I Ho 22 - Sơ̆p Hlabơar Nơ̆r 'Bok Kei-Dei

¹ Na Đawit khan. “'Bơ̆t âu gô pơm hnam Kră Yang 'Bok Kei-Dei; păng 'bơ̆t âu boih anih chơnang soi 'buh kơ lu bơngai Isơrael.”

Hơmet wă pơm hnam akŭm

² Đawit krao akŭm lu bơngai tơmoi oei lăm char Isơrael sư pơkă kơ lu bơngai teh blah tơmo wă pơm hnam Kră Yang 'Bok Kei-Dei.

³ Pơtao Đawit ăn lơ bơsei wă pơm kơđĭnh pơm, măng jang, pơm lu gơwŏk sư ăn kong đei lơlap ưh kơ kĕ jô̆.

⁴ Sư ăn 'long hơngo kư̆m ưh kơ kĕ jô̆ ôh yua kơ lu bơngai Siđôn hăm lu bơngai Tirơ chơ ba lơ dêh 'long hơngo ăn kơ Đawit.

⁵ Đawit khan: Sôlômôn kon drŏ-nglo inh oei tơdăm tam mă gơh jang ôh, mă pơm hnam Kră Yang athei pơm 'lơ̆ng rŏ krưp tơpă, đei tơdrong ư-ang, tơ jơ̆p-jang char, na inh gô chă hơmet lê̆ adrol. Thoi noh. Đawit chă hơmet tôm tơmam adrol kơ sư lôch.

⁶ Sư krao Sôlômôn kon drŏ-nglo sư păng pơkă kơ sư athei pơm hnam kơ Kră Yang 'Bok Kei-Dei Isơrael.

⁷ Đawit khan kơ Sôlômôn: “Ơ dăm, jơhngơ̆m inh 'maih pơm hnam kơ Anăn Kră Yang 'Bok Kei-Dei inh.

⁸ Mă-lei nơ̆r Kră Yang khan kơ inh: Ih pơlôch tuh pham lơ boih păng ih đei tơblah tih; ih ưh kơ gơh pơm hnam kơ Anăn Inh ôh, yua kơ ih pơlôch tuh pham lơ dêh 'bơ̆t anăp Inh lăm teh đak âu.

⁹ Ih gô đei minh 'nu kon drŏ-nglo; sư gô jing minh 'nu bơngai drŏ-nglo hiôk rơnŭk, inh gô ăn kơ sư rơnŭk rơnua păng ăn pơdơh đơ̆ng đĭ-đăng ayăt tăp dăr kơ sư. Krao anăn sư Sôlômôn, Inh gô ăn tơdrong hiôk rơnŭk kơ lu bơngai Isơrael lăm chăl sư pơgơ̆r.

¹⁰ Sư boih gô pơm hnam kơ Anăn Inh. Sư gô jing kon drŏ-nglo Inh, păng Inh gô jing 'bă sư. Inh gô pơm tang-dŏ pơtao sư lăm char Isơrael ling-lang khŏm khŏm.

¹¹ Dang ei ơ dăm ăn kơ Kră Yang oei hơdai hăm ih, tơgŭm ih lăm tơdrong pơm hnam kơkuh kơ Kră Yang 'Bok Kei-Dei ih, kiơ̆ thoi Sư đei khan boih gah ih.

¹² Apinh Kră Yang ăn kơ ih tơdrong gơh hơgei hlôh wao wă kơ ih pơgơ̆r wei-lăng lu bơngai Isơrael wă kơ ih răk kiơ̆ tơdrong juăt Kră Yang 'Bok Kei-Dei ih.

¹³ Thoi noh ih gô đei tơdrong kĕ jei, tơdah ih pơ'lơ̆ng wei răk pơm kiơ̆ tơdrong juăt păng nơ̆r tơtă Kră Yang athei Môis khan ăn kơ lu bơngai Isơrael. Pran kơjăp, păng nuih kơtang bĕ 'nĕ kơ hli, 'nĕ kơ tơrơ.

¹⁴ 'Nâu inh gleh hrat chă wă kơ đei tơmam pơm Hnam Kră Yang, pêng-rơbâu puăn-hrĕng pơđăm-jĭt tân maih, pêng-jĭt puăn-rơbâu tân hu, kong hăm bơsei ưh kơ kĕ jô̆ ôh, inh kư̆m chă 'long lơ păng tơmo. Ăn kơ lu iĕm chă thim dơ̆ng.

¹⁵ Ih kư̆m gô đei lơ bơngai jang, bơngai teh tơmo, lu bơngai man, lu bơngai jang 'long păng lu bơngai gơh jang tôm tơdrong jang,

¹⁶ hăm maih, hu, kong, păng bơsei, lơlap lơlang ưh kơ kĕ jô̆: Iung pơm bĕ! Apinh Kră Yang oei hơdai hăm ih!”

¹⁷ Đawit khan pơkă kơ đĭ-đăng lu kră pơgơ̆r Isơrael athei tơgŭm kon drŏ-nglo sư Sôlômôn.

¹⁸ Đawit khan: “Ưh kơ trŏ Kră Yang 'Bok Kei-Dei iĕm oei hơdai hăm lu iĕm hă? Sư ăn kơ iĕm tơdrong rơnŭk rơnua puăn pah yua kơ Sư ăn kơ inh kon pơlei oei lăm char 'nâu păng tơring 'nâu, chu kiơ̆ 'bơ̆t anăp Kră Yang păng 'bơ̆t anăp lu kon pơlei pơla Sư.

¹⁹ Dang ei đĭ jơhngơ̆m, đĭ bơhngol chơchă bĕ Kră Yang 'Bok Kei-Dei lu iĕm; iung bĕ păng pơm minh pôm anih 'lơ̆ng rơgoh kơ Kră Yang 'Bok Kei-Dei, lu iĕm tung ba bĕ Hom pơgơ̆p Kră Yang păng lu tơmam rơgoh 'lơ̆ng Kră Yang 'Bok Kei-Dei tơmơ̆t lăm hnam mă lu iĕm pơm boih hăm Anăn Kră Yang.”