I Ho 19 - Sơ̆p Hlabơar Nơ̆r 'Bok Kei-Dei

Blah bơngai Ammôn

¹ Đunh 'biơ̆ đơ̆ng noh Nahas pơtao Ammôn lôch. Kon drŏ-nglo sư pơm pơtao pơgơ̆r pơtrơp sư.

² Đawit khan: “Inh gô pơm 'lơ̆ng hăm Hanun kon drŏ-nglo Nahas, yua kơ 'bă sư pơm 'lơ̆ng hăm inh.” Na Đawit wơh lu bơngai năm hơpong wă pơlung sư, yua kơ đei tơdrong truh kơ 'bă sư. Lu jơ̆ng 'bang Đawit năm truh tơ Hanun lăm char Ammôn wă ngôi pơlung sư.

³ Mă-lei lu yŏng linh Ammôn khan kơ Hanun: “Ih ngeh kơ Đawit wơh lu bơngai năm ngôi pơlung ih, wă pơyom kơ 'bă ih hă? Ưh kơ trŏ ôh hă lu jơ̆ng 'bang sư năm tơ ih chă chop lăng wă blơ̆ blah iŏk char âu?”

⁴ Thoi noh Hanun rôp lu jơ̆ng 'bang Đawit hơkôih lê̆ sŏk kang, hăm kăt lê̆ ao sư minh puăt truh tơ kơiĕng đang kơ noh tơbrŏk lu sư wih.

⁵ Đe roi kơ Đawit tơdrong truh kơ đe noh, sư wơh bơngai năm sơng lu đe noh, yua kơ lu đe noh mơlâu dêh păng pơtao khan: “Lu iĕm oei tơ pơlei Jêrikô dĭng sŏk kang iĕm bluh 'mơ̆i na lu iĕm brŏk.”

⁶ Lu bơngai Ammôn băt tơdrong sư pơm ăn kơ Đawit 'bâu chhok. Hanun păng lu bơngai Ammôn gơih minh-rơbâu talâng jên hu wă apah gre aseh păng lu linh hao gre aseh đơ̆ng char Aram Naharaim, Aram Maaka, đơ̆ng char Sôba.

⁷ Lu sư apah pêng-jĭt 'bar-rơbâu gre aseh, bơngai chĕp gre aseh, pơtao Maaka hăm lu linh sư; lu sư năm pơm kơđông jê̆ tơ pơlei Mêdêba, lu đe Ammôn đơ̆ng lu pơlei lu sư năm akŭm băl păng lĕch năm tơblah.

⁸ Đawit kơtơ̆ng thoi noh na sư wơh Jôap hăm đĭ-đăng lu linh nuih pran sư.

⁹ Lu bơngai Ammôn lĕch năm tơblah 'bơ̆t 'măng jang pơlei, lu pơtao nai sư oei dan linh sư tơ lăm bri tơmăn.

¹⁰ Jôap 'bôh đe dă linh gah anăp gah rŏng sư, sư rơih lu linh hơgei đơ̆ng lăm bơngai Isơrael, năm găn tơblah hăm lu linh Siri.

¹¹ Oei đei lu linh sư pơjao ăn kơ oh sư Abisai răp tơblah hăm lu bơngai Ammôn.

¹² Jôap khan: “Mưh linh Siri pran hloh kơ ĭnh, ih năm dŏng inh; mă-lei mưh linh Ammôn pran hloh kơ ih, inh gô năm dŏng ih.

¹³ Athei mă nuih pran kơtang bĕ tơblah ăn kơ kon pơlei pơla bơ̆n păng kơ pơlei Kră Yang 'Bok Kei-Dei bơ̆n, Kră Yang gô pơm tơdrong kiơ 'lơ̆ng kiơ̆ thoi măt sư lăng lăp.”

¹⁴ Thoi noh Jôap hăm lu linh hơdai sư năm blah lu linh Siri; lu linh Siri kơdâu đĭ 'bơ̆t anăp lu sư.

¹⁵ Khŭl linh Ammôn 'bôh lu linh Siri kơdâu boih, lu sư kư̆m kơdâu đơ̆ng anăp Abisai oh Jôap, lu sư mơ̆t lăm pơlei, na Jôap brŏk tơ pơlei Jêrusalem.

¹⁶ Wă lu bơngai Siri 'bôh jei linh Isơrael lu sư thuơ boih, lu sư wơh bơngai năm sơng lu linh Siri gah to đak Krong Ơphrat đei Sophach yŏng linh Hadadêser jing bơngai ba trong lu sư.

¹⁷ Mưh đe roi kơ Đawit tơdrong noh sư pơpôi akŭm đĭ-đăng lu linh bơngai Isơrael tŏk kơ đak Krong Jôrđăn năm tơblah, pơrĕng lu linh sư tơklă lu linh wă tơblah lu ayăt. Mưh Đawit pơrĕng lu linh sư hăm lu linh Siri, lu linh Siri blah plơ̆ hloi.

¹⁸ Lu linh Siri kơdâu kơ lu linh Isơrael Đawit pơlôch tơpơh-rơbâu 'nu linh hao gre aseh, puăn-jĭt rơbâu 'nu linh Siri yak jơ̆ng, pơlôch hloi Sôphach yŏng linh lu sư.

¹⁹ Mưh lu pơtao kiơ̆ Hadadêser 'bôh lu sư thuơ kơ lu bơngai Isơrael, lu sư apinh pơgơ̆p hiôk-hian hăm Đawit kiơ̆ sư. Lu bơngai Siri ưh kơ wă dŏng lu bơngai Ammôn dơ̆ng.