I Ho 13 - Sơ̆p Hlabơar Nơ̆r 'Bok Kei-Dei

Đawit tung iŏk Hom Pơgơ̆p

¹ Đawit pơđâu hăm yŏng pơgơ̆r minh-rơbâu linh, yŏng pơgơ̆r minh-hrĕng linh, hăm rim kră pơgơ̆r.

² Đawit khan kơ đĭ-đăng lu kon pơlei Isơrael: “Tơdah lu iĕm 'bôh tơdrong 'nâu 'lơ̆ng păng lăp đon Kră Yang 'Bok Kei-Dei lu bơ̆n, lei bơ̆n wơh bơngai năm jơ̆p anih, tơ 'nhŏng oh lu bơ̆n mă oei tơ jơ̆p-jang dêh Isơrael, pơtơm lu 'bok soi păng bơngai Lêwi lăm rim pơlei tơring lu sư wă akŭm hơdai hăm lu bơ̆n.

³ Na bơ̆n athei tung ba Hom Pơgơ̆p Kră Yang 'Bok Kei-Dei wih tơ lu bơ̆n; yua kơ lăm chăl Sôl, lu bơ̆n ưh kơ đei krao apinh Kră Yang 'Bok Kei-Dei.”

⁴ Đĭ-đăng tơpôl lu sư lăp đon kơ pơm thoi noh; yua kơ lu sư 'bôh tơdrong noh trŏ 'lơ̆ng.

⁵ Na Đawit krao akŭm hloi đĭ-đăng bơngai Isơrael, đơ̆ng Sihô lăm char Êyiptơ truh tơ 'măng jang Hamat, wă năm iŏk Hom Pơgơ̆p Kră Yang 'Bok Kei-Dei đơ̆ng Kiriat Jêarim wih.

⁶ Đawit păng đĭ-đăng bơngai Isơrael năm hơdai sư tŏk tơ Baala noh Kiriat Jêarim, lăm dêh Juđa, wă kơ năm iŏk hom pơgơ̆p krao Anăn noh Kră Yang Tih Hloh Tơ'ngla dan tang-dŏ Sư sơlam kơ chêrubim.

⁷ Lu sư tung iŏk Hom Pơgơ̆p Kră Yang 'Bok Kei-Dei đơ̆ng hnam Abinađap, tah atŏk tơ kơpal gre rơmo 'nao; na Usa păng Ahiô dui rơmo hor gre.

⁸ Pơtao Đawit păng đĭ-đăng bơngai Isơrael đĭ jơhngơ̆m chơt hiôk 'bơ̆t anăp Kră Yang 'Bok Kei-Dei, hơri, reh brŏ, ot brŏ, teh hơgơ̆r iĕ, preh chhar păng hlôm keng hiôk chơt.

⁹ Lăp lu sư truh tơ cham pơjuă 'ba Kiđôn, Usa hiŏng ti sư rôp hom pơgơ̆p, yua kơ rơmo kơtơih tơsĕr.

¹⁰ Kră Yang hil dêh kơ Usa păng Kră Yang pơlôch hloi sư, yua kơ sư rôp 'bơm hom pơgơ̆p; na sư lôch hloi tơ noh 'bơ̆t anăp Kră Yang 'Bok Kei-Dei.

¹¹ Na Đawit ưh kơ lăp đon, yua kơ Kră Yang pơlôch Usa; sư krao anih noh Pêrês Usa, mă truh dang ei oei krao anăn 'noh.

¹² Lăm 'năr 'noh, Đawit hli kơ Kră Yang 'Bok Kei-Dei na apinh khan: “Lơliơ Inh gơh iŏk Hom Pơgơ̆p Kră Yang 'Bok Kei-Dei tơmơ̆t tơ hnam inh?”

¹³ Na Đawit ưh kơ tung iŏk Hom Pơgơ̆p Kră Yang 'Bok Kei-Dei tơmơ̆t tơ lăm hnam sư tơ lăm pơlei Đawit, mă-lei tung ba Hom Pơgơ̆p Kră Yang 'Bok Kei-Dei tơ lăm hnam Ôbêt Eđôm, bơngai Gitit.

¹⁴ Hom pơgơ̆p Kră Yang 'Bok Kei-Dei lăm hnam Ôbêt Eđôm pêng khei Kră Yang tuh tơdrong pŭn hiôk lăm hnam Ôbêt Eđôm păng dôm tơmam sư đei.