I Ho 4 - Sơ̆p Hlabơar Nơ̆r 'Bok Kei-Dei

Adrĕch adrung Juđa

¹ Kon sâu Juđa noh: Phêrês, Hêsrôn, Karmi, Hur păng Sôbal.

² Rêaja, kon drŏ-nglo Sôbal pơjing Jahat; Jahat pơjing Ahumai păng Lahat. 'Noh boih lu kon pơlei Sôrathit.

³ 'Nâu kon drŏ-nglo Êtam: Jêsreel Isma păng Ibas; oh drŏ-kăn lu sư anăn Haselepôni,

⁴ đei dơ̆ng Penuel 'bă kơ Gêđôr, păng Êser 'bă kơ Husa. 'Noh boih, kon sâu Hur, kon drŏ-nglo kơdră Êphratha 'bă kơ Betlehem.

⁵ Asur, 'bă kơ Têkôa, đei 'bar 'nu akăn Hêla păng Naara.

⁶ Naara tơpŭ kơ Ahusam, Hêpher, Têmeni păng Ahachtari. Noh boih lu kon drŏ-nglo Naara.

⁷ Kon drŏ-nglo Hêla noh: Sêret, Sôhar, Êtnan,

⁸ Kôs pơjing Anup, Hasôbêba păng adrĕch Aharhel, kon drŏ-nglo Harum.

⁹ Jabes đe pơyom hloh 'biơ̆ kơ lu 'nhŏng oh sư; mĕ sư krao anăn Jabes sư khan: “Inh tơpŭ kơ sư noh pơmat.”

¹⁰ Jabes krao apinh Kră Yang 'Bok Kei-Dei Isơrael khan: “Ơ Kră Yang apinh Ih tuh ăn kơ inh pŭn hiôk pơih ăn hơdral teh đak inh mă să! Apinh ti mơsêh Ih oei hơdai inh, wei-lăng inh klaih đơ̆ng tơdrong răm pơmat-tat” Kră Yang 'Bok Kei-Dei ăn hloi thoi tơdrong sư krao apinh.

¹¹ Kêlup, oh kơ Suha, 'bă kơ Mêhir, Mêhir 'bă kơ Êstôn.

¹² Êstôn pơjing Bet Rapha, Phasêa păng Têhina, 'bă kơ Irnahas. 'Noh boih lu bơngai Rêka.

¹³ Kon drŏ-nglo Kênas: Ôtniêl păng Sêraja. Kon drŏ-nglo Ôtniêl: Hathat păng Mêônôthai.

¹⁴ Mêônôthai pơjing Ophra. Sêraja pơjing Jôap, 'bă kơ Gê Harasim. Đe krao lu sư thoi noh yua kơ lu sư bơngai jang păng ti gơh hơgei.

¹⁵ Lu kon drŏ-nglo Kalep kon drŏ-nglo Jêphunê noh: Iru, Êlah, păng Naam. Kon drŏ-nglo Êlah noh: Kênas.

¹⁶ Kon drŏ-nglo Jêhalêlel noh: Sip, Sipha, Tiria păng Asarel.

¹⁷ Kon drŏ-nglo Esra noh: Jêther, Mêret, Epher păng Jalôn. Akăn Mêret tơpŭ kơ Miriam, Sammai, păng Isba 'bă kơ Êthemôa.

¹⁸ Akăn sư bơngai Juđa tơpŭ kơ Jêret, 'bă kơ Gêđôr, Hêber, 'bă kơ Sôkô păng Jêkuthiêl 'bă kơ Sanôa. 'Noh boih kon Bithia, kon drŏ-kăn Pharaôn, mă Mêret iŏk pơm akăn.

¹⁹ Kon drŏ-nglo akăn Hôđia, oh drŏ-kăn Naham, pơjing 'bă kơ Kêila bơngai Garmit, păng Êthemôa, bơngai Maakathit.

²⁰ Kon drŏ-nglo Simôn noh: Amnôn, Rinna, Bên Hanan păng Tilôn. Lu kon sâu Isi noh: Sôhêt păng Bên Sôhêt.

²¹ Kon drŏ-nglo Sêla, kon drŏ-nglo Juđa noh: Er, 'bă kơ Lêka, Laađa, 'bă kơ Marêsa păng lu adrĕch adrung lu bơngai tanh brai tơ pơlei Bêt Asbêa,

²² Jôkim lu bơngai pơlei Kôsêba, Jôas păng Sarap, bơngai pơgơ̆r dêh Môap hăm Jasubi Lêhem. 'Noh lu anăn đe chih sơ̆.

²³ Lu bơngai 'nâu gơh man ge gŏ, oei 'bơ̆t pơlei Nêtaim păng pơlei Gêđêra; lu sư oei tơ noh bơ̆jang kơ pơtao.

Adrĕch adrung Simêôn

²⁴ Kon sâu Simêôn noh: Nêmuel, Jamin, Jarip, Sêra păng Saul;

²⁵ Sallum kon drŏ-nglo Saul, Mipsam kon drŏ-nglo Sallum, păng Misma kon drŏ-nglo Mipsam.

²⁶ Kon sâu Misma noh: Hammuel, kon drŏ-nglo Hammuel noh Sakur, kon drŏ-nglo Sakur noh Simêi.

²⁷ Na Simêi đei mơjĭt-tơdrâu 'nu kon drŏ-nglo păng tơdrâu 'nu kon drŏ-kăn; mă-lei 'nhŏng oh lu sư ưh kơ đei kon hơ'lơ̆p lơ thoi adrĕch bơngai Juđa

²⁸ Lu sư oei tơ pơlei Bêrsêba, pơlei Molađa pơlei Hasar Sual,

²⁹ pơlei Bila, pơlei Esem, păng pơlei Tôlat,

³⁰ pơlei Bêthuêl, Horma, Siklak,

³¹ pơlei Bêt Makabôt, Hasar Susim, Bêt Biri păng pơlei Saaraim. 'Noh boih pơlei lu sư oei truh tơ chăl pơtao Đawit pơgơ̆r.

³² Đei pơđăm tŏ pơlei iĕ jum dăr noh pơlei Êtam, Ain, Rimmôn, Tôken, păng Asan,

³³ Đei lu pơlei iĕ oei tăp dăr kơ pơlei tih 'nâu truh tơ Baal noh boih anih lu sư oei păng lu sư đei chih răk đĭ adrĕch adrung lu sư,

³⁴ Mêsôbap, Jamlek, Jôsa, kon drŏ-nglo Amasia,

³⁵ Jôel, Jêhu, noh kon drŏ-nglo Jôsibia, sâu Sêraia, sâu i Asiêl,

³⁶ Êliôenai, Jakôba, Jêsôhaia, Asaia, Ađiêl, Jêsimiel Bênaia,

³⁷ păng Sisa, kon drŏ-nglo Siphi, sâu Alôn sâu i Jêđaia, sâu ach Simri, kon drŏ-nglo Sêmaia.

³⁸ Dôm lu bơngai đei anăn 'nâu jơ̆ lu bơngai chĕp kơ̆l pơgơ̆r lăm adrĕch lu sư kơdih; adrĕch adrung lu sư rai tŏk kơdrơ̆m lơlang lơlap.

³⁹ Lu sư năm tơ tơring Gêđôr, truh tơ gah hơlĕch kơ thŭng dơnă, wă chă tơmăn 'nhĕt ăn kơ sem dơrong lu sư.

⁴⁰ Lu sư chă 'bôh hloi tơmăn 'nhĕt bluh 'lơ̆ng na teh kư̆m să rơhơi, chơngue, hiôk-hian; adrol kơ noh adrĕch adrung Cham oei tơ noh.

⁴¹ Dôm lu bơngai đei anăn kơpal 'nâu, lăm chăl Hesekia; pơtao đe Juđa, lu sư blah lu bơngai Hamit hăm lu bơngai Meunit oei tơ noh, lu sư blah pơrăm tơgar iŏk đĭ teh păng oei hloi truh tơ dang ei; yua kơ tơ noh đei tơmăn 'nhĕt wă wei rong lu sem dơrong lu sư.

⁴² Lăm adrĕch Simêôn đei pơđăm-hrĕng 'nu bơngai năm truh tơ tơring Kông Sêir; lu bơngai pơgơ̆r lu sư noh Phêlatia, Nêaria, Rêphaia păng Usiêl; 'noh lu kon drŏ-nglo Isi.

⁴³ Lu sư blah pơlôch bơngai Amalek mă oei đei klaih, na lu sư oei tơ noh hloi truh tơ dang ei.