I Ho 26 - Sơ̆p Hlabơar Nơ̆r 'Bok Kei-Dei

Bơngai gak 'măng jang

¹ Dôm lu khŭl bơngai gak 'măng jang thoi âu: Lu bơngai Kôrahit đei Mêsêlêmia, kon drŏ-nglo Asap.

² Kon drŏ-nglo Mêsêlêmia đei: Secharia kon kơdră sư Jêđiael kon mă 'bar, Sêbađia kon mă pêng, Jatniêl kon mă puăn,

³ Êlam kon mă pơđăm, Jehôhanan kon mă tơdrâu, păng Êliehôenai kon mă tơpơh.

⁴ Lu kon drŏ-nglo Ôbêt Eđôm: Sêmaia kon kơdră sư, Jêhôsabat kon mă 'bar, Jôa kon mă pêng, Sakar kon mă puăn, Nêthanel kon mă pơđăm.

⁵ Ammiel mă tơdrâu, Isakar mă tơpơh păng Phêulêthai mă tơhngam yua kơ Kră Yang 'Bok Kei-Dei đei tuh tơdrong pŭn hiôk kơ Ôbêt Eđôm ăn đei kon lơ.

⁶ Sêmêia, kon drŏ-nglo Ôbêt Eđôm, kư̆m pơjing lu kon drŏ-nglo, đei wei-lăng adrĕch 'bă yua kơ lu sư tă kơ bơngai gơh hơgei ngăl.

⁷ Lu kon drŏ-nglo Sêmaia noh Ôtni, Rêphăl, Ôbêt păng Êlsabat; 'nhŏng oh lu sư Êlihu păng Sêmakia, lu bơngai nuih gơh hơgei ngăl.

⁸ Đĭ-đăng lu bơngai 'nâu kon sâu Ôbêt Eđôm; lu sư, hăm lu kon drŏ-nglo păng 'nhŏng oh lu sư tă kơ bơngai nuih gơh hơgei tơdrong jang đei tơdrâu-jĭt 'bar 'nu bơngai lu sư gah adrĕch adrung Ôbêt Eđôm.

⁹ Mêsêlêmia đei lu kon drŏ-nglo păng 'nhŏng oh sư tă kơ bơngai nuih gơh hơgei, đĭ-đăng đei mơjĭt-tơhngam 'nu.

¹⁰ Hôsa, adrĕch adrung Mêrari, kư̆m đei lu kon drŏ-nglo; Simri kon mă mônh mă khan sư ưh kơ trŏ kon kơdră ră, 'bă sư pôk sư pơm kon kơdră.

¹¹ Hilkia kon mă 'bar, Têbalia kon mă pêng păng Sacharia kon mă puăn. Đĭ-đăng kon drŏ-nglo păng 'nhŏng Hôsa đei mơjĭt-pêng 'nu.

¹² 'Nâu lu khŭl bơngai gak 'măng jang kiơ̆ kơ yŏng pơgơ̆r lu sư, kư̆m bơ̆jang lăm hnam Kră Yang lei-lăi thoi lu 'nhŏng oh sư.

¹³ Lu sư kiơ̆ kơ adrĕch adrung kơdih na hlang lăng iŏk 'măng jang bơngai 'lơ̆p thoi bơngai 'lŏ.

¹⁴ Hlang lăng 'măng jang hơlĕch trŏ kơ Sêlêmia. Hlang lăng 'măng jang yă-nơ̆m, trŏ kơ Sacharia kon drŏ-nglo Sêlêmia, bơngai gơh hơgei tơgŭm chă đon.

¹⁵ Hlang lăng 'măng jang gơal trŏ kơ Ôbêt Eđôm; hlang lăng trŏ kơ lu kon drŏ-nglo sư, wei-lăng hnam 'măn tơmam.

¹⁶ Suppim păng Hôsa hlang lăng trŏ 'măng jang Bơmơ̆t, 'măng jang Salêket, 'bơ̆t trong suăn năm tơ 'bar tŏ anih gak.

¹⁷ Rim năr 'măng jang Hơlĕch đei tơdrâu 'nu bơngai Lêwi gak 'măng jang gah yă-nơ̆m đei puăn 'nu bơngai Lêwi gak, 'măng jang Gơal đei puăn 'nu bơngai gak, păng hnam 'măn tơmam, rim 'măng đei 'bar 'nu bơngai.

¹⁸ Tơ 'bar tŏ anih gah Bơmơ̆t đei puăn 'nu 'bơ̆t 'nguaih kơ trong păng đei 'bar 'nu bơngai 'bơ̆t lăm cham.

¹⁹ 'Noh lu bơngai gak 'măng jang, kon sâu Kôra păng kon sâu Mêrari.

Lu bơngai wei-lăng hnam 'măn tơmam păng lu yŏng pơgơ̆r

²⁰ Lăm lu bơngai Lêwi mơ'nah wei-lăng hnam 'măn tơmam, hnam Kră Yang 'Bok Kei-Dei păng anih tah lu tơmam rơgoh.

²¹ Kon sâu Lađan lăm bơngai Gersôn pơm yŏng kơdră lăm bơngai Gersôn noh Jehieli.

²² Lu kon drŏ-nglo Jehieli noh Sêtham, păng Jôel oh sư đĭ-đăng lu sư jang wei-lăng hnam tah tơmam lăm hnam Kră Yang.

²³ Lăm bơngai Amram bơngai Ishar, bơngai Hêbrôn păng bơngai Usiêlit.

²⁴ Noh Subael, kon sâu Gersôm, kon drŏ-nglo Môis, pơm yŏng wei-lăng hnam tah tơmam gĭt.

²⁵ 'Nhŏng oh, kiơ̆ adrĕch Êliêser noh Rêhabia, kon drŏ-nglo sư Jêsaia, kon drŏ-nglo sư Jôram, kon drŏ-nglo sư Sikri, kon drŏ-nglo sư Sêlômit.

²⁶ Sêlômit păng 'nhŏng oh sư wei-lăng hnam 'măn lu tơmam gĭt đơ̆ng pơtao Đawit, lu bơngai yŏng kơdră adrĕch adrung, yŏng pơgơ̆r minh-rơbâu linh păng minh-hrĕng linh, hăm lu yŏng linh nai đei pơyơ̆r.

²⁷ Kŭm đei lu tơmam đơ̆ng blah iŏk kơplah tơblah băl, wă yua ming hơmet hnam Kră Yang.

²⁸ Đĭ-đăng lu tơmam mă Samuel, bơngai khan lê̆ adrol đơ̆ng Sôl, kon drŏ-nglo Kis, Apner, kon drŏ-nglo Nêr păng Jôap, kon drŏ-nglo Sêruia, păng lu bơngai nai đei pơyơ̆r Sêlômit păng lu 'nhŏng oh sư wei-lăng ngăl.

²⁹ Đơ̆ng lăm bơngai Ishar đei Kênania păng lu kon drŏ-nglo sư đe pôk pơm yŏng păng 'bok sek tơlang kơ bơngai Isơrael, lu sư athei wei-lăng tơdrong jang noh 'nguaih kơ hnam akŭm.

³⁰ Đơ̆ng lăm bơngai Hêbrôn đei Hasabia păng 'nhŏng oh sư, tă kơ bơngai nuih gơh hơgei ngăl, lu sư đei minh-rơbâu tơpơh-hrĕng 'nu; lu sư wei-lăng pơgơ̆r kon pơlei Isơrael gah bơmơ̆t kơ đak Krong Jôrđăn, wei-lăng tơdrong jang Kră Yang kư̆m bơ̆jang tơgŭm pơtao.

³¹ Lăm bơngai Hêbrôn đei Jêrija pơm yŏng kơdră lăm adrĕch adrung sư. Lăm sơnăm mă puăn-jĭt lăm chăl Đawit pơgơ̆r đe chă lăng 'bôh lăm bơngai Hêbrôn, đei lu bơngai nuih gơh hơgei lăm pơlei Jaser lăm dêh Gileat.

³² Jêrija đei 'bar-rơbâu tơpơh-hrĕng 'nu 'nhŏng oh sư, nuih gơh hơgei pơm yŏng kơdră wei-lăng hnam dơnŏ 'bă; pơtao Đawit pôk lu sư wă kơ pơgơ̆r bơngai Rubên păng bơngai Gat păng kơ minh puăt bơngai Manase, lăm tơdrong jang Kră Yang 'Bok Kei-Dei păng tơdrong jang pơtao.