Hei inh hiơt roi kơ iĕm, inh kư̆m oei pơm kơ đe 'batem mơ̆n, pơm kơ hnam dơnŏ đe Sêphanna. Đơ̆ng rŏng kơ noh inh ưh pă 'blŏk pơm kơ bu dơ̆ng boih.

¹⁷ Mă-lei ưh kơ sĭ Yêsu Krist wơh inh năm chă pơm kơ đe 'batem ôh. Yêsu Krist Sư wơh inh năm chă bơtho đe tơdrong 'nao 'lơ̆ng Sư đĕch păng Sư ưh kơ wă inh bơtho kiơ̆ kơ 'bơ̆r đon inh hơgei ôh. Dah inh bơtho kiơ̆ kơ 'bơ̆r đon inh hơgei lei đe ang inh đĕch, đe ưh kơ đei ang Yêsu mă lôch tơ 'long pơglang mă kăl tơpă, khan wă hiong ngôi đĕch.

'Bok Kei-Dei jô̆ tơdrong hơgei kon bơngai thoi lĕ kơtul

¹⁸ Lu bơngai wă hiong răm, lu sư lăng tơdrong bơ̆n bơtho gah tơdrong Yêsu Krist lôch tơ 'long pơglang, lu sư lăng dang tơdrong kơtul đĕch. Mă-lei gah bơ̆n, bơ̆n băt tơpă tơdrong Yêsu lôch tơ 'long pơglang kăl dêh, noh tơdrong mơsêh mơyang 'Bok Kei-Dei pơklaih bơ̆n.

¹⁹ Đe chih nơ̆r 'Bok Kei-Dei pơma sơ̆ thoi âu: “Lu bơngai hơgei inh gô pơtôch lê̆ tơdrong hơgei sư, ăn kơ lu sư jing ưh kơ hlôh; lu bơngai 'bơ̆r đon, inh gô pơtôch lê̆ tơdrong lu sư 'bơ̆r đon.”

²⁰ Na tơ yơ lu bơngai đe khan 'bơ̆r đon ei? Tơ yơ bơngai đe ang khan lu sư hŏk hơgei? Tơ yơ lu bơngai mă pran kơ pơjah pơjăng lăm kon bơngai ala teh âu? 'Bok Kei-Dei jô̆ tơdrong noh boih tơdrong hơgei kon bơngai thoi lĕ kơtul.

²¹ 'Bok Kei-Dei hơgei tơpă, na Sư ưh kơ wă kơ kon bơngai bơ̆n chă Sư kiơ̆ kơ đon kon bơngai bơ̆n tơchĕng ôh. 'Bok Kei-Dei Sư lăp đon gah tơdrong dŏng pơklaih dôm lu bơngai mă lui kơ Yêsu lôch tang bơ̆n tơ 'long pơglang. Mă-lei lu bơngai mă ưh kơ lui, lu sư tơchĕng tơdrong bơ̆n bơtho 'noh nhen lĕ tơdrong kơtul đĕch.

²² Khŭl bơngai Juđê, lu sư wă kơ 'bôh tơdrong mơsêh 'mơ̆i na lui; gah khŭl bơngai Grĕk, lu sư lui kiơ̆ kơ đe bơtho hơgei đĕch.

²³ Gah bơ̆n bơtho khan kơ đe tơdrong Yêsu lôch tơ 'long pơglang, mă-lei bơngai Juđê ơh klai, na mă lu bơngai nai lăng bơ̆n bơtho tơdrong 'noh nhen tơdrong kơtul đĕch.

²⁴ Mă-lei gah bơ̆n mă 'Bok Kei-Dei rơih iŏk boih, mă bơngai Juđê mă bơngai nai, tơdrong Yêsu Krist lôch tơ 'long pơglang 'noh, bơ̆n băt tơdrong Yêsu Krist tơgŭm bơ̆n tôch bơneh tơpă păng 'Bok Kei-Dei mơsêh mơyang tơpă, hơgei tôm tơdrong, na Sư mah ăn Yêsu lôch tang bơ̆n.

²⁵ Dôm tơdrong 'Bok Kei-Dei trŏ ngăl ră, mă-lei phŏ kon bơngai bơ̆n lăng thoi lĕ kơtul. Mă tơpă dôm tơdrong 'Bok Kei-Dei hơgei hloh kơ tơdrong kon bơngai lăng hơgei. Dôm tơdrong 'Bok Kei-Dei pran kơtang, mă-lei phŏ kon bơngai lăng thoi lĕ rơdu. Mă tơpă dôm tơdrong 'Bok Kei-Dei pran, Sư pran hloh kơ kon bơngai pran

²⁶ Ơ 'nhŏng oh, iĕm chă lăng lu bơngai mă 'Bok Kei-Dei rơih iŏk đơ̆ng lu khŭl iĕm sơ̆, sư thoi yơ? Lăm lu iĕm kư̆m hui kơ đei hŏk hơgei, hui bơngai pơm tih, hui bơngai đơ̆ng adrĕch yŏng mơng.

²⁷ Mă-lei 'Bok Kei-Dei rơih iŏk boih lu bơngai ưh kơ hơgei ala teh âu wă pơm kơ lu bơngai hơgei mơlâu; 'Bok Kei-Dei kư̆m rơih iŏk boih lu bơngai tơrăn ala teh âu wă pơm kơ lu bơngai pran kơtang mơlâu;

²⁸ păng 'Bok Kei-Dei rơih iŏk boih lu bơngai mă pă jing jat pă-tat tơdrong wă pơthuơ lu bơngai pơm tih pơm yŏng.

²⁹ Thoi noh na ưh kơ đei bu gơh pơang akâu sư 'bơ̆t anăp 'Bok Kei-Dei.

³⁰ 'Bok Kei-Dei ăn kơ bơ̆n oei hơdai minh jơhngơ̆m minh đon hăm Yêsu Krist. 'Bok Kei-Dei ăn kơ Kon Sư Yêsu Krist tơbăt ăn kơ bơ̆n gơh tơchĕng hơgei gah tơdrong Sư. Yua kơ đơ̆ng Yêsu Krist na 'Bok Kei-Dei huai iŏk bơ̆n đơ̆ng tơdrong yoch, Sư jô̆ bơ̆n jing bơngai tơpăt hăm Sư păng Sư ăn kơ bơ̆n jing bơngai 'lơ̆ng.

³¹ Thoi noh mơ̆n, lăm sơ̆p hla bơar 'Bok Kei-Dei đe chih thoi âu sơ̆: “Bơ̆n 'nĕ pă pơang akâu kơdih, bơ̆n athei pơang anăn Kră Yang đĕch.”