I Ho 5 - Sơ̆p Hlabơar Nơ̆r 'Bok Kei-Dei

Adrĕch adrung Rubên

¹ Rubên, kon drŏ-nglo kơdră Isơrael, yua kơ sư pơm pơ'mê̆ kơ giơng 'bă sư kơdih na krao kon kơdră noh, jing pơjao ăn kơ lu kon drŏ-nglo Jôsep, kon drŏ-nglo Isơrael; yua kơ noh lăm adrĕch adrung ưh kơ đei chih răk anăn sư kon kơdră.

² Mă Juđa pran kơtang hloh kơ lu 'nhŏng oh sư păng đơ̆ng sư na đei pơtao pơgơ̆r; mă-lei jing kon kơdră noh tơ Jôsep.

³ 'Nâu lu kon drŏ-nglo Rubên, kon kơdră drŏ-nglo Isơrael: Hanok, Palu, Hêsrôn păng Karmi.

⁴ Kon sâu Jôel: Kon drŏ-nglo Jôel noh: Sêmaia. Kon drŏ-nglo Sêmaia noh: Got. Kon drŏ-nglo Got noh: Simêi.

⁵ Kon drŏ-nglo Simêi noh: Mika. Kon drŏ-nglo Mika noh: Rêaia. Kon drŏ-nglo Rêaia noh: Baal.

⁶ Kon drŏ-nglo Baal noh: Beerah, bơngai mă Tiglat Pileser pơtao dêh Asiri rôp pơm bơnă; Beerah bơngai pơgơ̆r lăm adrĕch Rubên.

⁷ 'Nhŏng oh kiơ̆ kơ adrĕch sư đe chih jô̆ lăm sơ̆p hla bơar adrĕch adrung: Noh Jêiêl bơngai pơgơ̆r, Sachari

⁸ păng Bêla kon drŏ-nglo Asa, sâu Sêma, sâu i Jôel. Lu sư oei đơ̆ng pơlei Arôe truh tơ Nêbô păng Baal Mêôn;

⁹ Gah hơlĕch sư oei tơ char glă mă să truh tơ đak Krong Ơphrat, yua kơ khŭl sem dơrong lu sư chek hrôh rai lơlap lơlang lăm dêh Gileat.

¹⁰ Lăm jơhnơr pơtao Sôl, lu sư tơblah hăm kon pơlei Hagrit jei lu sư păng oei hloi lăm jơ̆p kơ tơring gah hơlĕch dêh Gileat.

Adrĕch adrung Gat

¹¹ Kon drŏ-nglo Gat oei tơklă jê̆ lu sư lăm dêh Basan truh tơ Salêka.

¹² Jôel bơngai yŏng kơdră, Sapham bơngai jang đơ̆ng rŏng kơ sư đơ̆ng noh Janai păng Saphat pơgơ̆r lăm char Basan.

¹³ 'Nhŏng oh kiơ̆ kơtum kơtŏng adrĕch lu sư, đei tơpơh 'nu: Mikael, Mêsulam, Sêba, Jôrai, Jakan, Siê păng Eber.

¹⁴ 'Noh boih lu kon drŏ-nglo Abihai, Abihai kon drŏ-nglo Huri, Huri kon drŏ-nglo Jarôa, Jarôa kon drŏ-nglo Gileat, Gileat kon drŏ-nglo Mikael, Mikael kon drŏ-nglo Jêsisai, Jêsisai kon drŏ-nglo Jađô, Jađô kon drŏ-nglo Bus.

¹⁵ Ahi kon drŏ-nglo Apđiel, Apđiel kon drŏ-nglo Guni; Ahi bơngai yŏng kơdră lăm adrĕch lu sư,

¹⁶ Lu sư oei lăm char Gileat, lăm char Basan, dêh lu pơlei iĕ; kư̆m oei lăm tơmăn 'nhĕt thŭng Sarôn truh kơ hơdral dêh char lu sư.

¹⁷ Lu bơngai 'nâu đei chih tơmơ̆t boih lăm sơ̆p hla bơar adrĕch adrung chăl Jôtham pơm pơtao dêh char Juđa păng lăm chăl Jêrôbôam pơm pơtao dêh char Isơrael.

¹⁸ Lăm kon sâu Rubên, Gat păng minh puăt adrĕch Manase, lu bơngai pran kơtang, gơh hơgei chĕp khêl đao, hră păng juăt tơblah hơgei; puăn-jĭt puăn-rơbâu tơpơh-hrĕng tơdrâu-jĭt 'nu bơngai hơmet boih wă tơblah.

¹⁹ Lu sư tơblah hăm kon pơlei Hagrit, kon pơlei Jêtur, kon pơlei Naphis, păng kon pơlei Nôđap.

²⁰ Lăm kơplah tơblah băl, lu sư krao apinh Kră Yang 'Bok Kei-Dei, na Kră Yang 'Bok Kei-Dei tơgŭm lu sư tơblah hăm kon pơlei Hagrit păng đĭ-đăng lu bơngai kiơ̆ sư jei lu sư yua kơ lu sư đei jơhngơ̆m đon lui gơnang kơ Kră Yang.

²¹ Lu sư đei rôp iŏk khŭl sem dơrong lu kon pơlei Hagrit, pơđăm-jĭt rơbâu aseh lăk-đa, 'bar-hrĕng pơđăm-jĭt rơbâu triu, 'bar-rơbâu aseh iĕ păng hăm minh-hrĕng rơbâu 'nu bơngai.

²² Kŭm đei lơ bơngai lôch, yua kơ đei Kră Yang 'Bok Kei-Dei wang tơblah lăm năr tơblah băl 'nâu. Lu sư oei tơ noh hloi dĭng truh tơ đe rôp chông ba năm pơm bơnă.

Adrĕch adrung Manase

²³ Đei minh puăt bơngai Manase oei lăm dêh char noh lơ tơpă iŏk đơ̆ng dêh Basan truh tơ Baal Hermôn, tơ Sênir păng Kông Hermôn.

²⁴ 'Nâu boih lu bơngai yŏng pơgơ̆r lăm adrĕch adrung lu sư: Êpher, Isi, Êliel, Asriel, Jêrêmi, Hôđawia păng Jahdiêl. Lu sư bơngai yŏng kơdră lăm adrĕch lu sư, lu sư bơngai nuih kơtang đe ư-ang.

²⁵ Mă-lei lu sư pơm yoch hăm Kră Yang 'Bok Kei-Dei 'bok lu sư, lu sư kiơ̆ lu rup yang lu bơngai dêh char noh, mă Kră Yang 'Bok Kei-Dei đei pơrăm lê̆ boih 'bơ̆t anăp lu sư.

²⁶ Na Kră Yang 'Bok Kei-Dei Isơrael, pơtrŭt jơhngơ̆m Pul, pơtao dêh char Asiri păng Tiglat Phileser pơtao dêh char Asiri, rôp lu kon pơlei bơngai Rubên, bơngai Gat păng minh puăt bơngai Manase anhăk ba lu sư tơ pơlei Hala, Habôr, Hara, păng tơ tơring đak Krong Gôsan, dĭng truh tơ dang ei.