I Ho 12 - Sơ̆p Hlabơar Nơ̆r 'Bok Kei-Dei

Lu bơngai kiơ̆ Đawit

¹ 'Nâu lu bơngai mă kiơ̆ Đawit tơ Siklak sư weh kơ Sôl, kon drŏ-nglo Kis, pơpuh Lu sư lu bơngai linh nuih kơtang mă đei tơgŭm Đawit tơblah wang.

² Lu sư tă hơgei prah hră ngăl, gơh yua tơlei hơwơ̆t tơmo, chĕp hră prah 'brơ̆m ti gah 'ma thoi gah 'ngiĕo; đĭ-đăng lu sư adrĕch adrung Sôl, bơngai Bênjamin.

³ Ahiser pơm yŏng păng Jôas kon drŏ-nglo Sêma bơngai Gibêah, Jêsiel păng Pêlêt, kon drŏ-nglo Asmawet; Bêraka, Jêhu bơngai Anathôt;

⁴ Ismaia đơ̆ng pơlei Gibeôn, bơngai mă nuih pran kơtang pơm yŏng lăm pêng-jĭt 'nu bơngai 'noh, Jêrêmi; Jahasiêl; Jôhanan; Jôsabat bơngai Gêđêra;

⁵ Êlusai, Jêrimôt, Bêalia, Sêmaria, Sêphatia bơngai Haruphit;

⁶ Êlkana, Isia, Asarel, Jôêser păng Jahôbêam, bơngai Kôrahit;

⁷ Jôêla păng Sêbađia, kon drŏ-nglo Jêrôham đơ̆ng pơlei Gêđôr;

⁸ Lăm adrĕch adrung Gat đei lu bơngai năm kiơ̆ Đawit tơ anih kơjăp lăm tơmăn glă; lu sư bơngai nuih pran kơtang, gơh hơgei tơblah, chĕp khêl chĕp tơju. Muh măt lu sư nhen dăm-brang, hơbĕch hơbal nhen thoi juei kơpal kông.

⁹ Êser pơm yŏng; Ôbađia pơm yŏng mă 'bar, Êliap pơm yŏng mă pêng,

¹⁰ Mismanna pơm yŏng mă puăn, Jêrêmi pơm yŏng mă pơđăm,

¹¹ Attai pơm yŏng mă tơdrâu, Êliel pơm yŏng mă tơpơh,

¹² Jôhanan pơm yŏng mă tơhngam, Êlsabat pơm yŏng mă tơsĭn,

¹³ Jêrêmi pơm yŏng mă mơjĭt, Makbanai pơm yŏng mă mơjĭt-mônh.

¹⁴ Lu bơngai âu kon sâu Gat ngăl, păng pơm yŏng pơgơ̆r lu linh; bơngai pơm iĕ pran dang minh-hrĕng 'nu, bơngai pơm tih pran dang minh-rơbâu 'nu bơngai.

¹⁵ 'Nâu boih lu bơngai mă tŏk kơ đak Krong Jôrđăn lăm khei mônh, kơplah đak tih lơ̆p blai kơ 'bar pah jih bơnơ̆, blah puh đĭ lu kon pơlei oei lăm thŭng dơnă gah hơlĕch păng gah bơmơ̆t.

¹⁶ Đei mơ'nah bơngai Bênjamin păng Juđa kư̆m năm truh tơ kơđông kơjăp kiơ̆ Đawit.

¹⁷ Đawit lĕch sơng lu sư păng khan: “Tơdah lu iĕm năm hăm tơdrong hiôk-hian păng wă tơgŭm inh lei jơhngơ̆m inh gô pơgơ̆p hăm lu iĕm; tơdah lu iĕm hơlĕnh blah inh wă tơgŭm kơ lu bơngai ayăt, lei apinh Kră Yang 'Bok Kei-Dei 'bok bơ̆n sek lăng păng phak lu iĕm; yua kơ ti inh ưh kơ đei pơm tơdrong kơnê̆ kiơ.”

¹⁸ Na Yang Bơhngol 'lơ̆ng jur tơ Amasai pơm yŏng kơ pêng-jĭt 'nu bơngai, na sư khan: “Ơ Đawit, lu nhôn gah ih ngăl! Ơ kon drŏ-nglo Jese, lu nhôn oei hăm ih! Hiôk-hian, hiôk-hian bĕ kơ ih; hiôk-hian kơ bơngai bu tơgŭm ih Kră Yang 'Bok Kei-Dei gô tơgŭm ih!” Na Đawit sơng iŏk lu sư, pơchĕp ăn kơ lu sư pơm yŏng pơgơ̆r linh.

¹⁹ Kŭm đei lu bơngai khŭl Manase năm kiơ̆ Đawit kơplah sư năm hơdai hăm linh Philistin tơblah hăm Sôl, mă-lei sư hăm lu linh sư ưh kơ đei tơgŭm linh Philistin yua kơ lu bơngai Philistin tơweh Đawit khan: “Hli kơ sư wih hơlơ̆k hăm Sôl, yŏng tơ'ngla sư, pơm kơnê̆ chơ̆ng kơ̆l lu bơ̆n dơ̆ng.

²⁰ Lăp Đawit wih hơlơ̆k tơ Siklak, đei lu bơngai Manase năm kiơ̆ sư: Atnah, Jôsabat, Jêđiael, Mikael, Jôsabat, Êlihu păng Sillethai, lu sư tă kơ pơm yŏng kơ rơbâu 'nu linh lăm adrĕch adrung Manase.”

²¹ Đei lu sư bơngai tơgŭm Đawit tơblah hăm linh chă iŏk blah tơgar, yua kơ lu sư bơngai nuih pran kơtang păng pơm yŏng pơgơ̆r lu linh.

²² Rim năr đei bơngai năm kiơ̆ păng tơgŭm Đawit truh tơ sư đei lu linh lơ tih, nhen thoi linh Kră Yang 'Bok Kei-Dei.

Lu linh kiơ̆ Đawit tơ Hêbrôn

²³ 'Nâu lu bơngai linh năm tơ Hêbrôn, wă ăn teh đak Sôl kơ Đawit, kiơ̆ thoi nơ̆r Kră Yang.

²⁴ Lăm kon sâu Juđa đei tơdrâu-rơbâu tơhngam-hrĕng 'nu bơngai hơmet lê̆ khêl, tơju, wă tơblah.

²⁵ Kon sâu Simêôn, đei tơpơh-rơbâu minh-hrĕng 'nu bơngai nuih pran kơtang gơh năm tơblah.

²⁶ Kon sâu Lêwi, đei puăn-rơbâu tơdrâu-hrĕng 'nu.

²⁷ Lăm noh đei Jêhôiada yŏng kơdră adrĕch Arôn păng hăm sư đei pêng-rơbâu tơpơh-hrĕng 'nu bơngai.

²⁸ Kŭm đei Sađok, bơngai drŏ-nglo hơ'lơ̆p nuih pran kơtang păng hăm sư đei 'bar-jĭt 'bar 'nu bơngai pơgơ̆r đơ̆ng hnam 'bă sư.

²⁹ Kon sâu Bênjamin, adrĕch Sôl, đei pêng-rơbâu 'nu bơngai mă truh tơ dang ei, đei lơ bơngai lăm lu sư oei kiơ̆ Sôl.

³⁰ Kon sâu Êphraim, đei 'bar-jĭt rơbâu tơhngam-hrĕng 'nu bơngai, tă kơ lu bơngai nuih pran kơtang ngăl đei đe ư-ang lăm adrĕch hnam 'bă sư kơdih.

³¹ Minh puăt adrĕch adrung Manase đei mơjĭt-tơhngam rơbâu 'nu bơngai, lu sư đe rơih đei anăn lu sư năm wă pôk Đawit pơm pơtao.

³² Kon sâu Isakar đei lu bơngai băt hlôh khei 'năr păng tơdrong jang kon pơlei Isơrael wă pơm; lu sư đei 'bar-hrĕng 'nu bơngai yŏng pơgơ̆r; na đĭ-đăng lu 'nhŏng oh sư lăm ala kơ lu sư pơgơ̆r.

³³ Kon sâu Sabulôn đei pơđăm-jĭt rơbâu 'nu bơngai gơh tơblah, chĕp lu tơmam tơblah, hơmet lê̆ wă tơblah, lu sư minh jơhngơ̆m đon hăm Đawit.

³⁴ Kon sâu Neptali, đei minh-rơbâu 'nu bơngai yŏng pơgơ̆r lu linh, hăm pêng-jĭt tơpơh-rơbâu 'nu bơngai chĕp khêl păng tơju,

³⁵ Kon sâu Đan, đei 'bar-jĭt tơhngam-rơbâu tơdrâu-hrĕng 'nu bơngai đei đon gơh hơgei kơ tơblah.

³⁶ Kon sâu Aser, đei puăn-jĭt rơbâu 'nu bơngai gơh hơgei tơblah.

³⁷ Na mă gah Rubên, Gat păng gah minh puăt adrĕch adrung Manase oei gah to đak Krong Jôrđăn, đei minh-hrĕng 'bar-jĭt rơbâu 'nu bơngai chĕp dôm lu tơmam wă tơblah.

³⁸ Lu bơngai 'nâu lu linh đei đon gơh hơgei kơ tơblah, đei jơhngơ̆m kơjăp nuih năm tơ Hêbrôn wă pôk Đawit pơm pơtao pơgơ̆r đĭ-đăng dêh char Isơrael. Đĭ-đăng lu bơngai Isơrael nai kư̆m dai minh jơhngơ̆m pôk Đawit pơm pơtao.

³⁹ Lu sư oei hăm pơtao Đawit pêng năr păng sŏng sa hơdai tơ noh yua kơ 'nhŏng oh lu sư hơmet ăn.

⁴⁰ Na lu 'nhŏng oh đơ̆ng ataih truh, đơ̆ng teh đak Isakar, Sabulôn păng Neptali lu sư chơ tơmam sa păng aseh iĕ, lăk-đa, aseh lai păng rơmo, lu sư ba lơ tơpŭng 'bĕng mi, 'bĕng pơlei hơra, hơmu kro, sik, đak rơmă, hăm dui ba rơmo păng triu lơlap lơlang, yua kơ đei tơdrong chơt hiôk lăm dêh char Isơrael.